ວັນຈັນ, ວັນທີ 14 ຕຸລາ 2024
ສະຫາຍ ພົນຕີ ພັນແສງ ບຸນພັນ ໂອ້ລົມພະນັກງານຫຼັກແຫຼ່ງຢູ່ກອງພົນທີ1
ເວລາອອກຂ່າວ: 2024-02-22 13:56:41 | ຜູ້ຂຽນ : admin2 | ຈຳນວນຄົນເຂົ້າຊົມ: 1654 | ຄວາມນິຍົມ: 
ໃນວັນຕອນເຊົ້າຂອງວັນທີ 21 ກຸມພາ 2024 ຜ່ານມານີ້, ສະຫາຍ ພົນຕີ ພັນແສງ ບຸນພັນ ຮອງຫົວໜ້າກົມໃຫຍ່ເສນາທິການກອງທັບ ລົງເຄື່ອນໄຫວຢ້ຽມຢາມ ແລະ ໂອ້ລົມ ຄະນະພັກ-ຄະນະບັນຊາ, ພະນັກງານຫຼັກແຫຼ່ງຢູ່ກອງພົນທີ1, ມີຄະນະພັກ-ຄະນະບັນຊາ, ພ້ອມດ້ວຍພະນັກງານຫຼັກແຫຼ່ງທົ່ວກົມກອງໃຫ້ການຕ້ອນຮັບ ແລະ ເຂົ້າຮ່ວມຮັບຟັງ.
ສະຫາຍ ພົນຈັດຕະວາ ວົງຈັນ ພັນຈັນທະມານ ຫົວໜ້າການເມືອງ ກອງພົນທີ1 ໄດ້ລາຍງານສະພາບການເຄື່ອນໄຫວປະຕິບັດໜ້າທີ່ການເມືອງຂອງກົມກອງໂດຍຫຍໍ້ ໃຫ້ຮັບຊາບ. ຈາກນັ້ນ, ສະຫາຍ ພົນຕີ ພັນແສງ ບຸນພັນ ກໍ່ໄດ້ໂອ້ລົມຄະນະພັກ-ຄະນະບັນຊາ, ພະນັກງານຫຼັກແຫຼ່ງ ກ່ອນອື່ນ ສະຫາຍ ກໍ່ໄດ້ສະແດງຄວາມຍ້ອງຍໍຊົມເຊີຍຢ່າງສຸດໃຈ ຕໍ່ຜົນງານທີ່ ກອງພົນທີ1 ຍາດມາໄດ້ຕະຫຼອດໄລຍະຜ່ານມາ. ສະຫາຍໄດ້ຍົກໃຫ້ເຫັນສະພາບການຂອງໂລກ ແລະ ພາກພື້ນທີ່ມີການຜັນແປໄປຢ່າງໄວວາເຊິ່ງຄາດເດົາໄດ້ຍາກ, ໂດຍສະເພາະກໍ່ແມ່ນສະພາບພາຍໃນປະເທດ ແລະ ຂອບເຂດກົມກອງຮັບຜິດຊອບ ພວມປະສົບກັບບັນຫາທ້າທາຍ, ທົດສອບຫຼາຍປະການ ຕໍ່ກັບບັນຫາດັ່ງກ່າວພະນັກງານ-ນັກຮົບກອງພົນທະຫານຮາບທີ1 ກໍ່ໄດ້ສ້າງຄວາມຕັດສິນໃຈສູງສູ້ຊົນອົດທົນຜ່ານຜ່າ ເຮັດໃຫ້ບັນຫາດັ່ງກ່າວຖືກຕີຖອຍ ແລະ ຫຼຸດໜ້ອຍຖອຍລົງ. ດ້ວຍຄວາມເປັນຫ່ວງເປັນໃຍ ສະຫາຍ ກໍ່ໄດ້ກ່າວຊີ້ນໍາ ແລະ ຮຽກຮ້ອງໃຫ້ສືບຕໍ່ວຽກງານສຶກສາອົບຮົບການເມືອງ-ແນວຄິດໃຫ້ພະນັກງານ-ນັກຮົບຢູ່ໃນຄວາມຮັບຜິດຊອບໃຫ້ເຊື່ອມຊຶມກໍາແໜ້ນແນວທາງນະໂຍບາຍຂອງພັກ-ລັດ, ລະບຽບກົດໝາຍ, ວິໄນ, ມະຕິ, ຄໍາສັ່ງ ເປັນຕົ້ນແມ່ນປະຕິບັດ 07 ລະບອບ 18 ວຽກຂອງກອງທັບໃຫ້ເຂັ້ມງວດ; ເຊີດຊູນໍ້າໃຈຄວາມຮັບຜິດຊອບໜ້າທີ່ການເມືອງຂອງຕົນ, ມີນໍ້າໃຈປະຕິວັດ, ມີຄວາມຈົງຮັກພັກດີ ແລະ ມີຄຸນທາດການເມືອງໜັກແໜ້ນ; ເອົາໃຈໃສ່ຍົກສູງຄວາມສາມັກຄີໃຫ້ເປັນປຶກແຜ່ນແໜ້ນໜາຕິດພັນກັບແບບແຜນວິທີເຮັດວຽກຢ່າງມີວິທະຍາສາດ ແລະ ຖືກຕາມຫຼັກການລວມສູນປະຊາທິປະໄຕ; ສືບຕໍ່ວຽກງານກໍ່ສ້າງພັກ, ກໍ່ສ້າງພະນັກງານໂດຍຖືເອົາຄຸນນະພາບເປັນກົກເພື່ອຫັນປ່ຽນກ້າວສູ່ທັນສະໄໝ. ອອກແຮງປັບປຸງກໍ່ສ້າງກໍາລັງໃຫ້ເຂັ້ມແຂງໜັກແໜ້ນໂດຍເລັ່ງໃສ່ກໍ່ສ້າງບຸກຄະລາກອນຕິດພັນກັບວຽກງານອົບຮົມ-ຫັດແອບປັບປຸງລະບຽບແບບແຜນດ້ານການເມືອງ, ການທະຫານ, ວິຊາສະເພາະໃຫ້ມີຄວາມຊໍານານສູງ; ຫັນລົງກໍ່ສ້າງຮາກຖານການເມືອງຕິດພັນກັບວຽກງານ 03 ສ້າງ ແລະ ສົ່ງເສີມການພົວພັນຮ່ວມມືກັບສາກົນ. ຍູ້ແຮງວຽກງານແກ້ໄຂຊີວິດການເປັນຢູ່ຂອງພະນັກງານ-ນັກຮົບໃຫ້ດີຂຶ້ນ ໂດຍປະຕິບັດຕາມທິດນໍາ ເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ. ຕັ້ງໜ້າປົກປັກຮັກສາພາຫະນະ, ອາວຸດ-ຍຸດໂທປະກອນໃຫ້ດີ ເພື່ອຮັບປະກັນເຮັດສໍາເລັດໜ້າທີ່ການເມືອງຂອງກົມກອງ.
ໂອກາດສໍາຄັນນີ້, ສະຫາຍ ຮອງຫົວໜ້າກົມໃຫຍ່ເສນາທິການກອງທັບ ຍັງເຄື່ອນໄຫວພົບປະໂອ້ລົມນັກຮຽນນາຍສິບທັງລະບົບກໍ່ສ້າງ ແລະ ບໍາລຸງ ຢູ່ສູນຝຶກອົບຮົມ, ໂອ້ລົມຢູ່ກອງພັນ 616 ແລະ ກອງພັນ 561 ຕື່ມອີກ.
ໂດຍ: ໂກຮັງ ພັນທະວົງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
