ວັນພະຫັດ, ວັນທີ 11 ມິຖຸນາ 2026
ແຂວງຈຳປາສັກຈັດງານແຂ່ງຂັນນັກຮ້ອງ-ນັກຂັບລໍາສຽງດີ ເພື່ອຂໍ່ານັບຮັບຕ້ອນວັນສໍາຄັາຕ່າງໆ
ເວລາອອກຂ່າວ: 2025-09-11 09:17:37 | ຜູ້ຂຽນ : admin1 | ຈຳນວນຄົນເຂົ້າຊົມ: 4631 | ຄວາມນິຍົມ: 
ໃນວັນທີ 5 ກັນຍາ 2025 ນີ້, ຢູ່ທີ່ຫໍວັດທະນະທຳ ແຂວງຈຳປາສັກ ໄດ້ຈັດງານແຂ່ງຂັນນັກຮ້ອງ-ນັກຂັບລຳສຽງດີຂື້ນ ໂດຍການເຂົ້າຮ່ວມຂອງ ສະຫາຍ ແກ້ວລັດຕະນະ ສີຫາວົງ ຄະນະປະຈຳພັກແຂວງ ຮອງປະທານສະພາປະຊາຊົນແຂວງ, ຫົວໜ້າອະນຸກຳມະການກໍ່ສ້າງຂະບວນການ, ໂຄສະນາອົບຮົມ-ຖະແຫຼງຂ່າວ, ມີ ສະຫາຍ ປອ ວັນນະໄຊ ຊາດຕະກຸນ ກຳມະການພັກແຂວງ ຫົວໜ້າພະແນກວັດທະນະທຳ ແລະ ທ່ອງທ່ຽວແຂວງຈຳປາສັກ,
ມີການນຳຂອງແຂວງ, ພະແນກການ, ກົມກອງອ້ອມຂ້າງແຂວງ, ການນຳວິສາຫະກິດ, ນັກທຸລະກິດ, ນັກຮ້ອງ-ນັກຂັບລຳ ທີ່ເຂົ້າຮ່ວມແຂ່ງຂັນ ແລະ ມວນຊົນພາຍໃນແຂວງເຂົ້າຮ່ວມຊົມ.
ການຈັດງານແຂ່ງຂັນນັກຮ້ອງ-ນັກຂັບລຳສຽງດີ ໃນຄັ້ງນີ້, ເພື່ອເປັນການສ້າງຂະບວນການຂ່ຳນັບຮັບຕ້ອນວັນສຳຄັນຕ່າງໆຂອງຊາດ, ຂອງພັກ ເວົ້າລວມ, ເວົ້າສະເພາະ ຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງຈຳປາສັກ, ວັນສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 50 ປີ ແລະ ວັນຄ້າຍວັນເກີດ ປະທານໄກສອນ ພົມວິຫານ ຄົບຮອບ 105 ປີ ໃຫ້ມີບັນຍາກາດຟົດຟື້ນ ແລະ ເປັນຂະບວນການຢ່າງກວ້າງຂວາງ. ນອກນີ້ ຍັງເປັນການອະນຸລັກຮັກສາ ແລະ ສົ່ງເສີມສິລະປະວັນນະຄະດີອັນດີງາມ ທີ່ເປັນເອກະລັກຂອງທ້ອງຖິ່ນ ກໍຄື ຂອງຊາດ ໃຫ້ໄດ້ຮັບການສືບທອດຕໍ່ໄປ ທັງເປັນການສົ່ງເສີມການສະແດງອອກຂອງຊາວໜຸ່ມ-ໄວໜຸ່ມ ໃຫ້ຫັນມາຮັກມັກ, ສົນໃຈ ແລະ ເຊີດຊູໃນດ້ານສິລະປະ-ວັນນະຄະດີ ໂດຍສະເພາະ ປະເພດເພງ-ຂັບລຳ ຂອງລາວເຮົາ ຫຼາຍຂຶ້ນ ສຳລັບການແຂ່ງຂັນມີຜູ້ສະໝັກເຂົ້າຮ່ວມແຂ່ງຂັນທັງໝົດ 22 ຄົນ, ແຂ່ງຂັນໃນ 2 ປະເພດ ຄື: ການແຂ່ງຂັນບົດເພງ ທີ່ມີແລ້ວ ຈຳນວນ 11 ເພງ ແລະ ການແຂ່ງຂັນບົດເພງທີ່ແຕ່ງຂຶ້ນໃໝ່ ຈຳນວນ 11 ເພງ.
ຜ່ານການແຂ່ງຂັນຕົວຈິງ ປະເພດເພງທີ່ມີແລ້ວ ທີ 1 ໄດ້ແກ່ ສະຫາຍ ໂອເລ້ ສັດຕະວົງ ໃນບົດເພງຢືນຍາມແຄມຂອງ ໄດ້ຮັບເງິນສົດ 5 ລ້ານກີບ ພ້ອມໃບຍ້ອງຍໍ, ທີ 2 ໄດ້ແກ່ ສະຫາຍ ນາງ ປູນາ ເຄື່ອຄຳ ໃນບົດເພງແດນແຫ່ງອິດສະຫຼະ ໄດ້ຮັບເງິນສົດ 3 ລ້ານກີບ ພ້ອມໃບຍ້ອງ, ທີ 3 ໄດ້ແກ່ ສະຫາຍ ຫຼັກໄຊ ມາບົວ ໃນບົດເພງ ມູນເຊື້ອລົດຕັງ ໄດ້ຮັບເງິນສົດ 2 ລ້ານກີບ ພ້ອມໃບຍ້ອງຍໍ, ປະເພດບົດເພງ ທີ່ແຕ່ງຂຶ້ນໃໝ່ທີ 1 ໄດ້ແກ່ ສະຫາຍ ສຸລິເດດ ສ້ອຍຄຳ ໃນບົດເພງ ຂໍ່ານັບຊົມເຊີຍ 3 ວັນປະຫວັດສາດໄດ້ຮັບເງິນສົດ 7 ລ້ານກີບ ພ້ອມໃບຍ້ອງຍໍ, ທີ 2 ໄດ້ແກ່ ສະຫາຍ ຮ້ອຍໂທ ຄຳສຸກ ບຸດແກ້ວ ໃນບົດ
ເພງ ພັກນຳພາຊາດລາວວິລະຊົນ ໄດ້ຮັບເງິນສົດ 5 ລ້ານກີບ ພ້ອມໃບຍ້ອງຍໍ, ທີ 3 ໄດ້ແກ່ ສະຫາຍ ຮ້ອຍເອກ ບຸນທັນ ສີພະຈັນ ໃນບົດເພງ ມ່ວນຊື່ນສະຫຼອງໄຊວັນປະຫັວດສາດ ໄດ້ຮັບເງິນສົດ 4 ລ້ານກີບ ພ້ອມໃບຍ້ອງຍໍ ໃຫ້
ກຽດມອບລາງວັນໂດຍ ສະຫາຍ ແກ້ວລັດຕະນະ ສີຫາວົງ ຄະນະປະຈຳພັກແຂວງ ຮອງປະທານສະພາປະຊາຊົນແຂວງ ຫົວໜ້າອະນຸກຳມະການກໍ່ສ້າງຂະບວນການ, ໂຄສະນາອົບຮົມ-ຖະແຫຼງຂ່າວ ສ່ວນລາງວັນຊົມເຊີຍ ແມ່ນ
ໄດ້ຮັບເງິນສົດຜູ້ລະ 1 ລ້ານກີບ.
ຂ່າວ: ນາງ ສີລິຄານ ສີດາວົງ
ພາບ: ນາງ ສົມພອນ
ແກ້ວມະນີໃສ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
