ກອງທັບປະຊາຊົນລາວ
 
ວັນສຸກ, ວັນທີ 24 ພຶດສະພາ 2024

  

ເວີ​ສະ​ແຕັບ​ເປິ້ນ ໄດ້​ແຊັມ 2 ສະໜາມ​ຕິດຕໍ່​ກັນ ລົດ​ສູດ​ໜຶ່ງ ຟໍ​​ຣ​ມູ​ລ້າ​ວັນ ປີ 2024
ເວລາອອກຂ່າວ: 2024-03-14 09:47:01 | ຜູ້ຂຽນ : admin1 | ຈຳນວນຄົນເຂົ້າຊົມ: 99 | ຄວາມນິຍົມ:



ການ​ແຂ່ງຂັນ​ລົດ​ສູດ​ໜຶ່ງ ຟໍ​​ຣ​ມູ​ລ້າ​ວັນ ປະຈຳ​ປີ 2024 ສະ ໜາມ​ທີ​ສອງ ທ້າຍ​ອາທິດ​ຜ່ານ​ມາ ອາ​ຣາ​ບີ ຊາ​ອຸ​ດິດ ກຣັງ​ປຣີ ທີ່​ສະໜາມ Jeddah Corniche Circuit ທີ່​ເມືອງ​ເຈັດ​ດ້າ ປະເທດ ອາ​ຣາ​ບີ ຊາ​ອຸ​ດິດ ມີ​ຄວາມ​ຍາວ​ຕໍ່​ຮອບ 6.174 ແມັດ ແຂ່ງ​ທັງ​ໝົດ 50 ຮອບ. ຜ່ານ​ການ​ແຂ່ງຂັນ​ປະກົດ​ວ່າ: ແມັກ ເວີ​ສະ​ແຕັບ​ເປິ້ນ ແຊັມ​ເກົ່າ ແລະ ເປັນ​ແຊັມ​ໂລກ 3 ປີ​ຫຼ້າ​ສຸດ ຈາກ​ຄ້າຍ Red Bull Racing-Honda ຜົນງານ​ດີ​ຕໍ່​ເນື່ອງ ອອກໂຕ​ເປັນ​ຄົນ​ທຳ​ອິດ ແລະ ປະຄອງ​ລົດ​ຄູ່​ໃຈ​ເຂົ້າ​ເສັ້ນ​ໄຊ​ເປັນ​ຄົນ​ທຳ​ອິດ ດ້ວຍ​ເວລາ 1 ຊົ່ວໂມງ 20 ນາທີ 43.273 ວິນາທີ ເອົາ​ຊະນະ​ເພື່ອນ​ເກົ່າ​ເຈົ້າ​ເດີມ​ເໝືອນ​ສະໜາມ​ທຳ​ອິດ ເຊີ​ຈີ​ໂອ້ ເປ​ເຣ​​ັຊ ນັກ​ຂັບ​ຊາວ ແມັກ​ຊິກ ເພື່ອນ​ຮ່ວມ​ທີມ 13.6431 ວິນາທີ. ທີ 3 ເປັນ​ຂອງ ຊາວ ເລັກ​ເລີ ອີກ​ໜຶ່ງ​ນັກ​ຂັບ​ລົດຈາກ​ຄ້າຍ​ເຟີ​ຣາ​ຣີ ຕາມ​ຫຼັງ 18 ກວ່າ​ວິນາທີ, ຂະນະ​ທີ່ ຄາ​​ຣລັອສ ເຊັນ ນັກ​ຂັບ​ຊາວ ແອັດ​ສະ​ປາຍ ຈາກ​ຄ້າຍ​ເຟີ​ຣາ​ຣີ ອັນ​ດັບ 3 ສະໜາມ​ທຳ​ອິດ ຖອນ​ຕົວ​ກະທັນຫັນ​ຍ້ອນ​ເຈັບ​ໄສ້​ຕິ່ງ ແລະ ໃຫ້ ໂອ​ລີ​ເວີ ເບຍ​ແມ້ນ ນັກ​ຂັບ​ລົດດາວ​ເດັ່ນ ອາຍຸ 18 ປີ ຊາວ​ອັງກິດ ມາ​ຂັບ​ແທນ ຜົນງານ​ບໍ່​ ທຳ​ມະ​ດາ​ຈົບ​ອັນ​ດັບ 7 ກັບ​ຄັ້ງ​ທຳ​ອິດ​ໃນ​ສັງວຽນ F1. ສ່ວນ ລຸຍ ຮາ​ມິນ​ຕັນ ແຊັມ​ໂລກ 7 ສະໄໝ ຈາກ​ຄ້າຍ Mercedes ຈົບ​ອັນ​ດັບ​ທີ 9 ຕາມ​ຫຼັງ 47 ກວ່າ​ວິນາທີ ແລະ ເຟີ​ນັນ​ໂດ ອາ​ລອນ​ໂຊ ແຊັມ​ໂລກ 2 ສະໄໝ ຈາກ​ຄ້າຍ Aston Martin Aramco-Mercedes ຈົບ​ອັນ​ດັບ​ທີ 5 ຕາມ​ຫຼັງ 35 ກວ່າ​ວິນາທີ. ຜ່ານ​ໄປ 2 ສະໜາມ​ທຳ​ອິດ ເວີ​ສະ​ແຕັບ​ເປິ້ນ ແຊັມ​ເກົ່າ ຂຶ້ນ​ນຳ ເກັບ​ໄດ້ 51 ຄະແນນ, ຮອງ​ລົງ​ມາ ເຊີ​ຈີ​ໂອ້ ເປ​ເຣ​​ັຊ ເພື່ອນ​ຮ່ວມ​ທີມ ມີ 36 ຄະແນນ, ອັນ​ດັບ 3 ຊາວ ເລັກ​ເລີ 28 ຄະແນນ. ການ​ແຂ່ງຂັນ F1 ປີ​ນີ້ ມີ​ສະ ໜາມ​ແຂ່ງຂັນ​ຫຼາຍ​ສຸດ​ໃນ​ປະ ຫວັດສາດ ລວມ 24 ສະໜາມ, ສະໜາມ​ຕໍ່​ໄປ ສະໜາມ​ທີ 3 ລາຍການ ​ອົດ​ສະ​ຕຼາລີ ກຣັງ​ປຣີ ຈະ​ແຂ່ງຂັນ​ວັນ​ທີ 24 ມີນາ ​ນີ້ ທີ່​ສະໜາມ Albert Park Circuit ທີ່​ນະຄອນ​ເມວ​ເບິ້ນ ປະເທດ ​ອົດ​ສະ​ຕຣາ​ລີ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ