ວັນອາທິດ, ວັນທີ 08 ກຸມພາ 2026
ກອງພົນທີ 3 ປິດຊຸດຮຽນ ກໍ່ສ້າງນາຍສິບ ຊຸດທີ 6
ເວລາອອກຂ່າວ: 2025-08-11 09:05:02 | ຜູ້ຂຽນ : admin1 | ຈຳນວນຄົນເຂົ້າຊົມ: 1352 | ຄວາມນິຍົມ: 
ວັນທີ 5 ສິງຫາ 2025 ນີ້, ກອງພົນທີ 3 ໄດ້ປິດຊຸດອົບຮົມການຮຽນ ພ້ອມທັງມອບໃບປະກາດສະນິຍະບັດໃຫ້ແກ່ນັກຮຽນກໍ່ສ້າງນາຍສິບ ຊຸດທີ 6 ປະຈຳສົກປີ 2024-2025 ໂດຍການເຂົ້າຮ່ວມເປັນປະທານ ຂອງສະຫາຍ ພັນເອກ ປອ ສະເຫຼີມ ໄຊສົມພອນ ກຳມະການຄະນະພັກກອງພົນ ຫົວໜ້າຫ້ອງເສນາທິການ ກອງພົນທີ 3, ມີຄະນະຫ້ອງ 5 ຫ້ອງ, ຄະນະພັກ-ຄະນະບັນຊາສູນເຝິກອົບຮົມ, ບັນດາແຂກທີ່ມາຈາກອົງການກົມກອງ ແລະ ຄູອາຈານ-ນັກຮຽນເຂົ້າຮ່ວມ.
ໃນພິທີ ສະຫາຍ ພັນເອກ ຄຳສອນ ໄຊສົງຄາມ ຫົວໜ້າການທະຫານ ສູນເຝິກອົບຮົມກອງພົນທີ 3 ກໍໄດ້ຂຶ້ນຜ່ານບົດສະຫຼຸບໂຄງການອົບຮົມ-ຫັດແອບຂອງນັກຮຽນກໍ່ສ້າງນາຍສິບຊຸດທີ 6 ປະຈຳສົກຮຽນ ປີ 2024-2025 ຕະຫຼອດໄລຍະ 10 ເດືອນຜ່ານມາ, ໃນນີ້ມີນັກ ຮຽນທັງໝົດ 103 ສະຫາຍ, ມາຈາກກົມກອງອ້ອມຂ້າງກອງພົນທີ 3 ຈຳນວນ 93 ສະຫາຍ, ຈາກກອງບັນຊາການ ແຂວງຜົ້ງສາລີ ຈຳນວນ 4 ສະຫາຍ, ແຂວງຫຼວງນ້ຳທາ ຈຳນວນ 3 ສະຫາຍ, ແຂວງຫົວພັນຈຳນວນ 1 ສະຫາຍ, ແຂວງບໍ່ແກ້ວຈຳ ນວນ 3 ສະຫາຍ, ນັກຮຽນແຕ່ລະ ສະຫາຍໄດ້ມີຄວາມເອົາໃຈໃສ່ຄົ້ນຄວ້າຮ່ຳຮຽນ ແລະ ປະຕິບັດຕາມລະບຽບການຕ່າງໆ ຂອງໂຮງຮຽນວາງອອກໄດ້ຢ່າງເຂັ້ມງວດ ອັນສາມາດສະຫຼຸບຜົນການສອບເສັງປິດສົກຮຽນໄດ້ຕາມລະດັບຄາດໝາຍໃນນັ້ນ ຂັ້ນເກັ່ງບັນລຸໄດ້ 25,42 %, ຂັ້ນກາງ 41,52 % ແລະ ຄາດ ໝາຍ 33,05 %, ຈາກນັ້ນ ສະ ຫາຍ ພັນໂທ ທອງສຸກ ຈັນທະລັດຮອງຫົວໜ້າພະແນກກຳລັງພົນກອງພົນທີ 3 ກໍໄດ້ຂຶ້ນຜ່ານດຳ ລັດວ່າດ້ວຍການປະດັບຊັ້ນ ໃຫ້ນັກຮຽນທີ່ຮຽນຈົບ ຈຳນວນ 71 ສະຫາຍ, ສ່ວນ 19 ສະຫາຍ ແມ່ນຮັບຊັ້ນວາທີມາຈາກກົມກອງ, 9 ສະຫາຍແມ່ນໄດ້ຮັບຮ້ອຍຕີຈາກກົມກອງ ແລະ 4 ສະຫາຍແມ່ນໄດ້ຊັ້ນທຽບຮ້ອຍໂທ, ໃນນີ້ປະດັບຊັ້ນສິບຕີ ຂຶ້ນ ສິບເອກ 61 ສະຫາຍ, ຊັ້ນສິບໂທ ຂຶ້ນ ສິບເອກ 11 ສະຫາຍ,ໂອກາດດັ່ງກ່າວຍັງໄດ້ມອບໃບປະກາດສະນີຍະບັດໃຫ້ແກ່ນັກຮຽນຈຳນວນ 103 ສະຫາຍ ຢ່າງສົມກຽດ.
ໂອກາດນີ້, ສະຫາຍ ພັນເອກ ປອ ສະເຫຼີມ ໄຊສົມພອນ ໄດ້ໂອ້ລົມ ເຊິ່ງກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບ, ຄູ-ອາຈານ ແລະ ນັກຮຽນທີ່ໄດ້ ພ້ອມກັນຜ່ານຜ່າອຸປະສັກຄວາມຫຍຸ້ງຍາກ, ໄດ້ພ້ອມກັນປະຕິບັດຕາມແຜນການຮຽນ-ການສອນໄດ້ປະສົບຜົນ ສຳເລັດເປັນຢ່າງດີ ພ້ອມທັງຮຽກຮ້ອງໃຫ້ນັກຮຽນແຕ່ລະສະຫາຍ ຈົ່ງພ້ອມກັນນຳເອົາ ເນື້ອໃນບົດ
ຮຽນຄວາມຮູ້ທີ່ຄູ-ອາຈານໄດ້ສິດສອນໃຫ້ ໄປຈັດຕັ້ງຜັນຂະຫຍາຍເຂົ້າໃນວຽກງານຕົວຈິງຢູ່ກົມກອງຂອງຕົນໃຫ້ເກີດດອກອອກຜົນ ແລະ ເຮັດສຳເລັດໜ້າທີ່ທີ່
ໄດ້ຮັບມອບໝາຍ.
ໂດຍ: ສົມພົງ ອິນຕະວັນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
