ກອງທັບປະຊາຊົນລາວ
 
ວັນພະຫັດ, ວັນທີ 18 ເມສາ 2024

  

ກອງປະຊຸມສະຫຼຸບວຽກງານພະລາທິການ-ການເງິນທົ່ວກອງບັນຊາການທະຫານແຂວງຫຼວງນໍ້າທາປະຈໍາປີ 2023
ເວລາອອກຂ່າວ: 2024-02-29 15:31:01 | ຜູ້ຂຽນ : admin2 | ຈຳນວນຄົນເຂົ້າຊົມ: 258 | ຄວາມນິຍົມ:



ກອງປະຊຸມສະຫຼຸບຖອດຖອນບົດຮຽນການຈັດຕັ້ງປະຕິບັດວຽກງານພະລາທິການ-ການເງິນ ທົ່ວກອງບັນຊາການທະຫານແຂວງຫຼວງນໍ້າທາ ປະຈໍາປີ 2023 ຈັດຂຶ້ນໃນລະຫວ່າງວັນທີ 27-28 ກຸມພາ 2024 ນີ້, ຢູ່ທີ່ສະໂມສອນຂອງກອງບັນຊາການ ພາຍໃຕ້ການເປັນປະທານຂອງ ສະຫາຍ ພັນໂທ ກໍາມະນີ ມິດລະແສນ ຄະນະພັກກອງບັນຊາການ ຮອງຫົວໜ້າຫ້ອງພະລາ, ໃຫ້ກຽດເຂົ້າຮ່ວມຂອງ ສະຫາຍ ພົນຈັດຕະວາ ອິນແກ້ວ ມະນີຈັນ ກໍາມະການປະຈໍາພັກແຂວງ ເລຂາພັກ ຫົວໜ້າການທະຫານ ກອງບັນຊາການທະຫານແຂວງຫຼວງນໍ້າທາ, ມີສະຫາຍ ພົນຈັດຕະວາ ຫູມພັນ ແກ້ວວັງລາດ ຮອງເລຂາພັກ ຫົວໜ້າການເມືອງ ກອງບັນຊາການທະຫານແຂວງ ມີຄະນະພັກກອງບັນຊາການ, ຄະນະພັກ-ຄະນະບັນຊາ 05 ເມືອງ 02 ກອງພັນ 05 ກອງຮ້ອຍຊາຍແດນ 025 ຫ້ອງ ກົມກອງອ້ອມຂ້າງ, ໂຮງຮຽນ, ໂຮງໝໍ, ຜູ້ຕາງໜ້າທີ່ເຮັດວຽກງານພະລາທິການ ແລະ ການເງິນຈາກບັນດາກົມກອງເຂົ້າຮ່ວມ. ສະຫາຍ ພັນໂທ ກໍາມະນີ ມິດລະແສນ ຄະນະພັກກອງບັນຊາການ ຮອງຫົວໜ້າຫ້ອງພະລາໄດ້ມີຄໍາເຫັນ ແລະ ກ່າວເປີດກອງປະຊຸມ ໂດຍຍົກໃຫ້ເຫັນຄວາມສໍາຄັນຂອງວຽກງານພະລາທິການ-ການເງິນໃນກອງທັບ ເຊິ່ງແມ່ນເຫລົ່າຮົບໜຶ່ງທີ່ສໍາຄັນ, ເປັນປັດໄຈພື້ນຖານປະກອບສ່ວນໃຫ້ກົມກອງເຮັດສໍາເລັດໜ້າທີ່ການເມືອງຂອງຕົນ ແລະ ເປັນກໍາລັງແຮງສັງລວມຂອງກອງທັບ, ຮັບປະກັນໂດຍກົງທາງດ້ານການເຄື່ອນໄຫວວຽກງານກຽມພ້ອມສູ້ຮົບ ແລະ ສູ້ຮົບໄດ້ໃນທຸກສະຖານະການ ໃນດ້ານການຮັບປະກັນສຸຂະພາບ ແລະ ຊີວິດການເປັນຢູ່ຂອງພະນັກງານ-ນັກຮົບຢູ່ໃນກອງທັບ. ກອງປະຊຸມຈະໄດ້ພ້ອມກັນສັງເກດຕີລາຄາຄືນກ່ຽວກັບການຈັດຕັ້ງປະຕິບັດວຽກງານພະລາທິການ-ການເງິນໃນ 1 ປີຜ່ານມາ ກໍຄື ການຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານຂອງຄະນະພັກກະຊວງປ້ອງກັນປະເທດວາງອອກ ໂດຍສະເພາະແມ່ນແຜນງານໃຫຍ່ທີ 3 ວຽກງານຈັດຕັ້ງຮັບປະກັນພະລາທິການເພື່ອຄວາມເປັນເອກະພາບໃນການປັບປຸງກໍ່ສ້າງກອງທັບໃຫ້ມີການຫັນປ່ຽນໃໝ່ຢ່າງຕັ້ງໜ້າ, ພ້ອມກັນຄົ້ນຄ້ວາເປັນເອກະພາບຕໍ່ກັບທິດທາງແຜນການທີ່ຈະສຸມໃສ່ຈັດຕັ້ງປະຕິບັດໃນປີ 2024 ໃຫ້ມີຜົນສໍາເລັດສູງຂຶ້ນກວ່າເກົ່າ. ໃນກອງປະຊຸມ, ສະຫາຍ ພັນໂທ ຫຼອງ ທອງສະໄໝ ຮອງຫົວໜ້າຫ້ອງພະລາທິການກໍໄດ້ສະຫຼຸບຕີລາຄາຄືນເຖິງການເຄື່ອນໄຫວຈັດຕັ້ງປະຕິບັດວຽກງານພະລາທິການ-ການເງິນໃນຫຼາຍດ້ານທີ່ພົ້ນເດັ່ນ. ຄະນະພັກ-ຄະນະບັນຊາ, ພະນັກງານວິຊາການທີ່ເຮັດວຽກງານພະລາທິການ ໃນໄລຍະທີ່ຜ່ານມາ ໄດ້ເອົາໃຈໃສ່ຕໍ່ໜ້າທີ່ວຽກງານຂອງຕົນ ຮັບປະກັນໃຫ້ແກ່ການເຄື່ອນໄຫວ, ຫັດແອບ ແລະ ກຽມພ້ອມສູ້ຮົບ, ຈັດຕັ້ງຮັບປະກັນຢ່າງຄົບຖ້ວນ, ທັນເວລາ, ດ້ານວັດຖຸ, ພາຫະນະຮັບໃຊ້, ວຽກງານຮັບປະກັນຊີວິດການເປັນຢູ່ການຈັດຕັ້ງລ້ຽງດູທັບ ດ້ານສະບຽງອາຫານ, ດ້ານການຈັດຕັ້ງກິນດື່ມລວມໝູ່, ດ້ານເຄື່ອງນຸ່ງຫົ່ມ, ດ້ານນໍ້າມັນເຊື້ອໄຟ, ວຽກງານຄຸ້ມຄອງທີ່ດິນ, ໄຟຟ້າ ແລະ ນໍ້າປະປາ, ຮັກສາເນື້ອທີ່ປູກຢາງພາລາ 126 ເຮັກຕາ, ມີຕົ້ນຢາງທັງໝົດ 27.712 ຕົ້ນ, ປາດແລ້ວ 23. 267 ຕົ້ນ, ປູກພຶດຊະນິດຕ່າງໆໄດ້: 72.952 ກິໂລ ທຽບໃສ່ແຜນການປະຕິບັດໄດ້ 51,4%, ງົວ-ຄວາຍ 119 ໂຕ, ໝູ-ແບ້ 131 ໂຕ, ສັດປີກ 31.593 ໂຕ ແລະ ສັດເຄີ່ງບົກ-ເຄີ່ງນໍ້າ 26.097 ໂຕ, ສ້າງແຫຼ່ງລາຍຮັບຈາກການບໍລິການຕ່າງໆໄດ້ 2 ຮ້ອຍລ້ານກວ່າກີບ. ກອງປະຊຸມຄັ້ງນີ້, ຄະນະພັກ-ຄະນະບັນຊາແຕ່ລະຂັ້ນ, ກໍຄືພະນັກງານຜູ້ທີ່ເຮັດວຽກງານພະລາທິການ-ການເງິນທົ່ວກອງທັບ ຍັງຈະໄດ້ພ້ອມກັນຍົກສູງຄວາມຮັບຜິດຊອບຂອງຕົນສຸມສະຕິປັນຍາເຂົ້າໃນການຄົ້ນຄວ້າ ແລະ ປະກອບຄໍາເຫັນໃສ່ເນື້ອໃນຕ່າງໆ ຂອງກອງປະຊຸມວຽກງານພະລາທິການ-ການເງິນທົ່ວກອງທັບ ປະຈໍາປີ 2023 ແລະ ທິດທາງແຜນການຄາດໝາຍສູ້ຊົນວຽກງານ ປະຈໍາປີ 2024 ເພື່ອຮັບປະກັນວຽກງານຈຸຸດສຸມໃນຕໍ່ໜ້າມີໃບໜ້າອັນໃໝ່ແລະໄດ້ຮັບປະສິດທິຜົນສູງຂຶ້ນກວ່າເກົ່າ. ໂດຍ: ບຸນມີ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ