ວັນສຸກ, ວັນທີ 06 ທັນວາ 2024
ໜ່ວຍສິລະປະສະໝັກຫຼີ້ນ ທະຫານແຂວງຈໍາປາສັກ ສະແດງຜ່ານລາຍການ
ເວລາອອກຂ່າວ: 2024-11-06 14:48:42 | ຜູ້ຂຽນ : admin2 | ຈຳນວນຄົນເຂົ້າຊົມ: 2072 | ຄວາມນິຍົມ: 
ວັນທີ 06 ພະຈິກ 2024 ນີ້, ໜ່ວຍສິລະປະສະໝັກຫຼີ້ນ ກອງບັນຊາການທະຫານແຂວງຈໍາປາສັກ ໄດ້ຈັດຕັ້ງສະແດງຜ່ານລາຍການ ເພື່ອກຽມສະແດງຮັບໃຊ້ ງານສະເຫຼີມສະຫຼອງຜົນສຳເລັດກອງປະຊຸມໃຫຍ່ ຄັ້ງທີ VI ຂອງອົງຄະນະພັກ ກອງບັນຊາການທະຫານແຂວງຈໍາປາສັກ ເຊິ່ງຈະໄດ້ຈັດຂຶ້ນໃນໃກ້ໆນີ້. ໂດຍການເຂົ້າຮ່ວມຮັບຊົມຂອງ ສະຫາຍ ພົນຈັດຕະວາ ວິລະຕູ່ ວໍລະຈິດ ຫົວໜ້າການເມືອງ ກອງບັນຊາການທະຫານແຂວງຈໍາປາສັກ, ມີຄະນະພັກ-ຄະນະບັນຊາ 5 ຫ້ອງ, ຄະນະຊີ້ນຳລວມ ພ້ອມດ້ວຍຄູເຝິກ ແລະ ນັກສະແດງສິລະປະສະໝັກຫຼີ້ນເຂົ້າຮ່ວມ.
ການກະກຽມ ແລະ ການເຝິກຊ້ອມຕະຫຼອດໄລຍະຜ່ານມາ ພາຍໃຕ້ການນໍາພາ-ຊີ້ນໍາຢ່າງໃກ້ຊິດຂອງຄະນະພັກ-ຄະນະບັນຊາ, ຄະນະຊີ້ນຳ, ຄູເຝິກ ແລະ ນັກສະແດງສິລະປະສະໝັກຫຼີ້ນທຸກສະຫາຍ ໄດ້ພ້ອມກັນທຸມເທເຫື່ອແຮງ ,ສະຕິປັນຍາ, ຄົ້ນຄວ້າປະລິດສ້າງລາຍການສະແດງດ້ວຍຄວາມຮັບຜິດຊອບສູງ, ເຖິງວ່າເວລາຊ້ອມຈະບໍ່ຫຼາຍ ແລະ ມີຄວາມຫຍຸ້ງຍາກໃນຫຼາຍດ້ານ, ແຕ່ທຸກສະຫາຍກໍ່ໄດ້ເອົາໃຈໃສ່ເຝິກຊ້ອມຢ່າງຕັ້ງໜ້າເຂົ້າໃນການສະແດງ. ສຳລັບລາຍການທີ່ໄດ້ສະແດງຜ່ານ ປະກອບມີ 6 ລາຍການສະແດງ ຄື: ບົດຮ້ອງເພງ ເດີນຕາມພັກນຳພາ ຮ້ອງໂດຍ (ໝູ່ຍີງ-ຊາຍ), ບົດຮ້ອງເພງ ຊົມເຊີຍຜົນງານ ຮ້ອງໂດຍ: ຮ້ອຍໂທ ຄຳໃສ ຜິວພົມ, ບົດຟ້ອນ ອວຍພອນ ຟ້ອນໂດຍ (ໝູ່ຍິງ), ບົດຮ້ອງເພງ ປະເທດເປັນບ້ານທະຫານເປັນຮົ້ວປ້ອງກັນ ຮ້ອງໂດຍ: ຮ້ອຍຕີ ຄຳສຸກ ບຸດແກ້ວ, ບົດຟ້ອນ ສັນລະເສີນພັກ (ຟ້ອນໂດຍ: ໝູ່ຍີງ-ຊາຍ) ແລະ ບົດຮ້ອງເພງປະກອບຟ້ອນ ຊົມເຊີຍກອງປະຊຸມ (ຮ້ອງ ແລະ ຟ້ອນໂດຍ: ໝູ່ຍີງ-ຊາຍ). ເຊິ່ງການສະແດງຜ່ານລາຍການຄັ້ງນີ້ ກໍເພື່ອເປັນການກວດກາຄືນເນື້ອໃນບົດຟ້ອນ ແລະ ເຕັກນິກການສະແດງ ເພື່ອກະກຽມສະແດງໃນວັນສຳຄັນຕ່າງໆຂອງຊາດ, ຂອງພັກ, ຂອງກອງທັບ ເວົ້າສະເພາະແມ່ນກຽມສະແດງໃນມື້ ສະເຫຼີມສະຫຼອງຜົນສຳເລັດກອງປະຊຸມໃຫຍ່ ຄັ້ງ VI ຂອງອົງຄະນະພັກກອງບັນຊາການທະຫານແຂວງຈໍາປາສັກ ໃຫ້ມີບັນຢາກາດຟົດຟື້ນມວ່ນຊື່ນ ແລະ ມີຄວາມໝາຍສຳຄັນຢ່າງເລິກເຊິ່ງ.
ຂ່າວ-ພາບ:ດາວົງ ບຸດຕະວົງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
