ກອງທັບປະຊາຊົນລາວ
 
ວັນອາທິດ, ວັນທີ 14 ກໍລະກົດ 2024

  

ກອງ​ປະຊຸມ​ປຶກສາ​ຫາລື​ວຽກ​ງານ​ການ​ທູດ​ເສດຖະກິດ
ເວລາອອກຂ່າວ: 2024-06-24 09:39:42 | ຜູ້ຂຽນ : admin1 | ຈຳນວນຄົນເຂົ້າຊົມ: 110 | ຄວາມນິຍົມ:



ວັນ​ທີ 20 ມິຖຸນາ 2024, ກົມ​ເສດຖະກິດ ກະຊວງ​ການ​ຕ່າງປະເທດ ໄດ້​ຈັດ​ກອງ​ປະຊຸມ​ປຶກສາ​ຫາລື “ວຽກ​ງານ​ການ​ທູດ​ເສດຖະກິດ ຮ່ວມ​ກັບ​ບັນດາ 5 ແຂວງ​ພາກ​ກາງ ແລະ 2 ແຂວງ​ພາກ​ເໜືອ” ຢູ່​ທີ່ແຂວງ​ສະຫວັນ​ນະ​ເຂດ,ພາຍ ​ໃຕ້​ການ​ເປັນ​ປະທານ​ຮ່ວມ​ ຂອງທ່ານ ທອງ​ຜ່ານ ສະຫວັນ​ເພັດ ຮອງ​ລັດຖະມົນຕີ​ກະຊວງ​ການ​ຕ່າງປະເທດ ແລະ ທ່ານ ​ປອ ແສນ​ສັກ ສຸ​ລິ​ສັກ ຮອງ​ເຈົ້າແຂວງ ແຂວງສະຫວັນ​ນະ​ເຂດ, ພ້ອມ​ດ້ວຍ​ບັນດາ​ຜູ້ຕາງໜ້າ​ຈາກ​ບັນດາ​ພະແນກ ການ​ຕ່າງໆ​ທີ່​ກ່ຽວຂ້ອງ ທີ່​ມາ​ຈາກ 5 ແຂວງ​ພາກ​ກາງ ແລະ 2 ແຂວງ​ພາກ​ເໜືອ ເຂົ້າ​ຮ່ວມ​ທັງ​ໝົດ ຈຳນວນ 110 ທ່ານ. ຈຸດປະສົງ​ການ​ຈັດ​ກອງ​ປະຊຸມ​ຄັ້ງ​ນີ້ ເພື່ອ​ສ້າງ​ຄວາມ​ຮັບ​ຮູ້ ແລະ ເຂົ້າໃຈ​ຕໍ່​​ບົດບາດ ແລະ ຄວາມ​ສຳຄັນ​ ຂອງ​ວຽກ​ງານ​ການ​ທູດ​ເສດຖະກິດ ທີ່​ຕິດ​ພັນ​ ກັບ​ແຜນການ​ພັດທະນາ​ເສດຖະກິດ-ສັງຄົມ ຂອງ​ປະເທດ​ ໃນ​ປັດຈຸບັນ ເພື່ອ​ແນໃສ່​ປະກອບສ່ວນ​ເຮັດ​ໃຫ້​ມີ​ຄວາມ​ເຂັ້ມແຂງ ແລະ ນຳ​ໃຊ້​ທ່າແຮງ​ບົ່ມ​ຊ້ອນ​ຂອງ ​ຊາດ ເພື່ອ​ດຶງ​ດູດ​ການ​ລົງທຶນ ລວມ​ທັງ​ສ້າງ​ພື້ນຖານ​ການ​ຜະລິດ​ທີ່​ເຂັ້ມແຂງ ເພື່ອ​ເຮັດ​ໃຫ້​ວຽກ​ງານ​ການ​ຄ້າ​ ຂອງ ​ສປປ ລາວ ສາມາດ​ແຂ່ງຂັນ​ກັບ​ພາກ​ພື້ນ ແລະ ສາກົນ​ໄດ້. ຄຽງ​ຄູ່​ກັນ​ນັ້ນ, ຍັງ​ແນໃສ່​ການ​ສ້າງ​ກົນ​ໄກ​ຂອດ​ປະສານ​ງານ​ໃນ​ການເຄື່ອນໄຫວ​ວຽກ​ງານ​ດ້ານ​ການ​ທູດ​ເສດຖະກິດ​ດັ່ງກ່າວ ລະຫວ່າງ ສູນ​ກາງ ແລະ ທ້ອງຖິ່ນ ແລະ ບັນດາ​ສະຖານທູດ​ລາວ​ຢູ່​ຕ່າງປະເທດ ໃຫ້​ເປັນ​ລະບົບ ເພື່ອ​ ຮັບປະກັນ​ໃຫ້​ແກ່​ການ​ປະສານ​ງານ​ມີ​ຄວາມ​ໂລ່ງ​ລ່ຽນ ແລະ ກົມກຽວ​ດີ​ຍິ່ງ​ຂຶ້ນ. ໃນ​ໂອກາດ​ກ່າວ​ເປີດ​ກອງ​ປະຊຸມ ທ່ານ​ປະທານ​ກອງ​ປະຊຸມ ໄດ້​ຍົກ​ໃຫ້​ເຫັນ​ເຖິງ​ຄວາມ​ໝາຍ​ຄວາມ​ສຳຄັນ​ຂອງ​ວຽກ​ງານ​ການ​ທູດ​ເສດຖະກິດ ເຊິ່ງ​ແມ່ນ​ວຽກ​ງານ​ໜຶ່ງ​ທີ່​ມີ​ຄວາມ​ສຳຄັນ​ຈຳເປັນ​ໃນ​ການ​ຊຸກຍູ້​ການ​ພັດທະນາ​ເສດຖະກິດ​ ຂອງ​ປະເທດ​ໃນ​ປັດຈຸບັນ ໂດຍ​ແນໃສ່​ຍົກ​ລະດັບ​ການ​ຮ່ວມ​ມື​ດ້ານ​ການ​ຄ້າ, ການ​ລົງທຶນ ແລະ ການ​ເຊື່ອມ​ໂຍງ​ສາກົນ​ຂຶ້ນ​ສູ່​ມິ​ຕິ​ໃໝ່. ການ​ໂຄສະນາ​ດຶງ​ດູດ​ການ​ຄ້າ-ການ​ລົງທຶນ, ການທ່ອງທ່ຽວ ລວມ​ທັງ​ການ​ສ້າງ​ສະພາບ​ແວດ​ລ້ອມ​ທີ່​ເອື້ອ​ອຳນວຍ​ໃຫ້​ແກ່​ການ​ສົ່ງ​ອອກ​ສິນຄ້າ​ ຂອງ ​ສປປ ລາວ ເຂົ້າ​ສູ່​ຕະຫຼາດ ​ຂອງ​ສາກົນ​ໃນ​ປັດຈຸບັນ ແມ່ນ​ຕັດຂາດ​ບໍ່​ໄດ້​ຈາກ​ການ​ເຮັດ​ໜ້າທີ່​ດ້ານ​ການ​ທູດ​ເສດຖະກິດ, ເນື່ອງ​ຈາກ​ການ​ທູດ​ເສດຖະກິດ​ແມ່ນ​ການ​ຂົນຂວາຍ​ຍາດ​ແຍ່ງ​ການ​ຮ່ວມ​ມື​ໂດຍ​ກົງ​ທາງ​ດ້ານ​ເສດຖະກິດໃນ​ຂອບ​ສອງ​ຝ່າຍ ແລະ ຫຼາຍ​ຝ່າຍ ໂດຍ​ສະເພາະ​ແມ່ນ​ຍຸກ​ເສດຖະກິດ​ໂລກາ​ພິ​ວັດ​ໃນ​ປັດຈຸບັນ. ໃນ​ກອງ​ປະຊຸມ​ຄັ້ງ​ນີ້ ຍັງ​ໄດ້​ຮັບ​ຟັງ​ການ​ນຳ​ສະເໜີ​ເອກະສານ​ສຳຄັນ​ຕ່າງໆ ຄື: ດຳລັດ​ ວ່າ​ດ້ວຍ​ການເຄື່ອນໄຫວ ​ຂອງ​ສຳນັກງານ​ຜູ້ຕາງໜ້າ ເພື່ອ​ພັດທະນາ​ເສດຖະກິດ​ຂອງ​ຊາດ; ເຜີຍແຜ່​ຄວາມ​ໝາຍ, ຄວາມ​ສຳຄັນ​ຂອງ​ການເຄື່ອນໄຫວ​ວຽກ​ງານ​ການ​ທູດ​ເສດຖະກິດ ແລະ ທິດ​ທາງ​ແຜນການ​ໃນຕໍ່ໜ້າ. ນອກ​ນີ້, ຍັງ​ໄດ້​ຮັບ​ຟັງ​ການ​ລາຍ​ງານ​ທ່າແຮງ​ທາງ​ດ້ານ​ການ​ຄ້າ, ການ​ລົງທຶນ ຂອງ​ບັນດາ 5 ແຂວງ​ພາກ​ກາງ (ແຂວງ​ວຽງ​ຈັນ, ແຂວງ​ໄຊ​ສົມບູນ, ແຂວງ​ບໍ​ລິ​ຄຳ​ໄຊ, ແຂວງ​ຄຳ​ ມ່ວນ, ແຂວງ​ສະຫວັນ​ນະ​ເຂດ) ແລະ 2 ແຂວງ​ພາກ​ເໜືອ (ແຂວງ​ ຫົວພັນ ແລະ ຊຽງ​ຂວາງ). ພ້ອມ​ທັງ​ໄດ້​ປຶກສາ​ຫາລື​ແລກປ່ຽນ​ຄຳ​ຄິດ​ເຫັນ ແລະ ບົດຮຽນ​ໃນ​ແຕ່​ລະ​ດ້ານ ທີ່​ຕິດ​ພັນ​ກັບ​ການ​ຄ້າ, ການ​ລົງທຶນ ແລະ ທ່ອງ​ທ່ຽວ ລະຫວ່າງ ແຂວງ​ກັບ​ແຂວງ ແລະ ປຶກສາ​ຫາລື​ກ່ຽວ​ກັບການ​ສ້າງຕັ້ງກົນ​ໄກ​ ຈຸດ​ປະສານ​ງານ ລະຫວ່າງ ສູນ​ກາງ ແລະ ທ້ອງຖິ່ນ ຕໍ່​​ວຽກງານ​ການ​ທູດ​ເສດຖະກິດ​ ​ອີກ​ດ້ວຍ. ໃນ​ໂອກາດ​ເຂົ້າ​ຮ່ວມ​ກອງ​ປະຊຸມ​ປຶກສາ​ຫາລື​ວຽກ​ງານ​ການ​ທູດ​ເສດຖະກິດ​ຄັ້ງ​ນີ້, ຄະນະ​ຜູ້​ແທນ​​ກອງ​ປະຊຸມ ຍັງ​ໄດ້​ດ​ໄປ​ຢ້ຽມຢາມ ເຂດ​ເສດຖະກິດ​ພິເສດ​ສະ ຫວັນ-ເຊ​ໂນ ເພື່ອ​ຢ້ຽມ​ຊົມ​ການ​ພັດທະນາ ແລະ ຮັບ​ຟັງ​ບັນດາ​ທ່າແຮງ​ດ້ານ​ການ​ລົງທຶນໃນເຂດ​ດັ່ງກ່າວ ໂດຍ​ມີ​ຄະນະ​ຮັບຜິດຊອບ​ເຂດ​ເສດຖະກິດ​ພິເສດ​ດັ່ງ ກ່າວ ໃຫ້ການ​ຕ້ອນຮັບ, ໃຫ້​ຂໍ້​ມູນ​ອະທິບາຍ ແລະ ນຳພາ​ຢ້ຽມ​ຊົມ ​ອີກ​ດ້ວຍ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ