ວັນພະຫັດ, ວັນທີ 12 ທັນວາ 2024
ໂຮງຮຽນກໍ່ສ້າງນາຍສິບເລກ1 ເປີດບັ້ນອົບຮົມ-ຫັດແອບວຽກງານພະລາທິການຮອບດ້ານປະຈຳປີ 2024.
ເວລາອອກຂ່າວ: 2024-11-05 11:07:55 | ຜູ້ຂຽນ : admin2 | ຈຳນວນຄົນເຂົ້າຊົມ: 1660 | ຄວາມນິຍົມ: 
ໃນວັນທີ 4 ພະຈິກ 2024 ນີ້. ໂຮງຮຽນກໍ່ສ້າງນາຍສິບເລກ1 ໄດ້ເປີດບັ້ນອົບຮົມ-ຫັດແອບວຽກງານພະລາທິການຮອບດ້ານປະຈຳປີ 2024. ໂດຍການເຂົ້າຮ່ວມເປັນປະທານຂອງສະຫາຍ ພົນຈັດຕະວາ ສີລາວົງ ບຸນມີໄຊ ຫົວໜ້າການເມືອງໂຮງຮຽນ, ມີສະຫາຍ ພັນເອກ ບົວແກ້ວ ກິ່ງບຸດດີ ຫົວໜ້າຫ້ອງພະລາທິການ, ມີຄະນະພັກ-ຄະນະບັນຊາ 5 ຫ້ອງ, 4 ກອງພັນ, ຕະຫຼອດຮອດ ຄູ-ອາຈານ ແລະ ພະນັກງານ-ນັກຮົບເຂົ້າຮ່ວມ.
ສະຫາຍ ພັນໂທ ວື່ເລົ່າ ເນັ່ງຈື່ ຫົວໜ້າພະແນກແຜນການ ຫ້ອງພະລາທິການ ໂຮງຮຽນກໍ່ສ້າງນາຍສິບເລກ1 ໄດ້ໃຫ້ຮູ້ວ່າ: ບັ້ນອົບຮົມ-ຫັດແອບໃນຄັ້ງນີ້ ໃຊ້ເວລາ 15 ວັນ ລວມມີ 9 ວິຊາຮຽນ, ມີ 105 ຊົ່ວໂມງຄື: ວຽກງານເສນາພະລາ ເນື້ອໃນອົບຮົມຈະໄດ້ສຸມໃສ່ຄົ້ນຄວ້າ ບັນດາຂໍ້ກຳນົດລວມ, ຄຳສັ່ງແນະນຳພະລາທິການຕ່າງໆ, ວຽກງານຄຸ້ມຄອງພະລາທິການປົກກະຕິ, ວຽກງານພະລາທິການໃນແຕ່ລະພາວະກຽມພ້ອມສູ້ຮົບປົກກະຕິ, ເພີ່ມທະວີຄົບຖ້ວນ, ວຽກງານອຸປະໂພກ-ລິໂພກ, ເນື້ອໃນຄົ້ນຄ້ວາຮັບປະກັນອຸປະໂພກໃນຍາມປົກກະຕິ, ຮັບປະກັນເຄື່ອງອຸປະໂພກ-ບໍລິໂພກ, ວຽກງານການເງີນເນື້ອໃນສ້າງແຜນງົບປະມານໃຊ້ຈ່າຍຂອງກົມກອງ, ການຄິດໄລ່ເງີນກິນ-ເງີນໄປວຽກທາງການ, ວຽກງານສຳລະຂາດຕົວ, ວຽກງານເສນາຮັກ 5 ເຕັກນິກການແພດ,ຫັດແອບກອບກູ້ໄພພິບັດຈາກທຳມະຊາດ, ຫັດແອບໜ່ວຍຜ່າຕັດເຄື່ອນທີ່ຂອງກົມກອງໂຮງໝໍ, ວຽກງານຂົນສົ່ງຈັດຕັ້ງບັນຊາ ແລະ ປະຕິບັດແຜນການເຄື່ອນທັບ, ຫຼັກການບົວລະບັດ ແລະ ແກ້ໄຂຂໍ້ຕິດຂັດ, ວຽກງານເຊື້ອໄຟ ຂໍ້ກຳນົດອັດຕາລະເຫີຍອາຍຂອງນ້ຳມັນເຊື້ອໄຟ ແລະ ການຄິດໄລ່ອັດຕາຊົມໃຊ້ນ້ຳມັນຂອງລົດແຕ່ລະຊະນິດ, ພື້ນຖານຮັບປະກັນນ້ຳມັນເຊື້ອໄຟ, ວຽກງານກໍ່ສ້າງ-ຄຸ້ມຄອງຊັບສິນທີ່ດິນ, ໄຟຟ້າ, ນ້ຳປະປາ,ຫຼັກການຮັບປະກັນ ແລະ ຄຸ້ມຄອງປົດຄ້າຍ, ວຽກງານຜະລິດກະສິກຳການບົວລະບັດຮັກສາຜົນລະປູກ, ເຕັກນິກການລຽ້ງໄກ່ລາດ ແລະ ການລ້ຽງປາ, ວຽກງານປຸງແຕ່ງ, ຫຸງຕົ້ມ ວິທີບຳລຸງຮັກສາເຕົາອາຍນ້ຳໃຫ້ໃຊ້ໄດ້ຍາວນານ, ເຮືອນຄົວ ເຮືອນກິນ ແລະບັນດາຂໍ້ກຳນົດຕ່າງໆ ແລະ ມາດຕະຖານນັກປຸງແຕ່ງ. ທັ້ງນີ້ກໍ່ເພື່ອເຮັດໃຫ້ວຽກງານອົບຮົມ-ຫັດແອບພະລາທິການຫັນເຂົ້າສູ່ລະບົບແບບທັນສະໄໝ, ກາຍເປັນຄວາມຮັບຜິດຊອບຂອງທຸກຂັ້ນໃຫ້ມີຄຸນນະພາບ, ສາມາດຮັບປະກັນໄດ້ໃນຍາມປົກກະຕິ,ກຽມພ້ອມສູ່ຮົບ ແລະ ສູ່ຮົບທຸກພາວະ, ທັງເປັນການຍົກລະດັບຄວາມຮູ້ ຄວາມສາມາດຂອງພະນັກງານ-ນັກຮົບດ້ານພະລາທິການຢູ່ໂຮງຮຽນກໍ່ສ້າງນາຍສິບເລກ1 ເຂົ້າໃນການປະຕິບັດວຽກງານຕົວຈິງໃນໜ້າທີ ຂັ້ນເທິງມອບໝາຍໃຫ້ມີຜົນສຳເລັດ.
ໂອກາດນີ້ ສະຫາຍ ພົນຈັດຕະວາ ສີລາວົງ ບຸນມີໄຊ ຍັງໄດ້ເນັ້ນໜັກໃຫ້ແຕ່ລະ ສະຫາຍຕັ້ງໜ້າເອົາໃຈໃສ່ໃນການເຝິກອົບຮົມໃຫ້ບັນລຸຕາມແຜນການ, ການຮຽນ-ການສອນ, ການຄຸ້ມຄອງຈຳນວນພົນໃຫ້ເຂັ້ມງວດ, ຕັ້ງໜ້າຄົ້ນຄວ້າຮໍ່າຮຽນດ້ານທິດສະດີ ຫຼັກການ ສົມທຽບໃສ່ພຶດຕິກຳຕົວຈິງ ເພື່ອຖອນຖອດບົດຮຽນເຊິ່ງກັນ ແລະ ກັນ ແນ່ໃສ່ເຮັດໃຫ້ຜົນຂອງການອົບຮົມ-ຫັດແອບໃນຄັ້ງນີ້ປະສົບຜົນສຳເລັດສູງ.
ໂດຍ: ຮ.ອ ນ້ອຍຈັນໄພ ແກ້ວວັນເຮືອງ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
