ກອງທັບປະຊາຊົນລາວ
 
ວັນພຸດ, ວັນທີ 24 ເມສາ 2024

  

ກົມ​ກອງ​ຕ່າງໆ​ ສະຫຼຸບ​ວຽກ​ງານ​ຮອບດ້ານ​ປະຈຳ​ປີ
ເວລາອອກຂ່າວ: 2024-02-29 09:15:14 | ຜູ້ຂຽນ : admin1 | ຈຳນວນຄົນເຂົ້າຊົມ: 118 | ຄວາມນິຍົມ:



ລະຫວ່າງ​ກາງ​ເດືອນ​ກຸມພາ 2024 ນີ້, ຫ້ອງການ​ກອງ​ພົນ​ທີ 3, ກອງຮ້ອຍ 1 ກອງພັນ 415 ​ກອງ​ບັນຊາ​ການ​ທະຫານ​ແຂວງ​ຫຼວງ​ພະ​ບາງ, ສະ​ຖາ​ບັນອະນາໄມ​ກັນ​ພະຍາດ ແລະ ສົ່ງເສີມ​ສຸຂະພາບ​ກອງທັບ, ພະ​ແນກ​ເສນາ​ທິ​ການ ​ກອງພັນ​ໃຫຍ່ 497, ກອງພັນ​ຊ່າງ​ແສງ 579, ຫ້ອງ​ການເມືອງ ​ກົມ​ໃຫຍ່​ເສນາ​ທິ​ການ​ກອງທັບ ແລະ ກອງຮ້ອຍ 3 ກອງພັນ 415 ກອງບັນຊາການທະຫານ​ແຂວງ​ຫຼວງ​ພະ​ບາງ ຕ່າງ​ກໍ​ໄດ້​ສະຫຼຸບ​ວຽກ​ງານ​ຮອບດ້ານ ​ປະ ຈຳປີ 2023 ແລະ ວາງ​ທິດ​ທາງ​ແຜນການ​ ປະຈຳ​ປີ 2024 ເຊິ່ງ​ອີງ​ຕາມ​ ບົດ​ສະຫຼຸບ​ຂອງ​ແຕ່​ລະ​ກົມ​ກອງ​ນັ້ນ ​ສັງ​ຮວມ​ໄດ້​ວ່າ:​ຄະນະ​ພັກ-ຄະນະ​ບັນຊາ ແລະ ພະນັກງານ-ນັກຮົບ​ໃນ​ທົ່ວ​ກົມ​ກອງລ້ວນ​ແຕ່​ໄດ້ພ້ອມ​ກັນ​ຈັດ​ຕັ້ງ​ປະຕິບັດ​ແຕ່​ລະ​ຂົງເຂດ​ວຽກ​ງານ​ດ້ວຍ​ຄວາມ​ຮັບຜິດຊອບ​ສູງ​ບັນລຸ​ໝາກຜົນ​ດີ ແລະ ຫຼາຍ​ດ້ານ ມີ​ລັກສະນະ​ພົ້ນ​ເດັ່ນ​ຂຶ້ນ. ຫ້ອງການ​ ກອງ​ພົນ​ທີ 3: ຄະນະ​ພັກ-ຄະນະ​ບັນຊາ​ນອກ ຈາກ​ເຮັດ​ສຳເລັດ​ໜ້າທີ່​ການ ເມືອງ​ແລ້ວ ຍັງ​ໄດ້​ເອົາໃຈໃສ່​ວຽກ​ງານ​ວິຊາ​ສະເພາະ​ໃນ​ການ​ຮັບ​ເອກະສານ​ເຂົ້າ-ອອກ, ພິມ​ເອກະສານ, ສໍາເນົາເອກະສານ ນອກ​ນັ້ນ, ​ຍັງ​ໄດ້​ເອົາໃຈໃສ່​ວຽກ​ງານ​ແກ້​ໄຂ​ຊີວິດ​ການ​ປັນ​ຢູ່​ໃນ​ການລ້ຽງ​ງົວ, ຄວາຍ, ສັດ​ປີກ, ມີ​ໜອງ 2 ໜອງ ປ່ອຍ​ປາ​ 11.000 ໂຕ, ປູກ​ພືດ​ຕາມ​ລະດູ​ການ, ປູກ​ມັນຕົ້ນ, ຫຍ້າ​ລ້ຽງງົວ, ສາລີ ໃນ​ໄລຍະ 1 ປີຜ່ານມາ ​ສາມາດ​ສ້າງ​ລາຍ​ຮັບ​ເຂົ້າ​ຄັງ​ລວມ​ໄດ້ 42 ລ້ານ​ກວ່າ​ກີບ. ກອງຮ້ອຍ 1 ກອງພັນ 415 ກອງ​ບັນຊາ​ການ​ທະຫານ​ແຂວງ​ຫຼວງ​ພະ​ບາງ: ຄະນະ​ພັກ-ຄະນະ​ບັນຊາ​ນອກຈາກ​ເຮັດ​ສຳເລັດ​ໜ້າທີ່​ວຽກ​ງານ​ວິຊາ​ສະເພາະ​ແລ້ວ ຍັງ​ໄດ້​ເອົາໃຈໃສ່​ຈັດ​ຕັ້ງ​ພະນັກງານ​ຫັນ​ລົງ​ກໍ່ສ້າງ​ຮາກ​ຖານ​ການເມືອງ ໃນ​ຂອບ​ເຂດ​ຕົນ​ຮັບຜິດຊອບ​ໃຫ້​ມີ​ຄວາມ​ສະຫງົບ​ປອດ​ໄພ ນອກ​ນີ້,​ ຍັງ​ໄດ້​ເອົາໃຈໃສ່​ວຽກ​ງານ​ແກ້​ໄຂ​ຊີວິດ​ການ​ເປັນ​ຢູ່​ດ້ວຍ​ການ​ລ້ຽງ​ງົວ, ສັດ​ປີກ, ປູກ​ພືດ​ຊະນິດ​ຕ່າງໆ​ສາມາດ​ເກັບ​ກ່ຽວ​ໄດ້ 3.406 ກິ​ໂລກຣາມ ໃນ​ໄລຍະ 1 ປີ​ຜ່າ​ນມາ​ສາມາດ​ສ້າງ​ລາຍ​ຮັບ​ຈາກ​ການ​ປູກຝັງ-ລ້ຽງສັດ​ໄດ້ 81 ລ້ານ​ກວ່າ​ກີບ. ຈາກ​ຜົນງານ​ດັ່ງກ່າວ​ນັ້ນ​, ກົມ​ກອງ​ໄດ້​ຮັບ​ຫຼຽນ​ໄຊແຮງງານ ​ຊັ້ນ II ຈຳນວນ 5 ສະຫາຍ, ຊັ້ນ III ຈຳນວນ 6 ສະຫາຍ, ຫຼຽນກາ​ແຮງ​ງານ 7 ສະຫາຍ, ໄດ້​ຮັບ​ໃບ​ຍ້ອງຍໍ​ລັດຖະບານ 9 ສະຫາຍ, ໃບ​ຍ້ອງຍໍ​ກະຊວງ​ປ້ອງ​ກັນ​ປະເທດ 11 ສະຫາຍ, ໃບ​ຍ້ອງຍໍ​ກົມ​ໃຫຍ່​ການເມືອງ​ກອງທັບ 10 ສະຫາຍ ແລະ ໃບ​ຍ້ອງຍໍ​ເຈົ້າແຂວງ 1 ສະຫາຍ ພ້ອມ​ທັງ​ມອບ​ຂອງ​ຂວັນ​ໃຫ້​ບຸກຄົນ​ທີ່​ມີ​ຄວາມ​ຫ້າວຫັນ​ດີເດັ່ນ​ຈຳນວນ 5 ສະຫາຍ​ຕື່ມ​ອີກ. ສະ​ຖາ​ບັນ​ອະນາໄມກັນ​ພະຍາດ ແລະ ສົ່ງເສີມ​ສຸຂະພາບ​ກອງທັບ: ອັນ​ພົ້ນ​ເດັ່ນ​ໄດ້​ເຄື່ອນ​ໄຫວ​ວຽກ​ງານ​ວິຊາ​ສະເພາະ ເປັນ​ເສນາ​ທິ​ການດ້ານ​ວຽກ​ງານ​ອະນາໄມ​ກັນພະຍາດ​ໃນ​ທົ່ວ​ກອງທັບໃຫ້​ແກ່​ກົມ​ເສນາ​ຮັກ ກົມ​ ໃຫຍ່​ພະລາທິການ​ກອງທັບ ໃນ​ໄລຍະ 1 ປີຜ່ານມາ ​ໄດ້​​ໂຄສະນາ​ສຶກ​ສາ​ກ່ຽວ​ກັບ​ພະຍາດ​ໄຂ້ຍຸງ, ເກັບ​ຕົວຢ່າງ​ເລືອດ​ຊອກ​ຫາ​ເຊື້ອ​ໄວຣັສ​ຕັບ B, C, ສັກ​ຢາ​ວັກຊີນ​ປ້ອງ​ກັນ​ພະຍາດ​ຊະນິດ​ຕ່າງໆ ແລະ ສຳ​ຫຼວດ​ອາຈົມໃນ​ທົ່ວ​ກອງທັບ, ​ກວດ​ຄຸນ​ນະ​ພາບ​ນໍ້າ​ດື່ມນໍ້າ​ໃຊ້ ແຕ່​ລະ​ກົມ​ກອງ ແລະ ກວດ​ສານ​ເຄ​ມີ​ປົນ​ເປື້ອນ​ໃນ​ອາຫານ​ໃນ​ກອງ​ປະຊຸມ​ຕ່າງໆ ແລະ ວຽກງານ​ອື່ນໆ ​ທີ່​ປິ່ນ​ອ້ອມ​ໜ້າທີ່​ການເມືອງ​ສຳເລັດ​ໂດຍ​ພື້ນຖານ ນອກ​ນັ້ນ, ​ຍັງ​ໄດ້​ຮັບ​ລະບົບ​ອັດຕາ​ເຄື່ອງ​ອຸປະໂພກ-ບໍລິໂພກ ຕາມ​ລະບຽບ​ຫຼັກການ​ຂອງ​ຂັ້ນ​ເທິງ​ປະກອບ​ໃຫ້ ແລະ ໃຊ້​ຈ່າຍ​ຖືກຕ້ອງ​ຕາມ​ລະບຽບ​ຫຼັກການ​ຂອງ​ກອງທັບ​ວາງ​ອອກ ບໍ່​ໄດ້​ຕົກເຮ່ຍ​ເສຍ​ຫາຍ. ພະ​ແນກ​ເສນາ​ທິ​ການກອງ ພັນ​ໃຫຍ່ 497: ຄະນະ​ພັກ-ຄະນະ​ບັນຊາ ​ນອກຈາກ​ເຮັດ​ສຳເລັດ​ໜ້າທີ່​ການເມືອງ​ແລ້ວ ຍັງ​ໄດ້​ເອົາໃຈໃສ່​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ດ້ວຍ​ການ​ຈັດຕັ້ງ​ພະນັກງານ​ປະ ຈຳການ​ຕະຫຼອດ 24 ຊົ່ວໂມງ, ພ້ອມ​ນີ້​ ຍັງ​ໄດ້​ຈັດ​ຕັ້ງ​ກຳລັງ​ອອກ​ເຄື່ອນ​ໄຫວ​ກວດກາ​ສາລະ​ເວ ໃນ​ຂອບ​ເຂດ​ຕົນ​ເອງ​ຮັບ​ຜິດຊອບ​ໃຫ້​ມີ​ຄວາມ​ສະຫງົບ​ປອດ​ໄພ ນອກນີ້, ​ຍັງ​ໄດ້​ເອົາໃຈໃສ່​ວຽກ​ງານ​ເພີ່ມ​ພູນ​ຜະລິດຜົນ​ໃນ​ການ​ປູກຝັງ-ລ້ຽງສັດ ເຮັດ​ໃຫ້​ຊີວິດ​ການ​ເປັນ​ຢູ່​ຂອງ​ພະນັກງານ-ນັກຮົບ​ດີ​ຂຶ້ນ​ເປັນ​ກ້າວໆ. ກອງພັນ​ຊ່າງ​ແສງ 579: ຄະນະ​ພັກ-ຄະນະ​ບັນຊາ​ໄດ້​ຖື​ເອົາ​ວຽກ​ງານ​ການ​ສຶກ​ສາ​ອົບ ຮົມ​ການເມືອງ​-ນຳພາ​ແນວ​ຄິດ​ໃຫ້​ແກ່​ພະນັກງານ-ນັກຮົບ ເປັນ​ບັນຫາ​ສຳຄັນ ໂດຍ​ນຳ​ເອົາ​ບັນ ດາ​ແນວທາງ​ແຜນ​ນະໂຍບາຍ​ຂອງ​ພັກ, ກົດໝາຍ​ຂອງ​ລັດ, ຂໍ້​ກຳນົດ, ​ກົດ​ລະບຽບ​ຂອງ​ກອງທັບ, ຂອງ​ກົມ​ກອງ​ມາ​ຈັດ​ຕັ້ງ​ເຜີຍແຜ່​ເຊື່ອມ​ຊຶມ​ຢ່າງ​ເປັນ​ປົກກະຕິ ເພື່ອ​ເຮັດ​ໃຫ້​ພະນັກງານ-ນັກຮົບ ມີ​ແນວ​ຄິດ​ຫຼັກ​ໝັ້ນ​ອຸ່ນ​ອຽນ​ທຸ່ນ​ທ່ຽງ​ຕໍ່ໜ້າ​ທີ່​ວຽກ​ງານ ເພື່ອ​ພ້ອມ​ກັນ​ເຮັດ​ສຳເລັດ​ໜ້າທີ່​ການເມືອງ​ທີ່​ການຈັດຕັ້ງ​ຂັ້ນ​ເທິງ​ມອບ​ໝາຍ​ໃຫ້ ຄຽງ​ຄູ່​ກັນ​ນີ້, ​ຍັງ​ໄດ້​ເອົາໃຈ ໃສ່​ວຽກ​ງານ​ຄຸ້ມ​ຄອງ​ລ້ຽງ​ດູ​ທັບ​ໄດ້​ເປັນ​ຢ່າງ​ດີ ໂດຍ​ປະຕິບັດ​ຕາມ​ຫຼັກການ​ມື້ໜຶ່ງ​ໄດ້​ຈັດ​ຕັ້ງ​ໃຫ້​ອ້າຍ​ນ້ອງ​ກິນ​ເຂົ້າ 3 ຄາບ ອາຫານ 3 ເຍື່ອງ ຕາມ​ລະບົບ​ອັດຕາ​ທີ່​ຂັ້ນ​ເທິງ​ກຳນົດ​ໃຫ້ ນອກ​​ນ​ນີ້​, ຍັງ​ໄດ້​ເອົາໃຈໃສ່​ວຽກ​ງານ​ແກ້​ໄຂ​ຊີວິດ​ການ​ເປັນ​ຢູ່​ດ້ວຍ​ການ​ປູກ​ພືດ​ຊະນິດ​ຕ່າງໆ, ລ້ຽງສັດ​ປີກ, ໄກ່, ລ້ຽງ​​​ງົວ, ລ້ຽງ​ປາ, ລ້ຽງ​ກົບ ສາມາດ​ສ້າງ​ລາຍ​ຮັບ​ຈາກ​ການ​ປູກຝັງ-ລ້ຽງສັດ ແລະ ບໍລິການ​ອື່ນໆ​ ໄດ້ 260 ລ້ານ​ກວ່າ​ກີບ. ຫ້ອງ​ການເມືອງ​ ກົມ​ໃຫຍ່​ເສນາ​ທິ​ການ​ກອງທັບ: ນອກຈາກ​ເຮັດ​ສຳເລັດ​ໜ້າທີ່​ການເມືອງ​ຕາມ​ທີ່​ໄດ້​ຮັບ​ມອບ​ໝາຍ​ເປັນ​ ຢ່າງ​ດີ​ແລ້ວ ຄະນະ​ພັກ-ຄະນະ​ບັນຊາ​ຍັງ​ໄດ້​ເອົາໃຈໃສ່​ຊີ້​ນຳ​ວຽກ​ງານ​ຮັບປະກັນ​ຊີວິດ​ການ​ເປັນ​ຢູ່​ຂອງ​ພະນັກງານ-ນັກຮົບ​ດ້ວຍ​ການ​ປູກຝັງ-ລ້ຽງສັດ ໃນ​ນີ້, ​ມີ​ໜອງ 1 ໜອງ ປ່ອຍ​ປາ​ 3.000 ໂຕ, ຂາຍ​ແບ້ 2 ໂຕ ແລະ ບໍລິການ​ອື່ນໆ ສາມາດ​ສ້າງ​ລາຍ​ຮັບ​ເຂົ້າ​ຄັງ​ລວມ​ໄດ້ 24 ລ້ານ​ກວ່າ​ກີບ. ກອງຮ້ອຍ 3 ກອງພັນ 415 ກອງບັນຊາການທະຫານ​ແຂວງ​ຫຼວງ​ພະ​ບາງ: ຄະ​ນະ​ພັກ-ຄະນະ​ບັນຊາ ໄດ້​ເອົາໃຈໃສ່​ສຶກ​ສາ​ອົບຮົມ​ການເມືອງ-​ແນວ​ຄິດ​ ເຮັດ​ໃຫ້​ພະນັກງານ-ນັກຮົບ​ມີ​ຄຸນ​ທາດ​ການເມືອງ​ໜັກ​ແໜ້ນ, ມີ​ຄຸນສົມບັດ​ສິນ​ທຳ​ປະຕິວັດ ແລະ ເຮັດ​ສຳເລັດ​ໜ້າທີ່​ຕາມ​ການ​ມອບ​ໝາຍ​ຂອງ​ຂັ້ນ​ເທິງ ພ້ອມ​ນີ້,​ ຍັງ​ໄດ້​ເອົາໃຈໃສ່​ຊີ້​ນຳ​ວຽກ​ງານ​ອົບຮົມ-​ຫັດ​ແອບ ເພື່ອ​ຍົກ​ລະດັບ​ຄວາມ​ຮູ້​ ຄວາມ​ສາມາດ​ທາງ​ດ້ານ​ສິລະ​ປະຍຸດ-ຍຸດທະວິທີ ນອກ​ນີ້, ​ຍັງ​ໄດ້​ເອົາໃຈໃສ່​ວຽກ​ງານ​ປ້ອງ​ກັນ​ຄວາມ​ສະຫງົບ​ໃນ​ການຈັດຕັ້ງ​ກຳລັງ​ອອກ​ປ້ອງ​ກັນ​ເວນຍາມ, ວັນ​ບຸນ​ສຳຄັນ​ຕ່າງໆ ໃນ​ຂອບ​ເຂດ​ຕົນ​ຮັບຜິດຊອບ​ໃຫ້​ມີ​ຄວາມ​ສະຫງົບ ຄຽງ​ຄູ່​ກັນ​ນັ້ນ​ຍັງ​ໄດ້​ເອົາໃຈໃສ່​ວຽກ​ງານ​ແກ້​ໄຂ​ຊີວິດ​ການ​ເປັນ​ຢູ່​ດ້ວຍ​ການ​ປູກ​ພືດຊະນິດ​ຕ່າງໆ, ລ້ຽງ​ງົວ, ໝູ, ແບ້, ສັດ​ປີກ ແລະ ບໍລິການ​ອື່ນໆ ສາມາດ​ສ້າງ​ລາຍ​ຮັບ​ໄດ້​ທັງ​ໝົດ 107 ລ້ານ​ກວ່າ​ກີບ. ພ້ອມ​ນີ້, ​ຍັງ​ໄດ້ມອບ​ຂອງຂວັນ​ໃຫ້​ພະນັກງານ​ທີ່​ມີ​ຄວາມ​ຫ້າວຫັນ​ຈຳນວນ 4 ສະຫາຍ ຕື່ມ​ອີກ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ