ກອງທັບປະຊາຊົນລາວ
 
ວັນພຸດ, ວັນທີ 24 ເມສາ 2024

  

​ປີ 2023 ທົ່ວ​ຫ້ອງ​ວ່າການ​ກະຊວງປ້ອງກັນປະເທດ ຮັບຮອງ​ ໜ່ວຍ​ພັກ​ປອດ​ໃສ ເຂັ້ມແຂງ ໜັກ​ແໜ້ນ 37 ໜ່ວຍ​ພັກ
ເວລາອອກຂ່າວ: 2024-03-04 09:28:29 | ຜູ້ຂຽນ : admin1 | ຈຳນວນຄົນເຂົ້າຊົມ: 169 | ຄວາມນິຍົມ:



ການ​ກໍ່ສ້າງ​ໜ່ວຍ​ພັກ​ປອດ​ໃສ ເຂັ້ມແຂງ ໜັກ​ແໜ້ນ ແມ່ນ​ຄວາມ​ຮຽກ ຮ້ອງ​ຕ້ອງການ​ອັນ​ຈຳເປັນ​ພາວະ​ວິໄສ​ທີ່​ພົວພັນ​ເຖິງ​ການ​ຄົງ​ຕົວ ແລະ ຂະຫຍາຍ ຕົວ​ຂອງ​ພັກ​ ​ທັງ​ແມ່ນ​ຄວາມ​ຮັບຜິດຊອບ​ໂດຍ​ກົງ​ ຂອງ​ຄະນະ​ພັກ-ຄະນະ​ບັນຊາ, ອົງ​ການຈັດຕັ້ງ​ມະຫາຊົນ, ພະນັກງານ-ສະມາຊິກ​ພັກ ແລະ ນັກຮົບ​ທຸກ​ຄົນ ເຊິ່ງ​ໃນ​ໄລຍະ​ຜ່ານ​ມາ, ເຫັນ​ວ່າການ​ກໍ່ສ້າງ​ໜ່ວຍ​ພັກ​ປອດ​ໃສ ເຂັ້ມແຂງ ໜັກ​ແໜ້ນ ຢູ່​ແຕ່​ລະ​ກົມ​ກອງ ແມ່ນ​ມີ​ຂະ​ບວນ​ການ​ຟົດຟື້ນ ແລະ ກວ້າງຂວາງ, ມີ​ຫຼາຍ​ໜ່ວຍ​ພັກ ໄດ້​ຮັບ​ການ​ຢັ້ງຢືນ​ເປັນ ໜ່ວຍ​ພັກ​ປອດ​ໃສ ເຂັ້ມແຂງ ໜັກ​ແໜ້ນ, ມີ​ຫຼາຍ​ໜ່ວຍ​ພັກ​ຮັກສາ​ໄດ້​ຫຼາຍ​ຄັ້ງ​ຕິດຕໍ່​ກັນ ແລະ ສະມາຊິກ​ພັກ​ແຂງ ກໍ​ນັບ​ມື້​ເພີ່ມ​ຂຶ້ນ​ທາງ​ດ້ານ​ຈຳນວນ ແລະ ຄຸນ​ນະ​ພາບ ໃນ​ນີ້, ເວົ້າ​ສະເພາະ​ຢູ່​ຄະນະ​ພັກ​ອົງການ​ຫ້ອງ​ວ່າການ​ກະຊວງ​ປ້ອງ​ກັນ​ປະເທດ ກໍ​ໄດ້​ຮັບ​ໝາກຜົນ​ສູງ​ສົມຄວນ ສະແດງ​ອອກ​ໃນ​ສົກ​ປີ 2023 ຜ່ານ​ມາ, ມີ​ໜ່ວຍ​ພັກ​ໄດ້​ຮັບ​ການ​ຢັ້ງຢືນ​ເປັນ​ໜ່ວຍ​ພັກ​ປອດ​ໃສ ເຂັ້ມແຂງ ໜັກ​ແໜ້ນ ຈຳນວນ 37 ໜ່ວຍ​ພັກ. ສະຫາຍ ພັນ​ເອກ ສະຫຼອງ​ໄຊ ໄຊ​ຍະ​ເສນາ ຮອງ​ຫົວໜ້າ​ຫ້ອງ​ການເມືອງ ຫ້ອງ​ວ່າການ​ກະຊວງ​ປ້ອງ​ກັນ​ປະເທດ ໄດ້ລາຍ​ງານ​ໃນ​ໂອກາດ ສະຫຼຸບການ​ກໍ່ສ້າງ​ໜ່ວຍ​ພັກ​ປອດ​ໃສ ເຂັ້ມແຂງ ໜັກ​ແໜ້ນ ແລະ ກົມ​ກອງ​ປອດ​ໃສ ປອດ​ໄພ ປອດ​ຄະດີ ປະຈຳ​ປີ 2023 ທົ່ວ​ຫ້ອງ​ວ່າການ​ກະຊວງ​ປ້ອງ​ກັນ​ປະເທດ ໃຫ້​ຮູ້​ວ່າ: ຕະຫຼອດ​ໄລຍະ​ຜ່ານ​ມາ, ຄະນະ​ພັກ​ອົງການ​ຫ້ອງ​ວ່າການ​ກະຊວງປ້ອງກັນປະເທດ ຍາມ​ໃດ​ກໍ​ໄດ້​ເອົາໃຈໃສ່​ນຳພາ-ຊີ້ນໍາ​ຄະນະ​ພັກ​ແຕ່​ລະ​ຂັ້ນ ໃນ​ການຈັດຕັ້ງ​ຜັນ​ຂະຫຍາຍມະຕິ ວ່າ​ດ້ວຍ​ການ​ເພີ່ມ​ທະວີ​ການ​ກໍ່ສ້າງ​ໜ່ວຍ​ພັກ ປອດ​ໃສ ເຂັ້ມແຂງ ໜັກ​ແໜ້ນ, ໂດຍ​ໄດ້​ແຕ່ງຕັ້ງ​ຄະນະ​ຊີ້​ນຳ, ຊຸກຍູ້, ຕິດຕາມ, ກວດກາຕີ​ລາຄາ​ປະ​ເມີນ​ຜົນ​ຂະ​ບວນ​ການ​ກໍ່ສ້າງ​ໜ່ວຍ​ພັກ​ປອດ​ໃສເຂັ້ມແຂງ ໜັກ​ແໜ້ນ ທົ່ວ​ຄະນະ​ ພັກ​ອົງການ​ຫ້ອງ​ວ່າການ​ກະຊວງ, ສ່ວນ​ຄະນະ​ພັກ​ຮາກ​ຖານ ແລະ ໜ່ວຍ​ພັກ ກໍ​ມີ​ແຜນການ, ມີ​ຄາດໝາຍ​ສູ້​ຊົນ ແລະ ຈັດ​ຕັ້ງ​ເຄື່ອນ​ໄຫວ​ຢ່າງ​ຕັ້ງໜ້າ, ພະນັກ ງານ-ສະມາຊິກ​ພັກ ແລະ ມະຫາຊົນມີ​ຄວາມ​ຕື່ນ​ຕົວ​ເຂົ້າ​ຮ່ວມ​ຢ່າງ​ເປັນ​ຂະ​ບວນ​ການ​ກວ້າງຂວາງ ໃນ​ນັ້ນ, ຄະນະ​ພັກ-ຄະນະ​ບັນຊາ​ແຕ່​ລະ​ຂັ້ນ, ແຕ່​ລະ​ກົມ​ກອງ​ໄດ້​ຖື​ສຳຄັນ​ວຽກ​ງານ​ສຶກ​ສາ​ອົບຮົມ​ການເມືອງ-ນຳພາແນວ​ຄິດໃຫ້​ຖັນ​ແຖວ​ພະນັກງານ-ສະມາຊິກ​ພັກ ໄດ້​ຮັບ​ຮູ້​ເຊື່ອມ​ຊຶມ​ແນວທາງ​ແຜນ​ນະໂຍບາຍ​ຂອງ​ພັກ, ກົດໝາຍ​ຂອງ​ລັດ, ມະຕິ, ຄຳ​ສັ່ງ​ຂອງ​ຂັ້ນ​ເທິງ ເຮັດ​ໃຫ້​ພະນັກງານ-ສະມາຊິກ​ພັກ ມີ​ຄຸນ​ທາດ​ການເມືອງ​ໜັກ​ແໜ້ນ, ມີ​ຄວາມ​ຈົງ​ຮັກ​ພັກດີ​ຕໍ່​ອຸດົມ​ການ​ຂອງ​ພັກ, ມີ​ຄວາມ​ຮັບຜິດຊອບ ແລະ ເຮັດ​ສຳເລັດ​ໜ້າທີ່​ການເມືອງ​ຂອງ​ຕົນ, ໄດ້​ເອົາໃຈໃສ່​ຈັດ​ຕັ້ງ​ຄົ້ນຄວ້າ​ເຊື່ອມ​ຊຶມ ແນວທາງ​ນະໂຍບາຍ​ຂອງ​ພັກ, ກົດໝາຍ​ຂອງ​ລັດ, ລະ ບຽບ​ວິໄນ​ຂອງ​ກອງທັບ, ດຳເນີນ​ຊີວິດ​ການເມືອງ​ຢ່າງ​ກວ້າງຂວາງ ແລະ ເລິກເຊິ່ງ, ຈັດ​ຕັ້ງ​ປາຖະກະຖາ​ມູນເຊື້ອ​ຂອງ​ຊາດ, ຂອງ​ພັກ, ຂອງ​ກອງທັບ, ວັນ​ສຳຄັນ​ຕ່າງໆ, ເຜີຍແຜ່​ສະພາບ​ການ​ພາຍ​ໃນ ແລະ ຕ່າງປະເທດ ເພື່ອ​ສ້າງ​ຄວາມ​ຮັບ​ຮູ້​ທີ່​ຖືກຕ້ອງ​ໃຫ້​ແກ່ ສະມາຊິກ​ພັກ-ພະນັກງານ, ຄະນະ​ພັກ ຕະຫຼອດ​ພະນັກງານ-ສະມາຊິກ​ພັກ ມີ​ຄວາມ​ເປັນ​ເອກະ​ພາບ​ກັນ​ສູງ ຕໍ່​ແນວທາງ​ນະໂຍ ບາຍ​ຂອງ​ພັກ, ຢຶດ​ໝັ້ນ​ຕໍ່​ອຸດົມ​ການ​ຂອງ​ພັກ, ມີ​ຄວາມ​ສາມັກຄີ​ເປັນ​ເອກະ​ພາບ​ພາຍ​ໃນ​ແໜ້ນ​ແຟ້ນ, ເຄົາລົບ ແລະ ປະຕິບັດ​ລະບຽບ​ກົດໝາຍ ແລະ ລະບຽບ​ວິໄນ​ຂອງ​ກອງທັບ​ຢ່າງ​ເຂັ້ມ​ງວດ, ໄດ້​ເອົາໃຈໃສ່​ປັບປຸງ​ບູລະນະ​ການຈັດຕັ້ງ​ພັກ ໂດຍ​ຢຶດ​ໝັ້ນ ແລະ ປະຕິບັດ​ຢ່າງ​ເຂັ້ມ​ງວດ ຕາມ 5 ຫຼັກການ 3 ທິດ​ນຳ ໃນ​ການ​ກໍ່ສ້າງ ແລະ ປັບປຸງ​ພັກ, ເສີມ​ຂະຫຍາຍ​ລັກສະນະ​ນຳພາ, ສຶກ​ສາ​ອົບຮົມ ແລະ ຕັ້ງໜ້າ​ກໍ່ສ້າງ​ໜ່ວຍ​ພັກ​ປອດ​ໃສ ເຂັ້ມແຂງ ໜັກ​ແໜ້ນ ຕິດ​ພັນ ກັບ​ການ​ກໍ່ສ້າງ​ກອງ 3 ປອດ ຢ່າງ​ເປັນ​ຂະ​ບວນ​ການ​ກວ້າງຂວາງ ເຮັດ​ໃຫ້​ບັນດາ​ການຈັດຕັ້ງ​ພັກ ໄດ້​ຮັບ​ການ​ປັບປຸງ​ບູລະນະ ມີ​ຄວາມ​ໜັກ​ແໜ້ນ​ເຂັ້ມແຂງ. ດ້ານ​ການ​ຂະຫຍາຍ​ພັກ​ ​ຖື​ເອົາ​ຄຸນ​ນະ​ພາບ​ເປັນ​ກົກ ແລະ ປະຕິບັດ​ຕາມ​ຂັ້ນ​ຕອນ​ໃນ​ການ​ຮັບ​ມະຫາຊົນ​ຜູ້​ດີເດັ່ນ ຈາກ​ການ​ເຝິກຝົນ​ຫຼໍ່​ຫຼອມ​ໃນ​ຂະ​ບວນ​ການ​ຕົວ​ຈິງ, ເຊິ່ງ​ໃນ​ ປີ 2023 ໄດ້​ອອກ​ໃບຢັ້ງຢືນ​ຮຽນ​ສະໜັບສະໜູນ​ເປົ້າ​ໝາຍ ຂະຫຍາຍ​ເຂົ້າ​ເປັນ​ສະມາຊິກ​ພັກ ຈຳນວນ 66 ສະຫາຍ, ອອກ​ໃບຢັ້ງຢືນ​ຮຽນ​ກົດ​ລະບຽບ​ພັກ 33 ສະຫາຍ, ຮັບ​ມະຫາຊົນ​ກ້າວໜ້າ​ເຂົ້າ​ເປັນ​ສະມາຊິກ​ພັກ​ສຳຮອງ 23 ສະຫາຍ ແລະ ເລື່ອນ​ສະມາຊິກ​ພັກ​ສຳຮອງ​ຂຶ້ນ​ສົມບູນ 26 ສະຫາຍ ຄຽງ​ຄູ່​ກັນ​ນັ້ນ, ຄະນະ​ພັກ​ແຕ່​ລະ​ຂັ້ນ​ຍັງ​ໄດ້​ຮັກສາ ແລະ ເສີມ​ຂະຫຍາຍ​ມູນເຊື້ອ​ແບບແຜນ​ນຳພາ​ຂອງ​ພັກ, ປະຕິບັດ​ລະບອບ​ການ​ປະຊຸມ​ ຂອງ​ຄະນະ​ພັກ, ຄົ້ນຄວ້າ​ປຶກສາ​ຫາລື, ຕົກລົງ​ວຽກ​ງານ, ບົນ​ພື້ນຖານ​ເຄົາລົບ​ຫຼັກການ​ລວມ​ສູນ​ປະຊາທິປະໄຕ, ນຳ ພາ​ເປັນ​ໝູ່​ຄະນະ, ບຸກຄົນ​ຮັບຜິດຊອບ, ໄດ້​ດຳເນີນ​ຊີວິດ​ການເມືອງ​ເປັນ​ປະຈຳ, ຈັດ​ຕັ້ງ​ກອງ​ປະຊຸມ​ຮັບ​ສ່ອງ​ແສງ​ລາຍ​ງານ​ການ​ນຳພາ​ຂອງ​ພັກ ເປັນ​ປົກກະຕິ ເພື່ອ​ພ້ອມ​ກັນ​ເສີມ​ຂະຫຍາຍ​ດ້ານ​ຕັ້ງໜ້າ, ແກ້​ໄຂ​ດ້ານ​ຫຍໍ້ທໍ້​ຕ່າງໆ ມີ​ຄວາມ​ວ່ອງໄວ ແລະ ທັນ​ເວລາ ພ້ອມ​ກັນ​ນັ້ນ, ຍັງ​ໄດ້​ຕັ້ງໜ້າ​ປະຕິບັດ​ໜ້າທີ່​ວິຊາ​ສະເພາະ​ເປັນ​ເສ ນາ​ທິ​ການ​ໃຫ້​ແກ່​ຂັ້ນ​ເທິງ ໃນ​ການຄົ້ນຄວ້າ​ສັງ​ລວມ, ວາງ​ແຜນການ, ຄົ້ນຄວ້າ​ຂີດ​ຂຽນ​ໃຫ້​ມີ​ຄຸນ​ນະ​ພາບ, ຄຸ້ມ​ຄອງ ແລະ ປົກ​ປັກ​ຮັກສາ​ເອກະສານ ຫັນ​ເຂົ້າ​ສູ່​ລະບຽບ​ແບບແຜນ, ຈັດ​ຕັ້ງ​ຜັນ​ຂະຫຍາຍ​ການ​ພົວພັນ​ຮ່ວມ​ມື​ກັບ​ກອງທັບ​ປະເທດ​ເພື່ອນ​ມິດ, ກອງທັບ​ບັນດາ​ປະເທດ​ໃນ​ພາກ​ພື້ນ ແລະ ໃນ​ໂລກ​ມີ​ປະ​ສິດທິ​ຜົນ, ເອົາໃຈໃສ່​ຄົ້ນຄວ້າ​ວາງ​ແຜນ, ປັບປຸງ-ຄຸ້ມ​ຄອງ​ຫົວໜ່ວຍ​ທຸລະ​ກິດ ແລະ ການ ​ຮ່ວມ​ລົງທຶນ​ໃຫ້​ມີ​ປະ​ສິດທິ​ຜົນ. ປັດຈຸບັນ​ນີ້, ຄະນະ​ພັກ​ອົງການ ຫ້ອງ​ວ່າການ​ກະຊວງປ້ອງກັນປະເທດປະກອບ​ມີ 4 ຄະນະ​ພັກ​ຮາກ​ຖານ, ມີ 31 ໜ່ວຍ​ພັກ​ຂຶ້ນ​ກັບ​ຄະນະ​ພັກ​ຮາກ​ຖານ, ມີ 11 ໜ່ວຍ​ພັກ​ຮາກ​ຖານ​ຂຶ້ນ​ກັບ​ຄະນະ​ພັກ. ຜ່ານ​ການ​ກໍ່ສ້າງ ໜ່ວຍ​ພັກ ປອດ​ໃສ ເຂັ້ມແຂງ ໜັກ​ແໜ້ນ ໃນ​​ປີ 2023 ຜ່ານ​ມາ, ມີ​ໜ່ວຍ​ພັກ​ໄດ້​ຮັບ​ການ​ຢັ້ງຢືນ​ເປັນ​ໜ່ວຍ​ພັກ​ປອດ​ໃສ ເຂັ້ມແຂງ ໜັກ​ແໜ້ນ ຈຳນວນ 37 ໜ່ວຍ​ພັກ ໃນ​ນີ້, ຖືກ​ຮັບຮອງ​ເປັນ​ຄັ້ງ​ທີ 5 ມີ 12 ໜ່ວຍ​ພັກ, ຮັບຮອງ​ເປັນ​ຄັ້ງ​ທີ 4 ມີ 4 ໜ່ວຍ​ພັກ, ຮັບຮອງ​ເປັນ​ຄັ້ງ​ທີ 3 ມີ 4 ໜ່ວຍ​ພັກ, ຮັບຮອງ​ເປັນ​ຄັ້ງ​ທີ 2 ມີ 9 ໜ່ວຍ​ພັກ, ຮັບຮອງ​ໃໝ່​ມີ 8 ໜ່ວຍ​ພັກ ແລະ ໜ່ວຍ​ພັກ​ກາງ ມີ 1 ໜ່ວຍ​ພັກ, ສາມາດ​ຕີ​ລາຄາ ແລະ ຮັບຮອງ​ເອົາ​ໄດ້​ສະມາຊິກ​ພັກ​ແຂງ ກວມ​ເອົາ 90,3% ແລະ ສະມາຊິກ​ພັກ​ກາງ ກວມ​ເອົາ 2,2%. ໂດຍ​ສັງ​ລວມ​ແລ້ວ ຜ່ານ​ການກໍ່ສ້າງ​ໜ່ວຍ​ພັກ​ປອດ​ໃສ ເຂັ້ມແຂງ ໜັກ​ແໜ້ນ ໃນ​ໄລຍະ​ຜ່ານ​ມາ ໄດ້​ເຮັດ​ໃຫ້​ການຈັດຕັ້ງ​ພັກ ທົ່ວ​ຫ້ອງ​ວ່າການກະຊວງປ້ອງກັນ ປະເທດ ມີ​ຄວາມປອດ​ໃສ ເຂັ້ມແຂງ ໜັກ​ແໜ້ນ, ກົມ​ກອງ​ມີ​ຄວາມ​ສະຫງົບ, ພະນັກງານ-ສະມາຊິກ​ພັກ ແລະ ມະຫາຊົນ ມີ​ຄຸນ​ທາດ​ການເມືອງ​ໜັກ​ແໜ້ນ, ມີ​ ຄຸນສົມບັດ​ສິນ​ທຳ​ປະຕິວັດ, ມີ​ສະຕິ​ລະວັງ​ຕົວ ແລະ ເປັນ​ເຈົ້າ​ການ​ຕອບ​ຕ້ານ​ກົນອຸບາຍ​ຂອງ​ສັດຕູ, ປະຕິບັດ​ລະບຽບ​ວິໄນ​ຂອງ​ກອງທັບ​ຢ່າງ​ເຂັ້ມ​ງວດ, ຕີ​ຖອຍ ​ບັນດາ​ປະກົດ​ການ​ຫຍໍ້ທໍ້​ຕ່າງໆ, ມີ​ຄວາມ​ຮັບຜິດຊອບ​ສູງ ແລະ ເຮັດ​ສຳເລັດ​ໜ້າທີ່​ການເມືອງ​ຂອງ​ກົມ​ກອງ​ໄດ້​ດີ​ຕະຫຼອດ​ມາ. ໂດຍ: ນາງ ຍ້ອມ​ເພັດ ວິໄລ​ພັນ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ