ກອງທັບປະຊາຊົນລາວ
 
ວັນພຸດ, ວັນທີ 26 ມິຖຸນາ 2024

  

ເຊັນ​ບົດ​ບັນທຶກ ມອບ-ຮັບ ອັດຖິ ທະຫານ​ອາສາ​ສະໝັກ ແລະ ຊ່ຽວຊານ ຫວຽດນາມ ກັບ​ຄືນ​ປະເທດ
ເວລາອອກຂ່າວ: 2024-05-17 08:53:47 | ຜູ້ຂຽນ : admin1 | ຈຳນວນຄົນເຂົ້າຊົມ: 301 | ຄວາມນິຍົມ:



ວັນ​ທີ 14 ພຶດ​ສາ​ພາ 2024 ນີ້, ຄະນະ​ຊີ້​ນຳ 515 ແຂວງ​ແທັງ​ຮວ່າ ​ສສ ຫວຽດນາມ ສົມທົບ​ກັບ​ກອງ​ບັນຊາ​ການ​ທະຫານ​ແຂວງ ແລະ ຄະນະ​ປະຕິບັດ​ງານ​ແຂວງ​ຫົວພັນ ໄດ້​ຈັດ​ພິທີເຊັນ​ບົດ​ບັນທຶກ​ມອບ-ຮັບ​ອັດຖິ ທະຫານ​ອາສາ​ສະໝັກ ແລະ ຊ່ຽວຊານ​ຫວຽດນາມ​ທີ່​ເສຍສະຫຼະ​ຊີວິດ ຢູ່​ບົນ​ດິນແດນ​ແຂວງ​ຫົວພັນ ໃນ​ປາງ​ສົງຄາມ​ທີ່​ໜ່ວຍ​ງານ​ຂຸດ​ຄົ້ນ​ອັດຖິ​ແຂວງ​ແທັງ​ຮວ່າ ຊອກ​ຫາ​ຂຸດ​ຄົ້ນ​ໄດ້​ຈຳນວນ 15 ອັດຖິ ໃນ​ລະດູແລ້ງ ສົກ​ປີ 2023-2024 ເພື່ອ​ກັບ​ຄືນ​ປະເທດ.​ ພິທິດັ່ງກ່າວໄດ້​ຈັດ​ຂຶ້ນ​ທີ່ ຫ້ອງ​ປະຊຸມ ກອງ​ບັນຊາ​ການ​ທະຫານ​ແຂວງ​ຫົວພັນ ຝ່າຍ​ແຂວງ​ຫົວພັນ ​ນຳ​ໂດຍ ສະຫາຍ ພັນ​ເອກ ພັນ​ສີ ຊ່ອນ​ມີ​ໄຊ ຫົວໜ້າ​ການເມືອງ ກອງ​ບັນຊາ​ການ​ທະຫານ​ແຂວງ​ຫົວພັນ, ທັງ​ເປັນ​ຫົວໜ້າຄະນະ​ປະຕິບັດ​ງານ​ພິເສດ​ແຂວງ​ຫົວພັນ, ຝ່າຍແຂວງ​ແທັງ​ຮວ່າ ນຳ​ໂດຍ ສະຫາຍ ພັນ​ເອກ ພິເສດ ເລ​ວັນ​ຈຸງ ຫົວໜ້າ​ການເມືອງ​ກອງ​ບັນຊາ​ການ​ທະຫານ​ແຂວງ, ຮອງ​ຫົວໜ້າ ຜູ້​ ປະຈຳການ​ຄະນະ​ຊີ້​ນຳ 515 ແຂວງ​ແທັງ​ຮວ່າ ພ້ອມ​ດ້ວຍ​ຄະນະທັງ​ສອງ​ຝ່າຍ​ເຂົ້າ​ຮ່ວມ. ການ​ມອບ-ຮັບ ແລະ ຈັດ​ສົ່ງ​ອັດຖິ​ທະຫານ​ອາສາ​ສະໝັກ ແລະ ຊ່ຽວຊານ​ຫວຽດນາມ ໃນ​ຄັ້ງ​ນີ້​ ແມ່ນ​ປະຕິບັດ​ຕາມ​ແນວທາງ​ນະໂຍບາຍ ແລະ​ຄວາມ ເປັນ​ທຳ​ຂອງ​ລັດຖະບານ​ລາວ ທີ່​ມີ​ຕໍ່​ເພື່ອນ​ມິດ​ຍຸດ​ທະ​ສາດ ແລະ ສະແດງ​ໃຫ້​ເຫັນ​ເຖິງ​ຄວາມ​ເອົາໃຈໃສ່ ເປັນ​ພິເສດ​ຂອງ​ຄະນະ​ພັກ, ອຳນາດ​ການ​ປົກຄອງ​ທ້ອງຖິ່ນ​ແລະ ປະຊາຊົນ​ບັນດາເຜົ່າ​ຊາວ​ແຂວງ​ຫົວພັນ ຕະຫຼອດ​ໄລຍະ​ຜ່ານ​ມາ. ໃນພິທີ ສະຫາຍ ພັນ​ເອກ ພັນ​ສີ ຊ່ອນ​ມີ​ໄຊ ໄດ້​ຕາງ​ໜ້າ​ໃຫ້ ຄະນະ​ພັກ, ອຳນາດ​ການ​ປົກຄອງ​ທ້ອງຖິ່ນ​ແຂວງ​ຫົວພັນ ມີ​ຄຳ​ເຫັນ​ວ່າ: ການ​ມອບ-ຮັບ​ອັດຖິ ທະຫານອາສາ​ສະໝັກ ແລະ ຊ່ຽວ​ຊານ​ຫວຽດນາມ ກັບ​ຄືນ​ສູ່​ປະເທດ ກັບ​ຄືນ​ສູ່​ບ້ານ​ເກີດ ​ເມືອງ​ນອນ ອັນ​ແສນ​ຮັກ ທີ່​ຄອບຄົວ, ຍາດ​ພີ່ນ້ອງ ແລະ ​ການຈັດຕັ້ງ​ກຳລັງ​ຄອງ​ຄອຍ​ໃຫ້​ຄວາມ​ອົບ​ອຸ່ນ​ນັ້ນ ແມ່ນ​ສຸດ​ທີ່​ມີ​ຄວາມ​ໝາຍ​ສຳຄັນ​ຍິ່ງ ເຊິ່ງ​ແມ່ນ​ຂີດ​ໝາຍ​ສຳຄັນ ທາງ​ດ້ານ​ປະຫວັດສາດ ທີ່​ສອງ​ປະເທດ​ຈະ​ໄດ້​ພ້ອມ​ກັນ ໂຄສະ​ນາ​ສຶກ​ສາ​ອົບຮົມໃຫ້​ພະນັກ ງານ-ນັກຮົບ, ນັກຮຽນ-ນັກ​ສຶກ​ສາ ປັນຍາ​ຊົນ​ທຸກ​ຊັ້ນ​ຄົນ​ໄດ້​ຮຽນ​ຮູ້​ມູນເຊື້ອ​ອັນ​ພິລະ​ອາດ​ຫານ ສູ້​ຮົບ​ມີ​ໄຊ​ຂອງ​ພັກ, ຂອງ​ກອງທັບ ແລະ ປະຊາຊົນ​ສອງ​ຊາດ​ລາວ-ຫວຽດນາມ ໃນ​ສະໄໝ​ຕໍ່ສູ້​ກູ້​ຊາດ ຕ້ານ​ຈັກກະພັດ​ຕ່າງ​ດ້າວ​ຜູ້​ຮຸກ​ຮານ ກໍຄື​ໄລຍະ​ປົກ​ປັກ​ຮັກສາ ແລະ ພັດທະນາ​ປະເທດ​ຊາດ​ເພື່ອ​ພ້ອມ​ກັນ​ປົກ​ປັກ​ຮັກສາ ແລະ ເສີມ​ຂະຫຍາຍມູນເຊື້ອ​ຄວາມ​ສາ​ມັກ​ຄີ​ພິເສດ ແລະ ການ​ຮ່ວມ​ມືຮອບດ້ານ​ລະຫວ່າງ​ສອງ​ພັກ-ສອງ​ລັດ, ສອງ​ກອງທັບ ແລະ ປະຊາຊົນ​ສອງ​ຊາດ​ ລາວ-ຫວຽດນາມ, ຫວຽດນາມ-ລາວ ໃຫ້​ນັບ​ມື້ໝັ້ນຄົງ​ທະ​ນົງ​ແກ່ນ ຂຶ້ນ​ເລື້ອຍໆ. ໂອກາດ​ດັ່ງກ່າວ​ນີ້ ທັງ 2 ຝ່າຍ​​ໄດ້​ເຊັນ​ບົດ​ບັນທຶກ​ຊ່ວຍ​ຈຳ ວຽກ​ງານ​ຊອກ​ຄົ້ນ​ອັດຖິ​ທະຫານ​ອາສາ​ສະໝັກ ແລະ ຊ່ຽວ​ຊານ​ຫວຽດນາມ ຢູ່​ແຂວງ​ຫົວພັນ ໃນ​ລະດູແລ້ງ ປີ 2024-2025 ຕື່ມອີກ. ໂດຍ: ນາງ ຄຳ​ມະນີ ແສງ​ມະນີ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ