ວັນສຸກ, ວັນທີ 06 ທັນວາ 2024
ຮອງຫົວໜ້າກົມໃຫຍ່ເສນາທິການ ພົບປະໂອ້ລົມພະນັກງານຫຼັກແຫຼ່ງຫ້ອງການເມືອງ
ເວລາອອກຂ່າວ: 2023-06-09 10:59:14 | ຜູ້ຂຽນ : admin2 | ຈຳນວນຄົນເຂົ້າຊົມ: 816 | ຄວາມນິຍົມ: 
ວັນທີ 8 ມິຖຸນາ 2023 ນີ້, ສະຫາຍ ພົນຕີ ພັນແສງ ບຸນພັນ ກໍາມະການຄະນະພັກ ກະຊວງປ້ອງກັນປະເທດ, ຮອງຫົວໜ້າກົມໃຫຍ່ເສນາທິການກອງທັບ ໄດ້ເຄື່ອນໄຫວພົບປະໂອ້ລົມພະນັກງານຫຼັກແຫຼ່ງ ຫ້ອງການເມືອງ ກົມໃຫຍ່ເສນາທິການກອງທັບ, ມີສະຫາຍ ພົນຈັດຕະວາ ກອງແກ້ວ ວໍລະຈິດ ຄະນະພັກກົມໃຫຍ່ ຫົວໜ້າຫ້ອງການເມືອງ ກົມໃຫຍ່ເສນາທິການກອງທັບ ພ້ອມຄະນະ, ຕະຫຼອດຮອດພະນັກງານຫຼັກແຫຼ່ງພາຍໃນຫ້ອງ ເຂົ້າຮ່ວມ.
ສະຫາຍ ພັນໂທ ພິມ ວິຈິດວົງສາ ຮອງຫົວໜ້າຫ້ອງການເມືອງ ກົມໃຫຍ່ເສນາທິການ ໄດ້ລາຍງານສະພາບໂດຍຫຍໍ້ໃນການຈັດຕັ້ງເຄື່ອນໄຫວຕາມພາລະ, ບົດບາດ, ສິດ ແລະ ໜ້າທີ່ຄວາມຮັບຜິດຊອບຂອງຫ້ອງການເມືອງ ໃນຖານະເປັນເສນາທິການ ທາງດ້ານວຽກງານພັກ-ວຽກງານການເມືອງໃຫ້ຄະນະນໍາກົມໃຫຍ່ເສນາທິການກອງທັບ ໃນການຄົ້ນຄວ້າເຊື່ອມຊຶມເຜີຍແຜ່ແນວທາງນະໂຍບາຍ, ມະຕິຄໍາສັ່ງ, ຂໍ້ກໍານົດກົດລະບຽບຂອງພັກ, ກົດໝາຍຂອງລັດ-ຂອງກອງທັບ ມູນເຊຶ້ອ ແລະ ເອກະສານສໍາຄັນຕ່າງໆ ຂອງຂັ້ນເທິງ, ສ້າງແຜນຍຸດທະສາດປັບປຸງກໍ່ສ້າງພັກ-ພະນັກງານ ແລະ ອົງການຈັດຕັ້ງມະຫາຊົນຂອງພັກ ໃຫ້ປອດໃສ ເຂັ້ມແຂງ ໜັກແໜ້ນ, ໂຄສະນາສຶກສາອົບຮົມການເມືອງ-ນໍາພາແນວຄິດ, ວຽກງານສື່ມວນຊົນ, ສິລະປະ-ວັນນະຄະດີ, ກິລາກາຍະກໍາ ແລະ ຂະບວນການດ້ານຕ່າງໆ, ຄົ້ນຄວ້າ ແລະ ນໍາສະເໜີປັບປຸງການຈັດຕັ້ງຮາກຖານພັກ, ຄຸ້ມຄອງ, ປ້ອງກັນພັກ, ຂະຫຍາຍພັກປັບປຸງກໍ່ສ້າງພະນັກງານ, ອົງການຈັດຕັ້ງມະຫາຊົນ, ຈັດຕັ້ງປະຕິບັດຍະໂຍບາຍ-ປະກັນສັງຄົມ ທົ່ວກົມໃຫຍ່ເສນາທິການກອງທັບ ຕະຫຼອດໄລຍະຜ່ານມາມີຜົນສໍາເລັດຫຼາຍດ້ານ.
ຈາກນັ້ນ ສະຫາຍ ພົນຕີ ພັນແສງ ບຸນພັນ ໄດ້ສະແດງຄວາມຢື້ຢາມຖາມຂ່າວ ແລະ ສະແດງຄວາມຍ້ອງຍໍຊົມເຊີຍຕໍ່ຜົນງານດ້ານຕ່າງໆ ທີ່ຄະນະຫ້ອງ ຕະຫຼອດຮອດພະນັກງານ-ສະມາຊິກພັກ-ນັກຮົບ ທົ່ວຫ້ອງການເມືອງ ຍາດມາໄດ້ໄລຍະຜ່ານມາເຊິ່ງບັນດາວຽກງານທີ່ຈັດຕັ້ງປະຕິບັດ ແມ່ນບັນລຸໜາກຜົນຕາມລະດັບຄາດໝາຍ, ມີຫຼາຍດ້ານມີລັກສະນະພົ້ນເດັ່ນເປັນຕົ້ນແມ່ນວຽກງານພັກ-ວຽກງານການເມືອງ ທົ່ວກົມໃຫຍ່ເສນາທິການ ແລະ ວຽກງານດ້ານຕ່າງໆ ທີ່ປິ່ນອ້ອມ 4 ໜ້າທີ່ໃຫຍ່ 26 ແຜນງານຂອງຄະນະພັກກະຊວງປ້ອງກັນປະເທດວາງອອກ. ພ້ອມນີ້ ຍັງໄດ້ກ່າວເຖິງສະພາບການຂອງໂລກທີ່ພວມຜັນແປໄປຢ່າງສັບສົນ ໂດຍສະເພາະການຂັດແຍ່ງກັນລະຫວ່າງ 2 ຂົ້ວມະຫາອຳນາດ, ບັນຫາດັ່ງກ່າວສະແດງໃຫ້ເຫັນແຈ້ງເຖິງທາດແທ້ຂອງສົງຄາມ, ສະພາບການດັ່ງກ່າວໄດ້ເຮັດໃຫ້ທົ່ວໂລກແຂ່ງຂັນກັນສະສົມອາວຸດ ເພື່ອປ້ອງກັນປະເທດ, ຍາດແຍ່ງຄູ່ຮ່ວມຍຸດທະສາດ, ຄຽງຄູ່ກັບການແຂ່ງຂັນທາງດ້ານເສດຖະກິດໄປພ້ອມໆກັນ, ເຊິ່ງໄດ້ເຮັດໃຫ້ທົ່ວໂລກພົບຄວາມຫຍຸ້ງຍາກດ້ານເສດຖະກິດ, ບັນຫາໄພເງິນເຟີ້ ແລະ ອື່ນໆ. ກໍຄືກຸ່ມປະເທດອາຊຽນ. ລວມເຖິງປະເທດ ສປປ ລາວ ຂອງ ພວກເຮົາ ຕໍ່ບັນຫາດັ່ງກ່າວຕາງ ໜ້າໃຫ້ກະຊວງປ້ອງກັນປະເທດ ກໍຄືຄະນະນໍາກົມໃຫຍ່ເສນາທິການກອງທັບ ຈິ່ງໄດ້ລົງເຄື່ອນໄຫວພົບປະໂອ້ລົມພະນັກງານຫຼັກແຫຼ່ງພາຍໃນຫ້ອງການເມືອງ ເພື່ອໃຫ້ເຂົ້າໃຈແຈ້ງເຖິງບັນຫາ, ເປັນກໍາລັງຫຼັກແຫຼ່ງເພື່ອກຽມເຮັດໜ້າທີ່, ຕອບຕ້ານທຸກກົນອຸບາຍຂອງກຸ່ມຄົນບໍ່ດີທີ່ຍັງບໍ່ລົດລະຫວັງມ້າງເພທໍາລາຍລະບອບໃໝ່, ຮຽກຮ້ອງໃຫ້ຄະນະນໍາຫ້ອງການເມືອງ ພະນັກງານຫຼັກແຫຼ່ງທຸກສະຫາຍ ຕ້ອງກໍາແໜ້ນບັນດາແນວທາງນະໂຍບາຍ, ມະຕິຄໍາສັ່ງ, ຂໍ້ກໍານົດກົດລະບຽບຂອງພັກ, ກົດໝາຍຂອງລັດ-ຂອງກອງທັບ, ເອົາວຽກງານສຶກສາອົບຮົມການເມືອງ-ນຳພາແນວຄິດເປັນບັນຫາສໍາຄັນ, ເປັນເສນາທິການໃຫ້ທາງດ້ານວຽກງານພັກ-ວຽກງານການເມືອງໃຫ້ຄະນະນໍາກົມໃຫຍ່ເສນາທິການກອງທັບ ໃນການນໍາເອົາບັນດາມະຕິ, ແນວທາງແຜນນະໂຍບາຍຂອງພັກ ລົງສູ່ຮາກຖານກົມກອງ, ຫັນເປັນມະຕິລະອຽດຈັດຕັ້ງເຄື່ອນໄຫວເປັນຮູບປະທໍາ, ໄປຄຽງຄູ່ກັບການກໍ່ສ້າງພັກ-ພະນັກງານຮຸ່ນສືບທອດ ຢູ່ບັນດາອົງການ-ກົມກອງ ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດດີ, ມີຄວາມຮູ້ຄວາມສາມາດ, ມີແບບແຜນວີທີເຮັດວຽກທີ່ມີຫຼັກການວິທະຍາສາດ, ກຳແໜ້ນແນວທາງຂອງພັກ, ນະໂຍບາຍຂອງລັດ, ຂໍ້ກໍານົດກົດລະບຽບຂອງກອງທັບ, ມີຄວາມເປັນເອກະພາບພາຍໃນ, ມີຄວາມສາມັກຄີເປັນປຶກແຜ່ນແໜ້ນໜາ, ມີຄວາມຮັບຜິດຊອບສູງຕໍ່ໜ້າທີ່ວຽກງານທີ່ຂັ້ນເທິງມອບໜາຍໃຫ້, ຖືເອົາມະຫາຊົນເປັນກຳລັງແຮງສັງລວມຂອງອົງການ-ກົມກອງ, ເດັດດ່ຽວໜຽວແໜ້ນ, ເຊື່ອໜັ້ນຕໍ່ການນຳພາຂອງພັກ, ຍອມເສຍສະຫຼະຜົນປະໂຫຍດສ່ວນຕົວເພື່ອສ່ວນລວມ, ມີແບບແຜນດໍາລົງຊີວິດທີ່ປອດໃສຂາວສະອາດ, ບຸກບືນຜ່ານຜ່າອຸປະສັກ, ຊອກຄົ້ນຄວ້າຮ່ຳຮຽນເພື່ອພັດທະນາຕົນເອງ ແລະ ສ້າງບັນດາ-ອົງການ ກົມກອງ ທົ່ວກົມໃຫຍ່ເສນາທິການ ກໍຄືຫ້ອງການເມືອງ ໃຫ້ມີຄວາມໜັກແໜ້ນທາງດ້ານການເມືອງແນວຄິດ, ເຂັ້ມແຂງທາງດ້ານການຈັດຕັ້ງ, ມີແບບແຜນທີ່ທັນສະໄໝຂຶ້ນເປັນກ້າວໆ.
ໂດຍ: ເກດຕະວັນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
