POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນຈັນ, ວັນທີ 09 ສິງຫາ 2021

ບົດປາໄສຂອງທ່ານ ຈຽງ ຈາຍຕົງ, ເອກອັກຄະລັດຖະທູດແຫ່ງ ສປ ຈີນ ປະຈໍາ ສປປ ລາວ ເນື່ອງໃນໂອກາດການສ້າງສາຍພົວພັນການທູດຄົບຮອບ 60 ປີ ກໍຄືປີມິດຕະພາບຈີນ-ລາວ (25/04/1961-25/04/2021)
ເວລາອອກຂ່າວ: 2021-04-25 12:41:16 | ຜູ້ຂຽນ : admin2 | ຈຳນວນຄົນເຂົ້າຊົມ: 47 | ຄວາມນິຍົມ:

ຮຽນບັນດາເພື່ອນສະຫາຍລາວນັບຖື, ບັນດາພີ່ນ້ອງຮ່ວມຊາດ, ທັງຊາວລາວເຊື້ອສາຍຈີນ ແລະ ຊາວຈີນຕ່າງດ້າວທີ່ຮັກແພງ, ມື້ນີ້ເປັນວັນລະນຶກການສ້າງສາຍພົວພັນການທູດ ຈີນ-ລາວ, ເຊິ່ງກ່ອນໜ້ານີ້ 60 ປີ, ສາທາລະນະລັດ ປະຊາຊົນຈີນ ແລະ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ສ້າງສາຍພົວພັນການທູດຢ່າງເປັນທາງການ, ເຊິ່ງໄດ້ເປີດໂສມໜ້າໃໝ່ຂອງການພົວພັນມິດຕະພາບລະຫວ່າງສອງພັກ, ສອງລັດ ແລະ ປະຊາຊົນສອງຊາດ. ໃນວັນເວລາທີ່ມີຄວາມໝາຍປະຫວັດສາດນີ້, ປະຊາຊົນສອງຊາດ ໄດ້ຫວນຄືນມູນເຊື້ອແຫ່ງການພົວພັນການທູດໄລຍະ 60 ປີແຫ່ງການກໍ່ສ້າງມິດຕະພາບຈີນ-ລາວ ແລະ ການນໍາຂັ້ນສູງຂອງສອງຝ່າຍ ໄດ້ສົ່ງໂທລະເລກຊົມເຊີຍໃຫ້ກັນ, ຕີລາຄາສູງຕໍ່ຜົນສໍາເລັດໃນ 60 ປີທີ່ຜ່ານມາ, ທັງໄດ້ປຶກສາຫາລືກັນເພື່ອວາງແຜນໃຫ້ແກ່ການເສີມສ້າງສາຍພົວພັນຈີນ-ລາວໃນຕໍ່ໜ້າ; ເພື່ອຜັນຂະຫຍາຍມູນເຊື້ອອັນດີງາມດັ່ງກ່າວເພື່ອຊຸກຍູ້ສົ່ງເສີມມາດຕະການສໍາຄັນຕ່າງໆຂອງການຮ່ວມມືຈີນ-ລາວ. ໂດຍຜ່ານໂທລະພາບແຫ່ງຊາດລາວ, ພວກຂ້າພະເຈົ້າຂໍສະແດງຄວາມຂອບໃຈຢ່າງຈິງໃຈມາຍັງພັກ ລັດຖະບານ ແລະ ປະຊາຊົນລາວອ້າຍນ້ອງ ທີ່ໄດ້ສະໜັບສະໜູນການພັດທະນາຂອງຈີນຢ່າງໜັກແໜ້ນມາຕະຫຼອດມາ, ຂໍສະແດງຄວາມຂອບໃຈຢ່າງຈິງໃຈມາຍັງບັນດາສະຫາຍລາວໃນທຸກຂົງເຂດວຽກງານນັບທັງພີ່ນ້ອງຊາວລາວເຊື້ອສາຍຈີນ ແລະ ຊາວຈີນຕ່າງດ້າວ ທີ່ຍາມໃດກໍໄດ້ຕັ້ງໃຈສົ່ງເສີມມິດຕະພາບຈີນ-ລາວ, ຂໍສະແດງຄວາມຂອບໃຈຢ່າງຈິງໃຈມາຍັງການນຳບັນດາກະຊວງ ອົງການ ແຕ່ສູນກາງຮອດທ້ອງຖິ່ນຂອງສອງປະເທດ ທີ່ໄດ້ຕັ້ງໜ້າກະກຽມຈັດກິດຈະກໍາຕ່າງໆເພື່ອສະຫຼອງປີມິດຕະພາບຈີນ-ລາວ. ເນື່ອງໃນໂອກາດອັນສະຫງ່າລາສີນີ້, ກໍຂໍອະນຸຍາດໃຫ້ຂ້າພະເຈົ້າ ຕາງໜ້າສະຖານທູດແຫ່ງ ສປ ຈີນ ປະຈໍາ ສປປລາວ ສະແດງຄວາມຂອບໃຈ ແລະ ຊົມເຊີຍອັນອົບອຸ່ນພ້ອມທັງອວຍພອນໄຊອັນປະເສີດມາຍັງບັນດາສະຫາຍລາວ ແລະ ຈີນທຸກຄົນມາໃນໂອກາດນີ້ດ້ວຍ. ບັນດາສະຫາຍ ແລະ ເພື່ອນມິດທັງຫຼາຍ, ຕະຫຼອດໄລຍະ 60 ປີ ຜ່ານມາ, ຈີນ ແລະ ລາວ ໄດ້ພະຍາຍາມບາກບັ່ນສູ້ຊົນ ແລະ ບັນລຸຜົນສໍາເລັດອັນຈົບງາມໃນການເສີມສ້າງ ສາຍພົວພັນສອງຝ່າຍໄດ້ຮັບການຍົກສູງຂຶ້ນຢ່າງຕໍ່ເນື່ອງ, ໃນປີ 2000 ຈີນ ແລະ ລາວ ໄດ້ສ້າງຕັ້ງສາຍພົວພັນຮ່ວມມືຮອບດ້ານທີ່ໝັ້ນຄົງຍາວນານ ໄມຕີຈິດຖານບ້ານໃກ້ເຮືອນຄຽງ ແລະ ໄວ້ເນື້ອເຊື່ອໃຈກັນ; ໃນປີ 2009 ໄດ້ຍົກລະດັບເປັນສາຍພົວພັນຄູ່ຮ່ວມຍຸດທະສາດຮອບດ້ານ; ໃນປີ 2017 ສອງຝ່າຍໄດ້ຕົກລົງກັນຢ່າງເອກະພາບ ໃນການສ້າງຄູ່ຮ່ວມຊາຕາກໍາທີ່ມີຄວາມໝາຍຍຸດທະສາດ; ໃນປີ 2019 ໄດ້ເລີ່ມຕົ້ນປະຕິບັດ ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາຈີນ-ລາວຈາກໝາກຜົນແຫ່ງການຮ່ວມມືແທດຕົວຈິງໄດ້ແຕກດອກອອກຜົນໃນຫຼາຍດ້ານດັ່ງກ່າວ, ໄລຍະພຽງແຕ່ 30 ປີຜ່ານມານັ້ນໄດ້ເຮັດໃຫ້ການລົງທຶນຂອງຈີນຢູ່ລາວກໍໄດ້ເພີ່ມຂຶ້ນ 70 ເທົ່າ, ການຄ້າສອງຝ່າຍໄດ້ເພີ່ມຂຶ້ນ 230 ເທົ່າ. ການເຊື່ອມໂຍງເຂົ້າກັນທາງດ້ານຄົມມະນາຄົມ ແລະ ການຄ້າໄດ້ມີການພັດທະນາຢ່າງກ້າວກະໂດດ, ທາງລົດໄຟຈີນ-ລາວ ທີ່ທັນສະໄໝຈະສ້າງສໍາເລັດໃນທ້າຍປີນີ້, ທາງດ່ວນສາຍທໍາອິດຂອງລາວໄດ້ເປີດນໍາໃຊ້ຢ່າງເປັນທາງການ ແລະ ອື່ນໆ. ການແລກປ່ຽນລະຫວ່າງປະຊາຊົນມີການພັດທະນາຢ່າງບໍ່ຢຸດຢັ້ງ, ໃນປີ 2019 ນັກທ່ອງທ່ຽວຈີນທີ່ມາທ່ຽວປະເທດລາວຫຼາຍກວ່າໜຶ່ງລ້ານຄົນ, ເພີ່ມຂຶ້ນ 100 ເທົ່າ ເມື່ອທຽບໃສ່ 30ປີ, ກ່ອນ ນັກສຶກສາລາວທີ່ໄປຮຽນຢູ່ຈີນມີຈໍານວນ 15000 ຄົນ ຊຶ່ງໄດ້ຈັດຢູ່ອັນດັບທີ່ 8 ຂອງໂລກໃນຈໍານວນນັກສຶກສາຕ່າງປະເທດທີ່ຮຽນຢູ່ ສປ ຈີນ. 60 ປີ ຜ່ານມາ, ຈີນ ແລະ ລາວ ໄດ້ຮ່ວມທຸກຮ່ວມສຸກ, ສ້າງຄວາມຮັກແພງ ແລະ ເຂົ້າໃຈເຊິ່ງກັນ ແລະ ກັນ. ການຊີ້ນຳແບບຍຸດທະສາດຂອງການນຳຂັ້ນສູງເປັນຄວາມຮັບປະກັນພື້ນຖານຕໍ່ການພັດທະນາສາຍພົວພັນລະຫວ່າງ ຈີນ-ລາວ, ໃນພາລະກິດປະຕິວັດປົດປ່ອຍຊາດຂອງສອງປະເທດ, ການນຳລຸ້ນອາວຸໂສໃນເມື່ອກ່ອນຄື ສະຫາຍ ເໝົາເຈີຕຸ້ງ ກັບ ສະຫາຍ ໄກສອນ ພົມວິຫານ ແລະ ອຶ່ນໆ ໄດ້ຜູກຮັດໄມຕີຈິດມິດຕະພາບອັນເລິກເຊິ່ງ ແລະ ສ້າງພື້ນຖານອັນແໜ້ນແກ່ນໃຫ້ແກ່ມິດຕະພາບຈີນ-ລາວ; ໃນເວລາກ້າວເຂົ້າສູ່ສະໄໝໃໝ່, ສະຫາຍ ສີຈິ້ນຜິງ, ເລຂາທິການໃຫຍ່, ປະທານປະເທດແຫ່ງ ສປ ຈີນ ກໍມີການພົບປະປະຈຳປີກັບການນຳສູງສຸດຂອງພັກ-ລັດລາວ, ການພົບປະທີເປັນປະຈຳລະຫວ່າງການນຳຂັ້ນສູງສຸດຂອງສອງພັກ-ລັດ ຈີນ-ລາວ ໄດ້ເປັນການຂັບເຄື່ອນຕໍ່ການຮ່ວມມືຍຸດທະສາດຮອບດ້ານລະຫວ່າງຈີນ-ລາວ; ນັບແຕ່ກອງປະຊຸມໃຫຍ່ ຄັ້ງທີ 11 ຂອງພັກປະຊາຊົນປະຕິວັດລາວເປັນຕົ້ນມາ, ສະຫາຍເລຂາທິການໃຫຍ່ ສີ ຈິ້ນຜິງ ກັບ ສະຫາຍເລຂາທິການໃຫຍ່ ທອງລຸນ ສີສຸລິດ ໄດ້ສົນທະນາທາງໂທລະສັບທີ່ສຳຄັນ ແລະ ຮັກສາການປະສານກັນຢ່າງໃກ້ຊິດ, ເຊິ່ງໄດ້ເປີດສັງກາດໃໝ່ໃຫ້ແກ່ການສ້າງຄູ່ຮ່ວມຊາຕາກຳຈີນ-ລາວ. ການສະໜັບສະໜູນຕໍ່ກັນຢ່າງຈິງໃຈເປັນເສົາຄ້ຳອັນໜັກແໜ້ນໃຫ້ແກ່ສາຍພົວພັນຈີນ-ລາວ ທີ່ຈະສືບຕໍ່ພັດທະນາໄປຢ່າງແໜ້ນແຟ້ນ, ພວກຂ້າພະເຈົ້າຂໍສະແດງຄວາມຂອບໃຈຢ່າງສຸດອົກສຸດໃຈຕໍ່ຝ່າຍລາວທີ່ໄດ້ໃຫ້ການສະໜັບສະໜູນຢ່າງໜັກແໜ້ນໃນບັນດາບັນຫາສຳຄັນທີ່ກ່ຽວພັນເຖິງສິດຜົນປະໂຫຍດຂອງຈີນ, ຝ່າຍຈີນຈະຍຶດໝັ້ນການຮ່ວມມືຕ່າງຝ່າຍຕ່າງມີຜົນປະໂຫຍດເພື່ອຊ່ວຍເຫຼືອຝ່າຍລາວຍົກສູງຄວາມສາມາດພັດທະນາດ້ວຍຕົນເອງ. ຄວາມສາມັກຄີສູ້ຊົນຮ່ວມກັນເປັນກຳລັງແຮງຊຸກຍູ້ທີ່ບໍ່ເຫືອດແຫ້ງໃຫ້ແກ່ການພັດທະນາສາຍພົວພັນຈີນ-ລາວ, ຈີນກັບລາວມີລະບອບການເມືອງຄືກັນແລະ ເສັ້ນທາງພັດທະນາຄ້າຍຄືກັນ, ໃນຂະບວນການຊຸກຍູ້ພາລະກິດສັງຄົມນິຍົມທີ່ມີສີສັນພິເສດຂອງໃຜລາວ, ສອງຝ່າຍໄດ້ຖອດຖອນບົດຮຽນ ແລະ ຊ່ວຍເຫຼືອເຊິ່ງກັນ ແລະ ກັນ, ຊຸກຍູ້ການສ້າງຄູ່ຮ່ວມຊາຕາກຳຈີນ-ລາວ ກ້າວຂຶ້ນສູ່ລະດັບໃໝ່ ແລະ ມີການກ້າວກະໂດດອັນຍິ່ງໃຫຍ່. ໃນ 60 ປີ ທີ່ຜ່ານມາ, ຈີນ ແລະ ລາວໄດ້ຮ່ວມກັນຜ່ານຜ່າຄວາມຫຍຸ້ງຍາກຕ່າງໆ ແລະ ພ້ອມກັນມອງໜ້າໄປສູ່ອະນາຄົດ. ພັກກອມມູນິດຈີນຈະຕ້ອນຮັບການສ້າງຕັ້ງຂຶ້ນຄົບຮອບ 100 ປີ ໃນເວລາໃກ້ໆນີ້, ປະຊາຊົນຈີນກຳລັງເປີດສັງກາດໃໝ່ແຫ່ງການສ້າງປະເທດສັງຄົມນິຍົມທັນສະໄໝຢ່າງຮອບດ້ານ. ປະຈຸບັນ ສາຍພົວພັນຈີນ-ລາວໄດ້ກ້າວເຂົ້າສູ່ໄລຍະດີທີ່ສຸດໃນປະຫວັດສາດ ແລະ ຈະສືບຕໍ່ຕ້ອນຮັບອະນາຄົດອັນຈົບງາມ. ພວກຂ້າພະເຈົ້າຍິນດີຮ່ວມກັນກັບຝ່າຍລາວ, ລົງເລິກແລກປ່ຽນບົດຮຽນການຄຸ້ມຄອງພັກ ແລະບໍລິຫານລັດ, ພ້ອມກັນຍຶດໝັ້ນເສັ້ນທາງສັງຄົມນິຍົມໃຫ້ດີ, ປັບປຸງລະບອບສັງຄົມນິຍົມໃຫ້ດີ ແລະ ພັດທະນາພາລະກິດສັງຄົມນິຍົມໃຫ້ດີ. ພວກຂ້າພະເຈົ້າຍິນດີ ພ້ອມກັບຝ່າຍລາວ ເປີດກວ້າງການຮ່ວມມືຮອບດ້ານ, ຊຸກຍູ້ໃຫ້ຂໍ້ລິເລິ່ມ "ຫນຶ່ງແລວຫນຶ່ງເສັ້ນທາງ" ເຊື່ອມໂຍງກັບ "ຍຸດທະສາດການຫັນປະເທດບໍ່ມີຊາຍແດນຕິດກັບທະເລມາເປັນປະເທດທີ່ມີທາງອອກສູ່ທະເລ"ຂອງລາວ, ເລັ່ງລັດການສ້າງແລວເສດຖະກິດຈີນ-ລາວ ເພື່ອສ້າງພື້ນຖານວັດຖຸອັນຫນັກແຫນ້ນໃຫ້ແກ່ສາຍພົວພັນລະຫວ່າງຈີນ-ລາວ ພວກຂ້າພະເຈົ້າຍິນດີຈະເພີ່ມທະວີການປະສານສົມທົບກັບຝ່າຍລາວໃນກິດຈະກຳສາກົນ ແລະ ເຂດແຄວ້ນ ພ້ອມກັນປົກປັກຮັກສາລັດທິຫລາຍຝ່າຍ ແລະ ຄວາມຍຸດຕິທຳສາກົນຢ່າງແທ້ຈິງ, ເຮັດໃຫ້ພຶດຕິກຳແຫ່ງການສ້າງຄູ່ຮ່ວມຊາຕາກຳລະຫວ່າງຈີນ-ລາວອຸດົມສົມບຸນຂຶ້ນເລື້ອຍໆເພື່ອປະກອບສ່ວນອັນຕັ້ງຫນ້າເຂົ້າໃນການຊຸກຍູ້ສ້າງປະຊາຄົມຮ່ວມຊາຕາກຳມວນມະນຸດ. ບັນດາສະຫາຍ ແລະ ເພື່ອນມິດທັງຫລາຍ ປະຈຸບັນປະຊາຊົນລາວກຳລັງສູ້ຊົນຕ້ານກັບການລະບາດຂອງພະຍາດໂຄວິດ-19 ໃນຮອບໃຫມ່. ການລະບາດຂອງພະຍາດໂຄວິດ-19 ໃນຮອບນີ້ມີທ່າອ່ຽງຮ້າຍແຮງ, ລະບາດໄວ, ຕອບໂຕ້ຍາກ ແລະ ມີຜົນກະທົບກວ້າງຂວາງ, ພວກຂ້າພະເຈົ້າເຫັນວ່າພັກແລະລັດຖະບານລາວໄດ້ນຳໃຊ້ມາດຕະການທຸກອັນທີ່ທັນການ ແລະ ເດັດຂາດລວມທັງການປິດນະຄອນຫລວງວຽງຈັນ ໂດຍອີງຕາມການກຳນົດປ້ອງກັນການລະບາດຂອງພະຍາດໂຄວິດ-19 ທັງສອງຝ່າຍໄດ້ຕົກລົງໂຈະການຈັດພິທີສະເຫລີມສະຫລອງການພົວພັນການທູດຄົບຮອບ 60 ປີ ທີ່ວັນທີ 23 ເມສາ (ໃນແຜນ). ໃນຖານະທີ່ເປັນຄູ່ຮ່ວມຊາຕາກໍາທີ່ຄຽງບ່າຄຽງໄລ ແລະ ໃຫ້ການຊ່ວຍເຫລືອຊຶ່ງກັນແລະ ກັນຕະຫລອດມາ ພວກຂ້າພະເຈົ້າຈະຕັ້ງຫນ້າຈັດຕັ້ງປະຕິບັດການຕົກລົງທີ່ເປັນເອກກະພາບກັນລະຫວ່າງເລຂາທິການໃຫຍ່ສອງພັກໃນການສືບຕໍ່ສະຫນັບສະຫນູນການຕໍ່ສູ້ຕ້ານກັບການລະບາດຂອງພະຍາດໂຄວິດ-19, ພະຍາຍາມສະຫນອງຢາວັກຊິນເປັນ ຄັ້ງທີ 3 ໃຫ້ແກ່ຝ່າຍລາວ. ພ້ອມກັນນີ້ ພວກຂ້າພະເຈົ້າຂໍສະແດງຄວາມຂອບອົກຂອບໃຈຢ່າງຈິງໃຈມາຍັງຝ່າຍລາວທີ່ໄດ້ມີການຈັດແຜນດ່ວນທີ່ສັກຢາວັກຊິນແບບບໍ່ເສຍຄ່າໃຫ້ແກ່ພົນລະເມືອງຈີນທີ່ດຳລົງຊີວິດຢູ່ລາວທີ່ມີຄວາມສ່ຽງສູງ ຊຶ່ງໄດ້ສະແດງໃຫ້ເຫັນເຖິງນໍ້າໃຈທີ່ເປັນຄູ່ຮ່ວມຊາຕາກຳລະຫວ່າງຈີນ-ລາວ ແລະ ກໍ່ເປັນການປະກອບສ່ວນອັນເປັນຮູບປະທຳໃຫ້ແກ່ການສ້າງປະຊາຄົມຮ່ວມສາທາລະນະສຸກຂອງມວນມະນຸດ. ພວກຂ້າພະເຈົ້າເຊື່ອຫມັ້ນວ່າ ດ້ວຍການນໍາພາອັນຫນັກແຫນ້ນເຂັ້ມແຂງຂອງພັກ-ລັດ, ທ່າແຮງອັນພົ້ນເດັ່ນຂອງລະບອບສັງຄົມນິຍົມ ແລະ ຄວາມສາມັກຄີເປັນຈິດຫນຶ່ງໃຈດຽວຂອງປະຊາຊົນລາວອ້າຍນ້ອງ, ແນ່ນອນຈະສາມາດຜ່ານຜ່າຄວາມຫຍຸ້ງຍາກທຸກປະການໄດ້ ແລະ ມີອະນາຄົດອັນຈົບງາມ. ພວກຂ້າພະເຈົ້າລໍຄອຍການພົບປະສັງສັນຮ່ວມກັນ ສະເຫລີມສະຫລອງການສ້າງສາຍພົວພັນການທູດຈີນ-ລາວຄົບຮອບ 60 ປີ ແລະ ປີມິດຕະພາບຈີນ-ລາວ ເພື່ອອວຍພອນໃຫ້ມິດພະພາບລະຫວ່າງຈີນ-ລາວ ຈົ່ງຫມັ້ນຄົງທະນົງແກ່ນ ສອງປະເທດຈີນ-ລາວ ຈົ່ງຈະເລີນຮຸ່ງເຮືອງ ແລະ ປະຊາຊົນສອງຊາດຈີນ-ລາວຈົ່ງມີຄວາມຜາສຸກ. ຂໍຂອບໃຈຂໍຂອບໃຈ !

news to day and hot news