ກອງທັບປະຊາຊົນລາວ
 
ວັນພະຫັດ, ວັນທີ 18 ເມສາ 2024

  

​ສນຮລ-ເບຍ​ລາວ ຈັດການ​ແຂ່ງຂັນ ​ກິລາ​ດອກ​ປີກ​ໄກ່ ຄັ້ງ​ທີ 8
ເວລາອອກຂ່າວ: 2024-02-29 10:09:56 | ຜູ້ຂຽນ : admin1 | ຈຳນວນຄົນເຂົ້າຊົມ: 72 | ຄວາມນິຍົມ:



ສະມາຄົມ​ນັກທຸລະກິດ​ຮ້ານ​ອາຫານ​ລາວ (​ສນຮລ) ນະຄອນຫຼວງ​ວຽງ​ຈັນ ຮ່ວມ​ກັບບໍລິສັດ ເບຍ​ລາວ ຈຳກັດ ຈັດການ​ແຂ່ງຂັນ​ກິລາ​ດອກ​ປີກ​ໄກ່ ຄັ້ງ​ທີ 8 ປະຈຳ​ປີ 2024 ເຊິ່ງ​ເປັນ​ກິດຈະກຳ​ໜຶ່ງ​ທີ່​ນອນ​ໃນ 11 ກິດຈະກຳ​ຂອງ ​ສນຮລ ທີ່​ໄດ້​ຂຶ້ນ​ແຜນ​ເຄື່ອນ​ໄຫວ ປະຈຳ​ປີ 2024 ເພື່ອ​ສ້າງ​ໂອກາດ​ໃຫ້​ບັນດາ​ຜູ້​ປະກອບ​ການ​ທຸລະ​ກິດ​ຮ້ານ​ອາຫານ ໄດ້​ພົບ​ປະ​ແລກປ່ຽນ, ໂດຍ​ຖື​ເອົາ​ກິລາ​ດັ່ງກ່າວ ເປັນ​ສື່​ກາງ​ໃນ​ການ​ພົບ​ປະໂອ້​ລົມ​ແລກປ່ຽນ​ເຊິ່ງ​ກັນ ແລະ ກັນ, ແນໃສ່​ສ້າງ​ຄວາມ​ເຂັ້ມແຂງ​ທາງ​ດ້ານ​ທຸລະ​ກິດ ແລະ ເສີມ​ສ້າງ​ໃຫ້​ບັນດາ​ສະມາຊິກ​ພາຍ​ໃນ​ສະມາຄົມ​ມີ​ສຸຂະພາບ​ແຂງແຮງ. ການ​ແຂ່ງຂັນ​ກິລາ​ດອກ​ປີກ​ໄກ່ ​ສນຮລ ນະຄອນຫຼວງ​ວຽງ​ຈັນ-ເບຍ​ລາວ ຈັດ​ຂຶ້ນ ເມື່ອ​ວັນ​ທີ 24 ກຸມພາ ຜ່ານ​ມາ​ນີ້, ທີ່​ສະໂມສອນ​ດອກ​ປີກ​ໄກ່ເບຍ​ລາວ ບ້ານ​ສາລາ​ຄຳ ເມືອງ​ຫາດ​ຊາຍ​ຟອງນະຄອນຫຼວງ​ວຽງ​ຈັນ, ໂດຍ​ໃຫ້​ກຽດ​ເຂົ້າ​ຮ່ວມ ແລະ ມອບ​ລາງ ວັນ​ຂອງ​ທ່ານ ອູ່​ຊ້າງ ແສງ​ທອງ ຜູ້​ຈັດການ​ພາກນະຄອນຫຼວງ​ວຽງ​ຈັນ ທັງ​ເປັນ​ທີ່​ປຶກສາ​ຊີ້​ນຳ​ວຽກ​ງານ ​ສນຮລ ແລະ ທ່ານ ຄຳ​ແພງ ເພົ້າ​ບົວ​ວົງ ປະທານ ​ສນຮລ, ມີ​ບັນດາ​ຄະນະ​ບໍລິຫານ​ງານ​ສະມາຄົມ, ສະມາຊິກ ແລະ ສື່​ມວນ​ຊົນ​ເຂົ້າ​ຮ່ວມ. ການ​ແຂ່ງຂັນ​ລາຍການ​ດັ່ງກ່າວແບ່ງອອກເປັນ 2 ປະເພດ ຄື: ຮຸ່ນ​ຊາວ​ໜຸ່ມ​ຄູ່​ຊາຍ ແລະ ຮຸ່ນ​ອາວຸໂສ​ຄູ່​ຊາຍ; ຊາວ​ໜຸ່ມ​ມີ 24 ຄົນ ແລະ ອາວຸໂສ 10 ທ່ານ. ການ​ແຂ່ງຂັນ​ຈັບ​ສະຫຼາກ​ປະ​ກົບ​ຄູ່​ແຂ່ງຂັນ​ເສຍ​ຕົກ​ຮອບ, ຄັດ​ເລືອກ​ເອົາ​ທີມ​ຊະນະ​ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຕໍ່​ໄປ. ຜ່ານ​ການ​ແຂ່ງຂັນ​ຜົນ​ປະກົດ​ວ່າ: ຊະນະ​ເລີດ​ຮຸ່ນ​ຊາວ​ໜຸ່ມ​ແມ່ນ​ ທ່ານ ສຸ​ລິ​ເດດ ກັບ ທ່ານ ເອກະລາດ ແລະ ອັນ​ດັບ​ທີ 2 ທ່ານ ບຸນ​ຕຸລາ ກັບ ທ່ານ ເພັດ​ສະຫວັນ; ສ່ວນ​ຮຸ່ນ​ອາວຸໂສ ຊະນະ​ເລີດ​ແມ່ນ ​ທ່ານ ບຸນ​ສຸກ ຈາກ​ບໍລິສັດ ເບຍ​ລາວ ກັບ ທ່ານ ນ້ອຍ​ໄຊ​ ຫຼ້າ​ຄຳ ຈາກ​ກຸ່ມ​ນັກ​ຂ່າວ​ສາຍ​ກິລາ​ລາວ ຫຼື ລາວ​ສະປອດ​ມິ​ເດຍ ແລະ ອັນ​ດັບ​ທີ 2 ແມ່ນ ​ທ່ານ ນາງ ບູມ ຮ່ວມ​ກັບ ​ທ່ານ ບຸນ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ