ວັນເສົາ, ວັນທີ 07 ທັນວາ 2024
ສະເຫຼີມສະຫຼອງວັນສ້າງຕັ້ງກອງພັນໃຫຍ່ 703 ຄົບຮອບ 35 ປີ ຈັດຂຶ້ນດ້ວຍບັນຍາກາດຟົດຟື້ນ
ເວລາອອກຂ່າວ: 2019-11-18 09:13:55 | ຜູ້ຂຽນ : admin3 | ຈຳນວນຄົນເຂົ້າຊົມ: 176 | ຄວາມນິຍົມ: 
ພິທີສະເຫຼີມສະຫຼອງວັນສ້າງຕັ້ງກອງພັນໃຫຍ່ 703 ຄົບຮອບ 35 ປີ (12/11/1984-12/ 11/2019) ໄດ້ຈັດຂຶ້ນດ້ວຍບັນຍາກາດຟົດຟື້ນ ແລະ ມີຄວາມ ໝາຍຢ່າງເລິກເຊິ່ງໃນວັນທີ 12 ພະຈິກນີ້, ໂດຍເປັນກຽດເຂົ້າຮ່ວມຂອງ ສະຫາຍ ພົນຕີ ພູວົງ ວົງພົມ ກຳມະການຄະນະປະຈໍາພັກກະຊວງ, ຮອງລັດຖະມົນຕີກະຊວງປ້ອງກັນປະເທດ, ມີຄະນະພັກ-ຄະນະບັນຊາ ຕະຫຼອດ ຮອດຜູ້ແທນ ແລະ ແຂກທີ່ຖືກເຊີນເຂົ້າຮ່ວມ.
ສະຫາຍ ພັນເອກ ຄໍາມ້າວ ວໍລະເດດ ກຳມະການຄະນະພັກ, ຫົວໜ້າການທະຫານກອງພັນໃຫຍ່ 703 ໄດ້ກ່າວຄວາມເຫັນຕໍ່ພິທີວ່າ: ໃນທ່າມກາງບັນຍາກາດທົ່ວພັກ, ທົ່ວກອງທັບ ແລະ ທົ່ວປວງຊົນລາວບັນດາເຜົ່າພວມສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມ
ໃຫຍ່ຄັ້ງທີ X ຂອງພັກເວົ້າລວມ, ເວົ້າສະເພາະແມ່ນກອງພັນໃຫຍ່ 703 ພວມ ສຸມທຸກກໍາລັງໃສ່ການເຝິກແອບຮ່ໍາຮຽນວິຊາສະເພາະເຕັກນິກເຮືອບິນທີ່ພັກ-ລັດຖະບານ ແລະ ກະຊວງປ້ອງກັນປະເທດປະກອບໃຫ້ກົມກອງຂອງພວກເຮົາດ້ວຍ ຄວາມຮັບຜິດຊອບສູງ ແລະ ມີ ຜົນສໍາເລັດທີ່ໜ້າເພິ່ງພໍໃຈ. ນີ້ແມ່ນເປັນຂີດໝາຍໃໝ່ໃນການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວເວົ້າລວມ, ເວົ້າສະເພາະກໍແມ່ນກອງພັນໃຫຍ່ 703 ພວກເຮົາ ແລະ ເປັນບາດ ລ້ຽວໃໝ່ທາງປະຫວັດສາດຂອງ ກອງທັບ, ກອງພັນໃຫຍ່ 703 ໄດ້ ສ້າງຕັ້ງຂຶ້ນໃນວັນທີ 12 ພະຈິກ 1984 ເຊິ່ງມີອາຍຸໄດ້ 35 ປີພໍດີ ແລະ ກໍເປັນເວລາແຫ່ງການປັບປຸງກໍ່ສ້າງກົມກອງໃນທຸກດ້ານຕະຫຼອດໄລຍະ 35 ປີຜ່ານມາກອງພັນໃຫຍ່ 703 ເຄີຍມີມູນເຊື້ອ ແລະ ຜົນງານຢ່າງຫຼວງຫຼາຍໄດ້ປະກອບສ່ວນສ້າງບົດ ບາດ ແລະ ມູນເຊື້ອໃຫ້ແກ່ກອງທັບປະຊາຊົນລາວຕະຫຼອດມາ, ມູນເຊື້ອ ແລະ ຜົນງານດັ່ງ ກ່າວນັ້ນແມ່ນມາຈາກການຊີ້ນໍາ-ນໍາພາຈັດຕັ້ງປະຕິບັດຂອງຄະນະພັກ-ຄະນະບັນຊາແຕ່ລະຂັ້ນ, ພະນັກງານ-ນັກຮົບແຕ່ລະຮຸ່ນຈົນເຖິງປັດຈຸບັນ ພາຍໃຕ້ການຊີ້ນໍາຢ່າງໃກ້ຊິດຂອງກະຊວງປ້ອງກັນປະເທດ
ຕະຫຼອດໄລຍະ 35 ປີຜ່ານມາກອງພັນໃຫຍ່ 703 ໄດ້ສ້າງຖັນ
ແຖວພະນັກງານວິຊາສະເພາະໄດ້ເຕີບໃຫຍ່ຂະຫຍາຍຕົວຢ່າງ
ບໍ່ຢຸດຢັ້ງ, ສ້າງພະນັກງານເຕັກນິກວິຊາສະເພາະການບິນເຊັ່ນ: ນັກບິນ, ນາຍຊ່າງສ້ອມແປງເຮືອບິນທຸກຂະແໜງການ, ນາຍຊ່າງສ້ອມແປງລົດ, ວິຊາການສື່ສານ, ນັກໂດດຈ້ອງ ແລະ ວິຊາສະເພາະຢ່າງຕໍ່ເນື່ອງ, ຮຽນທິດສະດີໃຫ້ນັກບິນ-ນາຍຊ່າງຢູ່ກັບທີ່ເຊັ່ນ: ປ່ຽນຊະນິດເຮືອບິນຕ່າງໆສ້າງ ນັກບິນສອງ, ນັກບິນໜຶ່ງ ແລະ ນັກບິນອາຈານ, ນາຍຊ່າງຊັ້ນຕົ້ນເຮືອບິນຂຶ້ນຊື່ ແລະ ເຮືອບິນປີກ, ນາຍຊ່າງຊັ້ນກາງທຽບເທົ່າ, ນັກໂດດຈ້ອງ ແລະ ວິຊາສະເພາະອື່ນໆໄດ້ຈໍານວນບໍ່ໜ້ອຍ, ພາຫະນະຂັ້ນເທິງປະກອບໃຫ້ມີເຮືອບິນ ຫຼາຍຊະນິດທີ່ທັນສະໄໝ. ນອກນັ້ນຍັງໄດ້ປະຕິບັດຕາມແຜນການຊີ້ນຳຂອງກະຊວງປ້ອງກັນປະ ເທດໃນການເຄື່ອນໄຫວປະຕິບັດໜ້າທີ່ການເມືອງຂອງກົມກອງໂດຍສະເພາະແມ່ນປະຕິບັດຕາມ 4 ໜ້າທີ່ໃຫຍ່ 26 ແຜນງານຂອງຄະນະພັກກະຊວງປ້ອງກັນ ປະເທດວາງອອກໂດຍໄດ້ຈັດຕັ້ງພະນັກງານລົງກໍ່ສ້າງຮາກຖານປະຊາຊົນໃນ 7 ບ້ານອ້ອມ ຂ້າງຂອງກົມກອງ, ເຮັດໃຫ້ສະພາບມີຄວາມສະຫງົບໂດຍພື້ນຖານ, ວຽກງານກໍ່ສ້າງພັກ-ພະນັກງານຍາມໃດກໍໄດ້ເອົາໃຈໃສ່ສຶກສາອົບຮົມໃຫ້ນາຍ
ແລະ ພົນທະຫານທາງດ້ານການເມືອງ-ແນວຄິດ, ຕິດພັນກັບການປະຕິບັດ ໜ້າທີ່ການເມືອງຂອງກົມກອງ, ເອົາໃຈໃສ່ຕໍ່ວຽກງານກໍ່ສ້າງພັກ, ຍົກສູງບົດບາດການນຳພາຂອງພັກ, ປັບປຸງກໍ່ສ້າງພັກຕາມ 5 ຫຼັກ ການ 3 ທິດນຳຂອງການກໍ່ສ້າງພັກໃນປັດຈຸບັນ. ຕໍ່ຜົນງານດັ່ງກ່າວເຮັດໃຫ້ກົມກອງໄດ້ຮັບນາມມະຍົດເປັນກອງວີລະຊົນ 1 ກົມກອງຄື: ກອງພັນ 302, ເປັນກອງພິລາດອາດຫານ 1 ກົມ ກອງຄື: ກອງພັນ 303, ທົ່ວກົມກອງໄດ້ຮັບນາມມະຍົດເປັນນັກຮົບແຂ່ງຂັນ 12 ສະຫາຍ, ໄດ້ຫຼຽນໄຊອິດສະຫຼະຊັ້ນ II ມີ 3 ຫຼຽນ, ຫຼຽນໄຊອິດສະຫຼະຊັ້ນ III ມີ 4 ຫຼຽນ, ຫຼຽນໄຊແຮງງານຊັ້ນ I ມີ 1 ຫຼຽນ, ຫຼຽນໄຊແຮງງານຊັ້ນ II ມີ 2 ຫຼຽນ, ຫຼຽນໄຊແຮງງານ ຊັ້ນ III ມີ 4 ຫຼຽນ, ຫຼຽນໄຊພິລາດອາດຫານຊັ້ນ II ມີ 12 ຫຼຽນ, ຫຼຽນໄຊພິລາດອາດຫານຊັ້ນ III ມີ 5 ຫຼຽນ, ຫຼຽນໄຊມິດຕະພາບ ຂອງ ສສ ຫວຽດນາມ 1 ຫຼຽນ, ກົມກອງລວມໝູ່ໄດ້ຮັບຫຼຽນປະ ເພດຕ່າງໆ 70 ຫຼຽນ ແລະ ບຸກ ຄົນທີ່ມີໜ້າໄດ້ຮັບຫຼຽນປະເພດຕ່າງໆ 937 ຫຼຽນ.
ຕອນທ້າຍພິທີຍັງໄດ້ຮັບຊົມການສາທິດພັບທຸງຊາດຕິດເກາະໃສ່ເຮືອບິນ, ວິທີແກ່ທຸງຂອງເຮືຶອ ບິນ, ຊົມວິທີກອບກູ້ຊ່ວຍເຫຼືອຄົນຂອງຈຸບິນ ແລະ ຮັບຊົມໂດດຈ້ອງ ຕື່ມອີກ.
ໂດຍ: ກອງສີ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
