ວັນເສົາ, ວັນທີ 17 ຕຸລາ 2026
HYROX ມີ 58 ຜູ້ເຂົ້າເສັ້ນໄຊ ລົງທະບຽນສັນຊາດ ໃນ Bangkok 2026
ເວລາອອກຂ່າວ: 2026-08-19 10:03:32 | ຜູ້ຂຽນ : admin3 | ຈຳນວນຄົນເຂົ້າຊົມ: 236 | ຄວາມນິຍົມ: 
ເຖິງແມ່ນວ່າ HYROX ຈະເປັນລາຍການທີ່ຜູ້ແຂ່ງຂັນຕ້ອງເສຍຄ່າສະໝັກຄ່ອນຂ້າງສູງ, ພ້ອມກັບຄ່າເດີນທາງ, ທີ່ພັກ ແລະ ຄ່າກຽມຕົວຕ່າງໆ, ແຕ່ຈຳນວນຜູ້ສະໝັກກັບເພີ່ມຂຶ້ນຢ່າງຕໍ່ເນື່ອງທຸກປີ. ຫຼ້າສຸດ ການແຂ່ງຂັນ HYROX Bangkok 2026 ຈັດຂຶ້ນລະຫວ່າງກາງເດືອນສິງຫາ 2026 ທີ່ສູນປະຊຸມແຫ່ງຊາດ Queen Sirikit ປະເທດໄທ. ມີຜູ້ເຂົ້າຮ່ວມແຂ່ງຂັນ 19.668 ຄົນ ໃນຫຼາຍປະເພດ. ສຳລັບນັກກິລາຈາກລາວ ມີ 58 ຊື່ທີ່ລະບົບລະບຸສັນຊາດ LAO ແລະ ມີຜົນເຂົ້າເສັ້ນໄຊ ໂດຍແບ່ງເປັນ:HYROX Open Men 20 ຄົນ, HYROX Open Women 5 ຄົນ, HYROX Pro Women 1 ຄົນ, Doubles Men 12 ຄົນ, Doubles Women 6 ຄົນ, Mixed Doubles 8 ຄົນ, Team, Relay Men 2 ຄົນ ແລະ Team Relay Women 4 ຄົນ. ໜຶ່ງໃນຜູ້ແຂ່ງສັນຊາດ LAO ທີ່ໄດ້ຮັບຄວາມສົນໃຈແມ່ນ Pheutsapha Phoummasak ເຊິ່ງລົງແຂ່ງປະເພດ HYROX Men ຮຸ່ນອາຍຸ 40-44 ປີ ເຮັດເວລາໄດ້ 1:38:02, ຢູ່ອັນດັບລວມ 1.452 ແລະ ອັນດັບ 192 ຂອງຮຸ່ນອາຍຸ. ໃນຂະນະທີ່ Toukta Khambounheuang ເປັນຜູ້ແຂ່ງສັນຊາດ ລາວຄົນດຽວໃນປະເພດ Pro Women ຮຸ່ນອາຍຸ 30-34 ປີ, ເຮັດເວລາ 1:45:51, ຄວ້າອັນດັບລວມ 53 ແລະ ອັນດັບ 22 ຂອງຮຸ່ນອາຍຸ. ສ່ວນປະເພດ Team Relay Women U40 ມີນັກແຂ່ງສັນຊາດລາວ ຄົບທັງ 4 ຄົນ ປະກອບມີ ພາວັນນາ ຄຸນສົມບັດ, ສີມມະລາ ອີນທະນຸສອນ, ໄຊນຸສອນ ອຸດົມຊັບ ແລະ ວຽງດາລາ ສົມເພັດ ເຮັດເວລາ 1:46:50.
HYROX ແມ່ນການແຂ່ງຂັນ Fitness Racing ທີ່ປະສົມການແລ່ນ 1 ກິໂລແມັດ ຈຳນວນ 8 ຮອບ ສະຫຼັບກັບ 8 ຖານທົດສອບຄວາມແຂງແຮງ ເຊັ່ນ SkiErg, Sled Push, Sled Pull, Burpee Broad Jump, Rowing, Farmers Carry, Sandbag Lunges ແລະ Wall Balls ແລະ ສາເຫດທີ່ HYROX ໄດ້ຮັບຄວາມນິຍົມ ເຖິງແມ່ນຄ່າສະໝັກຈະສູງ ເປັນເພາະຮູບແບບການແຂ່ງຂັນມີມາດຕະຖານດຽວກັນທົ່ວໂລກ, ຜູ້ແຂ່ງສາມາດປຽບທຽບສະຖິຕິຂອງຕົນເອງ, ມີທັງປະເພດບຸກຄົນ, Doubles, Relay, Pro ແລະ Adaptive ຮອງຮັບນັກກິລາຫຼາຍລະດັບ. ນອກນັ້ນ, ບັນຍາກາດໃນສະໜາມ, ການຈັດງານທີ່ທັນສະໄໝ, ການສ້າງ Community ແລະ ການແບ່ງປັນຜົນງານຜ່ານສື່ອອນລາຍ ເຮັດໃຫ້ການເຂົ້າຮ່ວມ HYROX ບໍ່ແມ່ນພຽງການແຂ່ງຂັນ ແຕ່ຍັງເປັນປະສົບການ ແລະ ເປົ້າໝາຍໃນການພັດທະນາຕົນເອງ. ໃນປີ 2025 ເຄືອຂ່າຍ HYROX ມີຜູ້ເຂົ້າແຂ່ງຫຼາຍກວ່າ 750.000 ຄົນ, ຈັດປະມານ 80 ງານໃນ 31 ຕະຫຼາດ ແລະ ມີສະຖານທີ່ເຝີກທີ່ເປັນພັນທະມິດຫຼາຍກວ່າ 10.000 ແຫ່ງທົ່ວໂລກ.
ການປາກົດຊື່ນັກແຂ່ງສັນຊາດລາວ ຢ່າງໜ້ອຍ 58 ຄົນ ໃນລາຍການດຽວ ສະແດງໃຫ້ເຫັນວ່າກະແສ Hybrid Fitness ກຳລັງເຕີບໂຕໃນກຸ່ມຄົນລາວ ແລະ ອາດກາຍເປັນອີກໜຶ່ງຕະຫຼາດກິລາທີ່ໜ້າຈັບຕາໃນອະນາຄົດ. ສ່ວນຕົວເລກ 58 ແມ່ນການນັບຊື່ຜູ້ທີ່ມີຜົນເຂົ້າເສັ້ນໄຊ ແລະ ລະບົບລະບຸສັນຊາດລາວ. HYROX ເປັນລາຍການເປີດຮັບສະໝັກທົ່ວໄປ ບໍ່ແມ່ນການສົ່ງນັກກິລາໃນນາມທີມຊາດລາວ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
