ວັນອັງຄານ, ວັນທີ 10 ທັນວາ 2024
ວຕກ ສະຫຼຸບຖອດຖອນບົດຮຽນວຽກງານປ້ອງກັນພາຍໃນ 5 ປີ
ເວລາອອກຂ່າວ: 2024-11-12 11:04:56 | ຜູ້ຂຽນ : admin2 | ຈຳນວນຄົນເຂົ້າຊົມ: 883 | ຄວາມນິຍົມ: 
ກອງປະຊຸມສະຫຼຸບຖອດຖອນບົດຮຽນວຽກງານປ້ອງກັນພາຍໃນ 5 ປີ (2020-2024) ຂອງວິທະຍາຄານເຕັກນິກການທະຫານ ໄດ້ໄຂຂຶ້ນໃນວັນທີ 8 ພະຈິກ 2024 ນີ້່, ໂດຍການເປັນປະທານຂອງ ສະຫາຍ ພົນຈັດຕະວາ ແສງຍືນ ລັດສະໝີ ຫົວໜ້າການເມືອງ. ມີບັນດາຄະນະພັກ-ຄະນະອໍານວຍການ, ບັນດາສະຫາຍຄະນະຫ້ອງ, ຄະນະວິຊາ, ສູນເຝິກຫັດທົດລອງ, ກອງພັນຄຸ້ມຄອງນັກສຶກສາພ້ອມດ້ວຍພະນັກງານຫຼັກແຫຼ່ງເຂົ້າຮ່ວມ.
ສະຫາຍ ພັນໂທ ຄໍາເຜີຍ ທຳມະນີວົງ ຮອງຫົວໜ້າຫ້ອງການເມືອງ ໄດ້ສະຫຼຸບຖອດຖອນບົດຮຽນ ຕີລາຄາຜ່ານການເຄື່ອນໄຫວວຽກງານປ້ອງກັນພາຍໃນ ໃນໄລຍະ 5 ປີຜ່ານມາ ພ້ອມທັງຊີ້ແຈ້ງໃຫ້ຮູ້ວ່າ: ໃນໄລຍະຜ່ານມາຄະນະພັກ-ຄະນະອໍານວຍການວິທະຍາຄານເຕັກນິກການທະຫານຕະຫຼອດຮອດຄະນະພັກ-ຄະນະບັນຊາທຸກຂັ້ນໄດ້ເອົາໃຈໃສ່ຊີ້ນຳວຽກງານປ້ອງກັນພາຍໃນຢ່າງເອົາຈິງເອົາຈັງ ໂດຍສົມທົບກັບກົມວິຊາສະເພາະ ເຊິ່ງໄດ້ຖືສໍາຄັນວຽກງານປ້ອງກັນພາຍໃນຕິດພັນກັບການກໍ່ສ້າງກອງ 3 ປອດ (ປອດໃສ ປອດໄພ ປອດຄະດີ) ໂດຍໄດ້ຖືເອົາວຽກງານດັ່ງກ່າວຕິດພັນກັບຂະບວນວຽກງານຕົວຈິງ, ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານ-ນັກຮົບດ້ວຍຫຼາຍຮູບການຢ່າງຕໍ່ເນື່ອງ ເຮັດໃຫ້ພະນັກງານສະມາຊິກພັກ-ນັກຮົບ, ນັກຮຽນ-ນັກສຶກສາມີຄຸນທາດການເມືອງໜັກແໜ້ນ, ມີຄວາມຈົງຮັກພັກດີຕໍ່ພັກຕໍ່ປະເທດຊາດ, ມີສະຕິລະວັງຕົວປະຕິວັດສູງ, ເປັນເຈົ້າການຕ້ານ ແລະ ສະກັດກັ້ນບັນຫາປາກົດການຫຍໍ້ທໍ້ຕ່າງໆບໍ່ໃຫ້ເກີດຂຶ້ນກັບກົມກອງ ກໍຄືພະນັກງານ ສະມາຊິກພັກ-ນັກຮົບ, ນັກຮຽນ-ນັກສຶກສາອັນໄດ້ເຮັດໃຫ້ພາຍກົມກອງມີຄວາມສະຫງົບ, ມີຄວາມເຂັ້ມແຂງທາງດ້ານການຈັດຕັ້ງໜັກແໜ້ນ. ຜ່ານການຈັດຕັ້ງປະຕິບັດວຽກງານດັ່ງກ່າວເຂົ້າສູ່ວຽກງານຕົວຈິງຢ່າງມີຈຸດສຸມນັ້ນ ສົກປີ 2023-2024ນີ້ ໄດ້ເຮັດໃຫ້ທົ່ວ ວຕກ ສາມາດຕີລາຄາ ແລະ ຮັບຮອງເປັນກົມກອງ 3 ປອດ (ປອດໃສ ປອດໄພ ປອດຄະດີ) ປະເພດ I ສາມາດບັນລຸມາດຖານໄດ້ 80% ຂຶ້ນໄປ ເຊິ່ງມີ 10 ຫົວໜ່ວຍກົມກອງຄື ຫ້ອງການບໍລິຫານ, ຫ້ອງອົບຮົມ, ຫ້ອງວິທະຍາສາດເຕັກໂນໂລຊີ ແລະ ສິ່ງແວດລ້ອມ, ຫ້ອງເຕັກນິກ, ຫ້ອງການເມືອງ, ຄະນະວິຊາການເມືອງ, ຄະນະວິຊາການທະຫານ, ຄະນະວິທະຍາສາດພື້ນຖານ, ຄະນະພື້ນຖານວິຊາສະເພາະ, ສູນເຝິກຫັດທົດລອງ. ປະເພດ II ມີ 05 ຫົວໜ່ວຍກົມກອງຄື ຫ້ອງພະລາທິການ, ຄະນະວິຊາລົດໂອໂຕການທະຫານ, ຄະນະຍຸດໂທ, ກອງພັນນັກສຶກສາທີ 1, ກອງພັນນັກສຶກສາທີ 2 . ໂອກາດນີ້, ກໍໄດ້ມອບໃບຢັ້ງຢືນໃຫ້ກົມກອງ 3 ປອດດັ່ງກ່າວ ຈາກນັ້ນແຕ່ລະຫົວໜ່ວຍກົມກອງກໍໄດ້ຂຶ້ນຈັບມືກັນຮັບເອົາຂໍ້ແຂ່ງຂັນຢ່າງສົມກຽດ.
ໂອກາດດັ່ງກ່າວ, ສະຫາຍ ພົນຈັດຕະວາ ແສງຍືນ ລັດສະໝີ ໄດ້ຮຽກຮ້ອງໃຫ້ພະນັກງານສະມາຊິກພັກ-ນັກຮົບທົ່ວ ວຕກ ຈົ່ງເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານ-ນັກຮົບ, ນັກຮຽນ, ນັກສຶກສາ ທີ່ຢູ່ພາຍໃນຄວາມຮັບຜິດຊອບຂອງຕົນມີແນວຄິດອຸ່ນອຽນທຸ່ນທ່ຽງ, ກຳແໜ້ນແນວທາງນະໂຍບທຍຂອງພັກ-ລັດ, ຍົກສູງຄວາມຮັບຜິດຊອບໜ້າທີ່ວິຊາສະເພາະ, ມີຄວາມເປັນເອກະພາບພາຍໃນພັກກໍຄືການບັນຊາ-ນໍາພາ, ດໍາເນີນຊີວິດການເມືອງພາຍໃນພັກໃຫ້ເປັນປົກກະຕິ ແລະ ຖືເອົາບັ້ນດໍາເນີນຊີວິດການເມືອງເປັນບ່ອນຕໍາໜິກໍ່ສ້າງເຊິ່ງກັນແລະກັນ, ປະຕິບັດລະບອບສ່ອງແສງລາຍງານໃຫ້ທ່ວງທັນຕາມເວລາ, ເພື່ອຮັບປະກັນເຮັດໃຫ້ສະພາບທົ່ວວິທະຍາຄານເຕັກນິກການທະຫານມີຄວາມສະຫງົບ, ມີສະຕິລະວັງຕົວປະຕິວັດສູງ, ເປັນເຈົ້າການຕ້ານ ແລະ ສະກັດກັ້ນບັນຫາປາກົດການຫຍໍ້ທໍ້ຕ່າງໆບໍ່ໃຫ້ເກີດຂຶ້ນກັບກົມກອງ, ສ້າງຂະບວນການຕ່າງໆເພື່ອຂໍ່ານັບຮັບຕ້ອນວັນບຸນປະຫວັດສາດສໍາຄັນຕ່າງໆຂອງຊາດຂອງພັກ ຂອງກອງທັບພາຍໃນກົມກອງໃຫ້ຟົດຟື້ນ. ສືບຕໍ່ຍູ້ແຮງຂະບວນການວຽກງານປ້ອງກັນພາຍໃນໂດຍຖືເອົາ ການກໍ່ສ້າງກອງ 3 ປອດ ຕິດພັນ ກັບການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ, ຕິດພັນກັບການກໍ່ສ້າງກົມກອງວັດທະນະທໍາ-ນັກຮົບວັດທະນະທໍາ.
ໂດຍ: ເພັດນາລີ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
