ວັນສຸກ, ວັນທີ 06 ທັນວາ 2024
ພັນລະຍາຫົວໜ້າຄະນະຜູ້ແທນ ໄອປາ ຢ້ຽມຊົມສະຖານທີ່ທ່ອງທ່ຽວວັດທະນະທຳ
ເວລາອອກຂ່າວ: 2024-10-24 09:02:10 | ຜູ້ຂຽນ : admin3 | ຈຳນວນຄົນເຂົ້າຊົມ: 179 | ຄວາມນິຍົມ: 
ໃນລະຫວ່າງວັນທີ 19-21 ຕຸລາ 2024, ບັນດາພັນລະຍາຂອງຫົວໜ້າຄະນະຜູ້ແທນລັດຖະສະພາ ຈາກບັນດາປະເທດສະມາຊິກອາຊຽນ ແລະ ປະເທດອື່ນໆ ທີ່ເດີນທາງມາເຂົ້າຮ່ວມກອງປະຊຸມສະມັດຊາໃຫຍ່ ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ແລະ ກອງປະຊຸມປິ່ນອ້ອມ ທີ່ ສ ປປ ລາວ ເປັນເຈົ້າພາບ ໄດ້ເຄື່ອນໄຫວຢ້ຽມຊົມສະຖານທີ່ທ່ອງທ່ຽວສຳຄັນດ້ານວັດທະນະທຳ ຢູ່ນະຄອນຫຼວງວຽງຈັນ ເຊິ່ງນຳພາໂດຍ ທ່ານ ນາງ ວິພາວັນ ພົມວິຫານ ພັນລະຍາຂອງທ່ານປະທານສະພາແຫ່ງຊາດລາວ, ປະທານໄອປາ 45.
ພາຍຫຼັງເຂົ້າຮ່ວມພິທີເປີດ ກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 ຢ່າງເປັນທາງການ, ບັນດາພັນລະຍາຫົວໜ້າຄະນະຜູ້ແທນໄອປາ ໄດ້ໄປຢ້ຽມຊົມຫ້ອງມູນເຊື້ອ ແລະ ຫ້ອງປະຊຸມສະພາແຫ່ງຊາດ, ສະຖາປັດຕະຍະກຳເກົ່າແກ່ພະທາດຫຼວງວຽງຈັນ, ສູນວາງສະແດງຫັດຖະກຳສິນ
ຄ້າໂອດັອບ ຈຳປາລ້ານຊ້າງ, ສູນວາງສະແດງແຜ່ນແພພື້ນເມືອງລາວ (ເຮືອນຂາວ ຂ້າງຫໍຄຳ). ຈາກນັ້ນ, ໄປຢ້ຽມຊົມຫໍວາງສະແດງສິນສາຍໄໝ ຢູ່ບ້ານຊຽງຍືນ ເມືອງຈັນທະບູລີ ເຊິ່ງເປັນອີກສະຖານທີ່ໜຶ່ງທີ່ສູນກາງສະຫະພັນແມ່ຍິງລາວ ໄດ້ສ້າງຕັ້ງຂຶ້ນເພື່ອສົ່ງເສີມ ແລະ ປົກປັກຮັກສາມູນເຊື້ອດ້ານຫັດຖະກຳຕ່ຳຫູກ-ທໍໄໝຂອງແມ່ຍິງລາວ ທີ່ຮູ້ປູກມອນ, ລ້ຽງມ້ອນ ຜະລິດເສັ້ນໄໝຍ້ອມສີທຳມະຊາດ ແລະ ຕ່ຳເປັນລວດລາຍຫຼາກຫຼາຍ ມາເປັນເວລາຢ່າງໜ້ອຍ 5 ພັນປີ. ດັ່ງນັ້ນ, ໃນປີ 1992 ສູນກາງສະຫະພັນແມ່ຍິງລາວ ຈຶ່ງໄດ້ດຳເນີນໂຄງການອະນຸລັກ ແລະ ສົ່ງເສີມສິນສາຍໄໝ ເພື່ອສົ່ງເສີມ ແລະ ພື້ນຟູການລ້ຽງມ້ອນສາວໄໝ, ອາຊີບເຮັດຫູກທໍໄໝ ແລະ ຫັດຖະກຳອື່ນໆ ຂອງແມ່ຍິງລາວ, ທັງເປັນບ່ອນສະສົມຜ້າອາພອນທີ່ມີດອກດວງລວດລາຍອັນປານີດ ທີ່ໄດ້ມາຈາກສີໄມ້ລາຍມືອັນເປັນເອກະລັກ ຂອງແມ່ຍິງລາວບັນດາເຜົ່າ.
ໃນໂອກາດນີ້, ທ່ານ ນາງ ວິພາວັນ ພົມວິຫານ ພ້ອມດ້ວຍຄະນະພັນລະຍາການນຳສະພາແຫ່ງຊາດ ສປປ ລາວ ຍັງໄດ້ຈັດພິທີບາສີສູ່ຂວັນຕາມຮີດຄອງປະເພນີລາວ ແລະ ງານລ້ຽງອາຫານທ່ຽງ ຢູ່ໂຮງແຮມ ດັບເບິນທຣີ ບາຍ ຮິວຕັນ ເພື່ອເປັນສິລິມຸງຄຸນແກ່ຄະນະພັນລະຍາຜູ້ແທນຕ່າງປະເທດ ນຳອີກ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
