POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນຈັນ, ວັນທີ 14 ຕຸລາ 2024

ທະຫານແຂວງບໍ່ແກ້ວ ສະຫຼຸບວຽກງານປ້ອງກັນຊາດຮອບດ້ານ
ເວລາອອກຂ່າວ: 2024-02-29 15:29:07 | ຜູ້ຂຽນ : admin2 | ຈຳນວນຄົນເຂົ້າຊົມ: 1040 | ຄວາມນິຍົມ:

ກອງບັນຊາການທະຫານແຂວງບໍ່ແກ້ວໄດ້ສະຫຼຸບຖອດຖອນບົດຮຽນວຽກງານປ້ອງກັນຊາດຮອບດ້ານປະຈຳປີ 2023 ແລະ ວາງທິດທາງແຜນການປະຈໍາປີ 2024, ວັນທີ 28 ກຸມພາ 2024 ນີ້, ຢູ່ທີ່ສູນບັນຊາກອງບັນຊາການທະຫານແຂວງ ໂດຍການເປັນປະທານຂອງ ສະຫາຍ ພັນເອກ ບຸນມີ ພາມີໄຊ ຄະນະປະຈຳພັກແຂວງ ເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງບໍ່ແກ້ວ ແລະ ສະຫາຍ ພັນເອກ ທອງໄຂ ສີຍາລາດ ຮອງເລຂາຄະນະພັກ ຫົວໜ້າການທະຫານກອງບັນຊາການທະຫານແຂວງບໍ່ແກ້ວ, ມີ ຄະນະພັກ-ຄະນະບັນຊາ 6 ຫ້ອງ, 5 ກອງບັນຊາການທະຫານເມືອງ, 2 ກອງພັນນ້ອຍ, ໂຮງຮຽນ, ໂຮງໝໍ, ກອງຮ້ອຍເອກະລາດ, ແຂກຖືກເຊີນຈາກພະແນກການ ຕະຫຼອດຮອດ ພະນັກງານຫຼັກແຫຼ່ງເຂົ້າຮ່ວມ. ກອງປະຊຸມ ສະຫາຍ ພັນໂທ ບຸນຄ້ຳ ຄຳພັນ ຮອງເລຂາຄະນະພັກຮາກຖານ ຮອງຫົວໜ້າຫ້ອງການກອງບັນຊາການທະຫານແຂວງບໍ່ແກ້ວ ໄດ້ສະຫຼຸບຕີລາຄາການເຄື່ອນໄຫວຈັດຕັ້ງປະຕິບັດວຽກງານປ້ອງກັນຊາດຮອບດ້ານໃນໄລຍະ 1 ປີ ຜ່ານມາ ແລະ ວາງທິດທາງແຜນການໃນ 1 ປີຕໍ່ໜ້າ. ກອງບັນຊາການທະຫານແຂວງບໍ່ແກ້ວ ປັດຈຸບັນໂດຍລວມແມ່ນມີຄວາມສະຫງົບ ແລະ ປອດໄພ 100%, ພະນັກງານນາຍ ແລະ ພົນທະຫານແມ່ນມີຄວາມຫ້າວຫັນວ່ອງໄວມີນໍ້າໃຈຮັກຊາດຢ່າງສູງສົ່ງຕ້ານ ແລະ ສະກັດກັ້ນທຸກກົນອຸບາຍ ແລະ ບັນດາປະກົດການຫຍໍ້ທໍ້ຂອງພວກອິດທິກຳລັງປໍລະປັກຈັດຕັ້ງກຳລັງປ້ອງກັນເວນຍາມຄ້າຍຄູ່ ແລະ ຂອບເຂດຄວາມຮັບຜິດຊອບທົ່ວເທດສະບານແຂວງໃຫ້ມີຄວາມສະຫງົບ ແລະ ປອດໄພໂດຍພື້ນຖານ. ໂດຍປະຕິບັດຕາມ 4 ໜ້າທີ່ໃຫຍ່ 26 ແຜນງານຂອງຄະນະພັກກະຊວງປ້ອງກັນປະເທດໃຫ້ປະກົດຜົນເປັນຈິງ, ພ້ອມກັນນັ້ນ ຜູ້ແທນກອງປະຊຸມໄດ້ສຸມສະຕິປັນຍາເຂົ້າໃນການຄົ້ນຄວ້າປະກອບຄຳຄິດເຫັນ, ແລກປ່ຽນບົດຮຽນດ້ວຍບັນກາດຟົດຟື້ນ ແລະ ມີຄວາມໝາຍສຳຄັນຢ່າງເລິກເຊິ່ງ. ເພື່ອປັບປຸງແກ້ໄຂວຽກງານປ້ອງກັນຊາດຮອບດ້ານກໍຄືປັບປຸງກໍ່ສ້າງພັກ-ພະນັກງານ, ກໍ່ສ້າງກຳລັງປະກອບອາວຸດທ້ອງຖິ່ນ ແຂວງບໍ່ແກ້ວ ໃນທຸກດ້ານຕາມແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກ, ຮັບປະກັນເຮັດໃຫ້ກຳລັງປະກອບອາວຸດທ້ອງຖິ່ນຮາກຖານມີຄວາມສະຫງົບໂດຍພື້ນຖານ.ຈາກນັ້ນຍັງໄດ້ມອບໃບຢັ້ງຢືນກົມກອງ 3 ປອດ (ປອດໃສ, ປອດໄພ, ປອດຄະດີ) ປະເພດ I ຈຳນວນ 17 ກົມກອງ ແລະ ປະເພດ II ຈຳນວນ 15 ກົມກອງ, ມອບຫຼຽນໄຊພິລະອາດຫານຊັ້ນ I ໃຫ້ບຸກຄົນ ຈຳນວນ 10 ສະຫາຍ, ມອບຫຼຽນໄຊພິລະອາດຫານຊັ້ນ II ໃຫ້ບຸກຄົນ ຈຳນວນ 88 ສະຫາຍ, ມອບຫຼຽນໄຊພິລະອາດຫານຊັ້ນ III ໃຫ້ບຸກຄົນ ຈຳນວນ 253 ສະຫາຍ, ໃບຍ້ອງຍໍກະຊວງປ້ອງກັນປະເທດ 114 ສະຫາຍ, ໃບຍ້ອງຍໍກົມໃຫຍ່ການເມືອງກອງທັບ 104 ສະຫາຍ, ມອບໃບຍ້ອງຍໍສັນລະເສີນໃຫ້ແກ່ບຸກຄົນ ແລະ ກົມກອງລວມໝູ່ຂັ້ນກອງບັນຊາການ ຈຳນວນ 734 ໃບ. ເປັນກຽດຂຶ້ນມອບຂອງ ສະຫາຍ ພັນເອກ ບຸນມີ ພາມີໄຊ ຄະນະປະຈໍາພັກແຂວງ ເລຂາຄະນະພັກ ກອງບັນຊາການຫົວໜ້າການເມືອງ ກອງບັນຊາການທະຫານແຂວງ ບໍ່ແກ້ວ ພ້ອມຄະນະຢ່າງສົມກຽດ. ໃນຕອນທ້າຍກອງປະຊຸມ, ສະຫາຍ ພັນເອກ ບຸນມີ ພາມີໄຊ ໄດ້ຍ້ອງຍໍຊົມເຊີຍຕໍ່ວຽກງານຜົນສໍາເລັດທີ່ສ້າງມາໄດ້ໃນໄລຍະຜ່ານມາ ພ້ອມທັງເນັ້ນໜັກ ບາງບັນຫາໃຫ້ຄະນະພັກ-ຄະນະບັນຊາແຕ່ລະຂັ້ນຈົ່ງພ້ອມກັນສຶກສາອົບຮົມການເມືອງ- ນໍາພາແນວຄິດໃຫ້ເປັນບັນຫາສໍາຄັນ, ຈັດຕັ້ງປະຕິບັດເຮັດສຳເລັດໜ້າທີ່ວຽກງານຕາມພາລະບົດບາດຂອງຕົນເຂົ້າໃນການນຳພາ-ຊີ້ນໍາ, ບັນຊາພະນັກງານ-ນັກຮົບ, ປະຕິບັດລະບອບປະຊຸມ ແລະ ລະບົບສ່ອງແສງລາຍງານ ພ້ອມກັບຕິດຕາມກວດກາສະພາບການໃຫ້ໜັກແໜ້ນ ເຂັ້ມແຂງ ແລະ ວ່ອງໄວທັນເວລາ, ເປັນເຈົ້າການເພີ່ມທະວີມີສະຕິລະວັງຕົວ ທັບມ້າງທຸກກົນອຸບາຍ ຫັນປ່ຽນໂດຍສັນຕິຂອງສັດຕູ, ສືບຕໍ່ປັບປຸງແບບແຜນວິທີການເຮັດວຽກ, ຄົ້ນຄວ້າສຶກສາອົບຮົມດ້ານທິດສະດີການເມືອງຂອງພັກ, ເພື່ອແນໃສ່ກໍ່ສ້າງພັກ-ພະນັກງານ ກໍຄືການປັບປຸງກໍ່ສ້າງກຳລັງປະກອບອາວຸດທ້ອງຖິ່ນໃຫ້ມີຄວາມເຕີບໃຫຍ່ໜັກແໜ້ນ ເຂັ້ມແຂງ ກ້າວຂຶ້ນຢ່າງບໍ່ຢຸດຢັ້ງ. ຂ່າວໂດຍ: ວໍລະສິດ ພິດສະຫາຍ, ເບີໂທ: 020 9444 9236. ພາບ: ພາກ ສຸທິປັນຍາ.

news to day and hot news