ວັນອາທິດ, ວັນທີ 27 ເມສາ 2025
ການປະຕິບັດຂໍ້ແຂ່ງຂັນ 4 ບຸກ ຂອງຊາວໜຸ່ມ ທະຫານແຂວງຫຼວງພະບາງ ມີຜົນສຳເລັດຫຼາຍດ້ານ
ເວລາອອກຂ່າວ: 2025-03-14 09:40:20 | ຜູ້ຂຽນ : admin3 | ຈຳນວນຄົນເຂົ້າຊົມ: 7164 | ຄວາມນິຍົມ: 
ພະແນກຊາວໜຸ່ມກອງບັນ ຊາການທະຫານແຂວງຫຼວງພະ ບາງ ແມ່ນອົງການຈັດຕັ້ງມະຫາ ຊົນໜຶ່ງທີ່ເປັນກຳລັງແຮງສັງລວມສຳຄັນ ໃນການປະຕິບັດໜ້າທີ່ການເມືອງຂອງກົມກອງ, ໂດຍພາຍໃຕ້ການຊີ້ນຳ-ນຳພາຮອບດ້ານຂອງຄະນະພັກຫ້ອງການເມືອງ ກອງບັນຊາການທະ ຫານແຂວງ, ຕະຫຼອດໄລຍະຜ່ານມາ ພະແນກຊາວໜຸ່ມໄດ້ຕັ້ງໜ້າເຄື່ອນໄຫວຕາມພາລະບົດບາດຂອງຕົນ, ຊຸກຍູ້ຮາກຖານຊາວ ໜຸ່ມທີ່ຂຶ້ນກັບ ໃຫ້ເອົາໃຈໃສ່ຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ທີ່ສູນກາງຊາວໜຸ່ມປະຊາຊົນປະຕິວັດລາວວາງອອກ ໂດຍຕິດພັນກັບໜ້າທີ່ການເມືອງຂອງກົມກອງ ດ້ວຍຄວາມຮັບຜິດຊອບສູງ ແລະ ມີຜົນສຳເລັດຫຼາຍດ້ານ.
ສະຫາຍ ພັນຕີ ສົມນຶກ ວິໄຊ ຫົວໜ້າພະແນກຊາວໜຸ່ມ ກອງບັນຊາການທະຫານແຂວງຫຼວງພະບາງໃຫ້ຮູ້ວ່າ: ການຈັດຕັ້ງຜັນຂະຫຍາຍເນື້ອໃນຂໍ້ແຂ່ງຂັນ 4 ບຸກ ຂອງຊາວໜຸ່ມຢູ່ກອງບັນຊາການທະຫານແຂວງ ໃນໄລຍະຜ່ານມາ ແມ່ນມີຜົນສຳເລັດຫຼາຍດ້ານ ສະແດງອອກບຸກດ້ານແນວຄິດ: ໄດ້ຖືເອົາການສຶກສາອົບຮົມການເມືອງ-ແນວຄິດ ໃຫ້ຄະນະໜ່ວຍຊາວໜຸ່ມ ຕະຫຼອດຮອດສະ ມາຊິກຊາວໜຸ່ມເປັນປົກະຕິ, ນຳເອົາເອກະສານທີ່ສຳຄັນຕ່າງໆ ມາເຜີຍແຜ່ເຊື່ອມຊຶມໃຫ້ໄດ້ຮັບຮູ້ຢ່າງທົ່ວເຖິງ ເຮັດໃຫ້ສະມາຊິກຊາວໜຸ່ມແຕ່ລະກົມກອງມີນໍ້າໃຈຮັກຊາດ, ມີສະຕິຕໍ່ການຈັດຕັ້ງ; ບຸກດ້ານການເຝິກຝົນຫຼໍ່ຫຼອມ, ຮໍ່າຮຽນ: ຜ່ານມາໄດ້ຄົ້ນຄວ້າສະມາຊິກຊາວໜຸ່ມຜູ້ທີ່ດີເດັ່ນຢູ່ ແຕ່ລະກົມກອງໄປຍົກລະດັບວິ ຊາສະເພາະຕ່າງໆ ຢູ່ບັນດາສະ ຖາບັນການສຶກສາ ພາຍໃນກອງ ທັບ ແລະ ນອກກອງທັບ ເຮັດໃຫ້ສະມາຊິກຊາວໜຸ່ມມີຄວາມຮູ້ຄວາມສາມາດໃນການຊີ້ນຳ- ນຳພາຢູ່ພາຍໃນໜ່ວຍ ກໍຄື ກົມ ກອງ; ບຸກດ້ານວຽກງານການ ຈັດຕັ້ງ: ໄດ້ເອົາໃຈໃສ່ປັບປຸງການຈັດຕັ້ງຢູ່ແຕ່ລະກົມກອງໃຫ້ມີຄວາມໜັກແໜ້ນເຂັ້ມແຂງທາງດ້ານການເມືອງ ແລະ ການ ຈັດຕັ້ງ ເພື່ອເຄື່ອນໄຫວເຮັດໜ້າ ທີ່ຕາມພາລະບົດບາດຂອງຕົນ, ຊາວໜຸ່ມຢູ່ແຕ່ລະກົມກອງ ສ່ວນຫຼາຍແມ່ນເປັນສະມາຊິກພັກ, ເປັນພະນັກງານບັນຊາຢູ່ແຕ່ລະຂັ້ນ, ເຊິ່ງແຕ່ລະສະຫາຍໄດ້ເອົາໃຈໃສ່ເຄື່ອນໄຫວປະຕິບັດໜ້າທີ່ຢ່າງແຂງແຮງ; ບຸກດ້ານວິຊາຊີບ-ສ້າງວຽກເຮັດງານທຳ: ພະແນກຊາວໜຸ່ມໄດ້ຊຸກຍູ້ໃຫ້ຊາວໜຸ່ມແຕ່ລະໜ່ວຍຂຸດຄົ້ນທ່າແຮງບົ່ມຊ້ອນທີ່ມີຢູ່ໃນກົມກອງ ດ້ວຍການຊອກແຫຼ່ງລາຍຮັບເຂົ້າຄັງລວມຂອງໜ່ວຍ ດ້ວຍການປູກພືດຜັກຊະນິດຕ່າງໆ ລ້ຽງສັດປີກ, ລ້ຽງປາ, ລ້ຽງກົບ ເຫັນວ່າມີຫຼາຍໜ່ວຍເຮັດໄດ້ດີ ແລະ ສະມາຊິກຊາວໜຸ່ມ ໄດ້ກາຍເປັນຄອບຄົວຕົວແບບໃນການປູກຝັງ-ລ້ຽງສັດ, ຕັ້ງຮ້ານກິນດື່ມ, ການບໍລິການຂາຍເຄື່ອງຍ່ອຍຕ່າງໆ ຫຼາຍສະຫາຍ.
ຜ່ານການຈັດຕັ້ງຜັນຂະຫຍາຍເນື້ອໃນຂໍ້ແຂ່ງຂັນ 4 ບຸກ ໃນໄລ ຍະຜ່ານມາ ມີໜ່ວຍຊາວໜຸ່ມໄດ້ ຮັບການຢັ້ງຢືນເປັນໜ່ວຍ 4 ບຸກ 3 ປີຊ້ອນ 22 ໜ່ວຍ, ມີສະມາ ຊິກຊາວໜຸ່ມນຳໜ້າ 1.346 ສະ ຫາຍ, ຊາວໜຸ່ມທີ່ເປັນສະມາຊິກພັກ 631 ສະຫາຍ, ວຽກງານຂະບວນການທີ່ພົ້ນເດັ່ນແມ່ນຂະບວນການອອກແຮງງານ, ການສ້າງເສດຖະກິດ, ການປູກຝັງ-ລ້ຽງສັດ, ຂະບວນການເຝິກແອບ ສິລະປະ-ວັນນະຄະດີ ເພື່ອສະ ແດງຮັບໃຊ້ກອງປະຊຸມ ແລະ ວັນສຳຄັນຕ່າງໆ ເຊິ່ງໄດ້ສ້າງບັນຍາກາດຟົດຟື້ນພາຍໃນກົມກອງ ແລະ ໄດ້ຮັບການຍ້ອງຍໍຈາກຄະນະພັກ-ຄະນະບັນຊາ ເປັນຢ່າງດີ.
ສະຫາຍ ພັນຕີ ສົມນຶກ ວິໄຊ ໃຫ້ຮູ້ຕື່ມວ່າ: ທິດທາງໃນປີ 2025 ຈະສືບຕໍ່ສຸມໃສ່ສຶກສາອົບຮົມການເມືອງແນວຄິດເປັນກົກ ເພື່ອເຮັດໃຫ້ຊາວໜຸ່ມມີຄວາມໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງທາງດ້ານຈັດຕັ້ງ, ເອົາໃຈໃສ່ຊີ້ນຳຊຸກຍູ້ຄະນະໜ່ວຍຕະຫຼອດຮອດສະມາຊິກຊາວໜຸ່ມຢູ່ແຕ່ລະກົມກອງ ເປັນເຈົ້າການຈັດຕັ້ງຜັນຂະຫຍາຍເນື້ອໃນຂໍ້ແຂ່ງຂັນ 4 ບຸກຂອງຊາວໜຸ່ມໃຫ້ເປັນປົກກະຕິ ແລະ ເປັນຂະບວນການຟົດຟື້ນ, ປັບປຸງການຈັດຕັ້ງຊາວໜຸ່ມຢູ່ແຕ່ລະກົມກອງໃຫ້ມີຄວາມໜັກແໜ້ນເຂັ້ມແຂງໃນທຸກດ້ານ, ຊຸກຍູ້ຂະ ບວນການຕ່າງໆ ເປັນຕົ້ນແມ່ນ ຂະບວນການອອກແຮງງານ ຕາມຂອບເຂດຮັບຜິດຊອບ ໃຫ້ມີຄວາມສະອາດງາມຕາ, ປຸກລະດົມໃຫ້ສະມາຊິກຊາວໜຸ່ມຊອກຮູ້ຮໍ່າຮຽນ, ຍົກລະດັບຄວາມຮູ້ຄວາມສາມາດຂອງຕົນໃຫ້ສູງຂຶ້ນ ເພື່ອເຮັດສຳເລັດໜ້າ ທີ່ການເມືອງທີ່ການຈັດຕັ້ງມອບໝາຍໃຫ້, ສືບຕໍ່ກໍ່ສ້າງຊາວໜຸ່ມ 4 ບຸກ ໃຫ້ບັນລຸໄດ້ຕາມຄາດໝາຍ ແລະ ຮັບປະກັນຄຸນນະພາບສູງ.
ໂດຍ: ເຄນໄຊ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
