ວັນສຸກ, ວັນທີ 07 ສິງຫາ 2026
ຂະແໜງຊາວໜຸ່ມກອງພັນໃຫຍ່ 643 ປະເມີນຜົນການຈັດຕັ້ງປະຕິບັດຂໍ້ແຂ່ງຂັນ 4 ບຸກ
ເວລາອອກຂ່າວ: 2026-08-05 08:53:12 | ຜູ້ຂຽນ : admin1 | ຈຳນວນຄົນເຂົ້າຊົມ: 122 | ຄວາມນິຍົມ: 
ໃນວັນທີ 29 ກໍລະກົດ 2026 ນີ້, ຂະແໜງຊາວໜຸ່ມກອງພັນໃຫຍ່ 643 ໄດ້ສະຫຼຸບປະເມີນຜົນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ແລະ ມອບໃບຢັ້ງຢືນນາມ ມະຍົດ 4 ບຸກໃຫ້ການຈັດຕັ້ງຊາວໜຸ່ມ ແລະ ສະມາຊິກຊາວໜຸ່ມ ສົກປີ 2022-2025, ໂດຍການເປັນປະທານຂອງ ສະຫາຍ ພັນໂທ ອານຸລັກ ມີລິດ ຮອງພະແນກການເມືອງ, ຜູ້ຊີ້ນຳວຽກງານອົງການຈັດຕັ້ງມະຫາຊົນຂັ້ນກອງພັນໃຫຍ່, ມີຊາວໜຸ່ມ, ສະຫະພັນແມ່ຍິງ, ພະແນກການ ແລະ ພາກສ່ວນກ່ຽວຂ້ອງເຂົ້າຮ່ວມ.
ສະຫາຍ ພັນໂທ ພູເງິນ ເທບພອນໄຊ ຫົວໜ້າຂະແໜງຊາວໜຸ່ມ ໄດ້ຜ່ານບົດສະຫຼຸບປະເມີນຜົນການຈັດຕັ້ງປະຕິບັດຂໍ້ແຂງຂັນ 4 ບຸກ ແລະ ຄັດເລືອກຊາວໜຸ່ມນຳໜ້າ 4 ບຸກ ປະຈຳປີ 2025 ເຊິ່ງໄດ້ຍົກໃຫ້ເຫັນຜົນງານດ້ານພົ້ນເດັ່ນໃນການຈັດຕັ້ງຜັນຂະຫຍາຍເນື້ອໃນຂໍ້ແຂ່ງຂັນ 4 ບຸກ ໃນໄລຍະ 1 ປີ ທີ່ຜ່ານມາ, ທົ່ວກົມກອງ ໄດ້ຮັບການຈັດຕັ້ງປະຕິບັດຢ່າງກວ້າງຂວາງ ແລະ ຕໍ່ເນື່ອງ, ສະມາຊິກຊາວໜຸ່ມທຸກສະຫາຍໄດ້ປະກອບສ່ວນດ້ານເຫື່ອແຮງ ແລະ ສະຕິປັນຍາ ເຂົ້າໃນທຸກຂົງເຂດວຽກງານຂະບວນການຂອງກົມກອງໂດຍຕິດພັນກັບການສ້າງໜ່ວຍພັກ ປອດໃສ, ເຂັ້ມແຂງ ແລະ ໜັກແໜ້ນ ຢ່າງຕັ້ງໜ້າ, ເສີມຂະຫຍາຍທ່າແຮງຫົວຄິດປະດິດສ້າງຂອງສະມາຊິກຊາວໜຸ່ມ ແລະ ປຸກລະດົມຊຸກຍູ້ຂະບວນການ 4 ບຸກ ພາຍໃນກົມກອງໃຫ້ມີບັນຍາກາດຟົດຟື້ນ ແລະ ຕໍ່ເນື່ອງ.
ໃນພິທີ, ສະຫາຍ ພັນຕີ ກອງແດງ ໄຊຍະລາດ ຊ່ວຍວຽກຂະແໜງຊາວໜຸ່ມໄດ້ຜ່ານ ຂໍ້ຕົກລົງ ວ່າດ້ວຍອະນຸມັດໃບ ຢັ້ງຢືນນາມມະຍົດ 4 ບຸກ ໃຫ້ການຈັດຕັ້ງຊາວໜຸ່ມ ແລະ ສະມາຊິກຊາວໜຸ່ມໃນກຳລັງຫຼວງທົ່ວກອງທັບ. ໃນນີ້, ການຈັດຕັ້ງຊາວໜຸ່ມກອງພັນໃຫຍ່ 643 ໄດ້ຮັບໃບຢັ້ງຢືນນາມມະຍົດ 4 ບຸກ ຈຳນວນ 17 ຄະນະ ແລະ ໃບຢັ້ງຢືນນາມມະຍົດ ສະມາຊິກຊາວໜຸ່ມ 4 ບຸກ ຈຳນວນ 363 ສະຫາຍ.
ຂ່າວ: ທອນ ແສງດວງຕາ
ພາບ: ພູວອນ ໄຊຍະແສງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
