ວັນຈັນ, ວັນທີ 14 ຕຸລາ 2024
ຮອງຫົວໜ້າກົມໃຫຍ່ພະລາທິການກອງທັບ ຕ້ອນຮັບຄະນະຜູ້ແທນກົມໃຫຍ່ພະລາທິການກອງທັບ ສສ ຫວຽດນາມ
ເວລາອອກຂ່າວ: 2024-09-11 15:04:13 | ຜູ້ຂຽນ : admin2 | ຈຳນວນຄົນເຂົ້າຊົມ: 384 | ຄວາມນິຍົມ: 
ວັນທີ 10 ກັນຍາ 2024 ນີ້, ສະຫາຍ ພົນຈັດຕະວາ ຈັນດີ ສຸລິວົງສັກ ຮອງຫົວໜ້າກົມໃຫຍ່ພະລາທິການກອງທັບປະຊາຊົນລາວ ພ້ອມດ້ວຍຄະນະ, ໄດ້ໃຫ້ກຽດຕ້ອນຮັບສະຫາຍ ພົນຈັດຕະວາ ຫວິງ ເຕີນ ຮຸ່ງ ຮອງຫົວໜ້າກົມໃຫຍ່ພະລາທິການ ກອງທັບປະຊາຊົນຫວຽດນາມ ພ້ອມດ້ວຍຄະນະ, ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ, ກໍຄືຢູ່ກົມໃຫຍ່ພະລາທິການກອງທັບປະຊາຊົນລາວ, ໂດຍມີ ຄະນະນໍາກົມໃຫຍ່ພະລາທິການກອງທັບປະຊາຊົນລາວ, ບັນດາກົມວິຊາສະເພາະ, ກົມກອງກ່ຽວຂ້ອງ ແລະ ພະນັກງານວິຊາການ ເຂົ້າຮ່ວມ.
ສະຫາຍ ພົນຈັດຕະວາ ຈັນດີ ສຸລິວົງສັກ ຮອງຫົວໜ້າກົມໃຫຍ່ພະລາທິການ ກອງທັບປະຊາຊົນລາວ, ໄດ້ກ່າວສະແດງຄວາມຍິນດີຕ້ອນຮັບຢ່າງອົບອຸ່ນດ້ວຍໄມຕີຈິດ, ມິດຕະພາບອັນດູດດື່ມ, ພ້ອມທັງຕີລາຄາສູງຕໍ່ໝາກຜົນຂອງການຮ່ວມມື ລະຫວ່າງ ສອງຝ່າຍ ໃນຊຸມປີຜ່ານມາ, ເຫັນວ່າມີຜົນສໍາເລັດຫຼາຍດ້ານເປັນຕົ້ນການຊ່ວຍເຫຼືອ ປະຊາຊົນກອບກູ້ໄພພິບັດ, ຮັບປະກັນການກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານຕາມແນວທາງແຜນການນະໂຍບາຍຂອງພັກ-ລັດວາງອອກ, ຮັບປະກັນຄົບຖ້ວນ, ທັນເວລາດ້ານລະບອບອັດຕາພະລາທິການໃຫ້ແກ່ນັກຮຽນທະຫານລາວ ທີ່ສຶກສາຢູ່ບັນດາສະຖາບັນການສຶກສາຕ່າງໆ ຂອງກອງທັບຫວຽດນາມ, ສ້າງເງື່ອນໄຂອໍານວຍຄວາມສະດວກໃຫ້ນັກສຶກສາທະຫານລາວ ເພື່ອຍົກສູງຄຸນນະພາບການຮໍ່າຮຽນ, ຊ່ວຍຮັບກວດ ແລະ ປິ່ນປົວທະຫານບາດເຈັບ-ເຈັບປ່ວຍໃຫ້ຝ່າຍລາວຢູ່ບັນດາໂຮງໝໍທະຫານຫວຽດນາມໂດຍບໍ່ເສຍຄ່າບໍລິການ, ປະຕິບັດສັນຍາແຮກສ່ຽວ ລະຫວ່າງ ໂຮງໝໍສູນກາງ 108 ກອງທັບຫວຽດນາມ ກັບ ໂຮງໝໍສູນກາງ 103 ກອງທັບປະຊາຊົນລາວ, ສ່ວນຝ່າຍຫວຽດນາມໄດ້ສົ່ງຊ່ຽວຊານມາຊ່ວຍຂະແໜງການຕ່າງໆ ຂອງໂຮງໝໍສູນກາງ 103 ກອງທັບປະຊາຊົນລາວ ໃນການຖ່າຍທອດບົດຮຽນ, ປະສົບການໃຫ້ແກ່ພະນັກງານແພດໝໍຂອງຝ່າຍລາວ, ເຮັດໃຫ້ຂະແໜງການຕ່າງໆ ທີ່ຊ່ຽວຊານຫວຽດນາມມາຊ່ວຍເຫຼືອນັ້ນມີຄຸນນະພາບສູງຂຶ້ນກວ່າເກົ່າ, ການຮ່ວມມື ລະຫວ່າງ 2 ໂຮງໝໍສູນກາງ ກອງທັບປະຊາຊົນລາວ ກັບ ກອງທັບປະຊາຊົນຫວຽດນາມ ໃນປີ ຜ່ານມາທີ່ພົ້ນເດັ່ນແມ່ນໄດ້ສຳເລັດການປູກຖ່າຍໄຂ່ຫຼັງ 7 ກໍລະນີທໍາອິດຢູ່ໃນ ສປປ ລາວ, ມອບ-ຮັບເຄື່ອງນຸ່ງຄົນເຈັບ, ຢາ, ອຸປະກອນການແພດຈຳເປັນຈຳນວນໜຶ່ງ ແລະ ສົ່ງຊ່ຽວຊານປູກຖ່າຍໄຂ່ຫຼັງມາປະຈຳຢູ່ໂຮງໝໍສູນກາງ 103 ກອງທັບປະຊາຊົນລາວ ເປັນແຕ່ລະໄລຍະ, ພ້ອມນັ້ນກໍຊ່ວຍຊື້ ແລະ ສະໜອງວັດຖຸດິບຮັບໃຊ້ເຂົ້າໃນການຜະລິດເກີບແພຂອງກອງທັບ, ພ້ອມທັງຊ່ວຍຂົນສົ່ງຮອດຊາຍແດນ ແລະ ສາງຂອງຝ່າຍລາວຢ່າງຄົບຖ້ວນ, ຮັບປະກັນຄວາມປວດໄພ 100% ແລະ ວຽກງານອື່ນໆຕື່ມອີກທີ່ໄດ້ລະບຸໄວ້ໃນອະນຸສັນຍາຂອງສອງກະຊວງປ້ອງກັນປະເທດ ລາວ-ຫວຽດ.
ໃນໂອກາດດຽວກັນນີ້, ສະຫາຍ ພົນຈັດຕະວາ ຈັນດີ ສຸລິວົງສັກ ຮອງຫົວໜ້າກົມໃຫຍ່ພະລາທິການກອງທັບປະຊາຊົນລາວ ພ້ອມດ້ວຍຄະນະ, ກໍໄດ້ນໍາພາຄະນະແທນກົມໃຫຍ່ພະລາທິການກອງທັບປະຊາຊົນຫວຽດນາມ, ເຂົ້າຢ້ຽມຂໍ່ານັບ, ພົບປະ ສະຫາຍ ພົນໂທ ສຈ ປອ ວົງຄໍາ ພົມມະກອນ ກໍາມະການສູນກາງພັກ ຮອງລັດຖະມົນຕີກະຊວງປ້ອງກັນປະເທດ ອີກດ້ວຍ.
ໂດຍ: ຄໍາປະສົງ ລາດຊະວົງ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
