ວັນພະຫັດ, ວັນທີ 23 ມັງກອນ 2025
ກອງປະຊຸມຜູ້ແທນຊາວໜຸ່ມ ຄັ້ງທີ VI ທົ່ວກອງພັນໃຫຍ່ 605
ເວລາອອກຂ່າວ: 2024-06-25 09:29:20 | ຜູ້ຂຽນ : admin1 | ຈຳນວນຄົນເຂົ້າຊົມ: 337 | ຄວາມນິຍົມ: 
ວັນທີ 19 ມິຖຸນາ 2024 ນີ້, ຂະແໜງຊາວໜຸ່ມ ກອງພັນໃຫຍ່ 605 ໄດ້ດໍາເນີນກອງປະຊຸມຜູ້ແທນຊາວໜຸ່ມ ຄັ້ງທີ VI, ໂດຍການເປັນປະທານຂອງສະຫາຍ ພັນເອກ ສຸດໃຈ ມະຫາວົງ ຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ຫົວໜ້າຫ້ອງການຊາວໜຸ່ມກອງທັບ, ມີຄະນະພັກ-ຄະນະບັນຊາ, ພະແນກການ, ກົມກອງ, ມີອົງການຈັດຕັ້ງມະຫາຊົນຊາວໜຸ່ມ-ແມ່ຍິງ, ແຂກຖືກເຊີນ ແລະ ຜູ້ແທນຊາວໜຸ່ມ ເຂົ້າຮ່ວມ.
ສະຫາຍ ພັນຕີ ຄຳພອນ ທ່ຽງທຳມາ ຫົວໜ້າຂະແໜງຊາວໜຸ່ມ ກອງພັນໃຫຍ່ 605 ໄດ້ຜ່ານບົດລາຍງານການເມືອງທັງສອງພາກ ຕະຫຼອດໄລຍະ 5 ປີຜ່ານມາ, ຄະນະພັກ-ຄະນະບັນຊາ ກໍຄືຄະນະນຳຊາວໜຸ່ມ ໄດ້ເອົາໃຈໃສ່ສຶກສາອົບຮົມການເມືອງ-ນຳພາແນວຄິດ ໃຫ້ສະມາຊິກຊາວໜຸ່ມເຮັດໃຫ້ການຈັດຕັ້ງຊາວໜຸ່ມແຕ່ລະຂັ້ນ ມີຄວາມໜັກແໜ້ນທາງດ້ານການເມືອງ-ແນວຄິດ ເຂັ້ມແຂງທາງດ້ານການຈັດຕັ້ງ, ນຳເອົາແນວທາງນະໂຍບາຍຂອງພັກ, ກົດໝາຍຂອງລັດ, ບັນດາມະຕິ, ຄຳສັ່ງ ແລະ ເອກະສານມູນເຊື້ອຕ່າງໆ ມາຈັດຕັ້ງເຊື່ອມຊຶມໃຫ້ສະມາຊິກຊາວໜຸ່ມ ຕິດພັນກັບການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ແລະ ເຄື່ອນໄຫວຕາມພາລະບົດບາດໜ້າທີ່ການເມືອງຂອງຕົນ, ສອດຫ້ອຍເຂົ້າໃນທຸກຂົງເຂດວຽກງານ ແລະ ທຸກຂະບວນການ ເຮັດໃຫ້ກົມກອງມີຄວາມສະຫງົບ, ມີລະບຽບວິໄນເຂັ້ມງວດ, ໂດຍສະເພາະການປະຕິບັດເນື້ອໃນຂໍ້
ແຂ່ງຂັນ 4 ບຸກ ຂອງສູນການຊາວໜຸ່ມປະຊາຊົມປະຕິວັດລາວວາງອອກ ແລະ ຂໍ້ກຳນົດ 7 ລະບອບ 18 ວຽກຂອງກອງທັບຢ່າງເຂັ້ມງວດ. ນອກນີ້, ຍັງໄດ້ປະຕິ
ບັດວຽກງານນະໂຍບາຍຊ່ວຍເຫຼືອເຊິ່ງກັນ ແລະ ກັນໃຫ້ພະນັກງານ-ນັກຮົບ, ສະມາຊິກຊາວໜຸ່ມຢ່າງເໝາະສົມ, ຄະນະຊາວໜຸ່ມພວກເຮົາ ຍັງໄດ້ປະກອບສ່ວນເຂົ້າຮ່ວມເປັນສະມາຊິກກອງທຶນຮ່ວມພັດທະນາຊາວໜຸ່ມກອງທັບ ເພື່ອສ້າງເງື່ອນໄຂໃຫ້ບຸກຄົນ ແລະ ກົມກອງລວມໝູ່ໄດ້ມີໂອກາດສ້າງເສດຖະກິດແກ້ໄຂຊີວິດການເປັນຢູ່ໃຫ້ດີຂຶ້ນ, ເຊິ່ງມີສະມາຊິກເຂົ້າຮ່ວມ 712 ສະຫາຍ, ມີເງິນຝາກທັງໝົດ 100 ລ້ານກວ່າກີບ ພ້ອມນີ້, ຍັງໄດ້ປຸກລະດົມຊຸກຍູ້ສະມາຊິກຊາວໜຸ່ມໃຫ້ເອົາໃຈໃສ່ເພີ່ມພູນຜະລິດຜົນ ໂດຍປະຕິບັດຕາມທິດຊີ້ນຳ 4 ປູກ 4 ລ້ຽງ ທີ່ກົມໃຫຍ່ພະລາທິການວາງອອກ ເພື່ອສ້າງແຫຼ່ງລາຍຮັບແກ້ໄຂຊີວິດການເປັນຢູ່ຂອງກົມກອງ ແລະ ຕົນເອງ ໃນນີ້, ໄດ້ປູກພືດຜັກລົ້ມລຸກຊະນິດຕ່າງໆ ໄດ້ 64.960 ກິໂລກຣາມ, ລ້ຽງສັດປະເພດຕ່າງໆ ໄດ້ 25.192 ກິໂລກຣາມ,
ລວມລາຍຮັບຈາກການປູກຝັງ ແລະ ລ້ຽງສັດທັງໝົດ 1.180.560.000 ກີບ.
ຜ່ານການຈັດຕັ້ງປະຕິບັດຂໍ້ແຂ່ງຂັນ 4 ບຸກຜ່ານມາ ໄດ້ຮັບຢັ້ງຢືນເປັນຄະນະບໍລິຫານງານຊາວໜຸ່ມ 4 ບຸກ 2 ຄະນະ, ຄະນະບໍລິຫານງານຊາວໜຸ່ມແຂງ 5 ຄະນະ, ໜ່ວຍຊາວໜຸ່ມນຳໜ້າ 4 ບຸກ 8 ໜ່ວຍ, ແຂງ 4 ໜ່ວຍ, ສະມາຊິກຊາວໜຸ່ມນຳໜ້າ 4 ບຸກ 62 ສະຫາຍ, ສະມາຊິກຊາວໜຸ່ມແຂງ 245 ສະຫາຍ, ກາງ 72 ສະຫາຍ, ຂະຫຍາຍມະຫາຊົນກ້າວໜ້າເຂົ້າເປັນສະມາຊິກພັກ 68 ສະຫາຍ. ຈາກຜົນງານດັ່ງກ່າວ, ສະມາຊິກຊາວໜຸ່ມຍັງໄດ້ຮັບການຍ້ອງຍໍປະເພດຫຼຽນໄຊ, ຫຼຽນກາ ຫຼາຍສະຫາຍ, ໃບຍ້ອງຍໍ ແລະ ໃບຊົມເຊີຍ 435 ໃບ. ຈາກນັ້ນ, ຜູ້ແທນກອງປະຊຸມຍັງໄດ້ປະກອບຄຳຄິດເຫັນໃສ່ບົດລາຍງານການເມືອງທັງສອງພາກຢ່າງກົງໄປກົງມາ ເພື່ອເຮັດໃຫ້ເນື້ອໃນຄົບຖ້ວນສົມບູນຂຶ້ນຕື່ມ.
ໂດຍ: ໜູແດງ+ເພັງ ມະນີລະສິດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
