ວັນສຸກ, ວັນທີ 06 ທັນວາ 2024
ແຂວງຫຼວງພະບາງ ກຽມປະກາດເປັນແຂວງຢຸດຕິການຖ່າຍຊະຊາຍ
ເວລາອອກຂ່າວ: 2024-11-05 09:43:23 | ຜູ້ຂຽນ : admin1 | ຈຳນວນຄົນເຂົ້າຊົມ: 158 | ຄວາມນິຍົມ: 
ວັນທີ 1 ພະຈິກ 2024 ນີ້, ທ່ານ ດຣ ຄຳສອນ ພົງສະຫວັດດີ ຫົວໜ້າພະແນກສາທາລະນະສຸກແຂວງຫຼວງພະບາງ ໄດ້ຖະແຫຼງຂ່າວກ່ຽວກັບການກະກຽມຄວາມພ້ອມ ປະກາດແຂວງຫຼວງພະບາງ ເປັນແຂວງຢຸດຕິການຖ່າຍຊະຊາຍ, ປັດຈຸບັນ ການກະກຽມ ແມ່ນສຳເລັດໂດຍພື້ນຖານ ແລະ ຈະຈັດພິທີປະກາດຢ່າງເປັນທາງການໃນວັນທ 8 ພະຈິກ 2024 ທີ່ຈະມາເຖິງນີ້.
ທ່ານ ດຣ ຄຳສອນ ພົງສະຫວັດດີ ໄດ້ໃຫ້ຮູ້ວ່າ: ການຂາດຫຼັກອະນາໄມ ໂດຍສະເພາະແມ່ນການຖ່າຍຊະຊາຍ ເຊິ່ງມີຜົນກະທົບຕໍ່ສຸຂະພາບຂອງຊຸມຊົນ ແລະ ສັງຄົມເຊັ່ນ: ການເກີດພະຍາດຖອກທ້ອງ, ແມ່ກາຝາກ, ລ່ອຍແຫຼວ, ໂປລີໂອ, ໂລກອະຫິວາ, ການຂາດສານອາຫານໃນເດັກ ແລະ ອື່ນໆ ເນື່ອງຈາກວ່າການແພ່ລະບາດພະຍາດທີ່ຕິດຕໍ່່ຈາກອາຈົມ ເຊິ່ງມີຜົນກະທົບຕໍ່ສຸຂະພາບ ແລະ ຊີວິດວິດການເປັນຢູ່ຂອງປະຊາຊົນ. ວິທີການເຮັດໃຫ້ຊຸມຊົນ ເປັນເຈົ້າການດ້ານສຸຂະອະນາໄມ (ຊຈສ) ແມ່ນຮູບການນຳພາປະຊາຊົນ ເພື່ອສ້າງຈິດສຳນຶກດ້ານສຸຂະອະນາໄມ ແລະ ຊຸມຊົນເອງເປັນເຈົ້າການ, ການຢຸດຕິການຖ່າຍຊະຊາຍ ແລ້ວຫັນມາກໍ່ສ້າງ ແລະ ຊົມໃຊ້ວິດຖ່າຍຢ່າງຖືກຕ້ອງຕາມຫຼັກສຸຂະອະນາໄມ. ຕໍ່ວຽກງານດັ່ງກ່າວ, ໃນໄລຍະຜ່ານມາ ພາກສ່ວນກ່ຽວຂ້ອງ ໄດ້ຈັດກອງປະຊຸມຊີ້ແຈງ ແລະ ຜັນຂະຫຍາຍວຽກງານ ພ້ອມທັງເຊັນສັນຍາ ແລະ ຈັບມືວາງຂໍ້ແຂ່ງຂັນລະຫວ່າງເມືອງຕໍ່ເມືອງ, ຈັດກອງປະຊຸມຂັ້ນວິຊາການ, ເຜີຍແຜ່ເນື້ອໃນແຜນການ ຈັດຕັ້ງປະຕິບັດວຽກງານ ໃຫ້ທົ່ວເຖິງແຕ່ລະບ້ານ, ໄດ້ຈັດຕັ້ງຄະນະກຳມະການ ຮັບຜິດຊອບກວດກາຄອບຄົວຊົມໃຊ້ວິດຖ່າຍ ຂັ້ນບ້ານ ແລະ ເມືອງ, ພ້ອມທັງເຜີຍແຜ່ເນື້ອໃນຂໍ້ແຂ່ງຂັນໃຫ້ປະຊາຊົນບັນດາເຜົ່າແຕ່ລະຄອບຄົວຮັບຮູ້ ແລະ ເຂົ້າໃຈຢ່າງເລິກເຊິ່ງ ກ່ຽວກັບຄາດໝາຍ ແລະ ຄຸນປະໂຫຍດຂອງການນຳໃຊ້ວິດຖ່າຍ. ມາຮອດປັດຈຸບັນໃນທົ່ວແຂວງ ມີທັງໝົດ 85.437 ຄອບຄົວ ໃນນີ້, ມີວິດຖ່າຍເປັນຂອງຕົນເອງ 80.279 ຄອບຄົວ ເທົ່າກັບ 93,96% ແລະໃຊ້ວິດຖ່າຍຮ່ວມນຳພີ່ນ້ອງມີ 5.158 ຄອບຄົວ ເທົ່າກັບ 6,04%, ມີໂຮງຮຽນປະຖົມ 721 ແຫ່ງ, ໂຮງຮຽນມັດທະຍົມຕອນຕົ້ນ 67 ແຫ່ງ ແລະໂຮງຮຽນມັດທະຍົມສົມບູນ 49 ແຫ່ງ ທັງໝົດມີວິດຖ່າຍ ແລະ ໄດ້ນຳໃຊ້ທຸກແຫ່ງ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
