ວັນເສົາ, ວັນທີ 07 ທັນວາ 2024
ສາຍພົວພັນແບບພິເສດລາວ-ຫວຽດນາມ ເປັນມູນເຊື້ອທີ່ໄດ້ຮັບການສືບທອດຢ່າງສະເໝີຕົ້ນສະເໝີປາຍ
ເວລາອອກຂ່າວ: 2021-12-15 10:26:16 | ຜູ້ຂຽນ : admin2 | ຈຳນວນຄົນເຂົ້າຊົມ: 444 | ຄວາມນິຍົມ: 
ສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດລາວ-ຫວຽດນາມ ເປັນມູນເຊື້ອທີ່ສືບທອດກັນມາຢ່າງສະເໝີຕົ້ນສະເໝີປາຍ ເຊິ່ງບໍ່ມີປະເທດໃດໃນໂລກນີ້ທີ່ມີການພົວພັນຮ່ວມມືຮອບດ້ານຄືສອງຊາດລາວ- ຫວຽດນາມ, ດັ່ງນັ້ນ ຈິ່ງເວົ້າວ່າສາຍພົວພັນແບບພິເສດ.
ໃນໂອກາດເຂົ້າຮ່ວມການພົບປະມິດຕະພາບວຽກງານປ້ອງກັນຊາດ ຢູ່ຊາຍແດນ ລາວ-ຫວຽດນາມ ຄັ້ງທີ 1 ,ສະຫາຍ ພັນເອກ ຄຳເພັດ ສຸລິຍະວົງ ຫົວໜ້າການທະຫານ ກອງບັນຊາການທະຫານແຂວງສະຫວັນນະເຂດ ໃຫ້ທັດສະນະຂອງຕົນ ວ່າ: ມາຮອດປັດຈຸບັນ ການນໍາສອງກະຊວງປ້ອງກັນປະເທດ ລາວ ແລະ ຫວຽດນາມ ຍັງສືບຕໍ່ຮັດແໜ້ນຄວາມສາມັກຄີທີ່ເປັນມູນເຊື້ອ ຕິດພັນກັບພຶດຕິກໍາຕົວຈິງ, ເຊິ່ງສະແດງການພົບປະມິດຕະພາບວຽກງານປ້ອງກັນຊາດ ຢູ່ຊາຍແດນລາວ-ຫວຽດນາມ (ແຂວງສະຫວັນນະເຂດ ແລະ ແຂວງກວາງຈິ) ຄັ້ງນີ້ ເປັນເຫດການປະຫວັດສາດສໍາຄັນໜຶ່ງຕໍ່ການເພີ່ມພູນຄູນສ້າງສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດລາວ-ຫວຽດນາມ ໃຫ້ກ້າວເຂົ້າສູ່ລວງເລິກ, ທັງເປັນແບບຢ່າງທີ່ດີເລີດໃຫ້ແກ່ຄົນລຸ້ນໃໝ່ ໄດ້ຮຽນຮູ້ ແລະ ພ້ອມກັນສືບຕໍ່ປົກປັກຮັກສາໄວ້ໃຫ້ໝັ້ນຄົງຕະຫຼອດຊົ່ວກາລະນານ.
ສະຫາຍ ພັນເອກ ຄຳເພັດ ສຸລິຍະວົງ ໃຫ້ຮູ້ຕື່ມວ່າ: ໃນໄລຍະຜ່ານມາ ກອງບັນຊາການທະຫານແຂວງສະຫວັນນະເຂດ ກໍ່ໄດ້ມີການພົວພັນຮ່ວມມືກັບກອງບັນຊາການທະຫານແຂວງກວາງຈິ, ກວາງບິງ ສສ ຫວຽດນາມ, ແຕ່ລະປີ ກໍ່ໄດ້ມີການເຄື່ອນໄຫວແລກປ່ຽນບົດຮຽນສະພາບການ, ການພົບປະຢ້ຽມຢາມ, ການເຄື່ອນໄຫວລາດຕະເວນສອງຝ່າຍ ແລະ ຝ່າຍດຽວ ຢ່າງເປັນປົກກະຕິ, ເຊິ່ງໃນຊ່ວງການແຜ່ລະບາດຂອງພະຍາດໂຄວິດ -19 ນີ້ ສາມກອງບັນຊາການທະຫານແຂວງສະຫວັນນະເຂດ, ກວາງຈິ, ກວາງບິງ ກໍ່ໄດ້ແລກປ່ຽນສະພາບການດ້ານຂໍ້ມູນຂ່າວສານເປັນປົກກະຕິ ເພື່ອແກ້ໄຂປະກົດການຫຍໍ້ທໍ້ຕ່າງໆ ຢູ່ລຽບຕາມບໍລິເວນຊາຍແດນ ເພື່ອຄຸ້ມຄອງປົກປັກຮັກສາ ຫຼັກໝາຍຊາຍແດນ ໃຫ້ກາຍເປັນເສັ້ນຊາຍແດນມິດຕະພາບ, ຄວາມສາມັກຄີ ແລະ ມີຄວາມສະຫງົບຮຽບຮ້ອຍ, ພ້ອມກັນນັ້ນ ຍັງໄດ້ເຄື່ອນໄຫວສືກສາອົບຮົມໃຫ້ພໍ່ແມ່ປະຊາຊົນບັນດາເຜົ່າຢູ່ລຽບຕາມຊາຍແດນ ເຂົ້າໃຈແຈ້ງຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ, ການເດີນທາງເຂົ້າ-ອອກ ໃຫ້ຖືກຕ້ອງຕາມລະບຽບກົດໝາຍ ກໍ່ຄືຂໍ້ກໍານົດກົດລະບຽບຕ່າງໆ ຂອງຊາຍແດນຂອງສອງປະເທດວາງອອກ, ນອກນີ້ ຍັງໄດ້ຊຸກຍູ້ອໍານາດການປົກຄອງທ້ອງຖິ່ນອ້ອມຂ້າງ ໃຫ້ພົບປະແຮກສ່ຽວແລກປ່ຽນບົດຮຽນຮ່ວມກັນ ລະຫວ່າງບ້ານຕໍ່ບ້ານ, ເມືອງຕໍ່ເມືອງ ໃຫ້ເປັນປົກກະຕິ ເພື່ອເສີມຂະຫຍາຍມູນເຊື້ອການ ພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດລາວ-ຫວຽດນາມ ໃຫ້ແຕກດອກອອກຜົນຍິ່ງໆຂື້ນ.
ໂດຍ: ທອງເພັດ ໄຊຍະເພັນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
