POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນສຸກ, ວັນທີ 16 ຕຸລາ 2026

ນັກກິລາຕຳຫຼວດລາວ ຄວ້າແຊັມ ການແຂ່ງຂັນກັອບຕຳຫຼວດອາຊຽນ ຄັ້ງທີ II ທີ່ ສສ ຫວຽດນາມ
ເວລາອອກຂ່າວ: 2026-08-07 09:19:23 | ຜູ້ຂຽນ : admin3 | ຈຳນວນຄົນເຂົ້າຊົມ: 260 | ຄວາມນິຍົມ:

ຄະນະນັກກິລາເຈົ້າໜ້າທີ່ຕຳຫຼວດ ຈາກ ສປປ ລາວ ສ້າງຜົນງານຢ່າງໂດດເດັ່ນ ດ້ວຍການຄວ້າແຊັມປະເພດບຸກຄົນ ແລະ ອັນດັບທີ 3 ປະເພດທີມ ໃນການແຂ່ງຂັນກິລາກັອບຕຳຫຼວດອາຊຽນ ເປີດກວ້າງ ປະຈຳປີ 2026 (ASEAN Police Open Golf Tournament 2026) ຄັ້ງທີ II ທີ່ຈັດຂຶ້ນໃນລະຫວ່າງວັນທີ 1-2 ສິງຫາ 2026 ຢູ່ສະໜາມ Nova World Phan Thiet Golf Club, ແຂວງລາມດົງ, ສາທາລະນະລັດ ສັງຄົມນິຍົມ ຫວຽດນາມ. ຄະນະນັກກິລາຕຳຫຼວດລາວ ນຳພາໂດຍ ທ່ານ ອານຸສິນ ສັກປະເສີດ ຫົວໜ້າຄະນະ ພ້ອມດ້ວຍຄູເຝິກ 1 ທ່ານ ຄື: ເພັດສະໝອນ ສີສົມຫວັງ ແລະ ນັກກິລາ 4 ທ່ານ ປະກອບມີ: ທ່ານ ອານຸສິນ ສັກປະເສີດ, ທ່ານ ວັນປະດິດ ຈັນທະວົງ, ທ່ານ ສິນໄຊ ພິລາສຸກ ແລະ ທ່ານ ໄຊຫຼ້າ ສຸວົງ. ໃນໂອກາດເດີນທາງເຂົ້າຮ່ວມການແຂ່ງຂັນ, ຄະນະນັກກິລາ ກໍໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ຄອນສີ ເນົາວະລາດ ຫົວໜ້າອົງການຜູ້ຕາງໜ້າ ກະຊວງປ້ອງກັນຄວາມສະຫງົບລາວ ປະຈຳ ສສ ຫວຽດນາມ. ພິທີເປີດການແຂ່ງຂັນໄດ້ຈັດຂຶ້ນຢ່າງສົມກຽດ ໂດຍການເປັນປະທານຂອງ ສະຫາຍ ພົນໂທ ເລ ວັນ ຕວຼຽນ ກຳມະການສູນກາງພັກ, ຮອງລັດຖະມົນຕີ ກະຊວງປ້ອງກັນຄວາມສະຫງົບ ສສ ຫວຽດນາມ. ການແຂ່ງຂັນຄັ້ງນີ້ ຈັດຂຶ້ນເພື່ອສົ່ງເສີມການແລກປ່ຽນ, ຮັດແໜ້ນການຮ່ວມມື ແລະ ເສີມຂະຫຍາຍສາຍພົວພັນມິດຕະພາບ ລະຫວ່າງອົງການບັງຄັບໃຊ້ກົດໝາຍ ໂດຍມີຄະນະນັກກິລາຕຳຫຼວດເຂົ້າຮ່ວມທັງໝົດຈາກ 14 ປະເທດ ແລະ ເຂດແຄວ້ນ ໃນນັ້ນ, ປະກອບມີ 9 ປະເທດສະມາຊິກອາຊຽນ ຄື: ມາເລເຊຍ, ໄທ, ລາວ, ກຳປູເຈຍ, ຫວຽດນາມ, ສິງກະໂປ, ບຣູໄນ, ອິນໂດເນເຊຍ, ຟີລິບປິນ ແລະ 5 ປະເທດຮ່ວມງານສາກົນ ຄື: ອົດສະຕຣາລີ, ໄຕ້ຫວັນ, ນອກແວ, ຮຸງກາລີ ພ້ອມດ້ວຍ ສາທາລະນະລັດ ເຊັກ. ສຳລັບຜົນການແຂ່ງຂັນ ຕະຫຼອດໄລຍະ 2 ຮອບ ຜົນປະກົດວ່າ ປະເພດທີມ ນັກກິລາຕຳຫຼວດ ສປປ ລາວ ສາມາດເຮັດຜົນງານໄດ້ຢ່າງໂດດເດັ່ນ ຄວ້າອັນດັບທີ 3 ມາຄອງໄດ້ຢ່າງສົມກຽດ ດ້ວຍຄະແນນລວມ 223 ຄະແນນ. ສ່ວນປະເພດບຸກຄົນ ທ່ານ ສິນໄຊ ພິລາສຸກ ສ້າງຜົນງານໄດ້ຢ່າງດີເລີດ ດ້ວຍການຄວ້າແຊັມມາຄອງ ດ້ວຍຄະແນນ 70 ສະໂຕຣກ. ຜົນສຳເລັດອັນຈົບງາມໃນຄັ້ງນີ້ ບໍ່ພຽງແຕ່ເປັນການສ້າງຊື່ສຽງ ແລະ ກຽດສັກສີທາງດ້ານກິລາໃຫ້ແກ່ກຳລັງປ້ອງກັນຄວາມສະຫງົບຂອງລາວ ໃນເວທີສາກົນເທົ່ານັ້ນ, ແຕ່ຍັງເປັນການປະກອບສ່ວນອັນສຳຄັນເຂົ້າໃນການສ້າງເຄືອຂ່າຍ, ຄວາມໄວ້ເນື້ອເຊື່ອໃຈ ແລະ ຄວາມສາມັກຄີອັນແໜ້ນແຟ້ນ ກັບເຈົ້າໜ້າທີ່ຕຳຫຼວດໃນພາກພື້ນອາຊຽນ ແລະ ສາກົນ ເພື່ອເປັນຮາກຖານໃຫ້ແກ່ການປະສານງານຕ້ານອາຊະຍາກຳຂ້າມຊາດຢ່າງມີປະສິດທິຜົນໃນອະນາຄົດ.

news to day and hot news