POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນຈັນ, ວັນທີ 14 ຕຸລາ 2024

ຄະນະບໍລິຫານງານພັກ ກົມໃຫຍ່ເຕັກນິກກອງທັບ ສໍາເລັດການດໍາເນີນ ກອງປະຊຸມໃຫຍ່ ຄັ້ງທີ II
ເວລາອອກຂ່າວ: 2024-02-28 17:44:05 | ຜູ້ຂຽນ : admin2 | ຈຳນວນຄົນເຂົ້າຊົມ: 1973 | ຄວາມນິຍົມ:

ຄະນະບໍລິຫານງານພັກ ກົມໃຫຍ່ເຕັກນິກກອງທັບ ໄດ້ສໍາເລັດການດໍາເນີນກອງປະຊຸມໃຫຍ່ຄັ້ງທີ II ໃນວັນທີ 28 ກຸມພາ 2024 ນີ້, ໂດຍການເປັນປະທານຂອງສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ມີສະຫາຍ ພົນຕີ ປະສິດ ທ່ຽງທໍາ ກຳມະການຄະນະປະຈໍາພັກ ກະຊວງປ້ອງກັນປະເທດ, ເລຂາຄະນະພັກ, ຫົວໜ້າກົມໃຫຍ່ເຕັກນິກກອງທັບ, ມີບັນດາສະຫາຍໃນຄະນະພັກກົມໃຫຍ່ເຕັກນິກກອງທັບ, ຄະນະພັກກະຊວງປ້ອງກັນປະເທດ, ຫ້ອງວ່າການກະຊວງປ້ອງກັນປະເທດ, ວິທະຍາຄານ, ກົມ, ກອງ, ໂຮງຮຽນ ແລະ ແຂກຖືກເຊີນ ເຂົ້າຮ່ວມ. ສະຫາຍ ພົນຕີ ປະສິດ ທ່ຽງທໍາ ໄດ້ຜ່ານບົດລາຍງານການເມືອງທັງສອງພາກ ໃນໄລຍະ 5 ປີຜ່ານມາ, ຄະນະພັກ ກົມໃຫຍ່ເຕັກນິກກອງທັບ ໄດ້ເອົາໃຈໃສ່ ສູ້ຊົນຈັດຕັ້ງປະຕິບັດ ມະຕິວ່າດ້ວຍ 4 ໜ້າທີ່ໃຫຍ່ 26 ແຜນງານ ທີ່ຄະນະພັກກະຊວງປ້ອງກັນປະເທດວາງອອກ, ໂດຍຖືເອົາການປະຕິບັດໜ້າທີ່ວິຊາສະເພາະເປັນບັນຫາສໍາຄັນ ໃນນີ້, ໄດ້ເອົາໃຈໃສ່ໃນການກວດກາ, ຕິດຕາມ, ຊຸກຍູ້ວຽກງານເຕັກນິກຂອງບັນດາກົມກອງກຳລັງຫຼວງ ແລະ ກຳລັງທ້ອງຖິ່ນ ສາມາດຮັບປະກັນການປະກອບ ພາຫະນະ, ອາວຸດ ແລະ ລູກກະສຸນໃຫ້ແກ່ກອງທັບ ໄດ້ຕາມຄາດໝາຍ, ດ້ານວຽກງານຮັບປະກັນເຕັກນິກ ໄດ້ຈັດຕັ້ງກວດກາຕີລາຄາ ດ້ານປະລິມານ-ຄຸນນະພາບ ຄົບຊຸດຂອງພາຫະນະ-ອາວຸດຍຸດໂທປະກອນເຕັກນິກທົ່ວກອງທັບສຳເລັດ, ເຮັດໜ້າທີ່ຮັບປະກັນເຕັກນິກ ໃນໂອກາດສະເຫຼີມສະຫຼອງວັນສ້າງຕັ້ງກອງທັບຄົບຮອບ 75 ປີ, ຮັບປະກັນໃຫ້ບັນດາບັ້ນຫັດແອບຊ້ອມຮົບ, ຕ້ານໄພພິບັດ, ໂຄງການເກັບກູ້ລະເບີດ ແລະ ໂຄງການອື່ນໆ ທີ່ກະຊວງປ້ອງກັນປະເທດຈັດຂຶ້ນຢ່າງມີປະສິດທິຜົນສູງ, ມີຄວາມປອດໄພ 100%, ດ້ານວຽກງານຄົ້ນຄວ້າວິທະຍາສາດເຕັກໂນໂລຊີ ແລະ ດັດແປງພາຫະນະ-ອາວຸດຍຸດໂທປະກອນເຕັກນິກ ໄດ້ສຳເລັດການຄົ້ນຄວ້າຜະລິດ ຈ້ອງ ແລະ ດັດແປງເຕັກນິກຂອງ ໂດຣນ 10 ລໍາ ເພື່ອປ່ອຍຈ້ອງເປັນເປົ້າຍິງໃຫ້ປືນປ້ອງກັນອາກາດ ແລະ ເປົ້າໝາຍອື່ນໆ. ພ້ອມດຽວກັນນີ້, ຄະນະພັກ ຍັງໄດ້ເອົາໃຈໃສ່ ນໍາພາ-ຊີ້ນໍາ ແລະ ປັບປຸງການຈັດຕັ້ງພາຍໃນພັກ ຕາມເນື້ອໃນ 5 ຫຼັກການ 3 ທິດນຳໃນການປັບປຸງກໍ່ສ້າງພັກ ເພື່ອນໍາພາ-ຊີ້ນຳ ຂົງເຂດຄວາມຮັບຜິດຊອບຂອງຕົນ ໃຫ້ມີຜົນສໍາເລັດຕາມແຜນການ, ເພີ່ມທະວີການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ໃນທົ່ວກົມໃຫຍ່ເຕັກນິກກອງທັບ ເພື່ອຍົກສູງຄຸນທາດການເມືອງ, ຄວາມຮູ້ຄວາມສາມາດ ຄະນະພັກ ຕະຫຼອດຮອດສະມາຊິກພັກແຕ່ລະສະຫາຍໃຫ້ສູງຂຶ້ນ. ປັດຈຸບັນ, ທົ່ວຄະນະພັກ ກົມໃຫຍ່ເຕັກນິກກອງທັບ ມີ 15 ຄະນະພັກຮາກຖານ, 62 ໜ່ວຍພັກຂຶ້ນກັບ, 18 ໜ່ວຍພັກຮາກຖານ, ໄດ້ຈັດຕັ້ງເຝິກອົບຮົມ ກວດສອບ ເລຂາ-ຮອງເລຂາຮາກຖານພັກ ທົ່ວຄະນະພັກກົມໃຫຍ່ເຕັກນິກກອງທັບ, ຈັດຕັ້ງກອງປະຊຸມວຽກງານຈັດຕັ້ງກໍ່ສ້າງພັກ-ພະນັກງານ ທົ່ວກົມໃຫຍ່ເຕັກນິກ ຄັ້ງທີ I, ສຳເລັດກອງປະຊຸມທາບທາມການສ້າງແຜນກຳນົດພະນັກງານຂັ້ນກະຊວງປ້ອງກັນປະເທດຄຸ້ມຄອງ ສົ່ງໃຫ້ຂັ້ນເທິງອະນຸມັດຮັບຮອງ ແລະ ໄດ້ດໍາເນີນກອງປະຊຸມໃຫຍ່ ຂັ້ນຮາກຖານພັກ-ໜ່ວຍພັກສຳເລັດ. ໃນກອງປະຊຸມ ຜູ້ແທນສົມບູນ ຍັງໄດ້ໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະພັກຊຸດໃໝ່ ຈໍານວນ 15 ສະຫາຍ ຄື: ພົນຕີ ປະສິດ ທ່ຽງທຳ ເປັນ ເລຂາຄະນະພັກ, ພົນຈັດຕະວາ ທອງພັນ ສຸທຳມະວົງ ເປັນ ຮອງເລຂາ, ພົນຈັດຕະວາ ສາຍສະໝອນ ໄຊພູບານ ເປັນປະທານກວດກາ, ພົນຈັດຕະວາ ຄອນສະຫວັນ ມິ່ງຈຳປາບານ ເປັນຄະນະປະຈຳພັກ, ພົນຈັດຕະວາ ຈອມເພັດ ໄຊຍະສຸກ ເປັນຄະນະປະຈຳພັກ, ພົນຈັດຕະວາ ຄຳແປງ ບົວລະບັດ ກຳມະການຄະນະພັກ, ພົນຈັດຕະວາ ປອ ຟອງສະໝຸດ ພົນທິລາດ ກຳມະການຄະນະພັກ, ຄຳສິງ ລືເດດສົມບັດ ກຳມະການຄະນະພັກ, ພັນເອກ ລຽນວີໄລ ພັນທອງຄຳ ກຳມະການຄະນະພັກ, ພັນເອກ ວົງໃສ ສຸວໍລະວົງ ກຳມະການຄະນະພັກ, ພັນເອກ ສຸດໃຈ ສໍວິໄຊ ກຳມະການຄະນະພັກ, ພັນເອກ ຈັນສະໝອນ ລັດສະໄໝ ກຳມະການຄະນະພັກ, ພັນເອກ ອານຸສອນ ຈະເລີນພົນມີໄຊ ກຳມະການຄະນະພັກ, ພົນຈັດຕະວາ ອຳພາວັນ ມະນີວົງ ກຳມະການຄະນະພັກ, ພັນເອກ ວິໄລຄຳ ຫຼວງຊົມພູ ກຳມະການຄະນະພັກ, ເລືອກເອົາ ສະຫາຍ ພົນຕີ ປະສິດ ທ່ຽງທໍາ ເປັນເລຂາຄະນະພັກ, ສະຫາຍ ພົນຈັດຕະວາ ທອງພັນ ສຸທໍາມະວົງ ເປັນຮອງເລຂາຄະນະພັກ, ພົນຈັດຕະວາ ສາຍສະໝອນ ໄຊພູບານ ປະທານກວດກາ ຄະນະປະຈຳພັກ, ພົນຈັດຕະວາ ຄອນສະຫວັນ ມິ່ງຈຳປາບານ ຄະນະປະຈຳພັກ, ພົນຈັດຕະວາ ຈອມເພັດ ໄຊຍະສຸກ ຄະນະປະຈຳພັກ ແລະ ເລືອກເອົາ ສະຫາຍ ພົນຈັດຕະວາ ສາຍສະໝອນ ໄຊພູບານ ເປັນປະທານກວດກາພັກ, ສະຫາຍ ພັນເອກ ວຽງທອງ ພັດທະສິດ ເປັນຮອງປະທານກວດກາພັກ ແລະ ສະຫາຍ ພັນໂທ ພອນສີ ທອງສິງຄໍາ ເປັນຮອງປະທານກວດກາພັກ. ພ້ອມດຽວກັນນີ້, ຍັງໄດ້ປ່ອນບັດຄັດເລືອກເອົາຜູ້ແທນສົມບູນ ແລະ ສໍາຮອງເຂົ້າຮ່ວມກອງປະຊຸມໃຫຍ່ຂອງອົງຄະນະພັກຂັ້ນເທິງໄດ້ຕາມລະດັບຄາດໝາຍ. ໂອກາດນີ້, ສະຫາຍ ພົນເອກ ຈັນສະໝອນ ຈັນຍາລາດ ໄດ້ເນັ້ນໜັກໃຫ້ຄະນະພັກຊຸດໃໝ່ ຕ້ອງເພີ່ມທະວີຄວາມສາມັກຄີເປັນເອກະພາບພາຍໃນ ຕິດພັນກັບ ການເຊີດຊູນໍ້າໃຈຮັກຊາດ, ສະຕິເປັນເຈົ້າຕົນເອງ, ຍົກສູງບົດບາດການນໍາພາຂອງພັກ ເຂົ້າໃນທຸກຂົງເຂດວຽກງານ, ສິ່ງສໍາຄັນແມ່ນປັບປຸງແບບແຜນວິທີເຮັດວຽກຂອງຄະນະພັກໃຫ້ມີການຫັນປ່ຽນໃໝ່ ຕາມຫຼັກການຂອງພັກຢ່າງເຂັ້ມງວດ, ປະຕິບັດລະບອບດໍາເນີນຊີວິດການເມືອງພາຍໃນໃຫ້ເປັນປົກກະຕິ, ເອົາໃຈໃສ່ວຽກງານກວດກາ, ວຽກງານປ້ອງກັນພັກ-ພະນັກງານ ໃຫ້ເຂັ້ມງວດ ແລະ ເຮັດເປັນປະຈໍາ, ຖືເອົາການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ເປັນປັດໄຈຕັດສິນ ຕິດພັນກັບການເຊີດຊູຄວາມເປັນແບບຢ່າງຂອງຄະນະພັກ, ສະມາຊິກພັກຈຶ່ງຈະເຂັ້ມແຂງໜັກແໜ້ນ, ຕ້ອງເອົາໃຈໃສ່ສຶກສາອົບຮົມການເມືອງ-ນໍາພາແນວຄິດໃຫ້ສະມາຊິກພັກ, ພະນັກງານ-ນັກຮົບ ເຊື່ອມຊຶມກໍາແໜ້ນແນວທາງປ່ຽນແປງໃໝ່ຂອງພັກ, ໜ້າທີ່ການເມືອງຂອງກອງທັບ, ເຊື່ອໝັ້ນຕໍ່ອຸດົມການຂອງພັກ, ມີຄວາມຈົ່ງຮັກພັກດີຕໍ່ປະເທດຊາດ, ຕໍ່ປະຊາຊົນ ແລະ ພ້ອມກັນຕັ້ງໜ້າເສີມຂະຫຍາຍທາດແທ້ມູນເຊື້ອອັນດີງາມຂອງກອງທັບ ຢ່າງບໍ່ຢຸດຢັ້ງ. ໂດຍ : ອາຫວຸ້ນ

news to day and hot news