ກອງທັບປະຊາຊົນລາວ
 
ວັນສຸກ, ວັນທີ 13 ພະຈິກ 2026

  

ບົດຖະແຫຼງຂ່າວ ຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ COVID-19 ປະຈໍາວັນພະຫັດ ວັນທີ່ 14 ພຶດສະພາ ປີ 2020
ເວລາອອກຂ່າວ: 2020-05-14 15:39:38 | ຜູ້ຂຽນ : admin3 | ຈຳນວນຄົນເຂົ້າຊົມ: 861 | ຄວາມນິຍົມ:



ໂດຍ: ທ່ານ ຮສ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ, ຜູ້ປະຈໍາການ ຄະນະສະເພາະກິດ I. ສະພາບການເຝົ້າລະວັງ COVID-19 ຢູ່ ສປປ ລາວ ຮອດ 5 ໂມງແລງ ຂອງວັນທີ 13 ພຶດສະພາ 2020 1. ວຽກງານຈຸດຜ່ານດ່ານ • ຈໍານວນຜູ້ເດີນທາງເຂົ້າມາ ມີທັງໝົດ 2,339 ຄົນ - ຈຸດຜ່ານດ່ານລາວ-ໄທ ທັງໝົດ 1,418 ຄົນ, ໃນນັ້ນ ມີແຮງງານລາວກັບມາຈາກປະເທດໄທ ຜ່ານດ່ານຊ່ອງເມັກ ແຂວງຈຳປາສັກ 9 ຄົນ, ເຫຼືອນັ້ນ ແມ່ນຜູ້ຂັບລົດຂົນສົ່ງສິນຄ້າ. - ຈຸດຜ່ານດ່ານລາວ-ຈີນ ທັງໝົດ 10 ຄົນ, ທັງໝົດແມ່ນຜູ້ຂັບລົດຂົນສົ່ງສິນຄ້າ. - ຈຸດຜ່ານດ່ານລາວ-ຫວຽດ ທັງໝົດ 911 ຄົນ, ໃນນັ້ນມີ 895 ຄົນແມ່ນຄົນຂັບລົດ ຂົນສົ່ງສິນຄ້າ ແລະ ອີກ 16 ຄົນແມ່ນແຮງງານຫວຽດນາມ - ຈຳນວນຜູ້ເດີນທາງຜ່ານສະໜາມບິນສາກົນວັດໄຕ 00 ຄົນ • ທຸກຄົນທີ່ຜ່ານດ່ານ ແມ່ນໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້. • ສຳລັບແຮງງານລາວ ຈຳນວນ 9 ຄົນ ທີ່ຜ່ານດ່ານຊ່ອງເມັກ ແຂວງຈຳປາສັກ ແມ່ນມີຖິ່ນຖານມາຈາກ ແຂວງຈຳປາສັກ. • ແຮງງານຫວຽດນາມ 16 ຄົນທີ່ເຂົ້າມາດ່ານນ້ຳໂສຍ ແຂວງຫົວພັນແມ່ນມາສືບຕໍ່ກໍ່ສ້າງໂຮງໝໍແຂວງ • ແຮງງານທັງໝົດໄດ້ເກັບຕົວຢ່າງມາກວດ ແລະ ນຳສົ່ງໄປຈຳກັດບໍລິເວນຢູ່ສູນຂອງແຂວງ ຈົນກ່ວາຈະຄົບກຳນົດ 14 ວັນ. 2. ການເຝົ້າລະວັງ ແລະ ວິເຄາະ • ໃນວັນທີ 13 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 117 ຄົນ, ໃນນັ້ນ ມີກໍລະນີສົງໄສ 38 ຄົນ ແລະ ແຮງງານລາວທີ່ກັບມາຈາກປະເທດໄທ 79 ຄົນ, ລາຍລະອຽດຂອງແຮງງານດັ່ງກ່າວແມ່ນ: - ສະຫວັນນະເຂດ 53 ຄົນ - ຄຳມ່ວນ 11 ຄົນ - ສາລະວັນ 09 ຄົນ - ບໍລິຄຳໄຊ 02 ຄົນ - ຈຳປາສັກ 02 ຄົນ - ອຸດົມໄຊ 02 ຄົນ • ຜົນກວດທັງໝົດຂອງມື້ວານນີ້ ບໍ່ພົບເຊື້ອ. • ໝາຍຄວາມວ່າໃນວັນທີ 13 ພຶດສະພາ 2020 ບໍ່ມີຜູ້ຕິດເຊື້ອໃໝ່. • ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 13 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 4,092 ຕົວຢ່າງ, ກວດພົບເຊື້ອສະສົມ 19 ຄົນ (32 ມື້ແລ້ວທີ່ບໍ່ພົບຜູ້ຕິດເຊື້ອໃໝ່). 3. ການຕິດຕາມຜູ້ເດີນທາງມາຈາກຕ່າງປະເທດໂດຍສະເພາະແຮງງານລາວ ຢູ່ສະຖານທີ່ຈຳກັດບໍລິເວນຕ່າງໆຂອງແຂວງ • ປະຈຸບັນນີ້ທົ່ວປະເທດ ມີສູນຈໍາກັດບໍລິເວນ ທັງໝົດ 66 ສູນ, ມີຜູ້ຈຳກັດບໍລິເວນຢູ່ສູນ 2,097 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດ ແລະ ບໍ່ມີຜູ້ຕິດເຊື້ອ. 4. ການຕິດຕາມປີ່ນປົວຄົນເຈັບຢູ່ໂຮງໝໍ • ປັດຈຸບັນ, ມີຜູ້ນອນຕິດຕາມຢູ່ໂຮງໝໍມິດຕະພາບ 5 ຄົນ, ຍີງ 04 ຄົນ ທັງໝົດເຫັນວ່າມີອາການປົກກະຕິ. 5. ການຕິດຕາມສະພາບການລະບາດຂອງປະເທດໃກ້ຄຽງ ແລະ ການລະບາດຢູ່ໃນໂລກ ເຫັນວ່າ: • ມາຮອດເວລາ 6:00 ໂມງເຊົ້າ ຂອງວັນທີ 14 ພຶດສະພາ 2020, ທົ່ວໂລກມີການລາຍງານການລະບາດ ທັງໝົດ 213 (ປະເທດ/ເຂດ) ມື້ວານເພີ່ມອີກປະເທດໜື່ງ (ປະເທດເລໂຊໂຕ ທະວີບອາຟຣິກາໃຕ້) - ມີການຢັ້ງຢືນ ຜູ້ຕິດເຊື້ອພະຍາດ COVID-19 ແມ່ນ 4,422,147 (84,710 ໃໝ່) - ເສຍຊິວິດ 297,552 (5,101 ໃໝ່) ກວມເອົາ 6,72 % ຂອງຜູ້ຕິດເຊື້ອທັງໝົດ; - ປີ່ນປົວຫາຍດີ 1,654,819 (79,261 ໃໝ່) ກວມເອົາ 37,42 % ຂອງຜູ້ຕິດເຊື້ອທັງ ໝົດ; - ບັນຫາສຳຄັນ ແມ່ນມີບາງປະເທດ ຈຳນວນຜູ້ຕິດເຊື້ອມື້ດຽວ ມີເຖິງ 19,103 ຄົນ ແລະ ເສຍຊີວິດ 1,616 ຄົນຕໍ່ມື້; - ອັດຕາຄວາມຮ້າຍແຮງຂອງມື້ນີ້ແມ່ນ 6.72 % (ມື້ວານນີ້ 6.74 %). • ສະເພາະກຸ່ມປະເທດອາຊຽນກໍ່ເຫັນວ່າ ຍັງມີບາງປະເທດທີ່ມີອັດຕາການຕິດເຊື້ອໃໝ່ປະ ຈຳວັນທີ 13 ພຶດສະພາ 2020 ສູງເຖິງ 689 ຄົນ, ໃນມື້ດຽວນີ້ຢູ່ກຸ່ມປະເທດອາຊຽນມີຜູ້ເສຍຊີວິດ 44 ຄົນ. 6. ຂໍ້ແນະນຳ ບັນດາທ່ານທີ່ນັບຖື ແລະ ຮັກແພງ, • ຂໍ້ມູນສໍາຄັນໃນມື້ນີ້ ແມ່ນການລາຍງານ ຂອງລະບົບເຝົ້າລະວັງພະຍາດ ຈາກທົ່ວປະເທດມາຫາສູນປະຕິບັດງານສຸກເສີນ ຂອງກະຊວງສາທາລະນະສຸກ ຢັ້ງຢືນວ່າ ສປປ ລາວ ບໍ່ພົບຜູ້ຕິດເຊື້ອໃໝ່ 32 ມື້ແລ້ວ (ເລິ່ມແຕ່ວັນທີ 12 ເມສາ 2020 ເປັນຕົ້ນມາ). ໄດ້ເກັບຕົວຢ່າງມາກວດທັງໝົດ ມີ 4,092 ຕົວຢ່າງ, ມີຈໍານວນຜູ້ຕິດເຊື້ອສະສົມ ທັງໝົດ 19 ຄົນ, ຍັງນອນຕິດຕາມຢູ່ໂຮງໝໍ 05 ຄົນ. • ການຈັດຕັ້ງປະຕິບັດແຈ້ງການ 524/ຫສນຍ ກ່ຽວກັບການຜ່ອນຜັນບາງມາດຕະການ ຮອດວັນທີ 17 ພຶດສະພາ ນີ້ກໍ່ຍັງພຽງແຕ່ 2-3 ວັນ ແຕ່ຍັງມີຄວາມຈຳເປັນທີ່ຈະຕ້ອງໄດ້ເອົາໃຈໃສ່ ວິທີປ້ອງກັນການຕິດເຊື້ອ ແລະ ວິທີປ້ອງກັນການແຜ່ເຊື້ອພະຍາດ ເພື່ອສະກັດກັ້ນບໍ່ໃຫ້ມີກໍລະນີໃໝ່ເກີດຂຶ້ນ. ປັດໄຈສໍາຄັນທີ່ສຸດ ແມ່ນຂຶ້ນກັບຄວາມຮັບຜິດຊອບຂອງທຸກພາກສ່ວນທີ່ເປີດການບໍລິການຄືນໃໝ່ ວ່າຈະປະຕິບັດມາດຕະການໄດ້ຖືກຕ້ອງ ເຂັ້ມງວດສ່ຳໃດ ແລະ ຂື້ນກັບພຶດຕິກໍາຂອງພວກເຮົາໝົດທຸກຄົນທີ່ຈະປັບປຸງວິຖີຊີວິດໃໝ່ຂອງຕົນ ຕາມຄຳແນະນຳຂອງຄະນະສະເພາະກິດ. • ພັກ ແລະ ລັດຖະບານໄດ້ມີຄວາມເປັນຫ່ວງເປັນໃຍ, ໄດ້ຕິດຕາມ ແລະ ໃຫ້ການຊີ້ນຳຢ່າງໃກ້ຊິດ. ເຊົ້າມື້ນີ້ກໍໄດ້ມີກອງປະຊຸມຂອງລັດຖະບານ ພາຍໃຕ້ການເປັນປະທານຂອງທ່ານ ນາຍົກລັດຖະມົນຕີ, ໄດ້ຮັບຟັງການລາຍງານປະເມີນຜົນສະພາບການລະບາດຂອງ ພະຍາດ ໂຄວິດ-19 ຢູ່ປະເທດເຮົາ, ປະເທດໃກ້ຄຽງ ແລະ ໃນໂລກ. ກອງປະຊຸມກໍ່ໄດ້ມີທິດຊີ້ນຳທີ່ຈະຜ່ອນຜັນຕື່ມອີກບາງມາດຕະການ ເພື່ອໃຫ້ມີຜົນກະທົບຕໍ່ເສດຖະກິດ-ສັງຄົມ ໜ້ອຍທີ່ສຸດ, ສ້າງເງື່ອນໄຂໃຫ້ພໍ່ແມ່ປະຊາຊົນ ໄດ້ກັບມາໃຊ້ຊີວິດຕາມປົກກະຕິເທື່ອລະກ້າວ, ລາຍລະອຽດຂໍໃຫ້ບັນດາທ່ານຕີດຕາມແຈ້ງການສະບັບໃໝ່ຂອງຫ້ອງວ່າການສຳນັກງານນາຍົກລັດຖະມົນຕີທີ່ຈະອອກໃນໄວໆນີ້. • ສະນັ້ນ, ຈຶ່ງຮຽກຮ້ອງໃຫ້ທຸກພາກສ່ວນໃນສັງຄົມ, ຊຸມຊົນ, ຄອບຄົວ ແລະ ສ່ວນບຸກຄົນ ມີຄວາມອົດທົນພະຍາຍາມ ເອົາໃຈໃສ່ຮ່ວມແຮງຮ່ວມໃຈກັນ ສືບຕໍ່ຈັດຕັ້ງປະຕິບັດຄຳແນະນຳ ແລະ ມາດຕະການຕ່າງໆ ໃຫ້ຖືກຕ້ອງ ແລະ ເຂັ້ມງວດ. ໂດຍສະເພາະ ການລ້າງມືດ້ວຍນໍ້າສະອາດ ແລະ ສະບູ ຫຼື ໃຊ້ເຈວລ້າງມື, ການປະຕິບັດໄລຍະຫ່າງທາງສັງຄົມ, ການໃສ່ຜ້າປິດປາກ-ດັງ ເວລາອອກຈາກບ້ານ ຫຼື ໄປສະຖານທີ່ບໍລິການຕ່າງໆ ໃຫ້ກາຍເປັນຄວາມຊີ່ນເຄີຍໃນການດຳລົງຊີວິດປະຈຳວັນ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ