ວັນສຸກ, ວັນທີ 06 ທັນວາ 2024
ປະກາດສ້າງຕັ້ງກອງຮ້ອຍກຳລັງສຳຮອງ ຂຶ້ນກັບ ແຂວງບໍ່ແກ້ວ
ເວລາອອກຂ່າວ: 2024-11-07 14:31:28 | ຜູ້ຂຽນ : admin2 | ຈຳນວນຄົນເຂົ້າຊົມ: 1150 | ຄວາມນິຍົມ: 
ພິທີປະກາດສ້າງຕັ້ງກອງຮ້ອຍ ກໍາລັງສໍາຮອງທີ 1 ຢູ່ກອງບັນຊາການທະຫານ ເມືອງປາກທາ ແຂວງບໍ່ແກ້ວ, ໄດ້ຈັດຂຶ້ນ ວັນທີ 6 ພະຈິກ 2024 ນີ້, ເຊິ່ງເປັນກອງຮ້ອຍທີ 4 ຂອງແຂວງບໍ່ແກ້ວ. ໂດຍການເປັນປະທານ ຂອງ ສະຫາຍ ພົນຕີ ສົມພອນ ມິດຕະພອນ ຮອງຫົວໜ້າ ກົມໃຫຍ່ເສນາທິການກອງທັບ, ມີສະຫາຍ ພົນຈັດຕະວາ ບຸນມີ ພາມີໄຊ ຫົວໜ້າການເມືອງ ກອງບັນຊາການທະຫານແຂວງບໍ່ແກ້ວ, ມີຄະນະພັກ-ຄະນະບັນຊາ ປກຊ-ປກສ ແຂວງ, ຄະນະປະຈຳພັກແຂວງ-ເມືອງ ແຂກຖີກເຊີນ ແລະ ອ້າຍ-ນ້ອງກອງຮ້ອຍກຳລັງສຳຮອງເຂົ້າ ຮ່ວມ.
ສະຫາຍ ພັນໂທ ສຸບິນ ສີຫາລາດ ຮອງຫົວໜ້າ ຫ້ອງເສນາທິການ ກອງບັນຊາການທະຫານແຂວງບໍ່ແກ້ວໄດ້ຜ່ານຂໍ້ຕົກລົງ ຂອງກົມໃຫຍ່ເສນາທິການ ວ່າດ້ວຍການສ້າງ ຕັ້ງກອງຮ້ອຍກຳລັງສຳຮອງຂອງ ເມືອງປາກທາ ເປັນກອງຮ້ອຍທີ 4 ຂອງແຂວງບໍ່ແກ້ວ. ຈາກນັ້ນ ສະຫາຍ ພັນໂທ ບຸນທາ ສີສົມບັດ ຫົວໜ້າການທະຫານ ກອງບັນຊາການທະຫານ ເມືອງປາກທາ ໄດ້ຂຶ້ນຜ່ານບົດລາຍງານການກະກຽມ ຄວາມພ້ອມການກໍ່ສ້າງກອງຮ້ອຍກຳລັງສຳຮອງ ທີ່ຄະນະຮັບຜິດຊອບຂອງເມືອງໄດ້ພ້ອມກັນເອົາໃຈໃສ່ຢ່າງຕັ້ງໜ້າບົນພື້ນຖານເຫັນໄດ້ຄວາມສຳຄັນຂອງວຽກງານ ປ້ອງກັນຊາດ-ປ້ອງກັນຄວາມສະຫງົບ ຈຶ່ງເຮັດໃຫ້ຊາວໜຸ່ມຊາຍສະກັນໃນທົ່ວເມືອງປະກອບສ່ວນຮັບໃຊ້ໜ້າທີ່ຢ່າງເປັນຂະບວນ. ເຊິ່ງລວມ ມີ 3 ກຸ່ມ: ກຸ່ມ ຫ້ວຍໂມງ, ກຸ່ມ ຫາດສະ-ຫາດດອນແກ້ວ ແລະ ກຸ່ມ ບ້ານໃຫຍ່ປາກທາ ມີຈຳນວນພົນທັງໝົດ 65 ສະຫາຍ.
ສະຫາຍ ພົນຕີ ສົມພອນ ມິດຕະພອນ ໄດ້ກ່າວວ່າ: ການສ້າງຕັ້ງກອງຮ້ອຍກໍາລັງພົນສໍາຮອງ ຂອງເມືອງປາກທາ ແຂວງບໍ່ແກ້ວ ຄັ້ງນີ້ ແມ່ນປະຕິບັດຕາມແນວທາງ ການທະຫານຂອງພັກ ໃນຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ, ເປັນການສ້າງທ່າສະໜາມສົງຄາມປະຊາຊົນ 3 ຂັ້ນ, ໂດຍສ້າງແຂວງເປັນຫົວໜ່ວຍຍຸດທະສາດ ຮັບຜິດຊອບທິດໜຶ່ງຂອງບັ້ນຮົບ, ສ້າງເມືອງເປັນຫົວໜ່ວຍສູ້ຮົບເອກະລາດ, ສ້າງບ້ານເປັນບ້ານປ້ອມໝັ້ນ ແລະ ກຸ່ມບ້ານສູ້ຮົບຕິດລຽນ ເວົ້າລວມແລ້ວ ວຽກງານກໍາລັງສໍາຮອງ ປ້ອງກັນຊາດ ສຸດທີ່ມີຄວາມໝາຍສໍາຄັນຍິ່ງ, ໂດຍຖືເອົາການກໍ່ສ້າງກອງທັບ ໃຫ້ມີຄວາມເຂັ້ມແຂງທັນສະໄໝ ເປັນກໍາລັງຫຼັກແຫຼ່ງ ໃນການສູ້ຮົບເພື່ອປົກປັກຮັກສາຄວາມໝັ້ນຄົງຂອງຊາດຫຼຸດຜ່ອນ ປະຈຳການທີ່ເຫຼືອການຈັດຕັ້ງ ແລະ ຮັກສາຈໍານວນພົນປະຈໍາການໃນກອງທັບໄວ້ໃນລະດັບອັນແນ່ນອນ ແລະ ເພີ່ມທະວີການກໍ່ສ້າງກໍາລັງພົນສໍາຮອງຢ່າງກ້ວາງຂວາງ ເພື່ອຕອບສະໜອງທາງດ້ານກໍາລັງພົນ, ພາຫະນະ-ເຕັກນິກ ສໍາຮອງໃຫ້ແກ່ກອງທັບໃນເມື່ອມີຄວາມຈຳເປັນໃຫ້ພຽງພໍ ແລະ ທັນເວລາ.
ຂ່າວໂດຍ: ນາງ ນີ່ ທຳມະວົງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
