ວັນພຸດ, ວັນທີ 07 ຕຸລາ 2026
ແພຣວາ ໃຊ້ເວລາເຝິກພຽງ 3 ວັນ ສູ່ເວທີໂລກ ແຕ່ເປົ້າໝາຍສຳຄັນຢູ່ທີ່ Asian Games 2026
ເວລາອອກຂ່າວ: 2026-08-19 10:04:34 | ຜູ້ຂຽນ : admin3 | ຈຳນວນຄົນເຂົ້າຊົມ: 225 | ຄວາມນິຍົມ: 
ເຖິງແມ່ນວ່າຜົນງານໃນເວທີຊີງແຊັມໂລກ ຈະບໍ່ເປັນໄປຕາມຄວາມຫວັງ ແຕ່ສຳລັບ ແພຣວາ ມິຊາໂຕະ ພິລາພັນເດຊ (Praewa Misato Philaphandeth) ການສາມາດກັບຄືນມາລົງແຂ່ງຂັນໄດ້ ຫຼັງຈາກມີເວລາເຝິກຊ້ອມພຽງ 3 ວັນ ຖືເປັນອີກໜຶ່ງໄຊຊະນະສຳຄັນເໜືອອາການບາດເຈັບ. ນັກກິລາຢິມນາສຕິກ ທີມຊາດລາວ ຈົບການແຂ່ງຂັນຮອບຄັດເລືອກ ລາຍການ 42nd Rhythmic Gymnastics World Championships 2026 ຢູ່ນະຄອນ ແຟຣງເຟີດ ປະເທດເຢຍລະມັນ ດ້ວຍອັນດັບທີ 85 ແລະ ຄະແນນລວມ 3 ອຸປະກອນທີ່ດີທີ່ສຸດ 57.500 ຄະແນນ. ເຊິ່ງຜົນງານແຕ່ລະອຸປະກອນປະກອບມີ: ປະເພດຫ່ວງ 19.900 ຄະແນນ, ບານ 16.700 ຄະແນນ, ຄະທາ 18.600 ຄະແນນ, ຮິບບິ້ນ 19.000 ຄະແນນ ຜົນດັ່ງກ່າວເຮັດໃຫ້ ແພຣວາ ບໍ່ສາມາດຜ່ານເຂົ້າສູ່ຮອບຊີງຊະນະເລີດ ແຕ່ນີ້ແມ່ນການລົງແຂ່ງຂັນຊີງແຊັມໂລກ ຄັ້ງທີ 3 ໃນເສັ້ນທາງນັກກິລາຂອງນາງ ຕໍ່ຈາກປີ 2023 ຢູ່ ວາເລນເຊຍຂອງ ແອັດສະປາຍ ແລະ ປີ 2025 ຢູ່ ຣີໂອ ເດີ ເຈນເນີໂຣຂອງ ບຣາຊີນ. ກ່ອນເດີນທາງໄປແຂ່ງຂັນ ແພຣວາ ຕ້ອງຜ່ານຊ່ວງເວລາທີ່ຫຍຸ້ງຍາກຈາກອາການບາດເຈັບ. ນາງເຜີຍວ່າຫຼັງຈາກລາຍການຊີງແຊັມອາຊີ ເຄີຍມີອາການເຈັບຈາກການເປັນນິ້ວ ແລະ ຕໍ່ມາມີອາການເຈັບຫຼັງຮຸນແຮງ ຈົນບໍ່ສາມາດຍືດ ຫຼື ແອ່ນຫຼັງໄດ້ຕາມປົກກະຕິ. ດ້ວຍເຫດນີ້ ທີມງານຈຶ່ງຕ້ອງປັບຫຼຸດບາງທ່າທີ່ມີຄວາມຍາກ ເພື່ອໃຫ້ນາງສາມາດລົງແຂ່ງຂັນໄດ້ໂດຍບໍ່ເພີ່ມຄວາມຮຸນແຮງຂອງອາການບາດເຈັບ ພາຍໃຕ້ການແນະນຳດ້ານກາຍະພາບຈາກທີມ Rehab Therapy by Yai. ເວທີຊີງແຊັມໂລກຄັ້ງນີ້ ຍັງເປັນໜຶ່ງໃນເສັ້ນທາງຄັດເລືອກສູ່ Olympic Games Los
Angeles 2028 ໂດຍມີການມອບສິດໂຄຕາຊຸດທຳອິດໃຫ້ແກ່ນັກກິລາອັນດັບນຳຂອງລາຍການ. ໃນພາລະກິດຕໍ່ໄປຂອງ ແພຣວາ ແມ່ນການກັບໄປຟື້ນຟູຮ່າງກາຍ ຮັກສາອາການບາດເຈັບ ແລະ ນຳບົດຮຽນຈາກເວທີໂລກໄປປັບປຸງການເຝິກຊ້ອມ ເພື່ອກຽມລຸຍມະຫະກຳກິລາເອຊຽນເກມ 2026. ການແຂ່ງຂັນ ຢິມນາສຕິກໃນ Asian Games ຈະຈັດຂຶ້ນວັນທີ 1-3 ຕຸລາ 2026 ຢູ່ Nagoya City General Gymnasium ໃນຂະນະທີ່ງານກິລາລວມຈະຈັດລະຫວ່າງວັນທີ 19 ກັນຍາ ຫາ 4 ຕຸລາ 2026.
ແພຣວາ ປະກາດຈະໃຊ້ເວລາທີ່ເຫຼືອປະມານເດືອນເຄິ່ງ ຟື້ນຟູສະພາບຮ່າງກາຍ ແລະ ເລັ່ງການເຝິກຊ້ອມໃຫ້ກັບຄືນມາສົມບູນທີ່ສຸດ ເພື່ອສ້າງຜົນງານໃຫ້ດີກວ່າເກົ່າ ແລະ ນຳຄວາມພາກພູມໃຈມາສູ່ປະເທດຊາດ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
