ກອງທັບປະຊາຊົນລາວ
 
ວັນພຸດ, ວັນທີ 26 ມິຖຸນາ 2024

  

ເປີດ​ອົບຮົມ-ຫັດ​ແອບ ການເມືອງ-ການ​ທະຫານ ໃຫ້​ກອງຮ້ອຍ​ກອງ​ຫຼອນ ທົ່ວ​ແຂວງ​ບໍ​ລິ​ຄຳ​ໄຊ
ເວລາອອກຂ່າວ: 2024-05-23 09:25:40 | ຜູ້ຂຽນ : admin1 | ຈຳນວນຄົນເຂົ້າຊົມ: 334 | ຄວາມນິຍົມ:



ວັນ​ທີ 14 ພຶດສະພາ 2024 ນີ້, ກອງ​ບັນຊາ​ການ​ທະຫານ ​ແຂວງ​ບໍ​ລິ​ຄຳ​ໄຊ ໄດ້​ເປີດ​ຊຸດ​ອົບ ຮົມ-ຫັດ​ແອບການເມືອງ-ການ​ທະຫານ ໃຫ້​ຫົວໜ້າ​ຂະແໜງການ​ທະຫານ​ທ້ອງຖິ່ນ ແລະ ຄະນະ​ກອງຮ້ອຍ​ກອງ​ຫຼອນ ທົ່ວ​ແຂວງ​ບໍ​ລິ​ຄຳ​ໄຊ ຊຸດ​ທີ 2, ໂດຍ​ການ​ເປັນ​ປະທານ ​ຂອງ​ສະຫາຍ ພົນ​ຈັດຕະວາ ຈວງ​ຈັນ ລາດ​ຊະວົງ ກຳມະການ​ຄະນະ​ປະຈຳ​ພັກ​ແຂວງ, ຮອງ​ປະທານ ​ປກຊ-​ປກສ ແຂວງ, ຫົວໜ້າ​ການເມືອງ ກອງ​ບັນຊາ​ການ​ທະຫານ​ແຂວງ​ບໍ​ລິ​ຄຳ​ໄຊ, ມີ​ສະຫາຍ ພັນ​ເອກ ບຸນ​ທັນ ໄຊ​ມຸງຄຸນ ຮອງ​ຫົວໜ້າ ກົມ​ການ​ທະຫານ​ທ້ອງ​ຖິ່ນ ກົມ​ໃຫຍ່​ເສນາ​ທິ​ການ​ກອງທັບ ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ. ສະຫາຍ ພັນ​ໂທ ກັນຍາ ບໍ​ລິ​ວັນ ຫົວໜ້າ​ພະ​ແນກການ​ທະຫານ​ທ້ອງຖິ່ນ ກອງ​ບັນຊາ​ການ​ທະຫານ​ແຂວງ​ບໍ​ລິ​ຄຳ​ໄຊ ໄດ້​ຜ່ານ​ແຜນການ​ອົບຮົມ-ຫັດ​ແອບການເມືອງ-ການ​ທະຫານ ໃຫ້​ຫົວໜ້າ​ຂະແໜງການ​ທະຫານ​ທ້ອງຖິ່ນ ແລະ ຄະນະ​ກອງຮ້ອຍ​ກອງ​ຫຼອນ ທົ່ວ​ແຂວງ​ບໍ​ລິ​ຄຳ​ໄຊ ຊຸດ​ທີ 2 ປະຈຳ​ປີ 2024, ໂດຍ​ປະຕິບັດ​ຕາມ​ແຈ້ງ​ການ ຂອງລັດຖະມົນຕີ​ກະຊວງ​ປ້ອງ​ກັນ​ປະເທດ, ຄຳ​ແນະນຳ ​ຂອງ​ກົມ​ໃຫຍ່​ເສນາ​ທິ​ການ​ກອງທັບ ແລະ ແຜນການ​ອົບຮົມ-ຫັດ​ແອບ ຂອງ​ກົມ​ການ​ທະຫານ​ທ້ອງຖິ່ນ ວ່າ​ດ້ວຍ​ການ​ອົບຮົມ-ຫັດ​ແອບ ໃຫ້​ຫົວໜ້າ​ຂະແໜງການ​ທະຫານ​ທ້ອງຖິ່ນ ແລະ ຄະນະ​ກອງຮ້ອຍ​ກອງ​ຫຼອນ ທົ່ວ​ແຂວງ​ບໍ​ລິ​ຄຳ​ໄຊ ປະຈຳ​ປີ 2024, ເພື່ອ​ແນໃສ່​ເຮັດ​ໃຫ້​ພະນັກງານ​ບັນຊາ, ບັນດາ​ຄະນະ​ກອງຮ້ອຍ​ກອງ​ຫຼອນ ຮັບ​ຮູ້ ແລະ ເຂົ້າໃຈ​ຕໍ່ສິດ, ໜ້າທີ່, ພາລະ​ບົດບາດ​ຂອງ​ຕົນ, ຮູ້​ໄດ້​ຄວາມ​ໝາຍ ​ຄວາມ​ສຳຄັນ ຂອງ​ວຽກ​ງານ​ການ​ທະຫານ​ທ້ອງຖິ່ນ ທັງ​ເປັນ​ການ​ປັບປຸງ​ກໍ່ສ້າງ​ກຳລັງ​ປະກອບ​ອາວຸດ​ຂັ້ນ​ທ້ອງຖິ່ນ ໃຫ້​ໜັກ​ແໜ້ນ​ທາງ​ດ້ານ​ການເມືອງ, ເຂັ້ມແຂງ​ທາງ​ດ້ານ​ການຈັດຕັ້ງ, ມີ​ຄວາມ​ຮູ້​ທາງ​ດ້ານ​ສິລະ​ປະຍຸດ-ຍຸດທະວິທີ ແລະ ຮູ້​ໝູນ​ໃຊ້​ອາວຸດ​ຍຸດ​ໂທ​ປະກອນ ເຂົ້າ​ໃນ​ການ​ປົກ​ປັກ​ຮັກສາ​ທ້ອງຖິ່ນ​ຂອງ​ຕົນ​ໃຫ້​ມີ​ຄວາມ​ປອດ​ໄພ. ເນື້ອ​ໃນ​ອົບຮົມ-ຫັດ​ແອບ ພາກ​ການເມືອງ ຈະ​ໄດ້​ຮຽນ​ຮູ້​ມູນເຊື້ອ​ຂອງ​ກອງທັບ, ວິ ທີ​ຕ້ານ​ການ​ຫັນປ່ຽນ​ໂດຍ​ສັນຕິ​ຂອງ​ສັດຕູ, ຂໍ້​ກຳນົດ ວ່າ​ດ້ວຍ​ທີ່​ຕັ້ງ, ພາລະ​ບົດບາດ, ສິດ, ໜ້າທີ່ ຂອງຫົວໜ້າກອງຮ້ອຍກອງ ຫຼອນ, ຂໍ້​ກຳນົດ ​ຂອງ​ກົມ​ການ​ທະຫານ​ທ້ອງຖິ່ນ ວ່າ​ດ້ວຍ​ການ​ຄຸ້ມ​ຄອງ​ອາວຸດ-​ກະສຸນ, ວິທີ​ສ້າງ​ແຜນການ​ສູ້​ຮົບ​ປ້ອງ​ກັນ​ບ້ານ ແລະ ຫຼັກການ​ເສນາ​ທິການ, ສ່ວນ​ພາກ​ການ​ທະຫານ ຈະ​ໄດ້​ຮຽນ​ຮູ້​ວິທີ​ການ​ມ້າງ-ປະກອບ​ປືນ, ການ​ເລັ່ງ​ເປົ້າຍິງປືນທະ ຫານ​ຮາບ, ວິທີ​ຂຸດ​ຂຸມ​ຄອງ​ສູ້​ຮົບ​ບຸກຄົນ, ວິທີ​ສ້າງ ແລະ ນຳ​ໃຊ້​ອາວຸດ​ພື້ນເມືອງ​ປະເພດ​ຕ່າງໆ, ຮຽນ 7 ຈັງຫ​ວະ​ພື້ນຖານ​ໃນ​ເວລາ​ສູ້​ຮົບ, ຫຼັກການ​ຮູບ​ແຖວ​ຈຸ​ປ້ອງ​ກັນ​ເວນຍາມ, ໝູ່​ຊອກ​ຄົ້ນ​ຕີ, ໝູ່​ດັກ​ສະກັດ, ໝວດ ຫຼື ກອງຮ້ອຍ​ສູ້​ຮົບ​ປ້ອງ​ກັນ​ບ້ານ. ຊຸດ​ອົບຮົມ​ຄັ້ງນີ້ ມີ​ຈຳນວນ​ພົນ​ເຂົ້າ​ຮ່ວມ ທັງ​ໝົດ 90 ສະຫາຍ ແລະ ຈະ​ໄດ້​ດຳເນີນ​ການ​ອົບຮົມ ​ເປັນ​ເວລາ 15 ວັນ ຈຶ່ງຈະສໍາເລັດ. ໂດຍ: ສີ​ທອງ ຈັນທະ​ວົງ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ