ກອງທັບປະຊາຊົນລາວ
 
ວັນພຸດ, ວັນທີ 26 ມິຖຸນາ 2024

  

ເຊັນມອບ-ຮັບອັດຖິອາສາສະໝັກ ແລະ ຊ່ຽວຊານຫວຽດນາມທີ່ເສຍຊີວິດແຕ່ປາງສົງຄາມ ຢູ່ແຂວງສາລະວັນ
ເວລາອອກຂ່າວ: 2024-05-17 12:35:01 | ຜູ້ຂຽນ : admin2 | ຈຳນວນຄົນເຂົ້າຊົມ: 414 | ຄວາມນິຍົມ:



ໃນວັນທີ16 ພຶດສະພາ 2024 ນີ້, ຄະນະຜູ້ແທນກອງບັນຊາການທະຫານແຂວງເທື່ອທຽນເຫວ້ ສສ ຫວຽດນາມ ເຊິ່ງນຳໂດຍ ສະຫາຍ ພັນເອກ ຮວ່າງວັນເຍິນ ຮອງເລຂາພັກ ຫົວໜ້າການເມືອງ ກອງບັນຊາການທະຫານແຂວງເທື່ອທຽນເຫວ້ ພ້ອມດ້ວຍຄະນະ ໄດ້ເຂົ້າພົບປະຢ້ຽມຢາມ ແລະ ເຮັດວຽກຢູ່ກອງບັນຊາການທະຫານແຂວງ ສາລະວັນ, ໂດຍໄດ້ຮັບການຕ້ອນຮັບຢ່າງອົບອຸ່ນ ຈາກສະຫາຍ ພົນຈັດຕະວາ ພູວັນ ພິມມະຈັນ ຄະນະປະຈໍາພັກແຂວງ ເລຂາພັກ ຫົວໜ້າການເມືອງ ກອງບັນຊາການທະຫານແຂວງສາລະວັນ ພ້ອມຄະນະ, ມີກໍາມະການພັກແຂວງ, ຫົວໜ້າພະແນກແຮງງານສະຫວັດດິການ ແລະ ສັງຄົມແຂວງ, ຮອງກອງບັນຊາການ ປກສ ແຂວງ, ຕາງໜ້າຫ້ອງວ່າການແຂວງ ພ້ອມດ້ວຍຜູ້ແທນທັງສອງຝ່າຍເຂົ້າຮ່ວມ. ໂອກາດນີ້, ສະຫາຍ ພົນຈັດຕະວາ ພູວັນ ພິມມະຈັນ ໄດ້ລາຍງານສະພາບການໂດຍຫຍໍ້ ໃນການຈັດຕັ້ງປະຕິບັດໜ້າທີ່ວຽກງານ ຂຸດຄົ້ນອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ເຊິ່ງໄດ້ຍົກໃຫ້ ເຫັນຂໍ້ສະດວກ ແລະ ຂໍ້ຫຍຸ້ງຍາກ ໃນການເຄື່ອນໄຫວປະຕິບັດໜ້າທີ່ດັ່ງກ່າວ, ພາຍຫຼັງທີ່ທາງຄະນະປະຕິບັດງານພິເສດກໍ່ຄືໜ່ວຍງານ 192 ໄດ້ລົງຂຸດຄົ້ນທົ່ວແຂວງສາລະວັນກໍ່ຄື 8 ຕົວເມືອງຂອງແຂວງ ໂດຍມີຄະນະປະຕິບັດງານພິເສດແຂວງສາລະວັນ ລົງຕິດຕາມກວດກາ ພ້ອມທັງຊຸກຍູ້ອໍານາດການປົກຄອງ, ພໍ່-ແມ່ປະຊາຊົນ ແລະ ສະເໜີໃຫ້ບັນດາກອງບັນຊາການທະຫານເມືອງແຕ່ງຕັ້ງພະນັກງານເຂົ້າຮ່ວມເຄື່ອນໄຫວຕໍ່ວຽກງານດັ່ງກ່າວ ແລະ ເຮັດໃຫ້ການເຄື່ອນໄຫວຊອກຄົ້ນ, ທ້ອນໂຮມອັດຖິປະຈໍາລະດູແລ້ງ ສົກປີ 2023-2024 ສາມາດຂຸດຄົ້ນໄດ້ທັງໝົດ 7 ອັດຖິ. ຈາກຂໍ້ສະດວກທີ່ກ່າວມາຂ້າງເທິງນັ້ນ ຄະນະປະຕິບັດງານພວກເຮົາຍັງພົບອຸປະສັກຂໍ້ຫຍຸ້ງຍາກບໍ່ນ້ອຍໃນການເຄື່ອນໄຫວຊອກຄົ້ນອັດຖິ ເປັນຕົ້ນບ່ອນຝັງສົບຂອງຜູ້ເສຍຊີວິດຜ່ານມາເປັນເວລາ 50 ກວ່າປີແລ້ວ, ສະພາບພູມີປະເທດໄດ້ມີການປ່ຽນແປງ ຍ້ອນບ້ານເມືອງໄດ້ມີການສ້າງສາພັດທະນາ ແລະ ສ່ວນໜຶ່ງປະຊາຊົນໄດ້ມີການບຸກເບີກເນື້ອທີ່ທໍາການຜະລິດ, ເສັ້ນທາງການສັນຈອນບໍ່ສະດວກມີບາງບ່ອນລົດໄປບໍ່ໄດ້ ແລະ ຂໍ້ມູນສ່ວນໃຫຍ່ແມ່ນໄດ້ຈາກການເລົ່າຕໍ່ກັນ ຈາກພໍ່ສູ່ລູກ ຫຼື ຫຼານ ດັ່ງນັ້ນຈຶ່ງເຮັດໃຫ້ບໍ່ຮູ້ຈຸດຝັງສົບ ແລະ ເຮັດໃຫ້ການພົວພັນປະສານງານບໍ່ໄດ້ເຕັມເມັດ, ເຕັມໜ່ວຍ ສະພາບການດັ່ງກ່າວຈຶ່ງສ້າງຜົນກະທົບໂດຍກົງຕໍ່ການເຄື່ອນໄຫວຊອກຫາ ແລະ ຂຸດຄົ້ນອັດຖິໃນຄັ້ງນີ້. ສະຫາຍ ພົນຈັດຕະວາ ພູວັນ ພິມມະຈັນ ກໍໄດ້ກ່າວຕື່ມອີກວ່າ: ຈະສືບຕໍ່ຮັກສາມູນເຊື້ອສາຍພົວພັນສາມັກຄີແບບພິເສດລະຫວ່າງສອງຊາດ ລາວ-ຫວຽດນາມ ຫວຽດນາມ-ລາວ ເວົ້າລວມ, ເວົ້າສະເພາະ ກໍຄືສືບຕໍ່ຮ່ວມມືຮັດແໜ້ນສາຍສໍາພັນອັນດີງາມ ແລະ ເສີມຂະຫຍາຍຄວາມສາມັກຄີໄມຕີຈິດ ມິດຕະພາບລະຫວ່າງກອງບັນຊາການທະຫານແຂວງເທື່ອທຽນເຫວ້ ກອງທັບປະຊາຊົນຫວຽດນາມ ກັບ ກອງບັນຊາການທະຫານແຂວງສາລະວັນ ໃຫ້ນັບມື້ມີຄວາມແໜ້ນແຟ້ນຍິ່ງໆຂຶ້ນ. ຫຼັງຈາກນັ້ນ, ຜູ້ແທນທັງສອງຝ່າຍຍັງໄດ້ເຊັນບົດບັນທຶກ ມອບ-ຮັບອັດຖິທະຫານອາສາສະໝັກ ແລະ ຊ່ຽວຊານຫວຽດນາມທີ່ເສຍສະຫຼະຊີວິດຢູ່ລາວໃນປາງສົງຄາມ ໂດຍຊ່ອງໜ້າຜູ້ແທນທັງສອງຝ່າຍເຂົ້າຮ່ວມເປັນສັກຂີພະຍານ. ໂອກາດດຽວກັນນີ້ຄະນະຜູ້ແທນກອງບັນຊາການທະຫານແຂວງເທື່ອທຽນເຫວ້ ສສ ຫວຽດນາມ ກໍ່ໄດ້ມອບເງິນສົດ ແລະ ວັດຖຸຈຳນວນໜຶ່ງ ໃຫ້ກອງບັນຊາການທະຫານແຂວງສາລະວັນ ປະກອບມີ: ເງິນສົດ 30 ລ້ານດົ້ງ (ສະກຸນເງິນຫວຽດນາມ), ຄອມພິວເຕີຕັ້ງໂຕະ 3 ຊຸດ, ລວມມູນຄ່າທັງໝົດ 44 ລ້ານດົ້ງ (ສະກຸນເງິນຫວຽດນາມ), ໂດຍໃຫ້ກຽດມອບຂອງ ສະຫາຍ ພັນເອກ ຮວ່າງວັນເຍິນ ຮອງເລຂາພັກ ຫົວໜ້າການເມືອງ ກອງບັນຊາການທະຫານແຂວງເທື່ອທຽນເຫວ້ ແລະ ໃຫ້ກຽດຮັບໂດຍ ສະຫາຍ ພົນຈັດຕະວາ ພູວັນ ພິມມະຈັນ ຄະນະປະຈໍາພັກແຂວງ ເລຂາພັກ ຫົວໜ້າການເມືອງ ກອງບັນຊາການທະຫານແຂວງສາລະວັນ ພ້ອມຄະນະ. ໂດຍ: ນາງ ສຸຂາວພອນ ສອນນາລີ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ