ວັນຈັນ, ວັນທີ 14 ຕຸລາ 2024
ກອງພັນໃຫຍ່ 703 ຈັດຕັ້ງລຳລຽງ-ຂົນສົ່ງ ເຄື່ອງໄປຊ່ວຍເຫຼືອປະຊາຊົນ ທີ່ປະຊົບໄພພິບັດນ້ຳຖ້ວມ ຢູ່ ແຂວງຫຼວງນ້ຳທາ
ເວລາອອກຂ່າວ: 2024-09-11 14:45:40 | ຜູ້ຂຽນ : admin2 | ຈຳນວນຄົນເຂົ້າຊົມ: 394 | ຄວາມນິຍົມ: 
ໃນວັນທີ 10 ກັນຍາ 2024 ນີ້, ກອງພັນໃຫຍ່ 703 ໄດ້ຮັບຄຳສັ່ງຈາກກະຊວງປ້ອງກັນປະເທດ ວ່າດ້ວຍການນຳໃຊ້ເຮືອບິນ ຂອງກອງພັນໃຫຍ່ 703 ກອງບັນຊາການທະຫານອາກາດ ເພື່ອຂົນສົ່ງກຳລັງ, ເຮືອ ແລະ ອຸປະກອນຊ່ວຍເຫຼືອຜູ້ປະສົບໄພ ຂອງກົມຊ່າງແສງ ກົມໃຫຍ່ເສນາທິການກອງທັບ ໄປຊ່ວຍເຫຼືອຜູ້ປະສົບໄພນ້ຳຖ້ວມ ຢູ່ແຂວງຫຼວງນ້ຳທາ, ອີງຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ອີງຕາມແຈ້ງການດ່ວນຂອງຄະນະກຳມະການຄຸ້ມຄອງໄພພິບັດຂັ້ນສູງກາງ ແລະ ອີງຕາມ ຄຳສັ່ງຂອງກົມໃຫຍ່ເສນາທິການກອງທັບ ວ່າດ້ວຍການກຽມພ້ອມຮັບມືພາຍຸ ຢາກິ, ກອງພັນໃຫຍ່ 703 ໄດ້ນຳໃຊ້ເຮືອບິນ ຈຳນວນ 4 ລຳ ເພື່ອບິນຂົນສົ່ງເຮືອ ແລະ ອຸປະກອນຕ່າງໆ ເພື່ອໄປຊ່ວຍເຫຼືອຜູ້ປະສົບໄພພິບັດນ້ຳຖ້ວມທີ່ແຂວງຫຼວງນ້ຳທາ ພາຍໃຕ້ການຊີ້ນຳຂອງ ສະຫາຍ ພັນເອກ ຄຳສຸກ ຄຳເລືອງເທບ ຫົວໜ້າການທະຫານ ກອງພັນໃຫຍ່ 703 ໄດ້ຈັດຕັ້ງປະຕິບັດຄື: ນຳເຮືອບິນ ຈຳນວນ 4 ລໍາ ເພື່ອຂົນສົ່ງອຸປະກອນການຊ່ວຍເຫຼືອ, ນຳໃຊ້ເຮືອບິນ MI-17 ຈຳນວນ 2 ລຳ ພ້ອມດ້ວຍຈຸບິນ ແລະ ນັກກອບກູ້ສຳລັບໂຢດພົນກອບກູ້ 1 ຈຸ ໄປປະຈໍາການຢູ່ພາກສະໜາມເພື່ອໄປກອບກູ້ຈຸດທີ່ເຮືອໄປບໍ່ເຖິງ.
ການເຂົ້າຮ່ວມກອບກູໄພພິບັດນ້ຳຖ້ວມຄັ້ງນີ້ ກໍເພື່ອຊ່ວຍເຫຼືອປະຊາຊົນໃຫ້ພົ້ນຈາກໄພພິບັດນ້ຳຖ້ວມ ເໝືອນດັ່ງຄຳສຸພາສິດທີ່ວ່າ: ບ່ອນໃດຍາກຊາວໜຸ່ມບຸກ ບ່ອນໃດທຸກຊາວໜຸ່ມອາສາ ບ່ອນໃດທຸລະກັນດານທະຫານມີໜ້າ.
ໂດຍ: ນາງ ບົວພັນ ເທີນຜາສຸກ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
