ກອງທັບປະຊາຊົນລາວ
 
ວັນອັງຄານ, ວັນທີ 28 ພຶດສະພາ 2024

  

ການ​ເຕີບ​ໃຫຍ່​ເຂັ້ມແຂງ ແລະ​ ສູ້​ຮົບ​ມີ​ໄຊ ​ຂອງ​ເຫຼົ່າ​ຮົບ​ລົດ​ຕັງ-ຍານ​ເກາະ
ເວລາອອກຂ່າວ: 2022-10-03 09:36:34 | ຜູ້ຂຽນ : admin3 | ຈຳນວນຄົນເຂົ້າຊົມ: 429 | ຄວາມນິຍົມ:



ຕະຫຼອດ​ໄລຍະ​ແຫ່ງ​ການ​ຕໍ່ສູ້​ຕ້ານ​ຈັກກະພັດ​ຜູ້​ຮຸກ​ຮານ​ພ້ອມ​ທັງ​ລູກ​ແຫຼ່ງ​ຕີນ​ມື​ຂອງ​ພວກ​ເຂົາ​ທີ່​ເຕັມ​ໄປ​ດ້ວຍ​ຄວາມ​ດຸເດືອດ​ຂ້ຽວຂາດ ເປັນຕົ້ນ ໃນ​ໄລຍະ​ຕໍ່ສູ້​ຕ້ານ​ຈັກກະພັດ​ອາເມຣິກາ ເຊິ່ງ​ເປັນ​ໄລຍະ​ຕໍ່ສູ້​ຍືດ​ເຍື້ອ​ຍາວ​ນານ ແລະ ລະ​ອິດ​ລະ​ອ້ຽວ​ເຕັມ​ໄປ​ດ້ວຍ​ຄວາມ​ຫຍຸ້ງຍາກ​ລຳບາກ​ບໍ່​ອາດ​ພັນ​ລະ​ນາ​ໄດ້, ແຕ່​ດ້ວຍ​ນ້ຳໃຈ​ຮັກ​ຊາດ​ຮັກ​ບ້ານ​ເກີດ​ເມືອງ​ນອນ, ຄຽດ​ແຄ້ນ​ຕໍ່​ການ​ກະທຳ​ອັນ​ປ່າ​ເຖື່ອນ​ຂອງ​ພວກ​ຈັກກະພັດ​ອາເມຣິກາ ແລະ ປະຕິ​ການ​ຂວາ​ຈັດ, ກອງທັບ ແລະ ປະຊາຊົນ​ລາວ ໄດ້​ລຸກຂຶ້ນ​ຕໍ່ສູ້​ຕ້ານ​ການ​ຮຸກ​ຮານ​ຢ່າງ​ເດັດດ່ຽວ​ໜຽວ​ແໜ້ນ ແລະ ພິລະ​ອາດ​ຫານ ສາມາດ​ປົດ​ປ່ອຍປະ​ເທດ​ຊາດ​ອອກ​ຈາກ​ການ​ເປັນ​ຫົວ​ເມືອງ​ຂຶ້ນ​ຂອງ​ຈັກກະພັດ​ທັງ​ແບບ​ເກົ່າ ແລະ ແບບ​ໃໝ່​ໄດ້​ຢ່າງ​ສົມບູນ. ພາຍຫຼັງ​ປະເທດ​ຊາດ​ໄດ້​ຮັບ​ການ​ປົດ​ປ່ອຍເຫຼົ່າ​ຮົບ​ລົດ​ຕັງ-ຍານ​ເກາະໄດ້​ສືບຕໍ່​ປະຕິບັດສອງ ໜ້າທີ່​ຍຸດ​ທະ​ສາດ ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ, ສືບຕໍ່​ເສີມ​ຂະຫຍາຍ​ທາດ​ແທ້​ມູນເຊື້ອ​ປະຕິວັດ ​ປັບປຸງ​ກໍ່ ສ້າງ​ກຳລັງ​ເຫຼົ່າ​ຮົບ​ໃຫ້​ນັບ​ມື້​ເຕີບ​ໃຫຍ່​ເຂັ້ມແຂງ ກາຍເປັນ​ກຳລັງ​ແຮງ​ສູ້​ຮົບ​ອັນ​ແຂງ​ແກ່ນ​ຂອງ​ກອງທັບ​ປະຊາຊົນ​ລາວ​ຕະຫຼອດ​ມາ. ການ​ເຕີບ​ໃຫຍ່​ຂະຫຍາຍຕົວ​ຂອງ​ເຫຼົ່າ​ຮົບ​ລົດ​ຕັງ-​ຍານ​ເກາະ ໄລຍະ​ປີ 2000-2020. ເພື່ອ​ສືບຕໍ່​ປະຕິບັດ​ສອງ​ໜ້າທີ່​ຍຸດ​ທະ​ສາດ​ ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ, ປັບປຸງ​ສ້າງ​ກຳລັງ​ປະກອບ​ອາວຸດ​ກອງທັບ​ປະຊາຊົນ​ລາວ ໃຫ້​ເຕີບ​ໃຫຍ່​ເຂັ້ມແຂງ ກາຍເປັນ​ກອງທັບ​ປະຕິວັດ​ມີ​ແບບແຜນ​ທັນ​ສະໄໝ, ເຫຼົ່າ​ຮົບ​ລົດ​ຕັງ-ຍານ​ເກາະ ໄດ້​ປັບປຸງ​ກໍ່ສ້າງ​ກຳລັງ​ຕົນ​ເອງ​ໃຫ້​ນັບ​ມື້​ເຕີບ​ໃຫຍ່​ເຂັ້ມແຂງ​ທາງ​ດ້ານ​ປະລິມານ ແລະ ຄຸນ​ນະ​ພາບ​ແທດເໝາະ​ກັບ​ສະພາບ​ການ​ໄລຍະ​ໃໝ່​ເຊັ່ນ: ໄດ້​ປັບປຸງ​ໝວດ​ຫຸ້ມ​ເກາະ​ທີ່​ຂຶ້ນ​ກັບ​ກອງ​ພົນ​ທີ 1 ຂຶ້ນ​ເປັນ​ກອງຮ້ອຍ​ ເອີ້ນ​ວ່າ: ກອງຮ້ອຍ 616 ແລະ ປັບປຸງ​ສ້າງຕັ້ງ​ໝວດ​ຫຸ້ມ​ເກາະ​ຢູ່​ບັນດາ​ກອງ​ບັນຊາ​ການ​ທະຫານ​ແຂວງ​ຄື: ສ້າງຕັ້ງ​ໝວດ​ຫຸ້ມ​ເກາະ​ແຂວງ​ຫຼວງ​ພະ​ບາງ ແລະ ແຂວງ​ບໍ່​ແກ້ວເຮັດ​ໜ້າທີ່​ເປັນ​ກຳລັງ​ສູ້​ຮົບ​ເພີ່ມ​ທະວີ​ຊ່ວຍ​ໜູນ​ໃຫ້​ແກ່​ກຳລັງ​ຫຼວງ ແລະ ກຳລັງ​ທ້ອງຖິ່ນ​ ທີ່​ເຄື່ອນ​ໄຫວ​ປ້ອງ​ກັນ​ຄວາມ​ສະຫງົບ​ປົກ​ປັກ​ຮັກສາ​ທີ່​ຕັ້ງ​ຍຸດ​ທະ​ສາດ​ບັນດາ​ແຂວງ​ພາກ​ເໜືອ, ອົງ​ການຈັດຕັ້ງ​ບັນຊາ​ເຫຼົ່າ​ຮົບ ​ໄດ້​ມີ​ການ​ປັບປຸງ​ພະແນກການ​ຈຳນວນ​ໜຶ່ງ ແຕ່​ຂັ້ນ​ກົມ​ລົງ​ຮອດ ​ກົມ​ກອງ​ເຫຼົ່າ​ຮົບ​ເຊັ່ນ: ໄດ້​ຂະ ຫຍາຍ​ອົງການ​ບັນຊາ​ດ້ານ​ວິຊາ​ສະເພາະ​ຈາກ 4 ພະ​ແນກ​ເປັນ 5 ພະ​ແນກ​ຄື: ພະ​ແນກ​ຈັດ​ຕັ້ງ​ປະກອບ, ພະ​ແນກ​ອົບຮົມ​ສູ້​ຮົບ, ພະ​ແນກ​ເຕັກນິກ-ວັດຖຸ, ພະ​ແນກ​ສື່ສານ ແລະ ພະ​ແນກ​ຍຸດ​ໂທ. ບັນດາ​ກອງ​ພົນ, ກອງ​ບັນຊາ​ການ​ທະຫານ​ແຂວງ ໄດ້​ຈັດ​ຕັ້ງ​ໃຫ້​ມີ​ພະ​ແນກ​ເຫຼົ່າ​ຮົບ​ລົດ​ຕັງ-ຍານ​ເກາະ ເພື່ອ​ໃຫ້​ແທດເໝາະ​ກັບ​ສະພາບ​ການ, ຊີ້​ນຳ​ບັນຊາ​ກຳລັງ​ວິຊາ​ສະເພາະ​ຂອງ​ເຫຼົ່າ​ຮົບ​ໃນຕໍ່ໜ້າ​ຕາມ​ຄວາມ​ຮຽກຮ້ອງ​ຕ້ອງການ​ໜ້າທີ່​ການເມືອງ​ຂອງ​ກອງທັບ. ນັບ​ແຕ່ ປີ 2000 ເປັນຕົ້ນ​ມາ ເຫຼົ່າ​ຮົບ​ລົດ​ຕັງ-ຍານ​ເກາະ ໄດ້​ຍົກ​ສູງ​ຄຸນ​ນະ​ພາບ​ໃນ​ການ​ປົກ​ປັກ​ຮັກສາ​ພາຫະນະ​ສູ້​ຮົບ ແລະ ປັບປຸງ​ກໍ່ສ້າງ​ກຳລັງໃຫ້​ນັບ​ມື້​ເຕີບ​ໃຫຍ່​ເຂັ້ມແຂງ​ຂຶ້ນ​ເປັນ​ກ້າວໆ​ເຊັ່ນ: ວັນ​ທີ 14 ກໍລະກົດ 2003 ສ້າງຕັ້ງ​ກອງພັນ174, ເດືອນ ກຸມພາ 2005 ສ້າງຕັ້ງ​ໝວດ​ຫຸ້ມ​ເກາະ​ແຂວງ​ຫຼວງ​ພະ​ບາງ, ເດືອນ ຕຸລາ 2010 ສ້າງຕັ້ງ​ໝວດ​ຫຸ້ມ​ເກາະ​ແຂວງ​ບໍ່​ແກ້ວ, ວັນ​ທີ 18 ມີນາ 2015 ສ້າງ​ສູນ​ເຝິກ 620 ແລະ ວັນ​ທີ 28 ຕຸລາ 2016 ປະ ກາດ​ການຍົກ​ລະດັບ​ກອງພັນ 661 ຂຶ້ນ​ເປັນ​ກອງພັນ​ໃຫຍ່ 661. ໂດຍ​ປະຕິບັດ​ຕາມ​ທິດ​ນຳ​ຂອງ​ກະຊວງ​ປ້ອງ​ກັນ​ປະເທດ ວ່າ​ດ້ວຍ​ການ​ເພີ່ມ​ທະວີຍົກ​ສູງ​ຄວາມ​ຮັບ​ຜິດ ຊອບ​ໃນ​ການ​ປົກ​ປັກ​ຮັກສາ​ພາຫະນະ​ອາວຸດ​ຍຸດ​ໂທ​ປະກອນ​ທີ່​ຂັ້ນ​ເທິງ​ປະກອບ​ໃຫ້​ມີ​ປະ​ສິດທິ​ຜົນ ແລະ ສາມາດ​ນຳ​ໃຊ້​ໄດ້​ຍາວ​ນານ, ເພື່ອ​ປະຕິບັດ​ທິດ​ນຳ​ດັ່ງກ່າວ ມາ​ຮອດ​ປີ 2015 ກົມ​ລົດ​ຕັງ-ຍານ​ເກາະ ໄດ້​ນຳ​ເອົາ​ລົດ​ຫຸ້ມ​ເກາະ ທີ່​ເປ່​ເພ ຈຳນວນ 10 ຄັນ ເຂົ້າ​ສ້ອມແປງ-ດັດແປງ​ຍົກ​ສະມັດ​ຕະ​ພາບ​ດ້ານ​ເຕັກນິກ ໃຫ້​ສາມາດ​​ຮັບ​ໃຊ້​ໜ້າທີ່​ສູ້​ຮົບ​ໄດ້​ເປັນ​ປົກກະຕິ ໂດຍ​ສົມທົບ​ກັບ​ບໍ ລິສັດ​ພາຫະນະ​ອາ​ໄຫຼ່​ໃໝ່​ ເປັນ​ຜູ້​ຮັບ​ເໝົາ​ໃນ​ການ​ຕອບ​ສະໜອງ​ເຄື່ອງ​ອາ​ໄຫຼ່ ແລະ ໃຕ້​ການ​ຊີ້​ນຳ​ດ້ານ​ຊ່ຽວຊານ​ຈາກ​ສະຫະພັນ​ຣັດ​ເຊຍ, ສ່ວນ​ກຳລັງ​ນັກ​ສ້ອມແປງ​ແມ່ນ​ຈັດ​ຕັ້ງ​ເອົາ​ຢູ່​ກອງພັນ​ລົດ​ຕັງ-ຍານ​ເກາະ 615 ເປັນ​ກຳລັງ​ສ້ອມແປງ​ຕົ້ນຕໍ, ການ​ສ້ອມແປງ​ພາຫະນະ​ຄັ້ງ​ນີ້ ໄດ້​ສຳເລັດ​ຕາມ​ແຜນການ ສາມາດ​ຍົກ​ສະມັດ​ຕະ​ພາບ​ທາງ​ດ້ານ​ເຕັກນິກ​ຂອງ​ພາຫະນະ​ລົດ​ຫຸ້ມ​ເກາະ​ຈຳນວນ​ດັ່ງກ່າວ​ໃຫ້​ສູງ​ຂຶ້ນ ແລະ ສາມາດ​ເຄື່ອນ​ໄຫວ​ສູ້​ຮົບ​ໄດ້​ເປັນ​ປົກກະຕິ.ໂດຍ​ສືບຕໍ່​ປະຕິບັດ​ຕາມ​ແຜນ​ຍຸດ​ທະ​ສາດ​ການ​ຮ່ວມ​ມື​ທາງ​ດ້ານ​ການ​ທະຫານ ກັບ​ບັນດາ​ປະເທດ​ເພື່ອນ​ມິດ​ໃນ​ໂລກ ມາ​ຮອດ​ປີ 2009 ເຫຼົ່າ​ຮົບ​ລົດ​ຕັງ-ຍານ​ເກາະ ໄດ້​ຮັບ​ການ​ຊ່ວຍເຫຼືອ​ລົດ​ຫຸ້ມ​ເກາະ ZYZ-8002 ຈາກ ​ສປ ຈີນ ຈຳນວນ 41 ຄັນ ເພື່ອ​ປະ ກອບ​ເພີ່ມ​ເຕີມ​ໃຫ້​ບັນດາ​ກົມ​ກອງ​ເຫຼົ່າ​ຮົບ​ໃນ​ຂອບ​ເຂດ​ທົ່ວ​ປະເທດ.ໃນ​ປີ 2017 ໂດຍ​ປະຕິບັດ​ຄຳ​ສັ່ງ​ຂອງ​ລັດຖະມົນຕີ​ກະຊວງ​ປ້ອງ​ກັນ​ປະເທດ ໃຫ້​ເຫຼົ່າ​ຮົບ​ລົດ​ຕັງ-ຍານ​ເກາະ ເປັນ​ຕົວ​ແທນ​ກອງທັບ​ປະຊາຊົນ​ລາວ ເຂົ້າ​ຮ່ວມ​ການ​ແຂ່ງຂັນ​ກິລາ​ການ​ທະຫານ​ນານາຊາດ ທີ່ ສະຫະພັນ​ຣັດ​ເຊຍ ຕາມ​ຄຳ​ເຊີນ​ຂອງ​ກະຊວງ​ປ້ອງ​ກັນ​ປະເທດ​ແຫ່ງ​ສະຫະພັນ​ຣັດ​ເຊຍ ແລະ ເປັນ​ຄັ້ງ​ທຳ​ອິດ​ທີ່​ເຫຼົ່າ​ຮົບ​ລົດ​ຕັງ-ຍານ​ເກາະ​ກອງທັບ​ປະຊາຊົນ​ລາວ​ ເຂົ້າ​ຮ່ວມ​ແຂ່ງຂັນ ເຊິ່ງ​ມີ​ຈຳນວນ​ພົນ 21 ສະຫາຍ, ນຳພາ​ໂດຍ ສະຫາຍ ພັນ​ໂທ ບຸນ​ປອນ ລົມ​ພະຈັນ ຫົວໜ້າ​ພະ​ແນກ​ອົບຮົມ-ສູ້​ຮົບ ກົມ​ລົດ​ຕັງ-ຍານ​ເກາະ, ນັບ​ແຕ່​ນັ້ນ​ມາ ​ໃນ​ແຕ່ລະ ​ປີເຫຼົ່າ​ຮົບ​ລົດ​ຕັງ-ຍານ​ເກາະ ໄດ້​ສືບຕໍ່​ເຂົ້າ​ຮ່ວມ​ການ​ແຂ່ງຂັນ​ດັ່ງ ກ່າວ​ເປັນ​ປົກກະຕິ. ເພື່ອ​ປັບປຸງ​ການ​ປະກອບ​ພາ ຫະນະ​ອາວຸດ-ຍຸດ​ໂທ​ປະກອນ ຕາມ​ທິດ​ນຳ​ປັບປຸງ​ກໍ່ສ້າງ​ກອງ ທັບ ມີແບບແຜນ​ທັນ​ສະໄໝທີ່​ຄະນະ​ນຳ​ກະຊວງ​ປ້ອງ​ກັນ​ປະ ເທດ​ວາງ​ອອກ, ໂດຍ​ໄດ້​ຮັບ​ການ​ຮ່ວມ​ມື​ສະໜັບສະໜູນ​ຈາກ​ກອງ ​​ທັບ​ສະຫະພັນ​ຣັດ​ເຊຍ ເພີ່ມ​ທະວີ​ຮັດ​ແໜ້ນ​ການ​ພົວພັນ​ຊ່ວຍເຫຼືອ​ເຊິ່ງ​ກັນ ແລະ ກັນ ທາງ​ດ້ານ​ພາ ຫະນະ​ອາວຸດ-ຍຸດ​ໂທ​ປະກອນ​ຕ່າງໆ ມາ​ຮອດ​ວັນ​ທີ 22 ທັນວາ 2018 ກອງທັບ​ປະຊາຊົນ​ລາວ​ໄດ້​ສົ່ງ​ມອບ​ຄືນ​ລົດ​ຕັງ T-34 ຢູ່​ກອງ ພັນ 617 ຈຳນວນ 30 ຄັນ​ ໃຫ້​ແກ່​ກອງທັບ​ສະຫະພັນ​ຣັດ​ເຊຍ ຕາມ​ການ​ຕົກລົງ​ຂອງ​ກະຊວງ ​ປ້ອງ​ກັນ​ປະເທດ ​ສປປ ລາວ, ເພື່ອ​ສືບຕໍ່​ປັບປຸງ​ການ​ປະກອບ​ກຳລັງ​ພາຫະນະ​ຂອງ​ເຫຼົ່າ​ຮົບ​ຕາມ​ການ​ຕົກລົງ​ຂອງ​ກົມ​ໃຫຍ່​ເສນາ​ທິ​ການ​ກອງທັບ, ເພື່ອ​ຍົກ​ສູງ​ເພີ່ມ​ທະວີ​ການ​ພົວພັນ​ທາງ​ດ້ານ​ເຕັກນິກ​ການ​ທະຫານ ລະຫວ່າງ​ກອງທັບ ລາວ-ຣັດ​ເຊຍ ໃຫ້​ນັບ​ມື້​ມີ​ຄວາມ​ໜັກ​ແໜ້ນ​ເຂັ້ມແຂງ​ຍິ່ງໆ​ຂຶ້ນ ໃນ​ໂອກາດ​ກະກຽມ​ສະເຫຼີມສະຫຼອງ ວັນ​ສ້າງຕັ້ງ​ກອງທັບ​ປະຊາຊົນ​ລາວ ຄົບຮອບ 70 ປີ, ມາ​ຮອດ​ທ້າຍ​ເດືອນພະຈິກ 2018 ກອງ ທັບ​ສະຫະພັນ​ຣັດເຊຍ​ໄດ້​ຊ່ວຍ ເຫຼືອ​ລົດ​ຕັງ​ໃຫ້ກອງທັບ​ປະຊາຊົນລາວ ເພື່ອ​ເຂົ້າ​ຮ່ວມ​ການ​ສວນສະໜາມ​ຄື: T-721MC ຈຳນວນ 15 ຄັນ ແລະ PM-2MC ຈຳນວນ 10 ຄັນ, ເພື່ອ​ຮັບປະກັນ​ກຳລັງ ແລະ ພາຫະນະ​ເຂົ້າ​ໃນ​ການ​ສວນ ສະໜາມ​ສະເຫຼີມສະຫຼອງ​ວັນ​ສ້າງຕັ້ງ​ກອງທັບ​ປະຊາຊົນ​ລາວ ຄົບຮອບ 70 ປີ, ໃນ​ວັນ​ທີ 19 ທັນວາ 2018 ກົມ​ໃຫຍ່​ເສນາ​ທິ​ການ​ກອງທັບ​ໄດ້​ມີ​ຄຳ​ສັ່ງ​ມອບ​ລົດ​ຕັງ T-721MC ຈຳນວນ 8 ຄັນ ແລະ PM -2MC ຈຳນວນ 7 ຄັນ​ໃຫ້​​ກອງພັນ​ໃຫຍ່​ລົດ​ຕັງ-ຍານ​ເກາະ 661 ເຂົ້າ​ຮ່ວມ​ໃນ​ກ້ອນ​ສວນສະໜາມ​ກຳລັງ​ພາຫະ​ຂອງ​ເຫຼົ່າ​ຮົບ​ ເຊິ່ງ​ເປັນ​ລົດ​ຕັງ-ຫຸ້ມ​ເກາະ​ລຸ້ນ​ໃໝ່ ຂອງ​ກອງທັບ​ປະຊາຊົນ​ລາວ, ໃນ​ໄລຍະ​ທ້າຍ​ເດືອນພະຈິກ 2019 ກອງທັບ​ສະຫະພັນ​ຣັດ​ເຊຍ​ໄດ້​ສືບຕໍ່​ນຳ​ສົ່ງ​ລົດ​ຕັງ-ລົດຫຸ້ມ​ເກາະ​ຊະນິດ​ດັ່ງກ່າວ​ມາ​ໃຫ້​ກອງທັບ​ປະຊາຊົນ​ລາວ​ຕື່ມ​ອີກ, ສັງ​ລວມ​ແລ້ວ​ພາ ຫະນະ​ທີ່​ກອງທັບ​ສະຫະພັນ​ຮັດ​ ເຊຍ​ຊ່ວຍເຫຼືອ​ກອງທັບ​ປະຊາຊົນ​ລາວ ໃນ​ໄລຍະ​ປີ 2018-2019 ມີ​ລົດ​ຕັງ T-721MC ຈຳນວນ 30 ຄັນ ແລະ ລົດ​ຫຸ້ມ​ເກາະ PM-2MC ຈຳນວນ 20 ຄັນ ແລະ ໃນ​ລະຫວ່າງ ວັນ​ທີ 10-19 ທັນວາ 2019 ເຫຼົ່າ​ຮົບ​ລົດ​ຕັງ-ຍານ​ເກາະ​ໄດ້​ຈັດ​ຕັ້ງ​ກຳລັງ​ເຂົ້າ​ຊ້ອມ​ຮົບ​ຮ່ວມ​ກັບ​ກອງທັບ​ສະຫະພັນ​ຣັດ​ເຊຍ ໂດຍ​ມີ​ຊື່​ເອີ້ນ​ວ່າ: ລາ​ໂຣດ 2019 ເຊິ່ງ​ຈັດ​ຂຶ້ນ​ຢູ່​ທີ່​ບ້ານ​ແປນ ເມືອງ​ພູ​ກູດ ແຂວງ​ຊຽງ​ຂວາງ ພາຍ​ໃຕ້​ຫົວຂໍ້: ຄຽງ​ບ່າ​ຄຽງ​ໄຫຼ່​ຕໍ່ສູ້​ເພື່ອ​ສັນຕິພາບ. ການ​ຊ້ອມ​ຮົບ​ຮ່ວມ ລາວ-ຣັດເຊຍ ແລະ ການ​ແຂ່ງຂັນ​ລົດ​ຕັງ​ນານາຊາດ ໄດ້​ຍົກ​ສູງ​ບົດບາດ​ຂອງ​ກອງທັບ​ປະຊາຊົນ​ລາວ​ຂຶ້ນ​ສູ່​ບົນ​ເວທີ​ສາກົນ​ຢ່າງ​ໜ້າ​ສັນລະເສີນ ແລະ ທັງ​ໄດ້​ຮັບ​ການ​ຊຸກຍູ້​ຊ່ວຍເຫຼືອ​ຈາກ​ປະຊາຊົນ​ລາວ​ບັນດາເຜົ່າ ນັບ​ທັງ​ພາກ​ລັດ ແລະ ເອກະ​ຊົນ ເຮັດ​ໃຫ້​ເຫຼົ່າ​ຮົບ​ລົດ​ຕັງ-ຍານ​ເກາະ​ກອງທັບ​ປະຊາຊົນ​ລາວ ມີ​ບົດບາດ​ອັນ​ສຳຄັນ​ໃນ​ພາລະກິດ​ປົກ​ປັກ​ຮັກສາ ແລະ ສ້າງສາ​ປະເທດ​ຊາດ​ໃນ​ໄລຍະ​ໃໝ່. ເພື່ອ​ສືບຕໍ່​ປັບປຸງ​ການ​ປະກອບ​ພາຫະນະ​ເຕັກນິກ ອາວຸດ​ຍຸດ​ໂທ​ປະກອນ ໃຫ້​ແກ່​ບັນດາ​ກົມ​ກອງ​ເຫຼົ່າ​ຮົບ​ໃຫ້​ຮັບປະກັນ​ສູ້​ຮົບ​ປົກ​ປັກ​ຮັກສາ​ປະເທດ​ຊາດ​ໃນ​ສະເພາະ​ໜ້າ ແລະ ຍາວ​ນານ, ວັນ​ທີ 26 ມີນາ 2021 ໄດ້​ປະກອບ​ລົດ​ຕັງ T-54 ຈຳນວນ 20 ຄັນ​ໃຫ້​ກອງພັນ​ລົດ​ຕັງ-ຍານ​ເກາະ 617 ປ່ຽນ​ແທນ​ລົດ T-34 ຈຳນວນ 30 ຄັນ ທີ່​ສົ່ງຄືນ​ໃຫ້​ສະຫະພັນ​ຣັດ​ເຊຍ. ວັນ​ທີ 29 ມິຖຸນາ 2022 ກົມ​ລົດ​ຕັງ-ຍານ​ເກາະ ໄດ້​ມອບ​ລົດ​ຕັງ T-721MC ຈຳນວນ 10 ຄັນ ແລະ ລົດ​ຫຸ້ມ​ເກາະ PM-2MC ຈຳນວນ 3 ຄັນ​ໃຫ້​ແກ່​ກອງພັນ​ໃຫຍ່​ລົດ​ຕັງ-ຍານ​ເກາະ661 ໂດຍ​ ສະຫາຍ ພົນ​ຈັດຕະ ວາ ບົວ​ວັນ ບຸດ​ທະ​ຈັນໂທ ຫົວ ໜ້າ​ກົມ​ລົດ​ຕັງ-ຍານ​ເກາະ​ເປັນ ​ຜູ້​ມອບ. ນັ້ນ​ແມ່ນ​ບາດກ້າວ​ໜຶ່ງ​ໃນ​ການ​ປັບປຸງ​ກໍ່ສ້າງ​ເຫຼົ່າ​ຮົບ​ລົດ​ຕັງ-ຍານ​ເກາະ ໃຫ້​ນັບ​ມື້​ເຕີບ​ໃຫຍ່​ເຂັ້ມແຂງ​ຂຶ້ນ​ຢ່າງ​ບໍ່​ຢຸດຢັ້ງ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ