ວັນເສົາ, ວັນທີ 12 ຕຸລາ 2024
ກະຊວງປ້ອງກັນປະເທດ ປະກາດການແຕ່ງຕັ້ງຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19
ເວລາອອກຂ່າວ: 2021-05-10 16:28:36 | ຜູ້ຂຽນ : admin2 | ຈຳນວນຄົນເຂົ້າຊົມ: 221 | ຄວາມນິຍົມ: 
ໃນວັນທີ 10 ພຶດສະພາ 2021 ນີ້, ກະຊວງປ້ອງກັນປະເທດໄດ້ຈັດຕັ້ງພິທີປະກາດການແຕ່ງຕັ້ງຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດ ໂຄວິດ-19, ໂດຍການເປັນປະທານຂອງ ສະຫາຍ ພົນຕີ ວົງຄຳ ພົມມະກອນ ຮອງລັດຖະມົນຕີກະຊວງປ້ອງກັນປະເທດ, ມີຄະນະພັກ-ຄະນະບັນຊາຈາກບັນດາກົມ, ກອງຕະຫຼອດຮອດພະນັກງານວິຊາການໄດ້ຮັບການແຕ່ງຕັ່ງເຂົ້າຮ່ວມ.
ສະຫາຍ ພົນຈັດຕະວາ ດຣ ບົວສິງ ອິນທະວົງ ຮອງຫົວໜ້າກົມໃຫຍ່ພະລາທິການກອງທັບ ໄດ້ຂື້ນຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະສະເພາະກິດເພື່ອປ້ອງກັນ,ຄວບຄຸມ ແລະ ແກ້ໄຂການແຜ່ລະບາດຂອງພະຍາດ ໂຄວິດ-19 ແລະ ຂໍ້ຕົກລົງວ່າດ້ວຍການແຕ່ງຕັ້ງຄະນະກຳມະການຊ່ວຍວຽກ ຄະນະສະເພາະກິດກະຊວງປ້ອງກັນປະເທດ ເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດ ໂຄວິດ-19. ທັງນີ້ກໍ່ເພື່ອຊີ້ນຳ ແລະ ຊຸກຍູ້ກົມກອງກຳລັງຫຼວງ ແລະ ກຳລັງທອ້ງຖິ່ນ ທົ່ວກອງທັບ ເປັນເສນາທິການໃນການສັງລວມສະພາບການກວດຄັດກອງຜູ້ທີ່ເຂົ້າມາໂຮງໝໍ, ຈຳນວນຜູ້ສົງໄສຕິດເຊື້ອ, ປິ່ນປົວຜູ້ຕິດເຊື້ອ, ການຈັດຕັ້ງປະຕິບັດມາດຕະການຕ່າງໆຂອງຂະແໜງວິຊາສະເພາະ ແລະ ການສະຫຼຸບລາຍງານຄົນເຈັບໃຫ້ຄະນະກອງເລຂາເປັນລາຍວັນ.
ໂອກາດນີ້, ສະຫາຍຮອງລັດຖະມົນຕີກະຊວງປ້ອງກັນປະເທດ ກໍໄດ້ມີຄໍາເຫັນຊີ້ນໍາຫຼາຍບັນທີ່ສໍາຄັນ ແລະ ເນັ້ນໜັກໃຫ້ຄະນະສະເພາະກິດ ແລະ ຜູ້ຊ່ວຍວຽກຈົ່ງພ້ອມກັນຈັດຕັ້ງປະຕິບັດຢ່າງເຂັ້ມງວດ ແລະ ເຄື່ອນໄຫວຊີ້ນໍາຢ່າງຕັ້ງໜ້າໂດຍສະເພາະຢູ່ບັນດາໂຮງໝໍ ໃຫ້ມີການປະສານສົມທົບ ແລກປ່ຽນຖອດຖອນບົດຮຽນ, ເຝິກອົບຮົມວິຊາການໃນການປິ່ນປົວຜູ້ຕິດເຊື້ອໃຫ້ໄດ້ຮັບຜົນດີ, ມີການພົວພັນລະຫວ່າງໂຮງໝໍຕ່າງໆພາຍໃນປະເທດ ເປັນຕົ້ນໂຮງໝໍ103, ໂຮງໝໍມິດຕະພາບ, ໂຮງໝໍມະໂຫສົດ ແລະ ມີຄວາມເປັນເອກະພາບທາງດ້ານວິຊາການ. ຊີ້ນຳນັກວິຊາສະເພາະແພດ ຢູ່ບັນດາອົງການ, ກົມ, ກົມກອງກຳລັງຫຼວງ-ກຳລັງທ້ອງຖິ່ນ ໃຫ້ຈັດຕັ້ງທີມແພດ ກວດວັດແທກອຸນນະພູມ ແລະ ຕິດຕາມສຸຂະພາບຂອງພະນັກງານ-ນັກຮົບທຸກໆວັນ, ຈັດຕັ້ງອະນາໄມ ຕາມສໍານັກ ງານ, ອົງການ, ກົມກອງ ໂດຍສະເພາະຫໍພັກ, ເຮືອນຄົວ, ເຮືອນກິນລວມ ໃຫ້ສະອາດຢູ່ສະເໝີ. ພ້ອມທັງຈັດຕັ້ງໜ່ວຍງານປາບເຊື້ອ-ຂ້າເຊື້ອ, ໜ່ວຍງານ ສືບສວນ-ສອບສວນ, ສູນວິເຄາະ ແລະ ໜ່ວຍງານສັກຢາວັກຊິນປ້ອງກັນພະຍາດໂຄວິດ-19, ລົງເຄື່ອນໄຫວເຮັດໜ້າທີ່ໃຫ້ບັນດາກົມກອງທັງກຳລັງຫຼວງ ແລະ ກຳລັງທ້ອງຖິ່ນໃນທົ່ວກອງທັບ, ເກັບກຳສະຖິຕິຈຳນວນພົນທະຫານທີ່ໄດ້ຮັບການສັກຢາວັກຊິນ, ຈຳນວນຕ້ອຍຄືເກັບຕົວຢ່າງ, ສະຖານທີ່ປາບເຊື້ອ ແລະ ວຽກງານສືບສວນຜູ້ທີ່ຕິດເຊື້ອ, ຈຳນວນທີ່ໄດ້ສຳຜັດ ເພື່ອລາຍງານໃຫ້ກອງເລຂາຄະນະສະເພາະກິດທຸກໆວັນ.
ກອງປະຊຸມຍັງໄດ້ພ້ອມກັນຄົ້ນຄວ້າ ແລະ ຈັດສັນງົບປະມານດ້ານການເງິນ, ນໍ້າມັນເຊື້ອໄຟ, ພາຫານະຂົນສົ່ງ, ອຸປະກອນການແພດ ທີ່ຈະນໍາໃຊ້ໃນວຽກງານປ້ອງກັນ, ຄວບຄຸມ ແລະ ຕອບໂຕ້ການແຜ່ລະບາດຂອງພະຍາດ ໂຄວິດ-19 ໃນກອງທັບໃຫ້ພຽງພໍ ແລະ ທັນເວລາ.
ຂ່າວ-ພາບ: ອາວຸນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
