ວັນພຸດ, ວັນທີ 04 ທັນວາ 2024
ທະຫານແຂວງບໍ່ແກ້ວ ສະຫຼຸບຖອດຖອນບົດຮຽນວຽກງານກົດໝາຍ
ເວລາອອກຂ່າວ: 2024-05-14 09:34:20 | ຜູ້ຂຽນ : admin2 | ຈຳນວນຄົນເຂົ້າຊົມ: 1211 | ຄວາມນິຍົມ: 
ໃນວັນທີ9 ພຶດສະພາ 2024 ນີ້, ຢູ່ທີ່ກອງບັນຊາການທະຫານແຂວງບໍ່ແກ້ວ, ໄດ້ສະຫຼຸບຖອດຖອນບົດຮຽນວຽກງານກົດໝາຍໂດຍການເປັນປະທານຂອງ ສະຫາຍ ພົນຈັດຕະວາ ບຸນມີ ພາມີໄຊ ຄະນະປະຈຳພັກແຂວງ ເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງບໍ່ແກ້ວ, ສະຫາຍ ພັນເອກ ພັນສະໄໝ ວິໄລ ຮອງຫົວໜ້າກົມກົດໝາຍ ກົມໃຫຍ່ການເມືອງກອງທັບ, ມີພະນັກງານວິຊາການກົມກົດໝາຍ, ຄະນະຫ້ອງ ຕະຫຼອດຮອດບັນດາພະແນກການກ່ຽວຂ້ອງເຂົ້າຮ່ວມ.
ສະຫາຍ ພັນໂທ ບຸນຕີມ ນາມສະຫວັນ ຫົວໜ້າພະແນກກົດໝາຍ ກອງບັນຊາການທະຫານແຂວງບໍ່ແກ້ວ ໄດ້ລາຍງານສະພາບທີ່ຕັ້ງ, ຄວາມໝາຍຄວາມສຳຄັນ, ພາລະບົດບາດ, ສິດໜ້າທີ່ ແລະ ຜົນງານການເຄື່ອນໄຫວວຽກງານວິຊາສະເພາະກົດໝາຍໃນໄລຍະຜ່ານມາ. ເຊິ່ງໄດ້ຍົກໃຫ້ເຫັນດ້ານດີດ້ານອ່ອນ, ຂໍ້ສະດວກ, ຂໍ້ຍຸ້ງຍາກໃນການປະຕິບັດຕົວຈິງເປັນຕົ້ນ ພະແນກກົດໝາຍແມ່ນພະແນກໜຶ່ງທີ່ຂຶ້ນກັບຫ້ອງການເມືອງ ມີຖານະເທົ່າກັບພະແນກອື່ນໆຂອງກອງບັນຊາການ, ພາຍໃຕ້ການຊີ້ນຳໂດຍກົງ, ຮອບດ້ານຂອງກອງບັນຊາການ ແລະ ການຊີ້ນຳດ້ານວິຊາສະເພາະຂອງກົມກົດໝາຍ, ມີພາລະບົດບາດເປັນເສນາທິການທາງດ້ານກົດໝາຍໃຫ້ຄະນະພັກ-ຄະນະບັນຊາກອງບັນຊາການທະຫານແຂວງ ກ່ຽວກັບວຽກງານນິຕິກຳ, ໂຄສະນາເຜີຍແຜ່ກົດໝາຍ, ວຽກງານປະຕິບັດຄຳຕັດສິນຂອງສານ, ຄົ້ນຄວ້າ, ສ້າງ, ປັບປຸງນິຕິກຳ, ກວດກາຄວາມຊອດຄ່ອງທາງດ້ານກົດໝາຍ, ຮ່າງນິຕິກຳ ໃນຂອບເຂດຄວາມຮັບຜິດຊອບຂອງຕົນ ຕາມການມອບໝາຍຂອງ ຄະນະພັກ-ຄະນະບັນຊາ ທີ່ຕົນຂຶ້ນກັບ, ເຂົ້າຮ່ວມຄົ້ນຄວ້າໃຫ້ຄຳເຫັນທາງດ້ານກົດໝາຍ ກ່ຽວກັບຂໍ້ຂັດແຍ່ງຕ່າງໆ ຕາມການມອບໝາຍຂອງຂັ້ນເທິງທີ່ກ່ຽວຂ້ອງ, ລົງໂຄສະນາເຜີຍແຜ່ກົດໝາຍໃຫ້ພະນັກງານ-ນັກຮົບໃນທົ່ວທະຫານແຂວງ, ມີນາຍ ແລະ ພົນທະຫານເຂົ້າຮ່ວມຮັບຟັງທັງໝົດ 955 ສະຫາຍ, ຍິງ 58 ສະຫາຍ ແລະ ໄດ້ປະຕິບັດຕັດສິນວຽກງານອື່ນໆທີ່ກ່ຽວຂ້ອງທາງດ້ານກົດໝາຍທີ່ຕົນຮັບຜິດຊອບຕື່ມອີກ. ກອງປະຊຸມຍັງໄດ້ຜັດປ່ຽນກັນຂຶ້ນປະກອບຄຳຄິດຄຳເຫັນ, ແລກປ່ຽນບົດຮຽນເຊິ່ງກັນ ແລະ ກັນດ້ວຍຄວາມສ້າງສັນແນໃສ່ເສີມສ້າງດ້ານດີ ແລະ ຫາວິທີປັບປຸງແກ້ໄຂຈຸດອ່ອນຂໍ້ຄົງຄ້າງໃຫ້ດີຂຶ້ນເລື້ອຍໆ ເພື່ອເຮັດໃຫ້ວຽກງານກົດໝາຍມີຄວາມສັກສິດ ແລະ ມີປະສິດທິພາບສູງສຸດ.
ທ້າຍກອງປະຊຸມ ສະຫາຍ ພົນຈັດຕະວາ ບຸນມີ ພາມີໄຊ ໄດ້ຍ້ອງຍໍຊົມເຊີຍຜົນງານໃນໄລຍະຜ່ານມາ ພ້ອມທັງເນັ້ນໜັກໃຫ້ພະແນກການທີ່ກ່ຽວຂ້ອງຈົ່ງພ້ອມກັນເອົາໃຈໃສ່ທາງດ້ານການເມືອງນຳພາແນວຄິດເປັນກົກສອດຫ້ອຍເຂົ້າໃນທຸກຂົງເຂດວຽກງານ, ເຊື່ອມຊຶມບັນດານິຕິກຳຕ່າງໆຢ່າງເລິກເຊິ່ງ ແລະ ເປັນປົກກະຕິ, ປະຕິບັດບັນດາກົດລະບຽບຂອງພັກ ຂອງຊາດ ແລະ ຂອງກອງທັບຢ່າງເຂັ້ມງວດ, ຮັດແໜ້ນຄວາມສາມັກຄີພາຍໃນ-ພາຍນອກ, ເຮັດວຽກເປັນໝູ່ຄະນະແບ່ງວຽກໃຫ້ບຸກຄົນຮັບຜິດ, ເພື່ອເຮັດໃຫ້ກົມກອງເຕີບໃຫຍ່ເຂັ້ມແຂງເປັນກ້າວ.
ໂດຍ: ວໍລະສິດ ພິດສະຫາຍ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
