POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນອັງຄານ, ວັນທີ 14 ກໍລະກົດ 2026

ລັດຖະບານຕ້ອງພິຈາລະນາ ແລະ ກຳນົດໃຫ້ຈະແຈ້ງ ການຈັດຕັ້ງປະຕິບັດວາລະແຫ່ງຊາດ
ເວລາອອກຂ່າວ: 2026-07-08 15:13:54 | ຜູ້ຂຽນ : admin2 | ຈຳນວນຄົນເຂົ້າຊົມ: 678 | ຄວາມນິຍົມ:

ທ່ານ ມອນໄຊ ລາວມົວຊົ່ງ ຮອງປະທານສະພາແຫ່ງຊາດ, ຕາງໜ້າຄະນະປະຈຳສະພາແຫ່ງຊາດ ໄດ້ປະກອບຄຳເຫັນຕໍ່ບົດລາຍງານວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ໃນກອງປະຊຸມສະໄໝວິສາມັນ ເທື່ອທີ I ຂອງສະພາແຫ່ງຊາດ ຊຸດທີ X ໃນວັນທີ 7 ກໍລະກົດ 2026 ນີ້, ທີ່ສະພາແຫ່ງຊາດ, ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ. ທ່ານ ມອນໄຊ ລາວມົວຊົ່ງ ກ່າວວ່າ: ຄະນະປະຈຳສະພາແຫ່ງຊາດ ສະເໜີໃຫ້ລັດຖະບານພິຈາລະນາ ແລະ ກຳນົດໃຫ້ຈະແຈ້ງຕື່ມ ໃນເງື່ອນໄຂທີ່ພວກເຮົາມີງົບປະມານຈຳກັດ ຈະສຸມໃສ່ເຮັດອັນໃດກ່ອນ, ເຮັດອັນໃດລຸນ ເນື່ອງຈາກວ່າບັນຫານີ້ ແມ່ນຕິດພັນກັບການຈັດສັນງົບປະມານ, ບຸກຄະລາກອນ, ເຄື່ອງມື, ອຸປະກອນ ແລະ ພາຫະນະຮັບໃຊ້ຕ່າງໆ. ໃນນັ້ນ, ກ່ຽວກັບກົນໄກການຈັດຕັ້ງປະຕິບັດ ແລະ ການແບ່ງຄວາມຮັບຜິດຊອບ, ດ້ານພື້ນຖານ ແມ່ນເຫັນດີ ຕໍ່ກັບບັນດາກົນໄກ ແລະ ການຈັດແບ່ງຄວາມຮັບຜິດຊອບທີ່ໄດ້ກຳນົດ, ແຕ່ຄະນະປະຈຳສະພາແຫ່ງຊາດ ສະເໜີເພີ່ມຕື່ມບາງບັນຫາ ດັ່ງນີ້: ພິຈາລະນາ ກໍານົດແຈ້ງຕື່ມກ່ຽວກັບມາດຕະການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ເພື່ອເປັນບ່ອນອີງໃນການຈັດຕັ້ງປະຕິບັດຕົວຈິງ, ຮັບປະກັນປະສິດທິພາບ ແລະ ປະສິດທິຜົນ; ສະເໜີໃຫ້ປັບປຸງກົນໄກການປະສານງານ ລະຫວ່າງ ພາກລັດ ແລະ ເອກະຊົນ, ອົງການຈັດຕັ້ງສັງຄົມ, ອົງການຈັດຕັ້ງສາກົນໃຫ້ຈະແຈ້ງ ແລະ ຮັດກຸມກວ່າເກົ່າ; ພິຈາລະນານະໂຍບາຍຕໍ່ຜູ້ທີ່ມີຜົນງານ ຫຼື ປະກອບສ່ວນຢ່າງຕັ້ງໜ້າເຂົ້າໃນການຈັດຕັ້ງປະຕິບັດ ວາລະແຫ່ງຊາດສະບັບນີ້ ຢ່າງສົມເຫດ-ສົມຜົນ ເພື່ອສ້າງແຮງຈູງໃຈໃຫ້ທຸກພາກສ່ວນຂອງສັງຄົມເຂົ້າຮ່ວມຢ່າງກວ້າງຂວາງ. ໃນນັ້ນ, ທັດສະນະ ຂອງຄະນະປະຈຳສະພາແຫ່ງຊາດ ຕໍ່ກັບການພັດທະນາຊົນນະບົດ ແລະ ແກ້ໄຂຄວາມທຸກຍາກ. ໃນໄລຍະຜ່ານມາ, ຄະນະປະຈຳສະພາແຫ່ງຊາດ ກໍຄືສະມາຊິກສະພາແຫ່ງຊາດ ຊຸດທີ IX ກໍໄດ້ ຕິດຕາມ, ກວດກາ, ຊຸກຍູ້ການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຕາມພາລະບົດບາດຂອງຕົນ, ຜ່ານການຕີລາຄາຜົນການຕິດຕາມ ກວດກາ, ຄະນະປະຈຳສະພາແຫ່ງຊາດມີບາງທັດສະນະ ດັ່ງນີ້: ການພັດທະນາຊົນນະບົດໃນໄລຍະຜ່ານມາ ໂດຍສະເພາະແມ່ນການກໍ່ສ້າງພື້ນຖານໂຄງລ່າງເຫັນວ່າ: ຍັງບໍ່ທັນມີຈຸດສຸມເທົ່າທີ່ຄວນ ເຊັ່ນ: ເສັ້ນທາງຄົມມະນາຄົມ, ໄຟຟ້າ, ໂທລະຄົມ ແລະ ການສື່ສານ, ໂຮງຮຽນ, ໂຮງໝໍ, ສຸກສາລາ, ສໍານັກງານອົງການ ອັນໃດແທ້ທີ່ພວກເຮົາຈະສຸມໃສ່ກ່ອນ, ອັນໃດຄວນເຮັດລຸນ, ພ້ອມນີ້ ພື້ນຖານໂຄງລ່າງ ທີ່ໄດ້ຮັບການກໍ່ສ້າງສໍາເລັດ ບາງບ່ອນຍັງບໍ່ທັນຮັບປະກັນທາງດ້ານຄຸນນະພາບເທົ່າທີ່ຄວນ, ການແກ້ໄຂບັນຫາຊີວິດການເປັນຢູ່ຂອງປະຊາຊົນຍັງບໍ່ທັນໄດ້ສຸມໃສ່ຢ່າງສົມເຫດ-ສົມຜົນ; ການຈັດສັນພູມລໍາເນົາ ແລະ ອາຊີບຄົງທີ່ ຕ້ອງຮັບປະກັນຄວາມຍືນຍົງ; ການໂຮມບ້ານ ຕ້ອງໃຫ້ສອດຄ່ອງກັບສະພາບຄວາມເປັນຈິງ ຂອງທ້ອງຖິ່ນ ໂດຍສະເພາະແມ່ນເຂດຍຸດທະສາດປ້ອງກັນຊາດ, ການໂຮມບ້ານ ບາງບ່ອນສາມາດໂຮມໄດ້ແຕ່ການຈັດຕັ້ງ, ແຕ່ປະຊາຊົນແມ່ນບໍ່ສາມາດໂຮມກັນໄດ້ ເນື່ອງຈາກທີ່ດິນທໍາການຜະລິດບໍ່ພຽງພໍ ເຮັດໃຫ້ປະຊາຊົນຈຳນວນໜຶ່ງກັບຄືນໄປຢູ່ບ້ານເກົ່າເພື່ອທໍາການຜະລິດ ແລະ ຕົກເຂົ້າສູ່ກໍລະນີ ແຍກຕົວອອກຫ່າງຈາກອໍານາດການປົກຄອງບ້ານ ແລະ ອຳນາດການປົກຄອງບ້ານ ບາງບ່ອນກໍບໍ່ສາມາດຄຸ້ມຄອງໄດ້ຢ່າງທົ່ວເຖິງ ກາຍເປັນຊ່ອງຫວ່າງ ກໍ່ໃຫ້ເກີດປະກົດການຫຍໍ້ທໍ້ ເຊັ່ນ: ບັນຫາຢາເສບຕິດ, ການຄ້າຂາຍເຖື່ອນ, ການບຸກລຸກຊັບພະຍາກອນທຳມະຊາດ ແລະ ອື່ນໆ ຊຶ່ງໄດ້ສົ່ງຜົນກະທົບເຖິງຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ; ພິຈາລະນາ ຄົ້ນຄວ້ານະໂຍບາຍ, ກຳນົດມາດຕະການ ຈັດຕັ້ງປະຕິບັດສໍາລັບປະຊາຊົນ ແລະ ພາກທຸລະກິດ ທັງພາຍໃນ ແລະ ຕ່າງປະເທດຢູ່ໃນຈຸດສຸມວຽກ ທີ່ 3, 4, 5 ໃຫ້ມີຄວາມເໝາະສົມ ເພື່ອຮັບປະກັນໃຫ້ປະຊາຊົນ ແລະ ພາກທຸລະກິດທັງພາຍໃນ ແລະ ຕ່າງປະເທດ ສາມາດປະກອບສ່ວນເຂົ້າໃນການຈັດຕັ້ງປະຕິບັດວາລະແຫ່ງຊາດສະບັບນີ້ໄດ້ຢ່າງມີປະສິດທິພາບ ແລະ ປະສິດທິຜົນ; ພິຈາລະນາ ແບ່ງຄວາມຮັບຜິດຊອບໃຫ້ບາງຂະແໜງການຕື່ມ ເປັນຕົ້ນ ແມ່ນກະຊວງປ້ອງກັນປະເທດ ເນື່ອງຈາກວ່າ: ບາງຈຸດສຸມທີ່ລັດຖະບານກຳນົດ ຕິດພັນກັບເຂດພື້ນຖານການປະຕິວັດ, ເຂດລຽບຊາຍແດນ, ທະນາຄານແຫ່ງ ສປປ ລາວ ຄົ້ນຄວ້າ, ສົ່ງເສີມບັນດາທະນາຄານທຸລະກິດ, ສະຖາບັນການເງິນ ມີນະໂຍບາຍປ່ອຍເງິນກູ້ທີ່ເໝາະສົມ ເພື່ອຮັບປະກັນໃຫ້ປະຊາຊົນເຂດຊົນນະບົດເຂົ້າເຖິງແຫຼ່ງທຶນກູ້ຢືມ; ຕ້ອງເພີ່ມທະວີຄວາມເຂັ້ມງວດ ແລະ ເດັດຂາດໃນການບັງຄັບໃຊ້ກົດໝາຍ ເພື່ອຄຸ້ມຄອງລັດ-ຄຸ້ມຄອງສັງຄົມ, ປົກປັກຮັກສາ ແລະ ນໍາໃຊ້ຊັບພະຍາກອນທຳມະຊາດ ແລະ ສິ່ງແວດລ້ອມຢ່າງມີປະສິດທິຜົນ ໂດຍສະເພາະແມ່ນການຄຸ້ມຄອງບັນດາໂຄງການຂຸດຄົ້ນແຮ່ທາດຕ່າງໆ ແລະ ຄຸ້ມຄອງບັນຫາສິ່ງແວດລ້ອມ; ສຸມໃສ່ສ້າງບຸກຄະລາກອນກັບທີ່ ຕິດພັນກັບການຫັນພະນັກງານລົງກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ແກ້ໄຂຄວາມທຸກຍາກ ຕາມທິດ 3 ສ້າງ.

news to day and hot news