POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນອັງຄານ, ວັນທີ 16 ມິຖຸນາ 2026

ໂຮງສີເຂົ້າກອງທັບ ຮັບປະກັນເຂົ້າກິນ ເພື່ອຮັບໃຊ້ກອງທັບໃນທຸກສະພາບການ
ເວລາອອກຂ່າວ: 2026-05-14 10:13:18 | ຜູ້ຂຽນ : admin3 | ຈຳນວນຄົນເຂົ້າຊົມ: 127 | ຄວາມນິຍົມ:

ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ວຽກງານພະລາທິການ ໂດຍສະເພາະແມ່ນການຮັບປະກັນເຂົ້າກິນໃຫ້ແກ່ກົມກອງທະ ຫານ ແມ່ນມີຄວາມສຳຄັນເປັນຢ່າງຍິ່ງ. ໃນນີ້, ໂຮງສີເຂົ້າກອງທັບ ເປັນກົມກອງທີ່ມີມູນເຊື້ອອັນຍາວນານ ໃນການເປັນຄັງສະບຽງອາຫານທີ່ໝັ້ນຄົງຂອງກອງທັບປະຊາຊົນລາວ. ກົມກອງດັ່ງກ່າວ ໄດ້ເລິ່ມກໍ່ສ້າງໃນປີ 1977 ແລະ ສຳເລັດໃນປີ 1979 ດ້ວຍທຶນຊ່ວຍເຫຼືອຈາກໂຄງການອາຫານໂລກ. ຈາກເບື້ອງຕົ້ນທີ່ຂຶ້ນກັບກະຊວງກະສິກຳ ແລະ ປ່າໄມ້, ມາຮອດວັນທີ 11 ມີນາ 1993, ລັດຖະບານໄດ້ເຫັນເຖິງຄວາມສຳຄັນໃນການລ້ຽງດູກອງທັບ ຈຶ່ງໄດ້ມອບໂອນໃຫ້ກະຊວງປ້ອງກັນປະເທດ ເປັນຜູ້ຄຸ້ມຄອງມາຈົນເຖິງປັດຈຸບັນ. ເຊິ່ງຕັ້ງຢູ່ບ້ານໜອງແຕ່ງເໜືອ ເມືອງສີໂຄດຕະບອງ ນະຄອນຫຼວງວຽງຈັນ. ສະຫາຍ ພັນໂທ ບຸນຜັນ ທຳມະວົງ ຫົວໜ້າອຳນວຍການໂຮງສີເຂົ້າກອງທັບ ໄດ້ໃຫ້ຮູ້ວ່າ: ໂຮງສີເຂົ້າກອງທັບ ເປັນກົມກອງໜຶ່ງທີ່ຢູ່ພາຍໃຕ້ການຊີ້ນຳ-ນຳພາຂອງຄະນະພັກ ອົງການກົມໃຫຍ່ພະລາທິການກອງທັບ ໂດຍກົງຮອບດ້ານ, ສາຍວິຊາສະເພາະແມ່ນຂຶ້ນກັບກົມອຸປະໂພກ-ບໍລິໂພກ, ເຊິ່ງມີອົງການຈັດ ຕັ້ງຄົບຊຸດ, ມີໜຶ່ງໜ່ວຍພັກເອກະລາດ, ມີອົງການຈັດຕັ້ງຊາວໜຸ່ມ-ແມ່ຍິງ, ມີຮາກຖານກຳມະບານ ແລະ ມີ 8 ຂະແໜງການຂຶ້ນກັບ, ມີ ຈຳນວນທັງໝົດ 45 ສະຫາຍ, ຍິງ 15 ສະຫາຍ, ມີໜ້າທີ່ການເມືອງຕົ້ນຕໍແມ່ນເກັບຊື້ເຂົ້າ ແລະ ສີເຂົ້າຮັບໃຊ້ໃຫ້ແກ່ກອງທັບໂດຍສະເພາະແມ່ນຕອບສະໜອງເປັນອັດຕາກິນໃຫ້ກຳລັງຫຼວງ- ກຳລັງທ້ອງຖິ່ນ, ເປັນເຂົ້າສຳຮອງສູ້ຮົບເຂົ້າສຳຮອງໄພພິບັດ ຂອງກະຊວງ ແລະ ມີບົດບາດເປັນການນຳ ແລະ ຕັດສິນຊີ້ຂາດບັນດາວຽກງານຕ່າງໆຢູ່ໃນຂົງເຂດ ໂຮງສີເຂົ້າກອງທັບ ແລະ ມີໜ້າທີ່ຊີ້ນຳບັນຊາສະມາຊິກພັກ, ພະນັກງານ-ນັກຮົບຢູ່ພາຍໃນກົມກອງ, ການປະຕິບັດໜ້າການເມືອງຂອງກົມກອງໃນໄລຍະປີຜ່ານມາ ບົນພື້ນຖານແມ່ນອີງໃສ່ ທິດທາງແຜນການຂອງກົມໃຫຍ່ພະລາທິການ ກໍ່ຄືກົມອຸປະໂພກ-ບໍລິໂພກ ໄດ້ມີຄຳສັ່ງ ອະນຸມັດ, ໃຫ້ເກັບຊື້ເຂົ້າເປືອກ ຈຳນວນ 2.000-2.500 ໂຕນຕໍ່ປີ, ແຕ່ລະປີຄະນະພັກ-ຄະນະບັນ ຊາ ກໍ່ໄດ້ຫັນເອົາວຽກງານດັ່ງກ່າວ ເປັນໜ້າທີ່ການເມືອງຕົ້ນຕໍຂອງກົມກອງ ແລະ ມະຕິຂອງຄະນະພັກ-ຄະນະບັນຊາ ໄດ້ແບ່ງໜ້າທີ່ຄວາມຮັບຜິດຊອບໃຫ້ຄະນະຈັດຕັ້ງປະຕິບັດ ນຳພາ-ຊີ້ນຳການຜະລິດຮັບໃຊ້ກອງທັບ ແລະ ການຄຸ້ມຄອງປົກປັກຮັກສາ ເພື່ອຮັບປະກັນທາງດ້ານປະລິມານ ແລະ ຄຸນນະພາບສູງ, ປະຕິບັດຕົວເລກລະດັບຄາດໝາຍໃນແຕ່ລະປີທີ່ຂັ້ນເທິງມອບໝາຍໃຫ້ໄດ້ສຳເລັດໜ້າທີ່ ການເມືອງຂອງກົມກອງ, ໃນປີຜ່ານມາ ສາມາດປະຕິບັດໄດ້ສຳເລັດຕາມຕົວເລກ ແຜນການທີ່ຂັ້ນເທິງ ກໍຄືກົມອຸປະໂພກ-ບໍລິໂພກໄດ້ກຳນົດໃຫ້. ນອກຈາກວຽກງານວິຊາສະເພາະແລ້ວ, ຍັງໄດ້ເອົາໃຈໃສ່ວຽກງານສຶກສາອົບຮົມ ການເມືອງ-ນຳພາແນວຄິດພະນັກງານ-ນັກຮົບສອດຫ້ອຍເຂົ້າໃນທຸກຂົງເຂດວຽກງານ ເພື່ອເຮັດໃຫ້ເຊື່ອມຊຶມ ກຳແໜ້ນແນວທາງນະໂຍບາຍຂອງພັກ-ລັດ, ຂໍ້ກຳນົດ, ກົດລະບຽບຂອງ ກອງທັບວາງອອກຢ່າງເຂັ້ມງວດ ໂດຍເອົາການດຳເນີນຊີວິດການເມືອງ, ຈັດຕັ້ງເຊື່ອມຊຶມ ບັນດາມະຕິຄຳສັ່ງແຈ້ງການຕ່າງໆຂອງຂັ້ນເທິງມາຈັດຕັ້ງຜັນຂະຫຍາຍໂຄສະນາໃຫ້ ພະນັກງານສະມາຊິກພັກ, ຊາວໜຸ່ມ, ແມ່ຍິງ ແລະ ກຳມະບານ ເປັນປົກກະຕິ, ເອົາໃຈໃສ່ໃນການຄຸ້ມຄອງ, ປົກປັກຮັກສາ ບົວລະບັດຜັດເຊັດພາຫະນະໂຮງສີເຂົ້າ, ເຄື່ອງຈັກບໍ່ໃຫ້ເປ່ເພເສຍຫາຍ ແລະ ນຳໃຊ້ໄດ້ຍາວນານ, ເພື່ອຮັບປະກັນຕໍ່ໜ້າທີ່ການເມືອງ ແລະ ວິຊາສະເພາະຂອງຕົນ, ນຳພາການຈັດຕັ້ງສີເຂົ້າຮັບໃຊ້ກອງທັບ, ຮັບປະກັນທາງດ້ານ ຄຸນະພາບ, ຮັບປະກັນການເບີກຈ່າຍໃຫ້ກົມກອງທະຫານເຂດໃຈກາງ ແລະ ອ້ອມຂ້າງ ກະຊວງຕາມກຳນົດ, ເອົາໃຈໃສ່ວຽກງານສ້າງເສດຖະກິດ ກໍຄື ການຫາລາຍໄດ້ ເຂົ້າກົມກອງຕາມທິດເພິ່ງຕົນເອງ-ກຸ້ມຕົນເອງເທື່ອລະກ້າວ ຖືເອົາການຜະລິດປູກຝັງ ແລະ ລ້ຽງສັດເປັນຕົ້ນແມ່ນປູກພືດລົ້ມລຸກຕາມລະດູການ ປູກດອກດາວເຮືອງ, ລ້ຽງປາ, ລ້ຽງເປັດ, ລ້ຽງໄກ່ ແລະ ເປີດຮ້ານຄ້າເພື່ອຈຳໜ່າຍເຂົ້າ, ເຂົ້າປຽນ, ຮຳ ແລະ ຫົວອາຫານທົ່ວໄປ, ປີຜ່ານມາ ສາມາດຫາລາຍໄດ້ທັງໝົດ 87 ລ້ານກວ່າກີບ. ສະຫາຍ ພັນຕີ ດາລາວັນ ພົມມະພາວັນ ຫົວໜ້າຂະແໜງສາງເຂົ້າເປືອກ ໄດ້ກ່າວຕື່ມອີກວ່າ: ພວກເຮົາກວດກາຄຸນນະພາບເຂົ້າເປືອກຢ່າງລະອຽດ, ບໍ່ໃຫ້ມີສິ່ງເຈືອປົນ. ການເກັບຮັກສາແມ່ນຕີເປັນຂາເພື່ອຮັກສາຄວາມຊຸ່ມ, ບໍ່ໃຫ້ເນົ່າເປື່ອຍ. ພວກເຮົາຖືຫຼັກການ ‘ເຂົ້າກ່ອນ-ຈ່າຍອອກກ່ອນ’ ເພື່ອໃຫ້ເຂົ້າທີ່ເບີກຈ່າຍໄປນັ້ນຍັງໃໝ່ ແລະ ມີຄຸນນະພາບສູງສຸດ. ພ້ອມດຽວກັນນັ້ນ, ສະຫາຍ ພັນໂທ ອູວິໄລ ສໍວົງດີ ຮັບປະກັນການເກັບມ້ຽນເຂົ້າສານກໍໄດ້ໃຫ້ຮູ້ຕື່ມອີກວ່າ: ການເກັບຮັກສາເຂົ້າສານແມ່ນເຮັດຕາມຫຼັກການວິຊາສະເພາະຢ່າງເຂັ້ມງວດ, ມີການພິກປີ້ນເຂົ້າປະຈຳເດືອນ ແລະ ພ້ອມສະເໝີທີ່ຈະເບີກຈ່າຍຕາມຄຳສັ່ງດ່ວນ ເຊັ່ນ: ເຂົ້າສະໜາມ ຫຼື ເຂົ້າຊ່ວຍເຫຼືອໄພພິບັດ. ດ້ານການບໍລິຫານ ແລະ ເຕັກນິກ, ສະຫາຍ ພັນໂທ ສົມພົງ ສຸລິວັນ ກໍໄດ້ຢືນຢັນເຖິງການເອົາໃຈໃສ່ບົວລະບັດຮັກສາເຄື່ອງຈັກໂຮງສີ ແລະ ພາຫະນະ ໃຫ້ມີຄວາມພ້ອມໃຊ້ງານຍາວນານ, ໂດຍການກວດກາ ແລະ ອະນາໄມເປັນປະຈຳທຸກອາທິດ. ໃນຂະນະທີ່ພວກເຮົາພວມຂ່ຳນັບຮັບຕ້ອນວັນສ້າງຕັ້ງເຫຼົ່າຮົບພະລາທິການກອງທັບ ຄົບຮອບ 70 ປີ ທີ່ຈະມາເຖິງນີ້, ໂຮງສີເຂົ້າກອງທັບ ພາຍໃຕ້ການນຳພາຂອງຄະນະພັກ-ຄະນະບັນຊາ ແມ່ນພວມສ້າງຂະບວນການຢ່າງຟົດຟື້ນ. ສະຫາຍ ພັນໂທ ບຸນຜັນ ທຳມະວົງ ໄດ້ກ່າວວ່າ: ພວກເຮົາພ້ອມແລ້ວທີ່ຈະປະກອບສ່ວນຮັບໃຊ້ກອງທັບຢ່າງສຸດຄວາມສາມາດ ໂດຍສະເພາະແມ່ນການຮັບປະກັນເຂົ້າກິນໃຫ້ມີຄຸນນະພາບ ເພື່ອສະໜອງໃຫ້ແກ່ພະນັກງານ-ນັກຮົບໃນກອງທັບ. ໂດຍ: ຄຳໄຕ ຈັນນະຄອນ

news to day and hot news