ກອງທັບປະຊາຊົນລາວ
 
ວັນອັງຄານ, ວັນທີ 25 ມິຖຸນາ 2024

  

ຄະນະ​ພັກ​ຮາກ​ຖານ ​ອົງການ​ສູນ​ບັນຊາ 761 ດຳເນີນ​ກອງ​ປະຊຸມ​ໃຫຍ່ ຄັ້ງ​ທີ V
ເວລາອອກຂ່າວ: 2024-05-29 08:44:48 | ຜູ້ຂຽນ : admin1 | ຈຳນວນຄົນເຂົ້າຊົມ: 171 | ຄວາມນິຍົມ:



ວັນ​ທີ 22 ພຶດສະພາ 2024 ນີ້, ຄະນະ​ພັກ​ຮາກ​ຖານ ​ອົງການ​ສູນ​ບັນຊາ 761 ໄດ້​ດຳ​​​ເນີນ​ກອງ​ປະຊຸມ​ໃຫຍ່ ຄັ້ງ​ທີ V, ໂດຍ​ການ​ເປັນ​ປະທານ ຂອງ ສະຫາຍ ພົນ​ຈັດຕະວາ ອຸ່ນ​ທອງ ບຸດ​ສຸວັນ ກໍາມະການຄະນະ​ພັກ​ອົງການ​ກົມ​ໃຫຍ່, ຫົວໜ້າ​ກົມປ້ອງ​ກັນ​ອາກາດ ກົມ​ໃຫຍ່​ເສນາ​ທິ​ການ​ກອງທັບ, ມີ​ຄະນະ​ພັກ​ຮາກ​ຖານ, ສະມາຊິກ​ພັກ​ສົມບູນ ແລະ ສຳຮອງ ພ້ອມດ້ວຍແຂກ​ຖືກ​ເຊີນ​ເຂົ້າ​ຮ່ວມ. ສະຫາຍ ພັນ​ໂທ ເສີມ ບຸນ​ຍະ​ສານ ເລຂາ​ຄະນະ​ພັກ​ ຮາກ​ຖານ, ຫົວໜ້າ​ການເມືອງ​ອົງການ​ສູນ​ບັນຊາ 761 ໄດ້​ຜ່ານ​ສະຫຼຸບ​ບົດ​ລາຍ​ງານ​ການເມືອງ​ທັງ​ສອງ​ພາກ ຕະຫຼອດ​ໄລຍະ​ຜ່ານ​ມາ, ຄະນະ​ພັກ​ຮາກ​ຖານ ໄດ້​ເອົາໃຈໃສ່​ວຽກ​ງານ​ສຶກ​ສາ​ອົບຮົມ​ການເມືອງ-ນຳພາ​ແນວ​ຄິດໃຫ້​ແກ່​ສະມາຊິກ​ພັກ, ພະນັກງານ-ນັກຮົບ ເຊື່ອມ​ຊຶມ​ກຳ​ແໜ້ນ​ແນວທາງ​ຂອງ​ພັກ, ລະບຽບ​ກົດໝາຍ​ຂອງ​ລັດ​ ເປັນຕົ້ນ​ແມ່ນບັນດາ​ມະຕິ, ຄຳ​ສັ່ງ ແລະ ເອກະສານ​ສຳຄັນ​ຕ່າງໆ​ຂອງ​ພັກ, ຂອງ​ຊາດ, ມູນເຊື້ອ​ ຂອງ​ກອງທັບ​ປະຊາຊົນ​ລາວ ຕິດ​ພັນ​ກັບ​ການ​ດຳເນີນ​ຊີວິດ​ການເມືອງ​ພາຍ​ໃນ​ພັກ​ເປັນ​ປົກກະຕິ ຕາມ 5 ຫຼັກການ 3 ທິດ​ນຳ​ຂອງ​ພັກ ກໍ່ສ້າງ​ພັກ​ໃຫ້​ປອດ​ໃສ ເຂັ້ມແຂງ ໜັກ​ແໜ້ນ ທາງ​ດ້ານ​ການເມືອງ, ແນວ​ຄິດ, ການຈັດຕັ້ງ ແລະ ແບບແຜນ​ການ​ນຳພາ ເຊິ່ງ​ຄະນະ​ພັກ​ຮາກ​ຖານ ​ມີ 3 ໜ່ວຍ​ພັກ​ຂຶ້ນ​ກັບ​ໄດ້​ຮັບ​ການ​ຢັ້ງຢືນ​ເປັນ​ໜ່ວຍ​ພັກ ປອດ​ໃສ ເຂັ້ມແຂງ ໜັກ​ແໜ້ນ 5 ສະໄໝ, ສາມາດ​ຕີ​ລາຄາ​ແບ່ງ​ປະເພດ​ສະມາຊິກ​ພັກ​ແຂງ ໄດ້ 80 ສະຫາຍ, ກາງ 2 ສະຫາຍ ແລະ ໄດ້​ຂະ​ຫາຍ​ມະຫາຊົນ​ເຂົ້າ​ເປັນ​ສະມາຊິກ​ພັກ​ໄດ້ 26 ສະຫາຍ ນອກ​ນັ້ນ, ​ຍັງ​ໄດ້​ຮັບ​ການ​ຢັ້ງຢືນ​ເປັນ​ກົມ​ກອງ 3 ປອດ​ປະເພດ I, ກົມ​ກອງ​ລວມ​ໝູ່​ໄດ້​ຮັບ​ການ​ຍ້ອງຍໍ​ຫຼຽນ​ໄຊ​ແຮງ​ງານ ​ຊັ້ນ III, 2 ໜ່ວຍ ແລະ ບຸກຄົນ​ໄດ້​ຮັບ​ໃບ​ຍ້ອງຍໍ​ຈາກ​ລັດຖະບານ, ກະຊວງ​ປ້ອງ​ກັນ​ປະເທດ ຈຳນວນ 177 ສະຫາຍ, ຄະນະ​ພັກຍັງ​ໄດ້​ຖື​ເອົາ​ວຽກ​ງານ​ພະລາທິການ​ແກ້​ໄຂ​ຊີວິດ​ການ​ເປັນ​ຢູ່ ຕາມ​ທິດ 4 ປູກ 4 ລ້ຽງ ເພື່ອ​ສ້າງ​ກົມ​ກອງ ເພິ່ງ​ຕົນ​ເອງ ກູ້ມ​ຕົນ​ເອງ ແລະ ສ້າງ​ຄວາມ​ເຂັ້ມແຂງ​ດ້ວຍ​ຕົນ​ເອງ ຕາມ​ທ່າແຮງ​ບົມ​ຊ້ອນ​ຂອງ​ກົມ​ກອງ ເອົາ​ການ​ປູກຝັງ-ລ້ຽງສັດ ເປັນ​ຫຼັກ ປູກ​ຜັກ​ຕາມ​ລະດູ​ການ​ສາມາດ​ເພື່ອ​ຕອບ​ສະໜອງ​ເຂົ້າ​ເຮືອນຄົວ​ລວມ​ຢ່າງ​ເປັນ​ປົກກະຕິ. ​ກອງ​ປະຊຸມ​ຍັງ​ໄດ້​ປ່ອນ​ບັດ​ຄັດ​ເລືອກ​ເອົາ​ຄະນະ​ພັກ​ຮາກ​ຖານ​ຊຸດ​ໃໝ່​ ​ເລືອກ​ໄດ້​ຄື: ສະຫາຍ ພັນ​ໂທ ເສີມ ບຸນ​ຍະ​ສານ ເປັນ​ເລຂາ, ພັນ​ໂທ ຈັນ​ສະໝອນ ໃບ​ທອງ​ສີ ເປັນ​ຮອງ​ເລຂາ, ພັນ​ໂທ ຄຳ​ມ່ວນ ທິດ​ພາ​ວັນ, ພັນ​ໂທ ບຸນ​ອ້ອມ ພົມ​ມະ​ຫອມ ແລະ ພັນ​ໂທ ພິລາ​ວົງ ພັກດີ, ຮ້ອຍ​ເອກ ຫຼຽນ​ທອງ ສີງ​ສາຍ​ຄຳ, ຮ້ອຍ​ເອກ ບຸນ​ມາ ທຳ​ມະ​ວົງ ເປັນ​ກຳມະການ. ໂອກາດ​ນີ້, ສະຫາຍ ພົນ​ຈັດຕະວາ ອຸ່ນ​ທອງ ບຸດ​ສຸວັນ ​ໄດ້​ສະແດງ​ຄວາມ​ຍ້ອງຍໍ​ຊົມເຊີຍ ແລະ ​ໂອ້​ລົມ​ຕໍ່​ຄະນະ​ພັກ​ຊຸດ​ໃໝ່ ​ເນັ້ນ​ໜັກ​ໃຫ້​ຍົກ​ສູງ​ຄວາມ​ຮັບຜິດຊອບ​ຕໍ່ໜ້າ​ທີ່​ການເມືອງ​ຂອງ​ຕົນ, ເປັນ​ແບບຢ່າງ​ນຳ​ໜ້າ​ທຸກ​ຂົງເຂດ​ວຽກ​ງານ, ຖື​ເອົາ​ການ​ປັບປຸງ​ແບບແຜນ​ວິທີ​ເຮັດ​ວຽກ​ໃຫ້​ສອດ​ຄອງ​ກັບ​ສະພາບ​ຕົວ​ຈິງ ໄປ​ພ້ອມ​ກັບ​ການ​ກໍ່ສ້າງ​ຮາກ​ຖານ​ຂອງ​ພັກ, ການ​ດຳເນີນ​ຊີວິດ​ພາຍ​ໃນ​ພັກ​ໃຫ້​ເປັນ​ປົກກະຕິ​ນຳ​ເອົາ​ບັນດາ​ມະຕິ, ຄຳ​ສັ່ງ, ແນວທາງ​ຂອງ​ພັກ ມາ​ຈັດ​ຕັ້ງ​ເຜີຍແຜ່​ເຮັດ​ໃຫ້​ສະມາຊິກ​ພັກ ມີ​ຄຸນ​ທາດ​ການເມືອງ​ໜັກ​ແໜ້ນ, ມີ​ຄຸນສົມບັດ​ສີນ​ທຳ​ປະຕິວັດແນ່​ໃສ່​ກໍ​ສ້າງ​ພັກ​ໃຫ້​ປອດ​ໃສ ເຂ້ັມ​ແຂງ ໜັກ​ແໜ້ນ ຢ່າງ​ບໍ່​ຢຸດ​ຢັ້ງ. ໂດຍ: ພຸດ​ທະ​ວອນ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ