ກອງທັບປະຊາຊົນລາວ
 
ວັນອັງຄານ, ວັນທີ 05 ມີນາ 2024

  

ການ​ປະຕິບັດ​ແຜນ​ງົບປະມານ​ແຫ່ງ​ລັດ ປີ 2023 ມີ​ຜົນສຳເລັດ​ຫຼາຍ​ດ້ານ
ເວລາອອກຂ່າວ: 2023-12-25 09:01:45 | ຜູ້ຂຽນ : admin3 | ຈຳນວນຄົນເຂົ້າຊົມ: 148 | ຄວາມນິຍົມ:



ການຈັດຕັ້ງ​ປະຕິບັດ​ແຜນ​ງົບປະມານ​ແຫ່ງ​ລັດ ປີ 2023 ໄດ້​ສຸມ​ໃສ່​ບັນດາ​ມາດ​ຕະການ ຕາມ​ ມະຕິ ສະພາ​ແຫ່ງ​ຊາດ ວ່າ​ດ້ວຍ ​ການ​ຮັບຮອງ​ແຜນ​ງົບປະມານ ​ແຫ່ງ​ລັດ ປີ 2023, ດຳລັດ, ຄຳ ​ແນະນຳ ໄປ​ພ້ອມກັບ​ການຜັນ​ຂະ ຫຍາຍ2 ແຜນ​ວຽກ​ຈຸດ​ສຸມຂອງ​ ຂະແໜງການເງິນ ທີ່​ກຳນົດໃນ​ ວາລະ​ແຫ່ງ​ຊາດ ເຊິ່ງ​ສາມາດ​ ຍາດ​ໄດ້​ຜົນສຳເລັດ​ຫຼາຍ​ດ້ານ ເປັນຕົ້ນ ດ້ານ​ລາຍ​ຮັບ ສຳເລັດ​ ການ​ທົດ​ລອງ​ມອບ​ຫົວໜ່ວຍ ​ວິ​ສາ​ຫະ​ກິດ ທີ່​ສູນ​ກາງ​ຄຸ້ມຄອງ 101 ຫົວໜ່ວຍ ໃຫ້ 9 ແຂວງມູນ​ ຄ່າ 2.420 ຕື້​ກີບ. ໃນ​ນີ້, 5 ແຂວງ ເກີນດຸນ63 ຫົວໜ່ວຍ ຈຳນວນ 1.848 ຕື້​ກີບ ແລະ 4 ແຂວງ ເພື່ອກ້າວໄປ​ເປັນ​ແຂວງກຸ້ມ​ຕົນ ​ເອງ​ໃນຕໍ່ໜ້າ. ຜ່ານ​ການຈັດ ຕັ້ງ​ປະຕິບັດ ສາມາດ​ເກັບ​ລາຍ​ຮັບ​ໄດ້​ທັງ​ໝົດ 3.448 ຕື້​ກີບ ເທົ່າ​ກັບ 144% ຂອງ​ແຜນການ​ປີ, ທຽບ​ໄລຍະ​ດຽວ​ກັນ​ຂອງ​ປີຜ່ານມາ ເພີ່ມ​ຂຶ້ນ 35% ເປັນ​ເງິນ 896 ຕື້​ກີບ. ທ່ານ ບຸນ​ປອນ ວັນນະ​ຈິດ ຮອງ​ລັດຖະມົນຕີ​ກະຊວງ​ການ​ເງິນ ໄດ້​ໃຫ້​ຮູ້ວ່າ: ໃນ​ປີ 2023 ໄດ້​ປັບປຸງ​ກົນ​ໄກ​ຄຸ້ມ​ຄອງ​ລາຍ​ຮັບ ໂດຍ​ສະເພາະການ​ຫັນ​ເອົາ​ຫົວໜ່ວຍ​ທຸລະ​ກິດ​ທີ່ຢູ່​ນອກ​ລະບົບ​ເຂົ້າ​ສູ່​ລະບົບ​ການ​ຄຸ້ມ​ຄອງ​ຂໍ້​ມູນ​ຂ່າວສານ​ຂອງ​ຂະແໜງການ​ເງິນ ສາມາດ​ບັນລຸ​ໄດ້ 100% ຕາມ​ມະ ຕິ​ຂອງ​ສະພາ​ຮັບຮອງ; ໄດ້​ຊຸກຍູ້​ບັນດາ​ຫົວໜ່ວຍ​ທຸລະ​ກິດ ເຂົ້າ​ສູ່​ລະບົບ​ອາກອນ​ມູນ​ຄ່າ​ເພີ່ມ​ໄດ້ 70% ຂອງ​ຫົວໜ່ວຍ​ທີ່​ມີ​ເງື່ອນ ໄຂ ພ້ອມ​ທັງ ຊຸກຍູ້​ບັນດາ​ຫົວ ໜ່ວຍ​ທຸລະ​ກິດ​ເຂົ້າ​ສູ່​ລະບົບ​ການ ​ຖື​ບັນຊີ ແລະ ຕິດ​ຕັ້ງ​ເຄື່ອງ​ບັນທຶກ​ການ​ຂາຍ​ເຊື່ອມ​ຕໍ່​ກັບ​ລະບົບ​ຂອງ​ຂະແໜງການ​ເງິນ. ນອກຈາກ​ນີ້, ຍັງ​ໄດ້​ສຳເລັດ​ການ​ຜັນ​ຂະຫຍາຍ ແລະ ນຳ​ໃຊ້​ລະບົບ​ຄຸ້ມ​ຄອງ​ຂໍ້​ມູນ ​ຂ່າວສານ​ລາຍ​ຮັບ​ສ່ວຍ​ສາ​ອາ ກອນ ໃນ​ຂອບ​ເຂດ​ທົ່ວ​ປະເທດ ແລະ 6 ຈຸດ ເຂດ​ເສດຖະກິດ​ພິ ເສດ; ພ້ອມ​ທັງ ຍົກ​ລະດັບ​ລະບົບ​ແຈ້ງ​ພາສີ​ປະຕູ​ດຽວ​ແຫ່ງ​ຊາດ ແລະ ລະບົບ​ການ​ແຈ້ງ​ພາສີ​ລວມ​ສູນ ມາ​ເປັນ​ລະບົບ​ແຈ້ງ​ພາສີ​ແບບ ​ເອ​ເລັກ​ໂຕຣ​ນິກ ເຊື່ອມ​ຕໍ່​ຫາ​ຂະແໜງການ​ທີ່​ກ່ຽວຂ້ອງ, ຜັນ​ຂະຫຍາຍ​ນຳ​ໃຊ້​ແລ້ວ​ຢູ່ 12 ດ່ານ​ ພາສີ​ສາກົນ ແລະ ພວມ​ດຳເນີນ ​ເຝິກ​ອົບຮົມ​ການ​ນຳ​ໃຊ້​ໃຫ້ 13 ດ່ານ​ພາສີ​ສາກົນ ທີ່​ເຫຼືອ​ໃຫ້​ສຳ ເລັດ​ໃນ​ປີ 2023; ປະສານ​ສົມທົບ​ກັບ​ຂະແໜງການ​ທີ່​ກ່ຽວຂ້ອງ ທັງ​ສູນ​ກາງ ແລະ ທ້ອງຖິ່ນ ຈັດ​ ຕັ້ງ​ປະຕິບັດ​ການ​ເກັບ​ກຳ, ເຕົ້າ ໂຮມ ແລະ ເກັບ​ກູ້ ຊັບ​ສິນ​ທີ່​ຖືກ​ຮິບ ຕາມ​ຄຳ​ຕັດສິນ​ຂອງ​ສານ ເປັນ ຕົ້ນ ພາຫະນະ, ເຄື່ອງ​ຈັກ, ທີ່​ດິນ ແລະ ສິ່ງ​ປຸກ​ສ້າງ, ໄມ້, ວັດຖຸ​ມີ ຄ່າ, ເງິນສົດ ແລະ ຊັບ​ສິນ​ອື່ນໆ 742 ລາຍການ ລວມ​ມູນ​ຄ່າປະ ມານ 43 ຕື້​ກີບ ໃນ​ນີ້, ເປັນ​ເງິນສົດ​ 3 ຕື້​ກວ່າ​ກີບ; ສຳເລັດ​ຊຸກຍູ້ ບໍລິສັດ ໂຕ​ໂຍ​ຕາ​ລາວ ຈຳກັດ ແລະ ບໍລິສັດ ປີ​ໂຕຣ​ເທດ ນຳ​ ເຂົ້າ-ສົ່ງ​ອອກ ຈຳກັດ ທີ່​ມີ​ມາດ ຖານ, ເງື່ອນໄຂ ເຂົ້າ​ຮ່ວມ​ແຜນ​ ງານ​ຜູ້​ປະກອບ​ການ​ມາດຕະຖານ AEO ຕາມ​ກົດໝາຍວ່າ​ດ້ວຍ ​ພາສີ ແລະ ສັນຍາ, ສົນທິສັນຍາ ທີ່ ​ສປປ ລາວ ເປັນພາຄີ ແລະ ຄາດ ຄະເນ​ວ່າ​ຈະ​ໄດ້​ຮັບຮອງ​ອີກ 2 ບໍລິສັດ ໃນ​ທ້າຍ​ປີ 2023. ຜ່ານ​ການຈັດຕັ້ງ​ປະຕິ ບັດ ຮອດ​ວັນ​ທີ 12 ທັນວາ 2023 ສາມາດ​ເກັບ​ລາຍ​ຮັບ​ໄດ້ 39.377 ຕື້​ກີບ ເທົ່າ​ກັບ 102% ຂອງ​ແຜນການ​ປີ ຫຼື ເທົ່າ​ກັບ 16,82% ຂອງ GDP, ທຽບໃສ່​ໄລຍະ​ດຽວ​ກັນ ຂອງ​ປີຜ່ານມາ​ເພີ່ມ​ຂຶ້ນ 34% ເປັນ​ເງິນ​ປະມານ 9.904 ຕື້​ກີບ ໃນ​ນັ້ນ, ລາຍ​ຮັບ​ພາຍ​ໃນ 38.088 ຕື້​ກີບ ເທົ່າ​ກັບ 109 ຂອງ​ແຜນການ​ປີ (ບໍ່​ລວມ​ການ​ປະຕິບັດ​ນະໂຍບາຍ​ຫຼຸດ​ອາກອນ​ຊົມໃຊ້ ແລະ ອາ ກອນ​ມູນ​ຄ່າ​ເພີ່ມ ນ້ຳມັນ​ເຊື້ອ​ໄຟ ຊ່ວຍ​ໜູນ​ສັງຄົມ 3.493 ຕື້​ກີບ, ກວມ 10% ຂອງ​ແຜນ​ລາຍ​ຮັບ ​ພາຍ​ໃນ). ສາເຫດ​ທີ່​ລາຍ​ຮັບ​ເພີ່ມ​ຂຶ້ນ ຕົ້ນຕໍແມ່ນ​​ສຸມ​ໃສ່​ຈັດ​ຕັ້ງ​ປະຕິບັດ​ບັນດາ​ມາດ​ຕະການ ຕາມ​ມະຕິ​ສະພາ​ແຫ່ງ​ຊາດ, ຜັນ​ ຂະຫຍາຍ​ວາລະ​ແຫ່ງ​ຊາດ ກໍ​ຄື ຄຳ​ສັ່ງ​ເລກ​ທີ 18/​ນຍ ແລະ ຄຸ້ມ​ ຄອງ​ເກັບ​ລາຍ​ຮັບ​ໄປ​ສູ່​ທັນ​ສະ ໄໝ. ນອກ​ນັ້ນ, ການ​ເກັບ​ລາຍ​ຮັບ​ເປັນ​ເງິນຕາ​ຕ່າງປະເທດ​ເພິ່ມ ​ຂຶ້ນ ປະມານ 49% ເປັນ​ເງິນ 2.552 ຕື້​ກີບ ກວມ 33%. ສຳ ລັບ​ລາຍ​ຮັບ​ເພີ່ມ​ຂຶ້ນ​ຈາກ​ອັດ ຕາ​ແລກປ່ຽນ ທຽບໃສ່​ເວລາ​ສ້າງ​ແຜນ ເປັນ​ເງິນ​ປະມານ 700 ກ່ວ​​າ​ ຕື້​ກີບ ກວມ ປະມານ 2,3%.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ