ວັນສຸກ, ວັນທີ 06 ທັນວາ 2024
ສຸມປະກອບຄຳເຫັນໃສ່ບົດພັດທະນາສະຖານທີ່ທ່ອງທ່ຽວພູເບ້ຍແຂວງໄຊສົມບູນ
ເວລາອອກຂ່າວ: 2020-06-10 15:11:17 | ຜູ້ຂຽນ : admin3 | ຈຳນວນຄົນເຂົ້າຊົມ: 132 | ຄວາມນິຍົມ: 
ວິຊາການຈາກບໍລິສັດກຸ່ມຄຳໄພຊະນະຈຳກັດຜູ້ດຽວ ແລະ ພະແນກການກ່ຽວຂ້ອງເບື້ອງລັດຂອງແຂວງໄຊສົມບູນ, ກົມພັດທະນາການທ່ອງທ່ຽວ ກະຊວງຖະແຫຼງຂ່າວ, ວັດທະນາທຳ ແລະ ທ່ອງທ່ຽວ ພ້ອມດ້ວຍຊ່ຽວຊານຈາກມະຫາວິທະຍາໄລແຫ່ງຊາດ ໄດ້ຂຸ້ນຂ້ຽວສຸມສະຕິປັນຍາ ປະກອບຄວາມຄິດເຫັນໃສ່ບົດວິພາກເສດຖະກິດ ແລະ ເຕັກນິກຂອງໂຄງການ ພັດທະນາແຫລ່ງທ່ອງທ່ຽວລະດັບຊາດ ສະຫວັນທະເລໝອກພູເບ້ຍ ໄຊສົມບູນ ເພື່ອໃຫ້ສາມາດຮັບຮອງໄດ້ໂດຍພື້ນຖານໃນຂັ້ນແຂວງ ກ່ອນເພື່ອນຳໄປຜ່ານອີກຄັ້ງໜື່ງທີ່ສູນກາງ ແລະ ກ້າວໄປຂັ້ນຕອນອະນຸມັດພັດທະນາຈາກລັດຖະບານ ແຕ່ທັງນີ້ແມ່ນຈະຕ້ອງໃຫ້ໄດ້ເປີດກິດຈະກຳຄາລະວານຂອງການນຳຂັ້ນສູງຂື້ນຈອມພູເບ້ຍພາຍໃນເດືອນທັນວາ 2020 ນີ້.
ກອງປະຊຸມດັ່ງກ່າວ ຈັດຂຶ້ນໃນຄາບເຊົ້າຂອງວັນທີ 8 ມີຖຸນານີ້ ທີ່ພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຂວງໂດຍການເປັນປະທານ ຂອງທ່ານ ແດງ ປະທຸມທອງ ຮອງເຈົ້າແຂວງໄຊສົມບູນ ທັງເປັນຫົວໜ້າຄະນະຮັບຜິດຊອບຊີ້ນໍາລວມ ໂຄງການ KPG ພັດທະນາແຫລ່ງທ່ອງທ່ຽວລະດັບຊາດ ສະຫວັນທະເລໝອກພູເບ້ຍ ໄຊສົມບູນ, ຊຶ່ງກອງປະຊຸມນອກຈາກໄດ້ສຸມໃສ່ປະກອບຄວາມເຫັນໃສ່ບົດວິພາກເສດຖະກິດແລ້ວ ຍັງມີການແບ່ງຄວາມຮັບຜິດຊອບຂອງອະນຸກໍາມະການຕ່າງໆໃນການເຮັດວຽກ ແລະ ຄົ້ນຄວ້າປະກອບຄວາມຄິດເຫັນໃສ່ຄຳຂວັນການທ່ອງທ່ຽວນຳອີກ.
ທ່ານ ຄໍາໄພ ສົມຊະນະ ປະທານບໍລິສັດກຸ່ມຄໍາໄພຈໍາກັດຜູ້ດຽວ ໃຫ້ສຳພາດວ່າ: ກອງປະຊຸມຄັ້ງນີ້ແມ່ນມີຄວາມໝາຍສຳຄັນທີ່ສຸດ ເພື່ອຜ່ານບົດວິພາກເສດຖະກິດຂອງໂຄງການເປັນເທື່ອສຸດທ້າຍຢູ່ຂັ້ນແຂວງ ຊຶ່ງທາງບໍລິສັດໄດ້ມີຄວາມເອົາໃຈໃສ່ສຶກສາສຳຫຼວດຢ່າງລະອຽດດ້ານທີ່ຕັ້ງພູມສັນຖານ ແລະ ຊີວະນາໆພັນ ຜ່ານມາແລ້ວປີກວ່າ, ຊຶ່ງຖ້າທຸກພາກສ່ວນເບື້ອງແຂວງຫາກຢັ້ງຢືນຄວາມຖືກຕ້ອງໃຫ້ກໍຈະໄດ້ນຳຂຶ້ນໄປຫາສູນກາງຄົ້ນຄວ້າຕື່ມອີກ ຊື່ງຄາດວ່າຫາກໂຄງການນີ້ເກີດຂຶ້ນກໍຈະກາຍເປັນຈຸດທ່ອງທ່ຽວທີ່ສຳຄັນຂອງຊາດ, ອັນຈະສົ່ງຜົນປະໂຫຍດຢ່າງມະຫາສານໃນການສ້າງອາຊີບ ແລະ ລາຍຮັບທີ່ໝັ້ນຄົງແກ່ພໍ່ແມ່ປະຊາຊົນພາຍໃນທ້ອງຖີ່ນແຂວງໄຊສົມບູນໃນອານາຄົດ.
ໂຄງການນີ້ແມ່ນຕັ້ງຢູ່ເມືອງອານຸວົງ ຄາດຄະເນວ່າຈະນຳໃຊ້ເງິນລົງທຶນທັງໝົດ 500 ລ້ານໂດລາສະຫະລັດ ເພຶ່ອເນລະມິດໃຫ້ເປັນແຫຼ່ງທ່ອງທ່ຽວທຳມະຊາດທີ່ມີຫຼາກຫຼາຍກິດຈະການທີ່ທັນສະໄໝ ຕິດພັນກັບການຮັກສາຄວາມອຸດົມສົມບູນຂອງທຳມະຊາດໂດຍປະຊາຊົນມີສ່ວນຮ່ວມຊຶ່ງການພັດທະນາຈະແບ່ງອອກເປັນ 2 ໄລຍະຄື: ໄລຍະທຳອິດແຕ່ປີ 2020-2025 ໂຄງການຈະສຸມໃສ່ການພັດທະນາຢູ່ເທິງພູເບ້ຍ ແລະ ຕີນພູເບ້ຍບາງສ່ວນ ໂດຍປະກອບມີກິດຈະກໍາຍ່າງປ່າສຶກສາທໍາມະຊາດ ແລະ ຊີວະນານາພັນ, ການທ່ອງທ່ຽວແບບຜະຈົນໄພຂີ່ສະລິງ, ໄຕ່ຂົວອູ່, ໄຕ່ໜ້າຜາ ແລະ ຂີ່ລົດຖີບຕາມສາຍພູ, ການນອນເຕັ້ນຊົມທະເລໝອກ, ການທ່ອງທ່ຽວດ້ານກະສິກໍາປອດສານພິດ, ການພັກແຮມນໍາເຮືອນປະຊາຊົນ ແລະ ອື່ນໆ.
ສ່ວນໄລຍະ 2 ແຕ່ປີ 2026-2032 ແມ່ນຈະພັດທະນາການທ່ອງທ່ຽວ ແບບຜະຈົນໄພ ແລະ ທັນສະໄໝ ໂດຍມີກິດຈະກໍາສວນສະໜຸກ, ທີ່ພັກລະດັບໂຮງແຮມລະດັບ 5 ດາວ, ກະຕ່າລອຍຟ້າ, ສວນນໍ້າ, ສູນວິໄຈພຶກສາສາດ, ຈໍາລອງອະລິຍະທໍາຊົນຊາດຊົນເຜົ່າ ແລະ ອື່ນໆ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
