ກອງທັບປະຊາຊົນລາວ
 
ວັນຈັນ, ວັນທີ 22 ກໍລະກົດ 2024

  

ຖື​ເອົາ​ວຽກ​ງານ​ການເມືອງ-ແນວ​ຄິດ ເປັນ​ສະໜາມຮົບ​ແຖວ​ໜ້າ
ເວລາອອກຂ່າວ: 2023-09-28 14:47:41 | ຜູ້ຂຽນ : admin1 | ຈຳນວນຄົນເຂົ້າຊົມ: 163 | ຄວາມນິຍົມ:



ສະຫາຍ ພົນ​ຈັດຕະວາ ຂັນ​ທອງ ວົງ​ອຳ​ຄາ ເລຂາ​ຄະນະ​ພັກ, ຫົວໜ້າ​ການເມືອງ ກອງ​ບັນຊາ​ການ​ທະຫານ​ແຂວງ​ຊຽງ​ຂວາງ ໃຫ້​ຮູ້​ວ່າ: ວຽກ​ງານ​ການ ເມືອງ-ແນວ​ຄິດ ເປັນ​ສະໜາມຮົບ​ແຖວ​ໜ້າ, ມີ​ພາລະ​ບົດບາດ​ອັນ​ສຳຄັນ​ໃນ​ການ​ເຮັດ​ໃຫ້​ສະພາບ​ແນວ​ຄິດ​ຂອງ​ພະນັກງານ-ນັກຮົບ​ໃນ​ກົມ​ກອງ​ມີ​ຄວາມ​ສະ ຫງົບ; ດັ່ງ​ຄຳ​ເຫັນ​ຂອງ ສະຫາຍ ທອງ​ລຸນ ສີ​ສຸ​ລິດ ເລຂາທິການ​ໃຫຍ່​ພັກ​ປະຊາຊົນ​ປະຕິວັດ​ລາວ, ປະທານ​ປະເທດ ແຫ່ງ ​ສປ​ປ ລາວ ໄດ້​ກ່າວ​ຕໍ່​ກອງ​ປະຊຸມ​ວຽກ​ງານ​ການເມືອງ-ແນວ​ຄິດ ທົ່ວ​ປະເທດ​ ຄັ້ງ​ທີ IV ວ່າ​ດ້ວຍ​ການ​ຍົກ​ສູງຄຸນ​ນະ​ພາບວຽກ​ງານ​ການເມືອງ-ແນວ​ຄິດ​ໃນ​ໄລຍະ​ໃໝ່​ເຂົ້າ​ໃນ​ຊີວິດ​ສັງຄົມ​ຕົວ​ຈິງ, ໃນ​ການ​ຕີ​ລາຄາ​ສະພາບ​ແນວ​ຄິດ​ຂອງ​ພະນັກງານ, ທະຫານ-ຕຳຫຼວດ ແລະ ຊັ້ນ​ຄົນ​ຕ່າງໆ ໄປ​ຄຽງ​ຄູ່​ກັບ​ວຽກ​ງານ​ກໍ່ສ້າງ​ຮາກ​ຖານ​ການເມືອງ​ພັດທະນາ​ຊົນນະບົດ​ຮອບດ້ານ​ຕາມ 4 ເນື້ອ​ໃນ 4 ຄາດໝາຍ ຕິດ​ພັນ​ກັບ​ວຽກ​ງານ 3 ສ້າງ​ຂອງ​ພັກ. ທັງ​ນີ້​ ​ເພື່ອ​ແນໃສ່​ເຮັດ​ໃຫ້​ຄະນະ​ພັກ​ທຸກ​ຂັ້ນ, ພະນັກງານ​ຫຼັກ​ແຫຼ່ງ​ໃນ​ທົ່ວ​ກຳລັງ​ປະກອບ​ອາວຸດ ​ນັບ​ແຕ່​ຂັ້ນ​ສູນ​ກາງ​ລົງ​ຮອດ​ທ້ອງຖິ່ນ​ໄດ້​ຮັບ​ຮູ້​ເຂົ້າໃຈ, ເຊື່ອມ​ຊຶມ​ກຳ​ແໜ້ນ​ເນື້ອ​ໃນ​ກອງ​ປະຊຸມ​ວຽກ​ງານ​ການເມືອງ-ແນວ​ຄິດ​ທົ່ວ​ປະເທດ ​ຄັ້ງ​ທີ IV ຢ່າງ​ກວ້າງຂວາງ, ທົ່ວ​ເຖິງ ແລະ ເລິກເຊິ່ງ, ເຮັດ​ໃຫ້​ຄະນະ​ພັກ​ແຕ່​ລະ​ຂັ້ນ​ທົ່ວ​ກອງ​ບັນຊາ​ການ​ທະຫານ​ແຂວງ​ຊຽງ​ຂວາງ​ໄດ້​ເປັນ​ເຈົ້າ​ການ​ຍົກ​ສູງ​ຄວາມ​ຮັບຜິດຊອບ​ທາງ​ດ້ານ​ການເມືອງ ໃນ​ການຈັດຕັ້ງ​ປະຕິບັດ​ມະຕິ​ດັ່ງກ່າວໃຫ້​ປະກົດ​ຜົນ​ເປັນ​ຈິງ ທັງ​ເປັນ​ບ່ອນ​ອີງ​ໃຫ້​ຄະນະ​ພັກ​ກອງ​ບັນຊາ​ການ​ທະຫານ​ແຂວງ, ຄະນະ​ພັກ​ຮາກ​ຖານ​ຂັ້ນ​ຫ້ອງ, ກອງ​ບັນຊາ​ການ​ທະຫານ​ເມືອງ, ກອງພັນ ແລະ ເລຂາ​ໜ່ວຍ​ພັກ​ໃນ​ທົ່ວ​ກອງ​ບັນຊາ​ການ​ທະຫານ​ແຂວງ​ຊຽງ​ຂວາງໃນ​ການ​ຜັນ​ຂະຫຍາຍ​ມະຕິ​ດັ່ງກ່າວ​ໃຫ້​ເປັນ​ແຜນ​ງານ, ໂຄງການ​ອັນ​ລະອຽດ ໂດຍ​ຕິດ​ພັນ​ກັບ​ວຽກ​ງານ​ຕົວ​ຈິງ​ຂອງ​ຂະແໜງການ ແລະ ທ້ອງຖິ່ນ​ຕົນ, ບົນ​ຈິດໃຈ​ຍູ້​ແຮງ​ເສີມ​ຂະຫຍາຍ​ໃນ​ການຈັດຕັ້ງ​ຜັນ​ຂະຫຍາຍ​ເຂົ້າ​ສູ່​ວຽກ​ງານ​ຕົວ​ຈິງ ໃຫ້​ເປັນ​ຂະ​ບວນ​ຟົດຟື້ນ, ກວ້າງຂວາງ ແລະ ແຂງແຮງ, ສ້າງ​ການ​ຫັນປ່ຽນ​ທາງ​ດ້ານ​ຄວາມ​ຮູ້, ທັດສະ​ນະ​ແນວ​ຄິດ ແລະ ການ​ກະທຳ ແນໃສ່​ສົ່ງເສີມ​ດ້ານ​ດີ, ແກ້​ໄຂ​ຂໍ້​ບົກ​ຜ່ອງ, ຂໍ້ຄົງຄ້າງ ແລະ ສິ່ງ​ທ້າ​ທາຍ​ຕ່າງໆ ໃນ​ໄລຍະ​ຜ່ານ​ມາ​ໃຫ້​ຂາດ​ຕົວ, ສ້າງ​ຄວາມ​ເຊື່ອ​ໝັ້ນ​ຂອງ​ສະມາຊິກ​ພັກ, ພະນັກງານຕໍ່​ການ​ຊີ້​ນຳ-ນຳພາ​ຂອງ​ພັກ ແລະ ການ​ບໍລິຫານ​ຄຸ້ມ​ຄອງ​ຂອງ​ລັດ​ແບບ​ໂປ່ງ​ໃສ. ສະຫາຍ ພົນ​ຈັດຕະວາ ຂັນ​ທອງ ວົງ​ອຳ​ຄາ ຍັງ​ໃຫ້​ຮູ້​ຕື່ມ​ອີ​ກວ່າ: ສະນັ້ນ, ​ວຽກ​ງານ​ການເມືອງ-ແນວ​ຄິດ ຈຶ່ງ​ເປັນ​ປັດໃຈ​ພື້ນຖານ​ສຳຄັນ​ໃນ​ການ​ຕັດ​ສີນ​ຊີ້​ຂາດ​ທຸກ​ໄຊຊະນະ; ເຮັດ​ວຽກ​ງານ​ການເມືອງ-ແນວ​ຄິດ ໄດ້​ດີ ກົມ​ກອງ​ມີ​ຄວາມ​ສະຫງົບ, ພະນັກງານ-ນັກຮົບ ກໍມີ​ຄວາມ​ເຊື່ອ​ໝັ້ນ​ຕໍ່​ການ​ນຳພາ ຢາກ​ເຮັດ​ວຽກ​ງານ​ການເມືອງ-ແນວ​ຄິດ ໄດ້​ດີ ​ຕ້ອງ​ຖື​ເອົາ​ການ​ສືກ​ສາ​ອົບຮົມ​ການເມືອງ-ນຳພາ​ແນວ​ຄິດ​ເປັນ​ກົກ, ເອົາ​ການ​ສ່ອງ​ແສງ​ລາຍ​ງານ​ເປັນ​ສຳຄັນ, ມີ​ການ​ສຳ​ຫຼວດ​ກວດກາ, ຕິ​ຊົມ, ກໍ່ສ້າງ​ຊ່ວຍເຫຼືອ​ເຊ່ິງ​ກັນ ແລະ ກັນ, ສຽງ​ສ່ວນ​ໜ້ອຍ​ປະຕິບັດ​ຕາມ​ສຽງ​ສ່ວນ​ຫຼາຍ, ບຸກຄົນ​ຂຶ້ນ​ນຳ​ການຈັດຕັ້ງ, ຕ້ານ​ແນວ​ຄິດ​ພັກ​ພວກ, ຈຸ້ມ​ເຈື້ອ​ຫຼາຍ​ເຄົ້າ ເພື່ອ​ຕີ​ຖ້ອຍ​ປະກົດ​ການ​ຫຍໍ້ທໍ້​ໃນ​ກົມ​ກອງ​ໃຫ້​ຂາດ​ຕົວ ແລະ ເປັນ​ການ​ຕີ​ຖອຍ​ແນວ​ຄິດ​ຜິດ​ເຂວ​ໃຫ້​ໝົດ​ໄປ ສຸດ​ທ້າຍ​ແນວ​ຄິດ​ທີ່​ຖືກຕ້ອງ, ການ​ກະທຳ​ທີ່​ຖືກຕ້ອງ ກໍສາມາດ​ເອົາ​ຊະນະ​ແນວ​ຄິດ​ທີ່​ບໍ່​ຖືກຕ້ອງ, ຜິດພາດ, ເດັດດ່ຽວບໍ່​ປ່ອຍ​ໃຫ້​ຄວາມ​ຄິດ, ການ​ກະທຳ​ທີ່​ຜິດ​ກືນ​ກິນ​ເນື້ອທີ່ ແລະ ຄອບ​ງວໍາ​ມັນສະໝອງ ຫຼື ແນວ​ຄວາມ​ຄິດ​ຂອງ​ພະນັກງານ-ສະມາຊິກ​ພັກ ແລະ ນັກຮົບ​ໄດ້​ເປັນອັນຂາດ. ພ້ອມ​ນັ້ນ​, ​ຕ້ອງ​ກຳຈັດ​ປັດ​ເປົ່າ​ແນວ​ຄິດ ແລະ ການ​ກະທຳ​ທີ່​ຜິດພາດອອກ​ຈາກ​ພັກ​ໃຫ້​ຂາດ​ຕົວ ແລະ ວາງ​ແນວທາງ​ທີ່​ຖືກຕ້ອງ, ຊັດ​ເຈນ, ເດັດດ່ຽວ, ເຄັ່ງ​ຄັດໃນ​ການຈັດຕັ້ງ​ປະຕິບັດ​ທີ່​ຖືກຕ້ອງ​ເປັນ​ບູ​ລິ​ມະ​ສິດ​ທີ່​ສາມາດ​ຈັບ​ຕ້ອງ​ໄດ້ ສາມາດ​ເອົາ​ຊະນະ​ທຸກ​ປະກົດ​ການ​ທີ່​ຫຍຸ້ງຍາກ​ສັບສົນ​ໄດ້ ແລະ ເປັນ​ຮູບ​ປະ​ທຳ​ຕົວ​ ຈິງ, ເວົ້າ​ແລ້ວ​ຕ້ອງ​ເຮັດ​ໃຫ້​ເປັນ​ຮູບ​ປະ​ທຳ, ເຮັດ​ແລ້ວ​ຕ້ອງ​ໃຫ້​ເກີດ​ດອກ​ອອກ​ຜົນ​ແທ້ ແລະ ຕ້ອງ​ແກ້​ການ​ສໍ້​ລາດ​ບາງ​ຫຼວງ, ແກ້ຄວາມ​ດຸນ​ດ່ຽງ​ໃນ​ການ​ພັດທະ ນາ, ແກ້ຄວາມ​ຫຼຸດ​ໂຕນ​ທາງ​ສັງຄົມ ຫຼື ເວົ້າ​ຢ່າງ​ໜຶ່ງ​ແມ່ນ​ການ​ຈຳກັດ​ຮັດ​ແຄບ​ຄວາມ​ແຕກ​ໂຕນ​ກັນ, ແກ້​ການ​ຂາດ​ປະສິດທິພາບ​ຂອງ​ກົງຈັກ, ແກ້​ບັນຫາ​ກົນ​ໄກ​ຂອງ​ກົງຈັກ ແຕ່​ເທິງ​ລົງ​ລຸ່ມ​ ເພື່ອ​ບໍ່​ໃຫ້​ເປັນ​ກົງຈັກ ແລະ ກົນ​ໄກທີ່ອາຍາ​ສິດ, ແຂງ​ກະດ້າງ, ຂາດ​ປະຊາທິປະໄຕ, ກົນ​ໄກ​ທີ່​ມີ​ຊ່ອງ​ຫວ່າງ​ມີ​ການ​ກວດກາ​ຍາກ, ສວຍ​ໃຊ້​ໜ້າທີ່​ເຮັດ​ຜິດ​ໄດ້​ງ່າຍ, ແກ້​ພະຍາດ​ອາຍາ​ສິດ, ຫ່າງ​ເຫີນ​ມະຫາຊົນ, ຂາດ​ນ້ຳໃຈ​ຮັບ​ໃຊ້​ປະຊາຊົນ, ແນວ​ຄິດ​ຄອງ​ເດີມ, ບໍ່​ຢາກ​ປ່ຽນແປງ, ມັກງ່າຍ. ສະນັ້ນ, ວຽກ​ງານ​ການເມືອງ-ແນວ​ຄິດ​ຂອງ​ພັກ​​ຈິ່ງ​ເປັນ​ອາວຸດ​ເພື່ອ​ຕໍ່ສູ້​ລະຫວ່າງຈິນຕະນາ ການ​ໃໝ່ ກັບຈິນຕະນາການ​ເກົ່າ ແນວ​ຄິດ​ທີ່​ຖື​ເອົາ​ຜົນ​ປະໂຫຍດ​ຂອງ​ຊາດ, ຂອງ​ປະຊາຊົນເປັນ​ຫຼັກ, ເດັດຂາດ​ຕ້ານ​ກັບ​ແນວ​ຄິດ​ເຫັນແກ່​ຜົນ​ປະໂຫຍດ​ສ່ວນ​ຕົວ, ຈຸ້ມ​ເຈື້ອ​ພັກ​ພວກ​ເປັນ​ໃຫຍ່, ສວຍໂອກາດ​ສໍ້​ລາດ​ບັງ​ຫຼວງ ແລະ ອື່ນໆ ໃຫ້ເດັດຂາດ. ພ້ອມ​ນັ້ນ​, ກໍເລືອກເຟັ້ນເອົາ​ພະນັກງານ​ທີ່​ມີ​ຄວາມ​ຮູ້, ຄວາມ​ສາມາດ ເປັນ​ນັກ​ປາຖະກະຖາ ໃຫ້​ຫຼາຍມີ​ປະ​ສິດທິ​ຜົນ, ເອົາໃຈໃສ່​ໃນ​ການ​ຄົ້ນຄວ້າ​ວິທະຍາສາດ ທີ່​ທັນ​ສະໄໝ ແລະ ສ້າງ​ພະນັກງານ​ນຳພາ​ຄຸ້ມ​ຄອງ​ໄປ​ນຳ​ຍົກ​ລະດັບ​ຄວາມ​ສາມາດ​ໃຫ້​ພະນັກງານ​ສື່​ມວນ​ຊົນໃຫ້​ດີ​ກວ່າ​ເກົ່າ ຫັນ​ເອົາ​ວຽກ​ນີ້​ ເປັນ​ກະບອກ​ສຽງ ​ໃນ​ການ​ໂຄສະນາ​ໃຫ້​ທຸກ​ຂະແໜງການ ເຂົ້າ​ໃນ​ວຽກ​ງານ​ຕົວ​ຈິງ​ຢ່າງ​ມີ​ຈຸດ​ສຸມ; ສ້າງ​ຄວາມ​ເຊື່ອ​ໝັ້ນ​ໃຫ້​ມະຫາຊົນ​ດ້ວຍ​ການ​ນຳພາ, ມີ​ແບບແຜນ​ວິທີ​ເຮັດ​ວຽກ​ທີ່​ມີ​ລັກ​ສະ​ນະ​ວິທະຍາສາດ ລວມ​ທັງ​ພະນັກງານປະຕິວັດ​ອາວຸໂສ​ບຳນານ ກໍຕ້ອງ​ມີ​ການ​ພົບ​ປະ​ໂອ້​ລົມ​ຢ້ຽມຢາມ​ຖາມ​ຂ່າວ, ຕອບ​ບຸນ​ແທນ​ຄຸນ ເພື່ອ​ເຮັດ​ໃຫ້​ພວກ​ເພິ່ນ​ເຫຼົ່າ​ນັ້ນ​ຍັງ​ມີ​ຄວາມ​ຜູກ​ພັນ​ຮັດ​ແໜ້ນ​ກັບ​ກົມ​ກອງ ແລະ ຂົງເຂດ​ວຽກ​ງານ​ອື່ນໆ ​ໃນ​ກົມ​ກອງ​ກໍ​ໃຫ້​ເດີນ​ແມ່ນ​ແລ່ນ​ສະດວກ​ດີ​ຂຶ້ນ​ເປັນ​ກ້າວໆ. ໂດຍ: ວັນ​ໄຊ ໄຊ​ສະ​ຫວັດ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ