ກອງທັບປະຊາຊົນລາວ
 
ວັນພຸດ, ວັນທີ 26 ມິຖຸນາ 2024

  

ສຳເລັດ​ກອງ​ປະຊຸມ​ໃຫຍ່ ຜູ້​ແທນ​ສະຫະພັນ​ນັກຮົບ​ເກົ່າ ນະຄອນ​ປາກ​ເຊ ຄັ້ງ​ທີ V
ເວລາອອກຂ່າວ: 2024-05-27 08:42:06 | ຜູ້ຂຽນ : admin1 | ຈຳນວນຄົນເຂົ້າຊົມ: 210 | ຄວາມນິຍົມ:



ກອງ​ປະຊຸມ​ໃຫຍ່​ຜູ້​ແທນ​ສະຫະພັນ​ນັກຮົບ​ເກົ່າ​ນະຄອນ​ປາກ​ເຊ ແຂວງ​ຈຳປາ​ສັກ ຄັ້ງ​ທີ V ໄດ້​ເປີດ​ຂຶ້ນ ແລະ ປິດ​ລົງ​ດ້ວຍ​ຜົນສຳເລັດ​ຢ່າງ​ຈົບງາມ ໃນ​ວັນ​ທີ 17 ພຶດສະພາ 2024 ນີ້, ຢູ່​ທີ່​ສະໂມສອນ ​ຂອງ​ຫ້ອງ​ວ່າການ​ປົກຄອງ ນະຄອນ​ປາກ​ເຊ, ໂດຍ​ການ​ເປັນ​ປະທານ ຂອງ​ສະຫາຍ ບົວ​ລີ ເພັດ​ສົງຄາມ ກໍາມະການຄະນະ​ປະຈຳ​ພັກ​ແຂວງ, ເລຂາ​ຄະນະ​ບໍລິຫານ​ງານ​ພັກ​ນະຄອນ, ເຈົ້າ​ນະຄອນ​ປາກ​ເຊ, ມີ ສະຫາຍ ພັນ​ເອກ ບຸນ​ມາກ ວິລະ​ວົງ ກໍາມະການຄະນະ​​ສະຫະພັນ​ນັກຮົບ​ເກົ່າ​ແຫ່ງ​ຊາດ​ລາວ, ປະທານ​ສະຫະພັນ​ນັກຮົບ​ເກົ່າ​ແຂວງ​ຈຳປາ​ສັກ, ມີ​ບັນດາຄະນະ​ບໍລິຫານ​ງານ​ພັກ​ນະຄອນ, ຫ້ອງການ​ທີ່​ກ່ຽວຂ້ອງ, ກອງ​ບັນຊາ​ການ ​ປກຊ-​ປກສ ນະຄອນ, ຕະຫຼອດ​ຮອດ​ຜູ້​ແທນ​ສົມບູນ​ທີ່​ມາ​ຈາກ​ສະຫະ​ພັກ​ນັກ ຮົບ​ເກົ່າ​ນະຄອນ, ສະຫະພັນ​ນັກຮົບ​ເກົ່າ​ຂັ້ນ​ໜ່ວຍ​ຮາກ​ຖານ​ບ້ານ​ເຂົ້າ​ຮ່ວມ. ສະຫາຍ ພັນ​ໂທ ສີ​ຈັນ ທົງ​ມະນີ ຮັກສາ​ການ ​ປະທານ​ສະຫະພັນ​ນັກຮົບ​ເກົ່າ​ນະຄອນ​ປາກ​ເຊ ໄດ້ຜ່ານ​ບົດ​ລາຍ​ງານ​ການເມືອງ​ທັງ 2 ພາກຂອງ​ສະ ຫະພັນ​ນັກຮົບ​ເກົ່າ​ນະຄອນ​ປາກ​ເຊ ​ໃນ​ໄລຍະ 5 ປີ ​ຜ່ານ​ມາ ແລະ ທິດ​ທາງ​ແຜນການ​ໃນຕໍ່ໜ້າ ເຊິ່ງ​ຍົກ​ໃຫ້​ເຫັນ​ເຖິງ​ຜົນງານ​ອັນ​ພົ້ນ​ເດັ່ນ​ຫຼາຍ​ດ້ານ ເປັນຕົ້ນ​ແມ່ນ​ໄດ້​ຖື​ສຳຄັນ​ກ່ຽວ​ກັບ​ວຽກ​ງານ​ສຶກ​ສາ​ອົບຮົມ​ການເມືອງ-ແນວ​ຄິດ​ເປັນ​ກົກ ໂດຍ​ໄດ້​ນຳ​ເອົາ​ແນວທາງ​ແຜນ​ນະໂຍບາຍ​ຂອງ​ພັກ, ກົດໝາຍ​ຂອງ​ລັດ, ມະຕິ​ຄຳ​ສັ່ງ ແລະ​ ມູນເຊື້ອ​ວັນ​ສຳຄັນ​ຕ່າງໆ ​ຂອງ​ຊາດ, ຂອງ​ພັກ ມາ​ຈັດ​ຕັ້ງ​ເຜີຍແຜ່​ໃຫ້​ສະມາຊິກ​ພັກ, ພະນັກງານ-ລັດຖະກອນ​ຢ່າງ​ເປັນ​ປົກກະຕິ ແລະ ​ຕໍ່​ເນື່ອງ, ເປັນ​ ເຈົ້າ​ການ​ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ການ​ປະຕິບັດ​ໜ້າທີ່​ວຽກ​ງານ​ທີ່​ການຈັດຕັ້ງ​ມອບ​ໝາຍ ມີ​ຜົນສຳເລັດ​ເປັນ​ຢ່າງ​ດີ ພ້ອມ​ດຽວ​ກັນ​ນັ້ນ, ຍັງ​ໄດ້​ເອົາ ໃຈໃສ່​ຕໍ່​​ວຽກ​ງານ​ໂຄສະນາ-ອົບຮົມ, ວຽກ​ງານ​ຈັດ​ຕັ້ງ​ນະໂຍບາຍ, ວຽກ​ງານ​ກໍ່ສ້າງ​ພັກ-ພະນັກງານ ແລະ ອົງ​ການຈັດຕັ້ງ​ມະຫາຊົນ. ປັດຈຸບັນ ສະຫະພັນ​ນັກຮົບ​ເກົ່າ​ນະຄອນ​ປາກ​ເຊ ປະກອບ​ມີ 1 ໜ່ວຍ​ພັກ, ມີ​ສະມາຊິກ​ພັກ​ທັງ​ໝົດ 11 ສະຫາຍ, ຍິງ 4 ສະຫາຍ, ສະມາຊິກ​ພັກ​ສຳຮອງ 1 ສະຫາຍ, ສາມາດ​ຕີ​ລາຄາ​ປະເພດ​ເຂັ້ມແຂງ ຈຳນວນ 3 ສະຫາຍ, ແຂງ 8 ສະຫາຍ, ຍິງ 4 ສະຫາຍ. ໃນ​ກອງ​ປະຊຸມ​ບັນດາ​ຜູ້​ແທນ​ທີ່​ເຂົ້າ​ຮ່ວມ​ໄດ້​ຜັດປ່ຽນ​ກັນ​ປະກອບ​ຄຳ​ຄິດ​ເຫັນ​ຢ່າງ​ກົງ​ໄປ​ກົງ​ມາ​ເພື່ອ​ເຮັດ​ໃຫ້​ເນື້ອ​ໃນ​ບົດສະຫຼຸບ​ມີ​ຄວາມ​ໝາຍ, ຄວາມ​ສຳຄັນ ແລະ ຮັດກຸມ​ຂຶ້ນ​ຕື່ມ. ຈາກ​ນັ້ນ, ໄດ້​ພ້ອມ​ກັນ​ໃຊ້​ສິດ​ປະຊາທິປະໄຕ​ປ່ອນ​ບັດ​ເລືອກ​ຕັ້ງ​ເອົາ​ຄະນະ​ບໍລິຫານ​ງານ​ສະຫະພັນ​ນັກຮົບ​ເກົ່າ​ນະຄອນ​ປາກ​ເຊ ​ຊຸດ​ໃໝ່​ໄດ້​ຕາມ​ລະດັບ​ຄາດໝາຍ​ທີ່​ກຳນົດ​ໄວ້. ເຊິ່ງ​ກອງ​ປະຊຸມ​ຄັ້ງ​ປະຖົມ​ມະລຶກ​ໄດ້​ເຫັນ​ດີ​ເປັນ​ເອກະ​ພາບ​ເລືອກ​ເອົາ ສະຫາຍ ພັນ​ໂທ ສີ​ຈັນ ທົງ​ມະນີ ເປັນ​ປະທານ​ສະ​ຫາ​ພັນ​ນັກຮົບ​ເກົ່າ​ນະຄອນ​ປາກ​ເຊ, ສະຫາຍ ຮ້ອຍ​ເອກ ທອງ​ລາ ອິນ​ທິ​ລາດ ເປັນ​ຮອງ​ປະທານ ທັງ​ເປັນ​ປະທານ​ກວດກາ, ສະຫາຍ ພັນ​ໂທ ກັນ​ແກ້ວ ປັນຍາ​ສິດ ເປັນ​ຮອງ​ປະທານ​ກວດກາ. ນອກ​ນັ້ນ​, ກອງ​ປະຊຸມ​ຍັງ​ໄດ້​ປ່ອນ​ບັດ​ເລືອກ​ເອົາ​ຜູ້​ແທນ​ສົມບູນ ແລະ ສຳຮອງ​​ໄປ​ຮ່ວມ​ກອງ​ປະຊຸມ​ໃຫຍ່ ຂອງ​ສະຫະພັນ​ນັກຮົບ​ເກົ່າ​ແຂວງ​ຈຳປາ​ສັກ ຈຳນວນ 7 ສະຫາຍ​ຕື່ມ​ອີກ. ໂອກາດ​ນີ້, ສະຫາຍ ບົວ​ລີ ເພັດ​ສົງຄາມ ໄດ້​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ໝາກຜົນໆ​ງານ​ທີ່​ບັນດາ​ສະຫາຍ​ສະຫະພັນ​ນັກຮົບ​ເກົ່າ​ນະຄອນ​ປາກ​ເຊ ສ້າງໄດ້​ໃນ​ຕະຫຼອດ​ໄລຍະ 5 ປີຜ່ານມາ ພ້ອມ​ທັງ​ເນັ້ນ​ໜັກ​ບາງ​ບັນຫາ​ຕໍ່​ກັບ​ຄະນະ​ຊຸດ​ໃໝ່​ຄັ້ງ​ນີ້, ເພື່ອ​ເຮັດ​ໃຫ້​ການຈັດຕັ້ງ​ປະຕິບັດ​ວຽກ​ງານ​ໃນ​ພາຍ​​ໜ້າ​​ມີ​ຜົນສຳເລັດ ແລະ ​ສອດຄ່ອງ​ຢ່າງ​ມີ​ວິໄສ​ທັດ ເປັນຕົ້ນ​ແມ່ນ​ການ​ເອົາໃຈໃສ່​ສືກ​ສາ​ອົບຮົມ​ການເມືອງ-ນຳພາ​ແນວ​ຄິດ​ໃຫ້​ແກ່​ພະນັກງານ-ລັດຖະກອນ​ຢູ່​ພາຍ​ໃນ​ກົມ​ກອງ​ ເຊື່ອມ​ຊຶມ​ກຳ​ແໜ້ນ​ຕໍ່​ແນວທາງ​ນະໂຍບາຍ​ຂອງ​ພັກ, ມີ​ຄຸນສົມບັດ​ສິນ​ທຳ​ປະຕິວັດ, ມີ​ແບບແຜນ​ວິທີ​ເຮັດ​ວຽກ​ແບບ​ວິທະຍາສາດ​ທີ່​ທັນ​ສະ​ໃໝ​ສາມາດ​ແບ່ງ​ວຽກ​ງານ​ໃຫ້​ບຸກຄົນ​ຮັບຜິດຊອບ​ຖືກຕ້ອງ​ຢ່າງ​ຈະແຈ້ງ ແລະ​ເໝາະ​ສົມ,ເຮັດ​ວຽກ​ເປັນ​ໝູ່​ຄະນະ​ລວມ​ສູນ​ປະຊາທິປະໄຕ ​ດຳລົງ​ຊີວິດ​ດ້ວຍ​ຄວາມ​ປອດ​ໃສ​ຂາວ​ສະອາດ, ມີ​ຄວາມ​ດຸໝັ່ນ​ຂະຫຍັນ​ພຽນ ​ປະຢັດ​ອົດທົນ ​ເຊື່ອ​ໝັ້ນ​ຕໍ່​ການ​ນຳພາ​ຂອງ​ພັກ ເພິ່ງ​ຕົນ​ເອງ​ກຸ້ມ​ຕົນ​ເອງ ແລະ​ສ້າງ​ຄວາມ​ເຂັ້ມແຂງ​ດ້ວຍ​ຕົນ​ເອງ​ ເພື່ອ​ພ້ອມ​ກັນ​ເຮັດ​ສຳເລັດ​ທຸກ​ໜ້າທີ່​ວຽກ​ງານ​ຕາມ​ການຈັດຕັ້ງ​ມອບ​ໝາຍ​ໃຫ້​ມີ​ຜົນສຳເລັດ​ຢ່າງ​ຕໍ່​ເນື່ອງ. ໂດຍ: ດາ​ວົງ ບຸດ​ຕະ​ວົງ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ