ວັນສຸກ, ວັນທີ 06 ທັນວາ 2024
ກອງປະຊຸມເຄືອຂ່າຍສະຖາບັນປ້ອງກັນຊາດ ແລະ ຄວາມໝັ້ນຄົງອາຊຽນ NADI
ເວລາອອກຂ່າວ: 2024-11-13 11:46:15 | ຜູ້ຂຽນ : admin2 | ຈຳນວນຄົນເຂົ້າຊົມ: 829 | ຄວາມນິຍົມ: 
ໃນລະຫວ່າງວັນທີ 5-6 ພະຈິກ 2024 ນີ້, ຄະນະຜູ້ແທນກະຊວງປ້ອງກັນປະເທດ ແຫ່ງ ສປປ ລາວ, ເຊິ່ງນໍາໂດຍ ທ່ານ ພົນຈັດຕະວາ ວຽງໄຊ ສົມວິຈິດ ຫົວໜ້າກົມວິທະຍາສາດ-ປະຫວັດສາດການທະຫານ, ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມເຄືອຂ່າຍສະຖາບັນປ້ອງກັນຊາດ ແລະ ຄວາມໝັ້ນຄົງອາຊຽນ ຫຼື ເອີ້ນວ່າ: ກອງປະຊຸມ ນາດີ(NADI) ທີ່ປະເທດ ສິງກະໂປ, ມີສະຫາຍຫົວໜ້າ ແລະ ຄະນະຜູ້ແທນຂອງສະຖາບັນປ້ອງກັນ ຊາດ ຈາກບັນດາປະເທດສະມາຊິກອາຊຽນ ລວມທັງໝົດ 13 ສະຖາບັນ ເຂົ້າຮ່ວມ.
ກອງປະຊຸມຄັ້ງນີ້ໄດ້ດໍາເນີນພາຍໃຕ້ຫົວຂໍ້ “ຂໍ້ຂັດແຍ່ງທີ່ສົ່ງຜົນກະທົບຕໍ່ພາກພື້ນ” ບັນດາຄະນະຜູ້ແທນຂອງສະຖາບັນປ້ອງກັນຊາດອາຊຽນ ໄດ້ແລກປ່ຽນສະພາບການກ່ຽວກັບບັນດາຂໍ້ຂັດແຍ່ງທີ່ສົ່ງຜົນກະທົບທາງກົງ ແລະ ທາງອ້ອມຕໍ່ສັນຕິພາບ, ຄວາມໝັ້ນຄົງ ແລະ ການພັດທະນາເສດຖະກິດ-ສັງຄົມຂອງພາກພື້ນອາຊຽນ. ກອງປະຊຸມ ໄດ້ສະຫຼຸບຕີລາຄາວ່າ ພາກພື້ນອາຊຽນ ໄດ້ປະເຊີນໜ້າກັບໄພຂົ່ມຂູ່ ແລະ ສິ່ງທ້າທາຍຕໍ່ຄວາມໝັ້ນຄົງທີ່ສະຫຼັບສັບຊ້ອນ ແລະ ຄາດຄະເນໄດ້ຍາກ, ໂດຍສະເພາະການແຂ່ງຂັນຂອງປະເທດມະຫາອໍານາດ, ການສ້າງກຸ່ມການຮ່ວມມືຂະໜາດນ້ອຍ, ຜົນກະທົບຈາກການປ່ຽນແປງສະພາບດິນຟ້າອາກາດ, ບັນຫາມຽນມາ, ທະເລຈີນໃຕ້ ແລະ ອາດສະຍາກໍາທາງລະບົບອອນລາຍ. ກອງປະຊຸມ ຍັງໄດ້ປຶກສາຫາລື ແລະ ແລກປ່ຽນພື້ນຖານແນວຄວາມຄິດກ່ຽວກັບການຮັບມືກັບສິ່ງທ້າທາຍດັ່ງກ່າວໃນອະນາຄົດ ແລະ ສະເໜີບາງແນວຄວາມຄິດພື້ນຖານ ໃຫ້ກອງປະຊຸມລັດຖະມົນຕີປ້ອງກັນປະເທດອາຊຽນ ເພື່ອພິຈາລະນາຕື່ມອີກ.
ກອງປະຊຸມ ໄດ້ດໍາເນີນໄປດ້ວຍບັນຍາກາດທີ່ສ້າງສັນ ແລະ ມີເນື້ອໃນ, ບັນດາປະເທດສະມາຊິກອາຊຽນ ໄດ້ຕັ້ງໜ້າປະກອບສ່ວນເຂົ້າໃນການແລກປ່ຽນສະພາບການຕ່າງໆ ແລະ ສະເໜີແນວຄວາມຄິດພື້ນຖານໃນການແກ້ໄຂບັນຫາສິ່ງທ້າທ້າຍຕໍ່ຄວາມໝັ້ນຄົງຂອງພາກພື້ນ, ເຊິ່ງເຮັດໃຫ້ກອງປະຊຸມ ປະສົບຜົນສໍາເລັດຕາມລະດັບຄາດໝາຍ.
ຂ່າວ: ນາງ ຈັນທະພອນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
