ກອງທັບປະຊາຊົນລາວ
 
ວັນເສົາ, ວັນທີ 13 ກໍລະກົດ 2024

  

ກອງປະຊຸມສາມັນຄັ້ງທີ IV ປະຈຳປີ 2024 ລະຫວ່າງ ໂຮງຮຽນກໍ່ສ້າງນາຍສິບເລກ 2 ວຽງໄຊ ກັບ ໂຮງຮຽນການທະຫານເຂດ 5 ກອງທັບປະຊາຊົນຫວຽດນາມ
ເວລາອອກຂ່າວ: 2024-06-12 12:01:38 | ຜູ້ຂຽນ : admin2 | ຈຳນວນຄົນເຂົ້າຊົມ: 276 | ຄວາມນິຍົມ:



ກອງປະຊຸມສາມັນຄັ້ງທີ IV ປະຈຳປີ 2024. ລະຫວ່າງ ໂຮງຮຽນກໍ່ສ້າງນາຍສິບເລກ 2 ວຽງໄຊ ກອງທັບປະຊາຊົນລາວ ກັບ ໂຮງຮຽນການທະຫານເຂດ 5 ກອງທັບປະຊາຊົນຫວຽດນາມ ໄດ້ຈັດຂື້ນໃນ ວັນທີ 10 ມິຖຸນາ 2024 ນີ້, ໂດຍການເປັນປະທານຂອງ ສະຫາຍ ພົນຈັດຕະວາ ວົງມະນີຈັນ ສາມະວົງ ຫົວໜ້າການທະຫານໂຮງຮຽນກໍ່ສ້າງນາຍສິບເລກ 2 ວຽງໄຊ ພ້ອມຄະນະ,ມີສະຫາຍ ພັນເອກ ຮິ່ງໂດນ ຫົວໜ້າອໍານວຍການໂຮງຮຽນການທະຫານເຂດ 5 ກອງທັບປະຊາຊົນຫວຽດນາມ ພ້ອມຄະນະ, ຕະຫຼອດຮອດຄະນະຜູ້ແທນທັງ 2 ຝ່າຍເຂົ້າຮ່ວມ. ໂອກາດນີ້ ສະຫາຍ ພົນຈັດຕະວາ ວົງມະນີຈັນ ສາມາວົງ ແລະ ສະຫາຍ ພັນເອກ ຮິ່ງໂດນ ໄດ້ຜັດປຽ່ນກັນ ລາຍງານທົບທວນຄືນ, ວຽກງານຕ່າງໆທີ່ໄດ້ຈັດຕັ້ງປະຕິບັດຮ່ວມກັນ ແລະ ຖອດຖອນບົດຮຽນ, ແກ້ໄຂບາງບັນຫາທີ່ຍັງຄົງຄ້າງ ໃນໄລຍະຜ່ານມາ ແລະ ສືບຕໍ່ພົວພັນ ຮ່ວມມືຊ່ວຍເຫຼືອເຊີ່ງກັນ ແລະ ກັນ ໃນປີ 2024, ເຊີ່ງໄລຍະຜ່ານມາ ສອງໂຮງຮຽນພວກເຮົາໄດ້ຊຸກຍູ້ໂຄສະນາເຜີຍແຜ່ມູນເຊື້ອການພົວພັນຮ່ວມມືຂອງສອງປະເທດ, ສຶກສາອົບຮົມສ້າງຈິດສຳນຶກ ໃຫ້ແກ່ພະນັກງານ-ນັກຮົບ,ນັກຮຽນ-ນັກສຶກສາ ໃນການປົກປັກຮັກສາ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່,ຄວາມສາມັກຄີພິເສດ, ການຮ່ວມມືຮອບດ້ານລະຫວ່າງສອງພັກ,ສອງລັດ ລາວ-ຫວຽດນາມ, ຫວຽດນາມ-ລາວ ໃຫ້ນັບມື້ໄດ້ຮັບການພັດທະນາຍິ່ງໆຂື້ນ. ພ້ອມກັນນັ້ນ ຍັງໄດ້ແລກປ່ຽນຂໍ້ມູນຂ່າວສານນໍາກັນເປັນປົກກະຕິ,ຢ້ຽມຢາມອວຍພອນເຊີ່ງກັນ ແລະ ກັນ. ເນື່ອງໃນໂອກາດວັນສຳຄັນຂອງສອງຊາດ, ສອງກອງທັບ ແລະ ສອງກົມກອງ, ຈັດກິດຈະກຳຖາມ-ຕອບ ວິທະຍາສາດ ຄວາມຮູ້ກ່ຽວກັບ ມູນເຊື້ອຂອງສອງຊາດ, ສອງກອງທັບ ແລະ ສອງໂຮງຮຽນ ໃຫ້ຄູ-ອາຈານ, ພະນັກງານນັກຮົບ-ນັກຮຽນ, ນັກສຶກສາໃນທົ່ວໂຮງຮຽນ. ພິເສດ :ໃນປີຜ່ານມາໂຮງຮຽນພວກເຮົາໄດ້ຮັບການຊ່ວຍເຫຼືອຈາກກອງບັນຊາການທະຫານເຂດ 5 ກອງທັບປະຊາຊົນຫວຽດນາມ ຊື້ຄອມພິວເຕີ ປະກອບໃສ່ຫ້ອງຮຽນມູນຄ່າ 300 ລ້ານດົງ, ໃຫ້ທຶນຄອບຄົວການນຳໂຮງຮຽນໄປພັກແລ້ງ 2 ຄອບຄົວ, ພະນັກງານໄປປິ່ນປົວພະຍາດ 6 ສະຫາຍ, ໄປແລກປ່ຽນຖອດຖອນບົດຮຽນວຽກງານອົບຮົມ-ຫັດແອບ, ຄຸ້ມຄອງລະບຽບແບບແຜນ ແລະ ການລ້ຽງດູທັບ ຈຳນວນ 7 ສະຫາຍ. ໂອກາດທີ່ມີຄວາມໝາຍສຳຄັນດັ່ງກ່າວນີ້ ກອງປະຊຸມຍັງໄດ້ພ້ອມກັນ ເອກກະພາບ ເຊັນບົດບັນທຶກ ການຮ່ວມມື ປີ 2024. ເຊິິ່ງທັງສອງຝ່າຍຍັງໄດ້ຕາງໜ້າມອບຂອງທີ່ລະນຶກ ແລະ ຂອງຂວັນໃຫ້ເຊິ່ງກັນ ແລະ ກັນ. ຈາກນັ້ນ, ກໍ່ໄດ້ເຂົ້າທ່ຽວຊົມຫໍມູນເຊື້ອຂອງໂຮງຮຽນ ແລະ ຮ່ວມກັນປູກຕົ້ນໄມ້ ເນື່ອງໃນວັນປູກຕົ້ນໄມ້ແຫ່ງຊາດຕື່ມອີກ. ໂດຍ :ສົມພົງ ແກ້ວປະເສີດ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ