ວັນຈັນ, ວັນທີ 14 ຕຸລາ 2024
ຂະແໜງຊາວໜຸ່ມ ກອງພັນໃຫຍ່ 643 ສະຫຼຸບວຽກງານ 6 ເດືອນຕົ້ນປີ 2024
ເວລາອອກຂ່າວ: 2024-09-06 09:03:26 | ຜູ້ຂຽນ : admin1 | ຈຳນວນຄົນເຂົ້າຊົມ: 345 | ຄວາມນິຍົມ: 
ໃນທ້າຍເດືອນ ສິງຫາ 2024 ນີ້, ຂະແໜງຊາວໜຸ່ມ ກອງພັນໃຫຍ່ 643 ໄດ້ຈັດກອງປະຊຸມສະຫຼຸບວຽກງານ 6 ເດືອນຕົ້ນປີ ແລະ ວາງທິດທາງແຜນການ
6 ເດືອນທ້າຍປີ 2024 ໂດຍການເປັນປະທານຂອງ ສະຫາຍ ພັນໂທ ຖາວອນ ແສງສະທອງ ກຳມະການຄະນະພັກກອງພັນໃຫຍ່, ຮອງຫົວໜ້າພະແນກການເມືອງກອງພັນໃຫຍ່ 643, ຜູ້ຊີ້ນຳວຽກງານອົງການຈັດຕັ້ງມະຫາຊົນ, ມີຄະນະພັກ-ຄະນະບັນຊາກົມກອງຮາກຖານ, ຄະນະບໍລິຫານງານຊາວໜຸ່ມ, ໜ່ວຍຊາວໜຸ່ມ ຕະຫຼອດຮອດສະມາຊິກຊາວໜຸ່ມເຂົ້າຮ່ວມ.
ສະຫາຍ ພັນຕີ ພູເງິນ ເທບພອນໄຊ ຫົວໜ້າຂະແໜງຊາວໜຸ່ມ ກອງພັນໃຫຍ່ 643 ໄດ້ຜ່ານບົດສະຫຼຸບວຽກງານການເຄື່ອນໄຫວໃນໄລຍະ 6 ເດືອນ ແລະ ທິດທາງແຜນການ 6 ຕໍ່ໜ້າ ໄດ້ຍົກໃຫ້ເຫັນຈຸດດີ, ຂໍ້ຄົງຄ້າງ ແລະ ບົດຮຽນທີ່ສາມາດຖອດຖອນໄດ້ ເປັນຕົ້ນແມ່ນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກຂອງສູນກາງຊາວໜຸ່ມປະຊາຊົນ ປະຕິວັດລາວ ກໍຄືທິດນຳຂອງຫ້ອງການຊາວໜຸ່ມກອງທັບ ໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານຂອງຄະນະພັກກະຊວງປ້ອງກັນປະເທດວາງອອກ ຕິດພັນກັບວຽກງານສຶກສາອົບຮົມການເມືອງ-ແນວຄິດໃຫ້ແກ່ຖັນແຖວສະມາຊິກຊາວໜຸ່ມ, ໄວໜຸ່ມ ຜ່ານມາເຫັນວ່າ: ສະມາຊິກຊາວໜຸ່ມໃນກົມກອງ ມີຄວາມເຂົ້າໃຈແຈ້ງຕໍ່ກັບແນວທາງແຜນນະໂຍບາຍຂອງພັກ-ປະຕິບັດກົດໝາຍຂອງລັດ ແລະ ຂໍ້ກຳນົດ, ກົດລະບຽບຂອງກອງທັບໄດ້ເປັນຢ່າງດີ. ສະແດງອອກໃນການເປັນກຳລັງແຮງສັງລວມຂອງກົມກອງຮັບປະກັນເຮັດໃຫ້ສະພາບມີຄວາມສະຫງົບໂດຍພື້ນຖານ, ຊີ້ນຳສະມາຊິກຊາວໜຸ່ມເຂົ້າຮ່ວມເຄື່ອນໄຫວຕາມຄຳສັ່ງຂອງຂັ້ນເທິງໃນການປ້ອງກັນວັນສຳຄັນຕ່າງໆຂອງຊາດ,ຂອງພັກ ແລະ ຂອງກອງທັບ, ປ້ອງກັນແຂກພາຍໃນ ແລະ ຕ່າງປະເທດທີ່ມາຢ້ຽມຢາມ ແລະ ເຮັດວຽກຢູ່ ແຂວງ ຊຽງຂວາງ ຮັບປະກັນໄດ້ຄວາມປອດໄພ 100%; ນອກນັ້ນຍັງໄດ້ປະຕິບັດລະບອບດຳເນິນຊີວິດການເມືອງຂັ້ນຈຸ, ຂັ້ນໜ່ວຍ ໄດ້ເປັນປົກກະຕິ ສຸມໃສ່ສ້າງໜ່ວຍຊາວໜຸ່ມ 4 ບຸກ ຕິດພັນກັບການສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ, ສ້າງນັກຮົບວັດທະນະທຳ ແລະ ກົມກອງວັດທະນະທຳ ໃຫ້ເພີ່ມຂຶ້ນທາງດ້ານຈຳນວນ ແລະ ຄຸນນະພາບ. ນອກຈາກນັ້ນຍັງໄດ້ຊີ້ນຳສຸມໃສ່ວຽກງານອົບຮົມ-ຫັດແອບການເມືອງ, ການທະຫານ, ພະລາທິການ-ເຕັກນິກ ແລະ ເຫຼົ່າຮົບວິຊາສະເພາະ ໃຫ້ມີຄວາມຊຳນິຊຳນານ.
ປັດຈຸບັນ ກອງພັນໃຫຍ່ 643 ປະກອບມີ 1 ຂະແໜງຊາວໜຸ່ມ, ມີ 3 ຄະນະບໍລິຫານງານຊາວໜຸ່ມ, ມີ 12 ໜ່ວຍຂຶ້ນກັບ ໃນນັ້ນ, ມີ 5 ໜ່ວຍເອກະລາດຂຶ້ນກັບຂະແໜງ, ມີສະມາຊິກຊາວໜຸ່ມທັງໝົດ 540 ສະຫາຍ, ຍິງ 50 ສະຫາຍ, ມີສະມາຊິກພັກເປັນແກນນຳ 140 ສະຫາຍ, ຍິງ 19 ສະຫາຍ, ສາມາດສ້າງໜ່ວຍຊາວໜຸ່ມ 4 ບຸກໄດ້ຈຳນວນ 17 ຫົວໜ່ວຍ, ສ້າງຊາວໜຸ່ມນຳໜ້າ 4 ບຸກ ໄດ້ 379 ສະຫາຍ, ຍິງ 29 ສະຫາຍ, ບຸກຄົນປະເພດແຂງ 130 ສະຫາຍ, ຍິງ 16 ສະຫາຍ, ປະເພດກາງ 24 ສະຫາຍ, ຍິງ 2 ສະຫາຍ. ວຽກງານສ້າງລາຍຮັບເຂົ້າຄັງລວມຈາກການປູກຝັງ-ລ້ຽງສັດ ແລະ ບໍລິການອື່ນໆໄດ້ທັງໝົດ 285.000.000 ກວ່າກີບ. ຈາກນັ້ນຍັງໄດ້ມອບໃບຢັງຢືນ 4 ບຸກ ປະຈຳປີ 2023 ໃຫ້ 17 ຫົວໜ່ວຍ ຢ່າງສົມກຽດ.
ໂດຍ: ຄຳໝັ້ນ ຄົງວິໄລ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
