ກອງທັບປະຊາຊົນລາວ
 
ວັນພຸດ, ວັນທີ 29 ພຶດສະພາ 2024

  

ກອງພັນ 410 ເປີດ​ບັ້ນ​ອົບຮົມ-ຫັດ​ແອບ ປະຈຳ​ປີ 2024
ເວລາອອກຂ່າວ: 2024-04-11 09:27:43 | ຜູ້ຂຽນ : admin1 | ຈຳນວນຄົນເຂົ້າຊົມ: 979 | ຄວາມນິຍົມ:



ວັນ​ທີ 2 ເມສາ 2024 ນີ້, ກອງພັນ 410 ກອງບັນຊາການທະຫານ​ແຂວງ​ໄຊ​ຍະ​ບູ​ລີ ໄດ້​ເປີດ​ບັ້ນ​ອົບຮົມ-ຫັດ​ແອບການ​ທະຫານ, ການເມືອງ, ພະລາທິການ ແລະ ເຕັກນິກ ປະຈຳ​ປີ 2024, ໂດຍ​ມີ ທ່ານ ແຫຼ້ ອ່ອນ​ສົມບູນ ຮອງ​ເລຂາ​ພັກ ເມືອງ​ຫົງ​ສາ ແຂວງ​ໄຊ​ຍະ​ບູ​ລີ, ມີ​ ສະຫາຍ ພັນ​ໂທ ໄມ​ໄຊ ແກ້ວ​ແກ່ນ​ຈັນ ຫົວໜ້າ​ການເມືອງ​ກອງພັນ 410, ມີ​ຄະນະ​ພັກ-ຄະນະ​ບັນຊາ, ແຂກ​ຖືກ​ເຊີນ ຕະຫຼອດ​ຮອດ​ພະນັກງານ-ນັກຮົບ ພາຍ​ໃນ​ກົມ​ກອງ​ເຂົ້າ​ຮ່ວມ. ໃນ​ພິທີ, ສະຫາຍ ພັນ​ຕີ ບຸນ​ປະເສີດ ຄຳ​ສະຫວາດ ຮອງ​ຫົວໜ້າ​ການ​ທະຫານ ​ກອງພັນ 410 ໄດ້​ຜ່ານ​ຄຳ​ສັ່ງ​ແນະນຳ ​ຂອງ​ຫ້ອງ​ເສນາ​ທິ​ການ ກອງ​ບັນຊາ​ການ​ທະຫານ​ແຂວງ​ໄຊ​ຍະ​ບູ​ລີ ວ່າ​ດ້ວຍ​ການ​ອົບຮົມ-ຫັດ​ແອບ ປັບປຸງ​ລະບຽບ​ແບບແຜນ, ຜ່ານ​ແຜນການ​ອົບຮົມ-ຫັດ​ແອບ ແລະ ຜ່ານ​ຂໍ້​ຕົກລົງ​ ຂອງ​ກອງພັນ 410 ວ່າ​ດ້ວຍ​ການ​ແຕ່ງຕັ້ງ ຄະນະ​ຮັບຜິດຊອບ​ບັ້ນອົບຮົມ-ຫັດ​ແອບ ການ​ທະຫານ, ການເມືອງ, ພະລາທິການ ແລະ ເຕັກນິກ ປະຈຳ​ປີ 2024. ການ​ອົບຮົມ-ຫັດ​ແອບ​ຄັ້ງ​ນີ້, ໄດ້ແບ່ງ​ອອກ​ເປັນ 2 ໄລຍະ ຄື: ໄລຍະ​ທີ 1 ເລີ່ມ​ແຕ່ ເດືອນ​ມີນາ ຫາ ເດືອນ​ພຶດສະພາ, ໄລຍະ​ທີ 2 ເລີ່ມ​ແຕ່​ເດືອນກໍລະກົດ ຫາ ເດືອນ​ຕຸລາ, ກຳນົດ​ເວລາ​ອົບຮົມ 180 ວັນ, ມີ​ພະນັກງານ-ນັກຮົບ​ເຂົ້າ​ຮ່ວມ​ທັງ​ໝົດ 134 ສະຫາຍ. ຕະຫຼອດ​ໄລຍະ​ການ​ອົບຮົມ ພະນັກງານ-ນັກຮົບ ຈະ​ໄດ້​ຮຽນ​ຮູ້​ກ່ຽວ​ກັບ ເນື້ອ​ໃນ​ທິດ​ສະ​ດີ​ຫຼັກການ ແລະ ພາກ​ປະຕິບັດ​ຕົວ​ຈິງ​ໄປ​ພ້ອມໆ ​ກັນ ເປັນຕົ້ນ​ແມ່ນ ອົບຮົມ​ພາກ​ຄວາມ​ຮູ້​ທົ່ວ​ໄປ, ອົບຮົມ​ວິຊາ​ສະເພາະ ສິລະ​ປະຍຸດ-ຍຸດທະວິທີ, ອົບຮົມ​ວຽກ​ງານ​ເສນາ​ທິ​ການ ແລະ ອື່ນໆ. ທັງ​ນີ້, ​ເພື່ອ​ເປັນ​ການ​ຍົກ​ລະດັບ​ຄວາມ​ຮູ້​ ຄວາມ​ສາມາດ ທາງ​ດ້ານ​ສິລະ​ປະຍຸດ-ຍຸດທະວິທີ ໃຫ້​ນາຍ ແລະ ພົນທະຫານ ມີ​ຄວາມ​ຊຳນິ​ຊຳນານ, ມີ​ໄຫວ​ພິກ​ຄ່ອງ​ແຄ່ວ ເພື່ອ​ຮັບປະກັນ​ການ​ກຽມພ້ອມ​ສູ້​ຮົບ ແລະ ແກ້​ໄຂ​ໄດ້​ໃນ​ທຸກ​ກໍລະນີ​ທີ່​ຈະ​ເກີດ​ຂຶ້ນ ທັງ​ເປັນ​ການ​ກະຕຸກ​ຊຸກຍູ້​ຂະ​ບວນ​ການ​ແຂ່ງຂັນ​ອົບຮົມ-ຫັດ​ແອບ​ຢູ່​ໃນ​ກົມ​ກອງ ໃຫ້​ເປັນ​ຂະ​ບວນ​ການ​ຟົດຟື້ນ ໂດຍ​ຄາດໝາຍ​ໃຫ້​ທຸກ​ກົມ​ກອງ​ເຫຼົ່າ​ຮົບ ຕ້ອງ​ເຊື່ອມ​ຊຶມ, ກຳ​ແໜ້ນ​ເນື້ອ​ໃນ​ຈິດໃຈ​ຂອງ​ຄຳ​ສັ່ງ, ແຜນການ​ອົບຮົມ​ຂອງ​ກອງ​ບັນຊາ​ການ​ທະຫານ​ແຂວງ​ວາງ​ອອກ​ຢ່າງ​ເຂັ້ມ​ງວດ ແລະ ກຳ​ແໜ້ນ​ແນວທາງ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ທົ່ວ​ປວງ​ຊົນ​ຮອບດ້ານ, ມີ​ສະຕິ​ຕໍ່​ການຈັດຕັ້ງ, ມີ​ລະບຽບ​ວິໄນ​ເຂັ້ມ​ງວດ, ຮັບປະກັນ​ການ​ກຽມພ້ອມ​ສູ້​ຮົບ, ຄວາມ​ເປັນ​ລະບຽບ​ຮຽບ​ຮ້ອຍ ແລະ ມີ​ຄວາມ​ປອດ​ໄພ 100%. ໂດຍ: ກິດ​ຕິ​ສັກ ບົວ​ໄລ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ