ວັນພະຫັດ, ວັນທີ 12 ທັນວາ 2024
ເຝິກອົບຮົມ ວິທີນຳໃຊ້ເຮືອກູ້ໄພ
ເວລາອອກຂ່າວ: 2023-06-08 15:26:48 | ຜູ້ຂຽນ : admin2 | ຈຳນວນຄົນເຂົ້າຊົມ: 905 | ຄວາມນິຍົມ: 
ໃນວັນທີ 6 ມິຖຸນາ 2023 ນີ້, ຢູ່ທີ່ສະໜາມຫັດແອບ ກອງພັນຂ້າມຜ່ານ 588 ໄດ້ເປີດເຝິກອົບຮົມວິທີນຳໃຊ້ເຮືອກູ້ໄພ, ໂດຍການເປັນປະທານຂອງສະຫາຍ ພັນເອກ ປາດຖະໜາ ບຸດຕິຈັກ ຮອງຫົວໜ້າຫ້ອງການ ກົມໃຫຍ່ເສນາທິການກອງທັບ, ຫົວໜ້າກອງເສນາທິການ ຄະນະກຳມະການຄຸ້ມຄອງໄພພິບັດ ກະຊວງປ້ອງກັນປະເທດ, ມີຄະນະພັກ-ຄະນະບັນຊາກອງພັນຂ້າມຜ່ານ 588, ພະນັກງານວິຊາການ ພ້ອມດ້ວຍນັກເຝິກອົບຮົມເຂົ້າຮ່ວມ.
ສະຫາຍ ພັນເອກ ປາດຖະໜາ ບຸດຕິຈັກ ໄດ້ກ່າວຈຸດປະສົງຂອງການເຝິກອົບຮົມຄັ້ງນີ້ວ່າ: ອີງຕາມແຜນການຈັດເຝິກອົບຮົມໄລຍະສັ້ນ ການນຳໃຊ້ເຮືອທີ່ໄດ້ຮັບການຊ່ວຍເຫຼືອຈາກລັດຖະບານຍີ່ປຸ່ນ ເພື່ອນຳໃຊ້ເຂົ້າໃນການກອບກູ້ໄພພິບັດ, ອີງຕາມຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການປະກອບເຮືອກູ້ໄພ ແລະ ລໍ້ລາກເຮືອ ທີ່ລັດຖະບານຍີ່ປຸ່ນຊ່ວຍເຫຼືອ ສປປ ລາວ ເພື່ອນຳໃຊ້ລາກແກ່ເຮືອກູ້ໄພໃນວຽກງານກຽມພ້ອມ ແລະ ຕອບໂຕ້ໄພພິບັດສຸກເສີນ, ສະນັ້ນ, ຈຶ່ງໄດ້ເປີດເຝິກອົບຮົມຄັ້ງນີ້ຂຶ້ນ ໂດຍມີນັກເຝິກອົບຮົມເຂົ້າຮ່ວມ 22 ສະຫາຍ ແລະ ມີຄູເຝິກຈາກບໍລິສັດ TOYOTA Tsusho ຕົວແທນປະຈຳ ສປປ ລາວ ເຂົ້າມາຊ່ວຍເຝິກອົບຮົມ, ໃນນີ້, ສຳມະນາກອນຈະໄດ້ຮັບການເຝິກອົບຮົມພາກທິດສະດີການນຳໃຊ້ ແລະ ການປົກປັກຮັກສາເຮືອ, ຈັກເຮືອ ແລະ ລໍ້ລາກເຮືອ, ການຕິດຕັ້ງຈັກໃສ່ເຮືອ, ບັນຈຸເຮືອໃສ່ລໍ້ລາກເຮືອ ແລະ ການລາກແກ່ລໍ້ລາກເຮືອ, ການບົວລະບັດສ້ອມແປງຈັກເຮືອ, ລຳເຮືອ ແລະ ລໍ້ລາກເຮືອ, ທິດສະດີຫຼັກການໃນການຂັບຂີ່ເຮືອໃນແມ່ນ້ຳ, ອ່າງນ້ຳ ແລະ ບ່ອນນ້ຳຍຶ່ງຖ້ວມໃນແຕ່ລະເງື່ອນໄຂຂອງພູມີປະເທດ ແລະ ການຂັບຂີ່ເຮືອໃນແມ່ນ້ຳຕົວຈິງ. ພາຍຫຼັງສຳເລັດຊຸດອົບຮົມຄັ້ງນີ້, ເປົ້າໝາຍຕໍ່ໄປແມ່ນຈະໄດ້ນຳເອົາບັນດານັກເຝິກອົບຮົມທີ່ສຳເລັດການອົບຮົມຄັ້ງນີ້ ໄປເປັນອາຈານສອນຢູ່ບັນດາແຂວງພາກເໜືອ, ພາກກາງ ແລະ ພາກໃຕ້ຂອງລາວ, ທັງນີ້, ກໍເພື່ອກະກຽມຄວາມພ້ອມ ແລະ ຕອບໂຕ້ ໄພພິບັດທີ່ອາດຈະເກີດຂຶ້ນໃນຕໍ່ໜ້ານີ້.
ໂດຍ: ສົມຄິດ ພູມມີຈິດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
