ກອງທັບປະຊາຊົນລາວ
 
ວັນພຸດ, ວັນທີ 26 ມິຖຸນາ 2024

  

ໂຮງໝໍ​ບໍລິເວນ 107 ປາຖະກະຖາ​ມູນເຊື້ອ 3 ວັນ​ປະຫວັດສາດ
ເວລາອອກຂ່າວ: 2024-05-28 08:33:11 | ຜູ້ຂຽນ : admin1 | ຈຳນວນຄົນເຂົ້າຊົມ: 187 | ຄວາມນິຍົມ:



ໃນ​ວັນ​ທີ 22 ພຶດສະພາ 2024, ໂຮງໝໍ​ບໍລິເວນ 107 ໄດ້​ປາຖະກະຖາ​ມູນເຊື້ອ 3 ວັນ​ປະຫວັດສາດ​ຄື: ວັນ​ໄຊຊະນະ​ບັ້ນ​ຮົບ​ດຽນ​ບຽນ​ຝູ ຄົບຮອບ 70 ປີ (7 ພຶດສະພາ 1954-7 ພຶດສະພາ 2024), ວັນ​ຜ່າ​ວົງປິດ​ລ້ອມ​ຂອງ​ກອງພັນ​ທີ 2 ວີລະ​ຊົນ​ ທີ່​ທົ່ງ​ໄຫ​ຫີນ ​ແຂວງ​ຊຽງ​ຂວາງ ຄົບຮອບ 65 ປີ (18 ພຶດສະພາ 1959-18 ພຶດສະພາ 2024) ແລະ ​ວີລະ​ກຳ​ໂຕນ​ຄຸກ ຢ່າງ​ມະຫັດສະຈັນ ຂອງ​ບັນດາ​ທ່ານ​ຜູ້ນຳ​ແນວ​ລາວ​ຮັກ​ຊາດ ຄົບຮອບ 64 ປີ (24 ພຶດສະພາ 1960-24 ພຶດສະພາ 2024), ໂດຍ​ການ​ເປັນ​ປະທານ ແລະ ປາຖະກະຖາ ​ຂອງ ສະຫາຍ ພັນ​ໂທ ຄຳຄ່ອງ ພິມ​ມະ​ວົງສາ ຮອງ​ຫົວໜ້າ​ອຳນວຍ​ການ​ໂຮງ ໝໍ​ບໍລິເວນ 107, ມີ​ຄະນະ​ພັກ-ຄະນະ​ອຳນວຍການ, ພະແນກການ, ຂະແໜງການ ແລະ​ພະ ນັກງານ-ນັກຮົບ ເຂົ້າ​ຮ່ວມ. ສະຫາຍ ພັນ​ໂທ ຄຳຄ່ອງ ພິມ​ມະ​ວົງສາ ໄດ້​ຍົກ​ໃຫ້​ເຫັນ​ຄວາມ​ໝາຍ​ຄວາມ​ສຳຄັນ​ຂອງ 3 ເຫດການ​ດັ່ງກ່າວ ທີ່​ສະແດງ​ໃຫ້​ເຫັນ​ເຖິງ​ຄວາມ​ສະຫຼາດ​ສ່ອງ​ໃສ​ຂອງ​ຜູ້ນຳ​ແນວ​ລາວ​ຮັກ​ຊາດ​ທີ່​ໄດ້​ຊີ້​ນຳ​ຢ່າງ​ໃກ້ຊິດ​ຕໍ່​ກຳລັງ​ປະຕິວັດ​ທີ່ຢູ່​ແນວ​ໜ້າ, ມີ​ພິກໄຫວ​ຄ່ອງ​ແຄ່ວ, ເຕົ້າໂຮມ​ພະນັກງານ ແລະ ປະຊາຊົນ​ໃຫ້​ເປັນ​ຈິດ​ໜຶ່ງ ​ໃຈ​ດຽວ ຈຶ່ງ​ສາມາດ​ເຮັດ​ໃຫ້​ກອງພັນ​ທີ 2 ຜ່າ​ວົງ​ປິດ​ລ້ອມ​ອັນ​ແໜ້ນ ໜາ​ຂອງ​ສັດຕູ​ໄປ​ໄດ້, ຕໍ່​​ເຫດການ​ທີ່​ຜູ້ນຳ​ຝ່າຍ​ແນວ​ລາວ​ຮັກ​ຊາດ ຈຳນວນ 16 ທ່ານ​ ຖືກ​ພວກ​ສັດຕູ​ຈັບ​ຕົວ​ໄປ​ຂັງ​ຢູ່​ຄຸກ​ໂພນ​ເຄັງ ​ໄດ້​ໂຕນ​ອອກ​ຈາກ​ຄຸກ ພ້ອມ​ກັນ​ມຸ່ງ​ໜ້າ​ໄປ​ສູ່​ເຂດ​ທີ່​ໝັ້ນ​ໄດ້​ຢ່າງ​ປອດ​ໄພ ທັງ​ສອງ​ເຫດການ​ນີ້ ເປັນ​ການ​ສ້າງ​ຄວາມ​ແຕກ​ຕື່ນ ຢ້ານ​ກົວ​ໃຫ້​ແກ່​ພວກ​ສັດຕູ​ຢ່າງ​ໃຫຍ່​ຫຼວງ ແລະ ຍັງ​ໄດ້​ຫວນ​ຄືນ​ມູນເຊື້ອ​ຂອງ​ວັນ​ໄຊຊະນະ​ບັ້ນ​ຮົບ​ດຽນ​ບຽນ​ຝູ ໂດຍ​ຍົກ​ໃຫ້​ເຫັນ​ເຖິງ​ສະພາບ​ແວດ​ລ້ອມ​ຢູ່​ໃນ​ອິນດູຈີນ, ສະພາບ​ຂອງ​ສັດຕູ, ແຜນ​ຍຸດ​ທະ​ສາດ​ປົດ​ປ່ອຍ​ດຽນ​ບຽນ​ຝູ​ຂອງ​ພັກ​ກອມ​ມູ​ນິດ​ຫວຽດນາມ ໄດ້​ເປີດ​ບັ້ນ​ຮົບ​ບຸກ​ໂຈມ​ຕີ​ຢ່າງ​ແຂງແຮງ​ທົ່ວ​ສະໜາມຮົບ​ອິນ ດູຈີນ ​ດ້ວຍ 5 ບາດ​ຄ້ອນ​ຍຸດ​ທະ​ສາດ ລ້ວນ​ແຕ່​ໄດ້​ຮັບ​ໄຊຊະນະ ເຊິ່ງ​ສ້າງ​ເງື່ອນໄຂ​ໃຫ້​ກອງທັບ​ຫວຽດນາມ​ເປີດ​ບັ້ນ​ຮົບ​ດຽນ​ບຽນ​ຝູ​ເປັນ​ການ​ຕໍ່ສູ້​ຕ້ານ​ການ​ຮຸກ​ຮານ​ຈາກ​ຈັກກະພັດ​ພາຍ​ນອກ​ຂອງ​ປະຊາຊົນ​ຫວຽດນາມ ຈົນ​ໄດ້​ຮັບ​ໄຊຊະນະ, ໄຊຊະນະ​ດຽນ​ບຽນ​ຝູ ບໍ່​ພຽງ​ແຕ່​ແມ່ນໄຊຊະນະ​ຂອງ​ປະຊາຊົນ​ຫວຽດນາມ ແຕ່​ຍັງ​ແມ່ນໄຊຊະນະ​ຂອງ​ປະຊາຊົນ​ລາວ ແລະ ກຳປູເຈຍ ທີ່​ໄດ້​ຮ່ວມ​ສຳພັນ​ສູ້​ຮົບ, ຮ່ວມ​ຂຸມ​ຄອງຕ້ານ​ສັດຕູ​ໂຕ​ດຽວ​ກັນ ເພື່ອ​ປົດ​ປ່ອຍ​ຕົນ​ເອງ ຈົນ​ກາຍເປັນ​ຖານ​ທີ່​ໝັ້ນ​ຂອງ​ການ​ປະຕິວັດ​ທີ່​ເຂັ້ມແຂງ, ໄຊຊະນະ​ດຽນ​ບຽນ​ຝູ ເປັນຄວາມ​ເອກອ້າງ​ທະ​ນົງ​ໃຈ​ຂອງ​ປະຊາຊົນ​ຫວຽດນາມ ໃນ​ພາລະກິດ​ສ້າງສາ​ພັດທະນາປະເທດ​ຊາດ​ຊົ່ວ​ກາລະ​ນານ. ໂດຍ: ນາງ ສຸ​ລິ​ຈັນ ພັດທະນາ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ