ວັນພະຫັດ, ວັນທີ 12 ທັນວາ 2024
ທະຫານ ນະຄອນຫຼວງວຽງຈັນມອບເງິນ ອຸດໜູນເສຍຊີວິດ ເທື່ອດຽວ
ເວລາອອກຂ່າວ: 2024-11-01 08:57:09 | ຜູ້ຂຽນ : admin1 | ຈຳນວນຄົນເຂົ້າຊົມ: 863 | ຄວາມນິຍົມ: 
ມອບເງິນອຸດໜູນເສຍຊີວິດເທື່ອດຽວ ພະນັກງານບຳນານ ເສຍອົງຄະ ຂອງກອງບັນຊາການທະຫານນະຄອນຫຼວງວຽງຈັນ ໄດ້ຈັດຂຶ້ນໃນ ວັນທີ 25 ຕຸລາ 2024 ນີ້, ໂດຍການເປັນປະທານຂອງ ສະຫາຍ ພັນໂທ ບຸນຖົມ ໄຊສັງທອງຮອງຫົວໜ້າຫ້ອງການເມືອງ ກອງບັນຊາການທະຫານນະ ຄອນຫຼວງວຽງຈັນ, ມີບັນດາພະແນກການ ແລະ ພະນັກງານວິຊາການທີ່ກ່ຽວຂ້ອງ ພ້ອມດ້ວຍຄອບຄົວຜູ້ເສຍຊີວິດ ເຂົ້າຮ່ວມ.
ສະຫາຍ ພັນໂທ ໂພໄຊ ແກ້ວມີໄຊ ຫົວໜ້າພະແນກປະກັນສັງຄົມ ກອງບັນຊາການທະຫານນະຄອນຫຼວງວຽງຈັນໄດ້ໃຫ້ຮູ້ວ່າ: ຜູ້ທີ່ໄດ້ຮັບເງິນອຸດໜູນເສຍຊີວິດເທື່ອດຽວໃນຄັ້ງນີ້ມີຈຳນວນທັງໝົດ 20 ສະຫາຍ ໃນນັ້ນມີພະນັກງານບຳນານ 13 ສະຫາຍ, ສະມາຊິກຄອບຄົວ 5 ສະຫາຍ ແລະ ພະນັກງານປະຈຳ
ການ 2 ສະຫາຍ, ສ່ວນເງິນທີ່ມອບແມ່ນລວມມີທັງໝົດ 1.405.976.069 ກີບ, ທັ້ງນີ້ກໍເພື່ອເປັນການຈັດຕັ້ງປະຕິບັດຕາມກົດໝາຍ ວ່າດ້ວຍປະກັນສັງຄົມ, ຄຳສັ່ງແນະນຳເພີ່ມເຕີມຂອງກະຊວງປ້ອງກັນປະເທດ ແລະ ແຈ້ງການຂອງກົມໃຫຍ່ການເມືອງກອງທັບ ກ່ຽວກັບການປະກອບເອກະສານ ແລະ ການຈັດ ຕັ້ງປະຕິບັດ ກົດໝາຍ ວ່າດ້ວຍປະກັນສັງຄົມໃນກອງທັບປະຊາຊົນລາວ ໃຫ້ມີຄວາມຖືກຕ້ອງແລະ ສອດຄ່ອງກັບສະພາບຄວາມເປັນຈິງຕາມທີ່ ຂັ້ນເທິງວາງ
ອອກຢ່າງເຂັ້ມງວດ ແລະ ຍັງເປັນການປະຕິບັດນະໂຍບາຍຕໍ່ຜູ້ເສຍຊີວິດ ທີ່ມີຜົນງານດີເດັ່ນໃນການປະຕິບັດໜ້າທີ່ ປະກອບສ່ວນອັນສຳຄັນເຂົ້າໃນພາລະກິດປົກປັກຮັກສາປະເທດຊາດໃນໄລຍະຜ່ານມາ ໃຫ້ມີຄວາມໝາຍຄວາມສຳຄັນ.
ສະຫາຍ ພັນໂທ ບຸນຖົມ ໄຊສັງທອງ ຮອງຫົວໜ້າຫ້ອງການເມືອງ ກອງບັນຊາການທະຫານນະຄອນຫຼວງວຽງຈັນ ພ້ອມທັງໄດ້ເນັ້ນໜັກໃຫ້ແຕ່ລະຄອບຄົວທີ່ມາຮັບເງິນອຸດໜູນເສຍຊີວິດ ໃນຄັ້ງນີ້ ຈົ່ງພ້ອມກັນນຳເອົາເງິນໄປໜູນໃຊ້ເຂົ້າໃນການພັດທະນາຄອບຄົວຂອງຕົນແບບມີຫົວຄິດປະດິດສ້າງຢ່າງຖືກຕ້ອງ ແລະ ໃຫ້ເກີດເປັນປະໂຫຍດອັນລ້ຳຄ່າທີ່ສຸດ ເພື່ອແນໃສ່ເຮັດໃຫ້ຄອບຄົວຂອງຕົນ ມີຊີວິດທີ່ດີໃນອະ ນາຄົດຕໍ່ໜ້າໃຫ້ເປັນຄອບຄົວທີ່ມີຄວາມສົມບູນພູນສຸກຕະຫຼອດໄປ.
ໂດຍ: ແສງດາລາ ໄຊຍະລາດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
